Tēⁿ Lâm-iông!
lí ū chı̍t-ê goā-hō miâ kiò “Tâi-oân”.
in-ūi sı̀-goe̍h chhe-chhit hit-pé hoé,
sı̄ ūi tio̍h Tâi-oân lâi sio--ê.
Sè-kan pùn-sò moá sı̀-koè,
Tâi-oân te̍k-pia̍t choē.
Bô put bô giâ-kê,
lú put lú oàn-chheh;
put-jû ēng hoé sio-sio--lè,
m̄-kam ê sı̄ lí ēng sin chò hoé-pé.
Tēⁿ Lâm-iông!
lí ū chı̍t-ê goā-hō miâ kiò “Chū-iû”
in-ūi sı̀-goe̍h chhe-chhit hit-pé hoé,
sı̄ ūi tio̍h bı̂n-chú lâi to̍h--ê.
Bı̂n-chú kháu-hō moá-thian-hióng,
Tâi-oân siōng lâ-liâng.
Chit-pêng ti-phoê ngē sí choàⁿ,
hit-pêng chhiáⁿ kúi the̍h io̍h-toaⁿ;
liân cha̍p-jı̄ goe̍h thiⁿ
thiaⁿ tio̍h tō oē lâu chhı̀n-koāⁿ.
Siàu-liām lí! éng-oán siàu-liām lí!
ná hoé chı̍t-poaⁿ ê sim-chı̀.
(Tâi-oân Kàu-hoē Kong-pò tē 2092 kı̂, 1992 nı̂, 4 goe̍h)
(Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)
