Sió-toān Chiam Tiúⁿ-ló
Chiam A-hián sı̄ Kong-koán-chng Kàu-hoē ê Tiúⁿ-ló. I tı̄ Bêng-tı̄ 12 nı̂ 9 ge̍h 7 jı̍t chhut-sı̀; i ê chhut seng-toē sı̄ Kong-koán-chng Sin-káng-liâu; 8 hè ê sı̂ soá khı̀ Pak-liâu khiā-khí, keng-êng lông-gia̍p lâi sêng-ka. I iáu-bē sı̀n Chú ê sı̂ thàn sè-sio̍k, ho̍k-sāi sı̂n-bêng chin jia̍t-sim. Tı̄ 19 hè ê sı̂, tùi Chiong A-múi Thoân-tō thiaⁿ-tio̍h tō-lí, chiū pàng-sak sè-sio̍k lâi sı̀n Chú. Kàu i 24 hè, chiū-sı̄ Bêng-tı̄ 36 nı̂, ū siū Kong-koán-chng Kàu-hoē kéng i choè Chip-sū 6 nı̂ kú; kàu 30 hè ê sı̂, chiū-sı̄ Bêng-tı̄ 42 nı̂, chiū siat-lı̍p i choè Tiúⁿ-ló, 20 nı̂ kú bô lı̄-jı̄m. I ū nn̄g ê ta-po͘-kiáⁿ, nn̄g ê cha-bó͘-kiáⁿ. Toā-kiáⁿ Chiam Tek-kiàn, iáu tı̄ Tâi-pak Sı̂n Ha̍k-hāu chāi-ha̍k tiong, 3 nı̂ seng; tē-jı̄ kiáⁿ teh pang-chān ke-lāi; soè-hàn ê cha-bó͘-kiáⁿ kin-nı̂ 14 hè, iáu tı̄ Kong-ha̍k-hāu pó͘-sı̍p-kho tha̍k. I tı̄ 11 ge̍h 10 jı̍t iáu khı̀ Biâu-le̍k Kàu-hoē hù Tok-hoē, tı̄ 13 jı̍t ē-po͘ 5 tiám hut-jiân tú-tio̍h náu chhut-hui ê pı̄ⁿ, kàu 14 jı̍t téng-po͘ 11 tiám-poàⁿ chiū kè-óng, hióng-siū 50 hè. Tı̄ 18 jı̍t ū chòng-sek, ū 7 ūi Thoân-kàu-su lâi hoē-chòng, ū tiàu-tiān 20 goā thong, iā ū kúi-nā ūi chiūⁿ tâi tiàu-sû. Taⁿ ài siá kúi-nā hāng lâi siàu-liām i: 1.I sı̄ khek-khûn khek-khiām ê lâng. Chá-khí sı̂ chin chá chiū khí-lâi, lé-pài-jı̍t kap kong-ek ê sū í-goā, bô chı̍t sı̂ êng; i chin-chiàⁿ gâu pó-sioh sı̂-kan. 2. I hó khoán-thāi chhut-goā lâng. Bô-lūn hn̄g-kūn, bô-lūn sím-mı̍h téng-hō ê lâng, nā kàu i ê ke, lóng it-lí hó khoán-thāi i. 3. I choan-siú lé-pài-jı̍t. Chiū-sı̄ bô-lūn sím-mı̍h kín kang ê sı̂, nā lé-pài-jı̍t chiū lóng hioh-khùn lâi lé-pài; m̄-nā i ê ke-lāi ê lâng hioh-khùn nā-tiāⁿ, liân tn̂g-kang kap só͘ chhiàⁿ ê choè kang lâng iā lóng hioh-khùn bô choè kang. 4. I sı̄ chin sêng-sı̍t ê lâng. Kóng oē sı̄, chiū-sı̄; m̄-sı̄, chiū m̄-sı̄; só͘-í hoē-lāi, hoē-goā hó miâ-siaⁿ, bô-lūn hoē-lāi hoē-goā ê lâng thiaⁿ-tio̍h i sí-khı̀, ta̍k lâng to kóng chin phah-sńg. 5. I chin chı̄n-tiong. I ū choè Chip-sū 6 nı̂, choè Tiúⁿ-ló 20 nı̂; i khoàⁿ Siōng-tè ê kok pí i ê ke khah iàu-kín, nā kàu-hoē ū sím-mı̍h tāi-chı̀, sui-jiân sı̄ chin bô êng, iā hoaⁿ-hí pàng kang. I ū choè pó-chiàⁿ kúi-nā nı̂ kú, tùi siā-hoē iā sı̄ chı̄n gı̄-bū, thang kóng sı̄ pè-hoē chı̍t ê bô͘-hoān-chiá. Taⁿ ka-têng sit chı̍t ê liông-hū, kàu-hoē sit chı̍t ki tòng-liông, boē bián-tit thòng-sim siong-pi. ( Tâi-oân Kàu-hoē-pò tē 538 koàn,1930 nı̂ 1 ge̍h)