Sió-toān Gô͘ Khoan-jū

Gô͘ khoan-jū Thoân-tō, tı̄ kin-nı̂ sin-le̍k 11 ge̍h 14 hō ū kè-sin, 15 hō ū chhut-chòng. Ū se-kok bo̍k-su, ko͘-niû, sian-siⁿ, kap pún-toē bo̍k-su, thoân-tō-su, í-kı̍p hoē-iú kúi-nā pah lâng kā i sàng-chòng. Hióng-siū 78 hè. Pak-pō͘ siat kàu ê sı̂, ū gō͘ ê lâng tē-it tāi-seng lâi niá soé-lé, i sı̄ hit tiong-kan ê chı̍t-ê. Kı̂-û hit 4 lâng lóng í-keng saⁿ-soà kè-sin liáu. Chí-ū Gô͘ Thoân-tō chia̍h kàu kin-nı̂. Thang kóng i put-chí ū hok-khı̀. Tı̄ kàu-hoē tiong iā thang kóng i sı̄ tē-it chá jı̍p kàu ê lâng. I bē thiaⁿ tō-lí í-chêng, sı̄ teh choè iû-chhat ê keng-kí, chin chhut-miâ, ū put-chí choē lâng chhiáⁿ i sı̀-koè khı̀ choè kang. I iā ū lâi Hō͘-bé iû-chhat. Só͘-í tı̄ Chú-āu 1872 nı̂ 10 ge̍h ū thiaⁿ-tio̍h Chú ê tō-lí. I sûi-sı̂ hoán-hoé lâi sı̀n Chú, keng-kè chı̍t nı̂ sı̄ 1873 nı̂ 3 goe̍h 9 hō, chiū niá-siū soé-lé. Tùi án-ni choè Kai Bo̍k-su ê ha̍k-seng, āu-lâi choè Thoân-tō. Ū tiàm choē-choē ūi ê pài-tn̂g thoân tō-lí, chin chhut-la̍t, put-chí gâu chio-ho͘ lâng lâi thiaⁿ. I só͘ tiàm ê pài-tn̂g chiū-sı̄: Pat-lí-hun, Toā-lōng-pōng, Saⁿ-têng-po͘, Koe-lâng, Sin-tek, Gı̂-lân-koe, sàu-khut, Sin-siā, Lūn-tá-téng, Toā-tiū-tiâⁿ, Sin-chng, Thô͘-hn̂g, Gō͘-kó͘-khiⁿ, Loán-loán, Sū-lı̂m, Tām-súi, Hê-siūⁿ-chiu, Gû-po͘-chng, chiah ê só͘-chāi. Taⁿ i í-keng kè sí-hô, tek-khak jı̍p Thiⁿ-siâⁿ ê mn̂g, teh hióng-siū tn̂g oa̍h ê hok-khı̀. Sı̍t-chāi iu-būn thang pı̀ⁿ choè hoaⁿ-hí. (Tâi-oân Kàu-hoē-pò tē 430 koàn, 1921 nı̂ 1 ge̍h)