Sió-toān Keh Chhoà--sı̄ Oàn

I ê goā-ke chiū-sı̄ Lo̍k-káng Chhoà Chhí ê toā cha-bó͘-kiáⁿ, cha̍p-chhit hè kè Keh Oai Tiúⁿ-ló. I ê tiōng-hu sı̀n tō-lí, gō͘ nı̂ kú kap i choè tùi-te̍k, ka-kı̄ pài ngó͘-siōng; kàu saⁿ-cha̍p-káu hè ê sı̂, chiah kap i ê tiōng-hu saⁿ-kap sı̀n Hok-im. Tùi hit-tia̍p khí, chin tı̀-ı̀ siú lé-pài; sui-jiân seng-khu loán-jio̍k, iā chē chhia khı̀ hù; koh i iā chin tı̀-ı̀ tò-tńg khı̀ Lo̍k-káng ín-chhoā i ê pē-bú lé-pài. 
I ê choè lâng khûn-khiām-khek-kí, gâu khoán-thāi lâng, gâu liāu-lí ke-sū, chun-kèng tiōng-hu. Kàu beh lı̂m-chiong ê í-chêng, iáu-kú kau-tài i ê cha-bó͘-kiáⁿ tio̍h phàu ke-nn̄g hō͘ i ê tiōng-hu chia̍h. Khoán-thāi lâng bô hun chhin-so, só͘-í bô-lūn hoē-lāi hoē-goā ê lâng nā kàu i ê chhù, i lóng hián-chhut i hoaⁿ-hí ê bı̄n, lâi hó khoán-thāi lâng. Só͘-í bat i ê lâng chin siàu-liām i. I ê thiàⁿ kiáⁿ bô hun-piat ta-po͘ cha-bó͘, lóng chı̍t-iūⁿ sim. I ū siⁿ saⁿ ê ta-po͘: toā--ê kap tē-jı̄--ê í-keng kè-óng; tē-saⁿ--ê, Téng-sūn kun, hiān-sı̂ tı̄ Kiaⁿ-to͘ Tông-chı̀-siā Tāi-ha̍k. Toā cha-bó͘-kiáⁿ kè Iûⁿ Choâⁿ Chip-sū, kúi-nā nı̂ chêng kè-sı̀. Tē-jı̄ kè N̂g Thêng-chhiau kun, tē-saⁿ kè Tân Khêng-iâu Bo̍k-su. 
I chin chun-kèng thoân tō-lí ê sian-siⁿ: só͘-í i ê cha-bó͘-kiáⁿ kè thoân tō-lí ê lâng, i chin hoaⁿ-hí. Poeh-nı̂ chêng Khêng-iâu Bo̍k-su tı̄ Gı̂-lân thoân tō-lí ê sı̂, i ê Bo̍k-su-niû phoà-pı̄ⁿ chin siong-tiōng, i chiū chhin-sin khı̀ Gı̂-lân chiàu-kò͘ i; kàu khah-hó chiū chhoā i tńg-lâi chhù-nı̍h chiàu-kò͘ i. 
Put-hēng tı̄ bô joā-kú chêng ū jiám-tio̍h hı̀-pı̄ⁿ, ū jı̍p Tâi-tiong pı̄ⁿ-ı̄ⁿ iok nn̄g ge̍h-jı̍t kan. I tı̄ pı̄ⁿ-chhn̂g chin jia̍t-sim, pek-chhiat kı̂-tó lâi siū an-ùi. Kàu beh lı̂m-chiong kúi jı̍t chêng, kā i tiōng-hu kóng, “Pài Siōng-tè hun-hô m̄-thang kió-kán.” Put-hēng tı̄ 5 ge̍h 8 jI̍t téng-po͘ 9 tiám, tı̄ ka-kı̄ ê chhù, hō͘ Chú kéng-tiàu i lı̄-khui sè-kan, hióng-siū 59 hè. I beh lı̂m-chiong ê sı̂, tú i tiōng-hu pek-chhiat kı̂-tó tiong, an-jiân siū-tiàu tò-tńg Pē tau, hióng-siū kú-tn̂g ê hok-khı̀. 
Kàu tı̄ 5 ge̍h 20 jı̍t ē-po͘ nn̄g-tiám ū chhut-chòng: hoē-chòng-chiá ū Jı̍t-pún Ki-tok Kàu-hoē ê bo̍k-su, kap Chiong-hoà, Tāi-kah Kàu-hoē ê Bo̍k-su, koh ū kúi-nā ūi ê thoân-tō-su, í-kı̍p Tâi-tiong pún-tn̂g ê tióng-chip hoē-iú, kap kúi-nā só͘-chāi ê hoē-iú, lóng chóng ū 500 goā lâng, thang kóng chin sēng-hóng. Che sı̄ hián-chhut i ê gâu choè lâng. 
Goá khı̀ hù chòng-sek, ū siū tio̍h in song-ka ê hó-ı̀, thok goá kóng i ê lí-le̍k, chiah chiong só͘ tiau-cha só͘ chai--ê siá tām-po̍h hō͘ lia̍t-ūi thang siàu-liām, iā thang o̍h i ê hó bô͘-iūⁿ. Chhiáⁿ lia̍t-ūi soà thoè in ke-lāi toā-soè kı̂-tó, hō͘ in lóng oē chiap-soà i ê hó bô͘-iūⁿ, koh hō͘ in tùi Chú lâi siū an-ùi. 

(Tâi-oân Kàu-hoē-pò tē 496 koàn, 1926 nı̂ 6 goe̍h)