Lı̂m kun Bûn-thong chhut-sı̀ tı̄ Chú-āu 1885 nı̂, soè-hàn ê sı̂ ū tı̄ Chúi-tńg-kha pài-tn̂g tha̍k sió-o̍h kúi-nā nı̂, kàu Chú-āu 1902 nı̂ ū jı̍p Tām-súi Sı̂n-ha̍k-hāu tha̍k chheh. Thâu-bé ū keng-kè 4 nı̂ kú. Āu-lâi ūi-tio̍h ke-lāi ê tāi-chı̀, ko͘-put-chiong tio̍h thè-o̍h, tńg-lâi pang-chān i ê pē, chóng-sı̄ bô kú i ê pē chiū sí, i tio̍h tam-tng ke-lāi kap hoa̍t-lo̍h seng-lí ê chek-sêng, put-hēng tı̄ 2 nı̂ chêng i ê ām-kún ū khí soàⁿ-gâm ê pı̄ⁿ. Kūn-lâi i ê pı̄ⁿ ná siong-tiōng, kàu pún nı̂ 6 ge̍h 30 hō ē-po͘ 6 tiám cheng chiū lı̄-khui sè-kan. Lūn i choē-choē-hāng ê hó bô͘-iūⁿ hō͘ lâng thang o̍h, taⁿ goá tāi-lio̍k siá kúi hāng pâi-lia̍t tı̄ ē-toé.
1.Sêng-sı̍t. Tùi i siàu-liân kàu 25 hè chiah kiàn-tı̀ ke-āu, m̄-bat thiaⁿ-kı̀ⁿ i ū sím-mı̍h hòng-chhiòng ê sū, iā bô ài kap hiah-ê choè pháiⁿ ê lâng kau-poê, nā êng ê sı̂ chiū kàu pài-tn̂g káng-kiù tō-lí, khoàⁿ chheh. Nā ū lâng thok-tiōng i sím-mı̍h tāi-chı̀ i iā put-chí tı̀-ı̀.
2.Jia̍t-sim tı̄ kàu-hoē. Tùi i chhut o̍h liáu-āu put-lūn i kàu bó͘ só͘ chāi choè sū-gia̍p, i chiū tı̄-hia tàu pang-chān kàu-hoē. Tı̄ Tun-á kha chho͘ siat pài-tn̂g ê sı̂ iáu-boē ū Thoân-tō thang khı̀ toà, hit-tia̍p i tı̄ Āu-lí-chng pān kang-sū, i chiū chhut-la̍t tàu pang-chān Tun-á-kha ê kàu-hoē. Āu-lâi i ū toà tı̄ Koe-lâng choè seng-lí, iā-sı̄ tàu pang-chān hia ê kàu-hoē. Koh i siông-siông kam-goān khek-kí chı̄n-la̍t toê-iân choè kàu hoē ê lō͘-ēng.
3.Chı̄n chit. I tı̄ Chú-āu 1912 nı̂ chiū tò-tńg-lâi Chúi-tńg-kha choè seng-lí. Hoē-iú khoàⁿ i chhut-la̍t tı̄ kàu-hoē, 1913 nı̂ kàu-hoē kéng i choè chip-sū, 1914 nı̂ Kàu-hoē kéng i choè tiúⁿ-ló. I só͘ tam-tng ê chit, bô lūn kó͘-bú toê-iân chiáng-siàu, choè kı̀ sū, á-sı̄ kap goá choè tı̄n chhut-goā thàm hoē-iú pò͘-tō, i lóng hoaⁿ-hí tam-tng, bô the-sı̂. Kàu i pı̄ⁿ-sè tı̂m-tāng ê sı̂, goá kap hoē-iú khı̀ thàm i , i iû-goân sı̄ khoà-lū kàu-hoē ê sū, kóng i lóng bô chhut-la̍t tı̄ kàu-hoē.
4. Gâu thun-lún. I só͘ tú tio̍h ê pēⁿ goá m̄-bat khoàⁿ-kı̀ⁿ lâng tú tio̍h hiah toā kan-khó͘. Chóng--sı̄ i iáu-bē tú tio̍h hiah toā kan-khó͘ ê sı̂, goá chiū siông-siông thè i khoà-lū. Chóng--sı̄ nā kı̀ⁿ tio̍h i ê bı̄n, i hoán-tńg chin chhiò-iông, hián-chhut lóng bô khoà-lū ê khoán. Ta̍k-pái nā lâi goán tau, lóng sı̄ kap goá kóng kàu-hoē ê sū. Tùi nn̄g goe̍h goā jı̍t chêng khí, i ê pēⁿ-sè chiū chin siong-tiōng, choân-sin thiàⁿ-thàng bē kóng-tit, bē chē, bē tó, bē khùn; kàu āu-lâi tio̍h chhiáⁿ sian-siⁿ lâi kā i chiam-io̍h, chı̍t-jı̍t ū-sı̂ nn̄g-pái. Goá ū khı̀ an-ùi i, i kóng: “Goá nā bô sı̀n Siōng-tè, tek-khak bē thun-lún kàu hiah kú.”
Taⁿ í-keng lı̄-khui sè-kan, ū pàng-sak i ê bó͘ iáu siàu-liân, nn̄g ê cha-bó͘-kiáⁿ iáu soè-hàn, koh tùi kúi-nā nı̂ chêng ná sit-pāi, soà tı̀-kàu khiàm lâng ê chè. Án-ni bó͘-kiáⁿ tio̍h tú-tio̍h chin kan-khó͘. Chhiáⁿ khoàⁿ Pò ê hiaⁿ-chí thoè in kı̂-tó, koh thoè Chúi-tńg-kha ê kàu-hoē kı̂-tó, ǹg-bāng Siōng-tè oē koh kéng lâng choē-choē lâi chiap-soà i ê kang.
(Tâi-oân Kàu-hoē-pò tē 377 koàn,1916 nı̂ 8 ge̍h)
