Sió-toān Phêⁿ-ô͘ Khó͘ Thóng Chip-sū

Thóng-peh sı̄ sio̍k Sai-sū ê kàu-hoē, 1902 nı̂ siū sé-lé, kin-nı̂ siū kéng chò chip-sū. Tùi jı̍p kàu-hoē liáu-āu, jia̍t-sim pài Siōng-tè, khı̂n-siú sèng-jı̍t. Sui-jiân tùi-tio̍h chin-chē ê khún-tio̍k iā bô loé-chı̀;Ū-sı̂ hı̂ lia̍h-lia̍h hō͘ sè-sio̍k lâng chhiúⁿ-chhiúⁿ-khı̀ iā bô beh kap lâng kè-kàu, chò lâng chin chhin-chhiat, chhù-piⁿ lâng-lâng hó; chin-chiàⁿ sı̄ chin ê Ki-tok-tô͘. Sai-sū ê kàu-hoē lóng sı̄ oá-khò i chı̍t lâng teh liāu-lí siat-hoat, pún-sin chin kam-goān chò chú-lí, chio lâng lâi lé-pài; chin-chiàⁿ sı̄ Sai-sū kàu-hoē ê kng-teng. Taⁿ bô lah! 10 goe̍h 7 jı̍t, chiū hō͘ Chú tiàu i lı̄-khui sè-kan, hióng-siū 51 hoè. Lóng-chóng phoàⁿ-pı̄ⁿ 20 goā jı̍t kú, 10 goā jı̍t bē kóng-oē. Tı̄ teh-beh sí ê sı̂, iáu ē khui-chhùi khó͘-khǹg hoē-iú tio̍h jia̍t-sim pài Siōng-tè, tio̍h ū tı̀-sek. Chhù-piⁿ thiaⁿ-tio̍h i sí, ta̍k lâng bô m̄ thó͘-khùi lâu ba̍k-sái kóng, Khó-sioh ah, bô chhái chit ê lâng; án-ni chiū thang chai i chò lâng tek-khak sı̄ chin bô-táⁿ-kín. Chóng-sı̄ ū chı̍t hāng thang an-ùi lán ê sim, chiū sı̄ I ū jia̍t-sim pài Siōng-tè,tek-khak tit-tio̍h Chú siúⁿ-sù I toā pêng-an khoài-lo̍k ê só͘-chāi. Ū chı̍t hāng thang hoân-ló, chiū-sı̄ i ê kiáⁿ-jı̂ iáu sè-hàn, tō-lí bô sím-mı̍h ē bêng-pe̍k, koh kan-ta 2 hō͘ chhap-cha̍p tı̄ sè-sio̍k lâng ê tiong-kan, kiaⁿ-liáu ē khah loé-chı̀. Chhiáⁿ khoàⁿ Pò ê hiaⁿ-ché thè in chı̍t ke kı̂-tó. (Tâi-oân Kàu-hoē-pò tē 440 koàn, 1921 nı̂ 11 ge̍h)