Tân Tiúⁿ-ló sı̄ Pı̂n-tong ke Kui-lâi-chng ê lâng. Tı̄ siàu-liân chiū sit-lo̍h pē-bó ê chai-poê; chóng-sı̄ khı̂n-bián keng-êng lâi khí-ke; tı̄ in chng-nı̍h ê lâng, khoàⁿ i chò ū bêng-bōng ê lâng. Ūi-tio̍h i lâi pài Siōng-tè, chng-bı̂n tùi I kóng, chêng khoàⁿ lí chò toā thâu-bú, taⁿ chiū khoàⁿ lí chò boé cháiⁿ-á ê lâng. Tân Tiúⁿ-ló chin hoaⁿ-hí sêng-siū chit hō lêng-jio̍k ê oē. Koh ū chı̍t-pái chng-bı̂n chio-chı̍p kúi-cha̍p lâng kng chı̍t téng lián-kiō koan hō͘ i khí-lián; ū ê gia̍h hoé-pé, ū ê hoah hiu, tı̍t-tı̍t boeh khı̀ lòng pháiⁿ i ê chhù, jı̍p khı̀ tı̄ in thiaⁿ-nı̍h, loān-loān chông; Tân Tiúⁿ-ló ēng un-jiû ê siaⁿ kā in kóng, Lín tio̍h sè-jı̄, nā hoé-sio-chhù chiū pháiⁿ-sè; tùi án-ni lián-kiō soah bē hián, tāi-ke thè cháu. Tùi i ê chò lâng sui-bóng chı̍t-sı̂ siū lêng-jio̍k, āu-lâi chng-bı̂n iû-goân chin chun-kèng i; lō͘-boé chèng-lâng kéng I tng pó-chèng kúi-nā-jı̄m. Che sı̄ i sı̀n Chú tùi goā ê sêng-kong.
Tı̄ Tāi-chèng 8, 9 nı̂, châi-kài hoán-tōng, siāng chı̍t nı̂ : (1) I ke-lāi ê châi-sán sit-pāi; (2) Sí i só͘ tùi-tiōng teh tong ke-sū ê toā-kiáⁿ; (3) Sit-lo̍h i só͘ tin-ài ê soah-boé cha-bó͘-kiáⁿ. Chhin-chhiūⁿ chit-hō ê tàⁿ, sím-mı̍h lâng taⁿ ē khí ? Chóng-sı̄ Tân Tiúⁿ-ló tùi goā kóng, i it-hoat khò Chú lâi keng-koè hit-ê khó͘-tàⁿ ê lō͘-chām. Che sı̄ i tùi sı̀n-khò, lâi chiàn-sèng lóng-chóng ê chhı̀-liān.
Phí-jı̂n tı̄ Tāi-chèng 13 nı̂ chiaⁿ-goe̍h, tit-tio̍h Pı̂n-tong Kàu-hoē ê bô khı̀-hiâm, lâi chiū-jı̄m liáu, hit-sı̂ ê Bo̍k-su siok-sià sı̄ tek-chō khàm kam-chià-hio̍h; Chú-jı̍t-o̍h kap kı̂-thaⁿ ê siok-sià iā sı̄ án-ni; i bat tùi goá kóng, nā ē-thang khí chı̍t-keng khah tú-hó, hō͘ Bo̍k-su toà, kap Chú-jı̍t-o̍h ê lō͘-ēng; goá hoaⁿ-hí ke̍k-le̍k boeh chhut 300 kho͘. Tı̄ Chiau-hô goân-nı̂ boé, tú sı̄ i 69 hoè, tú-tio̍h tāng-pı̄ⁿ, chhe lâng lâi kiò goá, tú-hó goá bô tı̄-teh. Goá ê hū-jı̂n-lâng koáⁿ-kín khı̀, i chiū kiò i ê kiáⁿ, sim-pū lóng lâi, hoan-hù in kóng, Goá nā tńg-khı̀, chit 300 kho͘ bô-lūn jû-hô, lín tio̍h kau, goá ê sim chiah ē pêng-an. Siōng-tè hō͘ i koh ióng-khı̀-lâi. Pè-hoē tı̄ Chiau-hô 2 nı̂ boé, chiū tio̍k-chhiú khí chı̍t-chō, lâu-téng chò siok-sià, lâu-kha Chú-jı̍t-o̍h, 3 nı̂ koh khí chı̍t-chō 4 keng, 5 nı̂ koh khí Chú-jı̍t-o̍h káng-tn̂g. Hit-tia̍p i ê sin-thé ná lám, kā goá kóng, goá bô phah-sǹg Siōng-tè lâu goá koh khoàⁿ-tio̍h Kàu-hoē só͘ khiàm ê chhù lóng oân-pı̄, put-lūn sím-mı̍h sı̂ goá lóng piān thang tńg-lâi ! Che thang kiàn-chhut Tân Tiúⁿ-ló tùi Chú ê Kàu-hoē koan-sim ê tiám.
Í-siōng ê bô͘-iūⁿ kiám bô hō͘ lâng thang o̍h mah ?
(Tâi-oân Kàu-hoē-pò tē 569 koàn, 1932 nı̂ 8 goe̍h)
