Sió-toān Tı̄ⁿ Gím-sam

Chit lâng sı̄ Bâ-û kàu-hoē Tı̄ⁿ Teng-thiam Tiúⁿ-ló ê tē saⁿ kiáⁿ, kin-nı̂ 18 hè. Tām-súi Tiong-o̍h saⁿ liân seng, jı̍p o̍h liáu-āu tı̄ Tām-súi siū soé-lé jı̍p kàu-hoē. Kin-nı̂ hioh-joa̍h hoê-ka iáu ū kap goán khı̀ hù pò͘-tō-hoē, bô phah-sǹg 7 ge̍h bé khí koâⁿ-jia̍t pı̄ⁿ, kàu 9 ge̍h 27 hō hō͘ Chú tiàu i lı̄-khui sè-kan. Jı̄-cha̍p peh hō tı̄ Tāi-kah an-chòng. Sit chit hō chheng-liân-poè thiaⁿ-kı̀ⁿ ê lâng bô m̄ siong-sim. Pē-bú chhin-lâng iā iu-būn boē liáu. 1.Phín-hēng tong-chiàⁿ. Tùi pē-bú sūn-chêng, iú-hàu, m̄ bat hō͘ sı̄ toā lâng khı̀ khó͘. Tùi chhù-piⁿ, chím, ḿ, pêng-iú ū lé-sò͘, giân-gú ûn-sûn, chèng-khı̀ hō͘ lâng khim-ho̍k o-ló. 2.Gâu thun-lún. Phoà-pı̄ⁿ hiah kú, bô haiⁿ-chhan, bô khiâu lâng, bô kiò kan-khó͘. 3.Chı̀-bōng ko-tāi. Hit-sı̂ beh jı̍p Tiong-o̍h, iā hō͘ ha̍k-hāu sian-siⁿ kiò khı̀ chhı̀-giām su-hoān-pō͘, ū kı̍p-tē. Chóng-sı̄ ài jı̍p kàu-hoē ê ha̍k-hāu, chiū jı̍p Tām-súi Tiong Ha̍k-hāu, ǹg-bāng chiong-lâi khı̀ Loē-tē liû-ha̍k, sêng-bêng lâi êng kng kàu-hoē. 4.Sı̀n-gióng chin chhim. I ê tông-chhong kóng, Tı̄ hāu-tiong chá-àm tēng sı̂-kan tha̍k sèng-keng, kı̂-tó. Tı̄ ke-lāi khó͘-khǹg chhin-lâng tio̍h jia̍t-sim ho̍k-sāi Siōng-tè. Tùi pêng-iú khó͘-khǹg in tio̍h sı̀n Ki-tok. Kàu phoà-pı̄ⁿ tó chhn̂g iáu chhim khoà-lū Bâ-û ê kàu-hoē chin chió lâng, iā khoà-lū ke-lāi bē chhim-sı̀n Siōng-tè. Goá kúi-nā pái siá phoe khó͘-khǹg i m̄ thang kè-thâu bián-kióng, sin-thé nā bô khong-kiān, ha̍k-būn bô lō͘-ēng. Siuⁿ tāng ê tàⁿ sı̄ oh taⁿ. Kàu phoà-pı̄ⁿ tó chhn̂g iā mı̂ jı̍t khoà-lū tha̍k-chheh ê sū. Pó-lô kóng, Chı̄n-la̍t pháu-cháu, cháu kàu chhah pio hit-nı̍h, iáu-kú tio̍h tú hó chiah oē tit-tio̍h siúⁿ. Chhiáⁿ khoàⁿ Pò ê hiaⁿ-chí thoè in ê pē-bú chhin-lâng lâi kı̂-tó, kiû Sèng-sı̂n an-ùi. (Tâi-oân Kàu-hoē-pò tē 428 koàn, 1920 nı̂ 11 ge̍h)