Siāu-kài

Ùi Wiki Tô·-su-kóan

Lō͘-tek Má-teng kóng, "Tē-it hó ê Ki-tok-tô͘ m̄-sı̄ kan-ta khǹg choē-choē chheh, koh tha̍k choē-choē chheh ê lâng, chiū-sı̄ tùi choē-choē chheh ê lâi tit- tio̍h ê kà-sı̄, hoaⁿ-hí koh pun hō͘ pa̍t- lâng, ū án-ni lâi sı̍t-hêng--ê chiah sı̄ chin ê Ki-tok-tô͘. Chóng-sı̄ án-ni lâi sı̍t-hêng ê sı̄ tit-tio̍h Sèng Sı̂n ê chhiong-moá ê lâng chiah oē." Lán thang kóng hó ê Ki-tok-tô͘ tio̍h tha̍k-chheh choē-choē, thiaⁿ hó kà-sı̄ choē-choē, sı̍t-hêng pun hō͘ lâng choē-choē, chiah oē ēng-tit. Só͘ ài siāu-kài ê sı̄ kò͘ Tō͘-sı̍t (Chuge) Sian-siⁿ ê ûi-tù "Gō͘-sûn-choeh ê Chêng- āu"; sı̄ siá Hô-bûn, kiōng 267 bı̄n, hun choè 32 chiuⁿ, kı̂-tiong 9 chiuⁿ ū siá lâi lán Tâi-oân thoân-tō lí-hêng ê sū. Tēng- kè pēng-chè kho͘-jı̄, siōng-chè kho͘-la̍k. Tı̄ Tâi-tiong chhia-thâu-chêng Kóng- ūn Kong-si, Tân Khêng-iâu Bo̍k-su hia ū teh boē. Nā bat Jı̍t-pún oē ê lâng chhiáⁿ boé lâi khoàⁿ. Lán chai Tō͘-sı̍t Sian-siⁿ m̄-sı̄ ha̍k- chiá, sı̄ chong-kàu-ka, sı̄ Siōng-tè ê lâng. I ū lâi lán Tâi-oân thoân-tō. I oa̍h ê sı̂ put-chí teh siàu-liām lán hiaⁿ-tı̄ chí-bē. I choè Thian-bō͘ Pò͘-tō-tūi kàu lán chia ê sı̂, lán toā hoan-gêng. Chit-tia̍p lán khoàⁿ-tio̍h i ê chheh ê sı̂ oán-jiân khoàⁿ- tio̍h i. Chit pún chheh sı̄ tō-lí ê chheh. I ê chong-kàu keng-giām tâm choē-choē. Lán thang kóng i sı̄ Jı̍t-pún ê Sat-hu Sun-tāi. Án-ni sió-pò chiū-sı̄. (Tâi-oân Kàu-hoē-pò tē 512 koàn,1927 nı̂ 11 ge̍h)