Siāu-kài ka-kı̄
Kok-ūi A-hiaⁿ A-ché: Ta̍k-ê pêng-an! Siau Lah-jih, Chhân-tiong lâng (Chiong-hoà koān Tiân-tiong-tı̀n), 1941 nı̂ seⁿ, tih-beh koè 1 kah-chí ê sèⁿ-miā, iáu-sı̄ boé-á chit 10 tang oa̍h-liáu khah-ū ı̀-gı̄. Chhut-sı̀ tı̄ phok-sı̍t ê chng-kha, chò 1 ê bô tha̍k-chheh choh-chhân-lâng ê chú-tē, koai-koai-á thiaⁿ-oē, gōng-gōng-á tha̍k-chheh, tha̍k-chheh beh chhòng-siáⁿ? Kan-nā chai-iáⁿ beh bat-jı̄ niā-niā, chhun--ê tiō-sı̄ toā-lâng kóng-siáⁿ, lāu-su kóng-siáⁿ, goá tiō thiaⁿ-siáⁿ, chin-koai chin-khiáu tiō-sı̄ Siau Lah-jih gín-á siàu-liân sı̂-tāi ê siá-chin. chit-má siūⁿ--khí-lâi, kı̂-sı̍t sı̄ gû-gōng ê 1 ê. Chū kok-hāu kàu su-hoān kàu chhut siā-hoē chò lāu-su, lóng it-tı̍t jı̄n-ûi sı̄ Tiong-kok-lâng, sui-jiân tùi Tiong-kok ê le̍k-sú tē-lí bô chhù-bı̄, mā it-tı̍t leh jı̄n-chin phah-piàⁿ tha̍k, khó-sioh tha̍k-bô siáⁿ-mı̍h sêng-chek, kàu taⁿ chiah chai-iáⁿ goân-lâi he m̄-sı̄ goá ka-kı̄ ê mı̍h-kiāⁿ, kan-nā beh khò sí-kı̀ ngē-liām lâi kı̀-tı̀, pēng m̄-sı̄ goá ê khiáu-khı̀, bo̍k-koài khah án-choáⁿ tha̍k, khah án-choáⁿ kı̀, tiō-sı̄ tha̍k-bô. Chū sè-hàn tiō bô chhù-bı̄ gí-giân ê mı̍h-kiāⁿ, ha̍k-seng sı̂-tāi siōng hoân-ló ê tāi-chı̀, tiō-sı̄ chok-bûn kap káng-ián, te̍k-pia̍t he kap goá bô-tı̄-tāi ê tê-ba̍k, tiō siá bô lō͘-lí-lâi, kóng bē kui-chhut, kok-hāu sı̂-tāi, bat hō͘ lāu-su tiám-miâ chham-ka káng-ián, kiat-kó hāi goá ké pak-tó͘-thiàⁿ m̄ khı̀ tha̍k-chheh, sı̍t-chāi ū-kàu iàn-khı̀ bô-lō͘-iōng. kóng--khí-lâi m̄-kiaⁿ lín chhiò, kàu kah chit-kú, nā-sı̄ beh kiò goá tı̄ chiòng-lâng bı̄n-chêng piáu-ta̍t kúi-kù-á, iáu-hoân-ná sı̄ kám-kak ùi-ùi, put-kò nā-sı̄ su-té-hā phò͘-tāu gı̄-niū, ū-tang-sı̂-á tiō chin kāu-oē. Ū 1 hāng hō͘ goá kám-kak khah ū chū-sı̀n ê tāi-chı̀, tiō-sı̄ o̍h Tâi-gí-bûn, chū-chiông ē-hiáu siá Tâi-gí liáu-āu, sim-chêng chiâu khin-sang, khǹg-tiàm thâu-khak-lāi kúi nā cha̍p nı̂ ê kı̀-tı̀, khai-sí tit-tio̍h tháu-pàng, siūⁿ siáⁿ kóng siáⁿ, siūⁿ siáⁿ siá siáⁿ, ū Tâi-oân-jı̄ ê chō͘-la̍t, Hàn-jı̄ í-keng pa̍k goá bē-tiâu; iû-kı̂ o̍h ē-hiáu phah tiān-náu, ka-siōng HOTSYSR kap Taiwanese Package su-jı̍p-hoat ê pang-chān, ná-leh chē phùn-siā-ki--leh, siu̍h-siu̍h-kiò, joā sóng Lí kám chai. Ài-hō͘ Tâi-gí-bûn ê pêng-iú, koáⁿ-kín lâi, Ta̍k-ke koáⁿ-kín lâi siá Tâi-gí, chit-chūn sı̄ siōng-kài-hó ê sı̂-ki, kok-chióng ê kang-khū kā Lán chhoân piān-piān, Ta̍k-ke jı̄n-chin lâi siá, iah beh tháu-pàng sim-lāi hoaⁿ-hí kap ut-chut, iah beh pó-chûn Lán-ê bûn-hoà, iah beh ūi āu-tāi kiáⁿ-sun chò kong-tek, kám m̄-sı̄ chin ū ı̀-gı̄ ê tāi-chı̀.