Siōng-tè Só͘ Beh Ēng Ê Lâng 01

Tio̍k-ka Bûn-jı̄ Pò͘-tō-hoē Chhut-pán Tē 1 Chiuⁿ Siⁿ-jı̍t Ê Kı̂-tó 1922 nı̂ 11 ge̍h 8 jı̍t, sı̄ goá 38 hè ê siⁿ-jı̍t, goá kı̂-tó kóng: Chú ah, kiû lí hō͘ goá chiâⁿ-choè ha̍h Lí sim-ı̀ ê lâng . Tı̄ hit-sı̂ Siōng-tè khui goá ê ba̍k-chiu, hō͘ goá khoàⁿ-kı̀ⁿ kàu-taⁿ goá só͘ teh choè ê kang, só͘ khoàⁿ choè iàu-kín ê sū, só͘ lia̍h choè chhù-bı̄ ê tāi-chı̀, pèng m̄-sı̄ tē-it tiōng-iàu. Tùi Siōng-tè lâi khoàⁿ, sio̍k-lêng ê seng-oa̍h chiah sı̄ tē-it iàu-kín. Chú án-ni hō͘ goá khoàⁿ-kı̀ⁿ chêng só͘ bē bat khoàⁿ-tio̍h ê sū. Goân-lâi goá lia̍h ka-kı̄ só͘ siá ê chheh, só͘ kóng ê tō-lí, í-kı̍p kı̂-thaⁿ só͘ choè ê kang kap só͘ sêng-chiū ê sū choè tek-ı̀. Nā-sı̄ Siōng-tè hiān-chāi hō͘ goá bêng-pe̍k, ū pí chiah-ê koh-khah iàu-kín ê sū, iā sı̄ Siōng-tè khah khoàⁿ-tāng--ê, chiū-sı̄ tı̄ seng-oa̍h siōng, goá só͘ chûn ê liām-thâu, sim-lāi ê sèng-kiat í-kı̍p kiâⁿ kong-gı̄ chiah-ê sū. Oāⁿ oē lâi kóng, goá tio̍h tùi Sèng Sı̂n lâi kái-piàn, tı̄ seng-oa̍h siōng ū hián-chhut Ki-tok ê khoán-sit. Koh-khah chhin-kūn Siōng-tè , kap I tâng-kiâⁿ kàu lō͘-bé. Chit kù oē khah chhim ê ı̀-gı̄, tı̄ hit-sı̂ goá chiah bêng-pe̍k. Goá ê sim chhiat-chhiat him-bō͘ ài tit-tio̍h chit khoán pó-poè ê keng-giām. Úi-tāi ê sù-tô͘ Pó-lô bat kı̂-tó kóng, “Hō͘ goá bat I,” koh kóng, “Ki-tok tiàm tı̄ lín,” “Ki-tok tiàm tı̄ goá teh oa̍h.” Kı̀-jiân Ná-a kap Siōng-tè saⁿ-kap kiâⁿ; Í-lo̍k iā kap Siōng-tè saⁿ-kap kiâⁿ, goá kiám choè boē kàu mah? Tùi Siōng-tè ê ba̍k-chiu lâi khoàⁿ, goá pún-sin kiám bô pí goá ê kang-chok í-kı̍p goá só͘-ū--ê khah pó-kùi mah? Siōng-tè m̄-nā ài goá ê ho̍k-sāi nā-tiāⁿ, I koh-khah ài ê, sı̄ teh ho̍k-sāi I ê goá chit ê lâng . Tng goá khún-kiû ài beh chiâⁿ-choè ha̍h I sim-ı̀ ê lâng liáu-āu, Siōng-tè chiū ín-chhoā goá kı̂-tó kóng: Chú ah, goá beh chiong goá ê chhiú hiàn hō͘ Lí. goān goá ê chhiú bô koh bong Lí só͘ bô ài ê mı̍h, á-sı̄ khı̀ choè bô êng-kng Lí ê sū. Chú ah, goá beh chiong goá ê kha hiàn hō͘ Lí. Kiû Lí pó-siú goá ê kha bô kiâⁿ kàu khoàⁿ Lí boē tio̍h ê só͘-chāi. Chú ah, goān goá ê ba̍k-chiu iā lóng bô khoàⁿ kı̀ⁿ-nā oē hō͘ Sèng Sı̂n iu-būn ê mı̍h. goān goá ê hi-khang bô thiaⁿ-tio̍h tùi Lí ū bô kèng-khiân ê sū. Goān goá ê chhùi bô kóng chhut Lí só͘ m̄-ài thiaⁿ ê oē. Goān goá ê thâu-náu bô khı̀ siūⁿ kı̀ⁿ-nā oē hō͘ Lí ê Sèng Sı̂n kan-khó͘ ê sū. Koh goān Chú ê thiàⁿ, Chú ê kám-chêng chhiong-moá goá ê sim-lāi. Kı̂-tó liáu-āu, goá liâm-piⁿ chai-iáⁿ Siōng-tè ài goá choan-sim kui-ǹg I. Sui-jiân tı̄ sè-kan, boē thang bô chhin-lâng , pêng-iú, ka-têng, kim-chı̂ⁿ kap sū-gia̍p, nā-sı̄ Ki-tok sı̄ tē-it tiōng-iàu. Bô-lūn jı̍t--sı̂, bô-lūn mı̂--sı̂, ta̍k sı̂-khek goá tio̍h choan-sim gióng-bōng I, sūn-ho̍k I choè goá ê Chú, choè goá ê Ông, to̍k-to̍k I sı̄ goá ê thâu. Che sı̄ goá tùi I eng-kai ū ê thài-tō͘. Chí-ū án-ni, chiah oē tit-tio̍h I ê sù-hok kap tiōng-iōng. Chí-ū án-ni goá chiah oē thang boán-chiok I ê sim. Tı̄ Siōng-tè kap goá ê tiong-kan, choa̍t-tùi boē thang iông-ún ū sím-mı̍h lâi chó͘-gāi. Chhin-chhiūⁿ tiōng-hu kap hū-jı̂n-lâng ê koan-hē, tiōng-hu sı̄ hū-jı̂n-lâng ê thâu, tio̍h thiàⁿ-sioh hū-jı̂n-lâng , hū-jı̂n-lâng ài tē-it thiaⁿ ka-kı̄ ê tiōng-hu. Chhin-chhiūⁿ án-ni, Chú tı̄ goá ê sim-lāi choè thâu, koh goá tio̍h tē-it thiàⁿ I. Tiōng-hu á-sı̄ hū-jı̂n-lâng nā bô tiong-sı̍t, che hun-in chiū bô hēng-hok. Chhin-chhiūⁿ án-ni, chí-ū goá choan-sim chı̍t-ı̀ ǹg Siōng-tè , goá kap I ê kau-poê chiah oē oân-boán. Ūi-tio̍h án-ni, I ài goá put-sı̂ kap I saⁿ kiat-liân. Chú tı̄ hit jı̍t iau-kiû goá ê, kin-á-jı̍t iā sı̄ án-ni teh iau-kiû tāi-ke. I ū iau-kiû ê koân-lı̄, lán kiám thang kū-choa̍t I mah? Tı̄ sè-kan, I í-goā kiám iáu ū sím-mı̍h oē kham-tit hō͘ lán choan-sim chı̍t-ı̀ khı̀ thiàⁿ i mah? Kı̀-jiân sı̄ án-ni, siáⁿ-sū lán iáu-kú bô teh thiaⁿ I ê iau-kiû? Siōng-tè í-goā lán kiám eō thang koh chhē tio̍h chin-chiàⁿ ê hoaⁿ-hí khoài-lo̍k? Bu̍t-chit kiám oē hō͘ lán tit-tio̍h hēng-hok kap boán-chiok? “In-ūi lâng ê oa̍h-miā put-chāi i só͘ chek-chū ê hong-sēng.” (Lō͘-ka 12:15). Siōng-tè ūi-tio̍h I pún-sin chhòng-chō lán, ài lán sı̂-siông kap I kau-poê, kap I tâng-kiâⁿ. Tı̄ chit ê siâ-phiah hêng-ge̍k ê sè-tāi------lâng chiong hun-pia̍t choè sèng ê sio̍k-lêng seng-oa̍h khoàⁿ choè bô lı̄-ek, chiong Sat-tàn choè sı̂n-bêng lâi ho̍k-sāi, hoán-tńg chiong lán ê Chú tèng sı̍p-jı̄-kè------tı̄ chit khoán ê sè-kài, Siōng-tè ài lán o̍h sèng-tô͘ ê bô͘-iūⁿ khoàⁿ ka-kı̄ choè kià-kha ê lâng -kheh, kap I saⁿ-kap kiâⁿ. che sı̄ Siōng-tè tùi lán só͘ tiāⁿ-tio̍h ê kè-e̍k kap chí-ı̀. Lán kiám thang hō͘ I sit-bāng mah? Kiám thang in-ūi lán ê sio̍k-hoà tı̀-kàu hō͘ I iu-siong? Siōng-tè ài lán pah-hun ê chı̍t-pah sio̍k tı̄ I, m̄-sı̄ pah-hun ê káu-cha̍p; sui-jiân ū chin-choē jio̍k-thé ê sū sı̄ chèng-tong--ê, chóng-sı̄ lán tio̍h kiû Siōng-tè hō͘ lán tùi bu̍t-chit, sè-kài, ka-têng, chhin-iú, chiah-ê tiong-kan hun-pia̍t chhut-lâi, hō͘ lán oē thang choan-sim chı̍t-ı̀ kui-ǹg I. Siat-sú lán ê chit-bū su-iàu lán tn̂g sı̂-kan lı̄-khui só͘ thiàⁿ ê lâng lâi ho̍k-sāi Chú, lán kiám choè boē kàu? Lán kiám khéng oá-khò I ê un-tián, khoàⁿ bô sè-kài kap jio̍k-thé lâi tit-tio̍h Chú Iâ-so͘? Tùi Sèng Sı̂n khiā-khí tı̄ lán ê lāi-bı̄n, lán chiū oē thang oân-choân ūi I lâi oa̍h, koh tùi sim-toé o-ló kóng, Chú Iâ-so͘ sı̍t-chāi hō͘ goá tit-tio̍h boán-chiok! Che chiū-sı̄ I só͘ kà-sı̄ goá ê, iā chiū-sı̄ goá só͘ kóng, oân-choân sio̍k tı̄ Siōng-tè , oân-choân ūi Chú Iâ-so͘ Ki-tok, pah-hun ê chı̍t-pah sio̍k tı̄ I ê sı̍t-chāi ı̀-gı̄. Án-ni lán chiū oē chiâⁿ-choè chı̍t ê ha̍h Chú sim-ı̀ ê lâng . Ha̍h Siōng-tè sim-ı̀ ê lâng , hoān-sū lia̍h Siōng-tè choè tē-it, sı̂-khek kap I tâng-kiâⁿ, bô choè I só͘ bô hoaⁿ-hí ê sū, bô hō͘ I iu-būn, tı̄ I ê bı̄n-chêng kiâⁿ kong-gı̄, ū sèng-kiat ê seng-oa̍h, choan-sim kui-ǹg I, chı̄n-sim, chı̄n-sèng, chı̄n-ı̀, chı̄n-la̍t khı̀ thiàⁿ I. Tāi-pı̍t sı̄ ha̍h Siōng-tè sim-ı̀ ê lâng . Tı̄ i hoān-choē liáu-āu, iáu-kú oē thang chiâⁿ-choè ha̍h Siōng-tè sim-ı̀ ê lâng , lí goá kiám boē mah? “Tān-í-lí lı̍p-chı̀ bô beh......phah lâ-sâm ka-kı̄.” (Tān-í-lí 1:8). Lán iā tio̍h án-ni lı̍p-chı̀, Siōng-tè chiū siúⁿ-sù lán khùi-la̍t, chiâⁿ-choè ha̍h I sim-ı̀ ê lâng . Lán tio̍h án-ni chiah oē chhin-chhiūⁿ Ki-tok ê khoán-sit, che iā-sı̄ Siōng-tè tùi lán choè toā ê ǹg-bāng, chiū-sı̄ ài lán chhin-chhiūⁿ I ê Kiáⁿ, ū I ê Kiáⁿ ê hêng-chōng. Sui-jiân choè 10 nı̂ kú ê Ki-tok-tô͘, iā bô pí khí-chho͘ hoán-hoé ê sı̂ koh-khah chhin-chhiūⁿ Ki-tok, che sı̍t-chāi sı̄ thang pi-siong ê sū. Ū lâng tit-kiù chiah 6 ge̍h jı̍t, chiū pí sı̀n Chú 6 nı̂ ê Ki-tok-tô͘ koh-khah chhin-chhiūⁿ Ki-tok. Chí-ū hiah ê siông-siông tı̄ Ki-tok bı̄n-chêng kap I kau-poê ê lâng chiah oē chhin-chhiūⁿ Ki-tok, iā chí-ū hiah ê choan-sim chı̍t-ı̀ ǹg Chú ê lâng , chiah oē chin-chiàⁿ bat I. Beh tit-tio̍h Chú choè-hó ê hok-khı̀, chiū tio̍h chiong ka-kı̄ choè-hó--ê hiàn hō͘ I. Beh chiâⁿ-choè ha̍h I sim-ı̀ ê lâng , tio̍h ēng choan-it ê sim kui-ǹg I. Lán nā ài beh tit-tio̍h I, chiū tio̍h hâng-ho̍k I; nā beh ūi-tio̍h I lâi oa̍h, tio̍h khéng ūi I sí. Ài beh tit-tio̍h I, chiū tio̍h chiong ka-kı̄ lóng kau hō͘ I. Chit khoán ê seng-oa̍h sı̄ joā-nih tiⁿ-bı̍t! Kap I kau-poê sı̄ hô-téng ê khoài-lo̍k! Che lóng m̄-sı̄ toē-bı̄n-chiūⁿ ê mı̍h-kiāⁿ só͘ oē thang pí-phēng ê. “I sı̄ soaⁿ-kok tiong ê pek-ha̍p-hoe,” “I sı̄ thiⁿ-kng-chá ê khé-bêng-chhiⁿ,” “I sı̄ Sa-lûn ê mûi-kùi-hoe.” “I sı̄ bān-lâng -tiong ê tē-it--ê.” “I oân-choân thang thiàⁿ.” Chhin-ài ê hiaⁿ-tı̄ chí-bē, lâng khoàⁿ choè thang oá-khò--ê, kı̂-sı̍t boē khò tit. Lí ê chhin-lâng oē hō͘ lí sit-bāng; kim-chı̂ⁿ oē chiâⁿ-choè lí ê tāng-tàⁿ; miâ-siaⁿ oē ín-khí lí ê hoân-ló. Chí-ū Chú oē boán-chiok lán ê sim-sı̂n, Siōng-tè boē hō͘ lán sit-bāng. Kap I tâng-kiâⁿ sı̄ tē-it tiⁿ-bı̍t ê sū. Nā tı̄ I kap lán ê tiong-kan lóng bô tām-po̍h ê chó͘-gāi, bô choē-ok ê o͘-hûn jia-cha̍h I êng-kng ê bı̄n------che sı̍t-chāi sı̄ thian-tông! Chú ah! Kiû Lí hō͘ goá chiâⁿ-choè chı̍t-ê ha̍h Lí sim-ı̀ ê lâng . Ǹg-bāng lán lóng oē án-ni kı̂-tó, iā án-ni koat-sim, koh-khah tio̍h chiàu án-ni khı̀ seng-oa̍h.