Siōng-tè Só͘ Beh Ēng Ê Lâng 05

Tē 5 Chiuⁿ Chiâⁿ-sèng Seng-oa̍h Ê Keng-giām Tāi-seng, goá ài lí tio̍h chai-iáⁿ chiâⁿ-sèng 3 ê hoán-bı̄n ê ı̀-gı̄, án-ni lí chiah oē khah iông-ı̄ⁿ liáu-kái chiâⁿ-sèng sı̄ sím-mı̍h. 1. Chiâⁿ-sèng m̄-sı̄ í-āu lóng bô koh ū chhı̀-thàm: lâng koat-sim beh ū chiâⁿ-sèng seng-oa̍h ê sı̂, só͘ siū ê chhı̀-thàm, kiám-chhái oē pí í-chêng koh-khah choē. Kàu taⁿ lí ê seng-oa̍h tùi Sat-tàn ê kok bô gûi-hiám, só͘-í i lóng m̄-bat lâi chhap lí. Chóng-sı̄ lí ū chiâⁿ-sèng ê keng-giām í-āu, i beh chı̄n i ê khùi-la̍t lâi kong-kek lí, só͘-í chiâⁿ-sèng m̄-sı̄ í-āu lóng bô koh ū chhı̀-giām. 2. Chiâⁿ-sèng m̄-sı̄ pó-hiám lí í-āu lóng boē hoān-choē: “Só͘-í ka-kı̄ lia̍h choè khiā-chāi ê, tio̍h kín-sı̄n, kiaⁿ-liáu poa̍h-tó.” Tı̄ sè-kan, bô chı̍t ê chêng-hêng, hō͘ Ki-tok-tô͘ an-choân, thò-tòng boē hoān-choē; peh kàu tē-it koân ê lâng oē poa̍h-lo̍h kàu tē-it kē ê só͘-chāi. Án-ni tio̍h kéng-sèng, in-ūi chiâⁿ-sèng m̄-sı̄ pó-hiám lí í-āu lóng boē hoān-choē. 3. Chiâⁿ-sèng iā m̄-sı̄ chiām-chiām tùi choē-ok tit-tio̍h tháu-pàng: Che choa̍t-tùi m̄-sı̄ Siōng-tè beh hō͘ lán tùi choē-ok tek-sèng hong-hoat. In-ūi Chú Iâ-so͘ í-keng éng-oán tùi-hù, chhú-lí choē-ok ê būn-toê, iā choē-ok ê koân-sè í-keng kòng-phoà, lí chiū m̄-thang koh hâng-ho̍k i. Taⁿ í-keng kóng-bêng chiâⁿ-sèng hoán-bı̄n ê ı̀-gı̄, chiū beh kóng khí chiâⁿ-sèng 3 ê chiàⁿ-bı̄n ê ı̀-gı̄: 1. Chiâⁿ-sèng sı̄ chı̍t ba̍k-nih-kú choán-ki ê thé-giām: Chit ê ı̀-sù chiū-sı̄ kóng, chiâⁿ-sèng ū i ê khai-sí, sui-jiân i ê kiat-kó sı̄ kui-sı̀-lâng chiah khoàⁿ oē chhut. Iā tek-khak ū i hun-kài ê khí-thâu. Í-sek-lia̍t peh-sı̀ⁿ teh kè Iok-tàn-hô ê sı̂, chiū ū chit-chióng ê thé-giām. Hit sı̂ chiū-sı̄ tı̄ le̍k-sú chiūⁿ chı̍t-ê hun-kài. Chá-khí-sı̂ in iáu-kú tı̄ khòng-iá hit-pêng, thiⁿ beh àm ê sı̂ chiū kàu tùi-bı̄n hoāⁿ. 2. Chiâⁿ-sèng sı̄ khah-iâⁿ choē-ok ê seng-oa̍h: Nā m̄-sı̄ án-ni, chiâⁿ-sèng chiū lóng bô kè-ta̍t. Siōng-tè pó-chèng lán oē tùi choē-ok ê koân-sè tit-tio̍h tháu-pàng. “In-ūi choē-ok bô koh koán-hat lín.” lâng nā bô kóng-khí tek-sèng choē-ok ê seng-oa̍h lâi kóng chiâⁿ-sèng, che sı̍t-chāi chin hó-chhiò ê tāi-chı̀. 3. Chiâⁿ-sèng sı̄ kui-sı̀-lâng ê kái-piàn, beh hō͘ lâng ná lâi ná chhin-chhiūⁿ Ki-tok ê khoán-sit: “Lán chèng lâng ê bı̄n bô tà phè, chhin-chhiūⁿ kiàⁿ tò-chiò Chú ê êng-kng, lóng piàn-hoà choè I ê siōng, tùi êng-kng kàu êng-kng, chhin-chhiūⁿ tùi Chú, chiū-sı̄ Sı̂n, án-ni.” (II Ko-lı̂m-to 3:18). Lán jú ū hūn tı̄ I ê siōng, kàu lō͘-bé I nā hián-hiān, lán chiū chhin-chhiūⁿ I. Sím-mı̍h sı̄ chiah oē tit-tio̍h chiâⁿ-sèng? Tı̄ Siōng-tè ê kè-e̍k, sı̄ lán hoán-hoé sı̀n Chú hit-sı̂; nā sı̄ lâng ê keng-giām, sı̄ tı̄ í-āu. Goá bô siong-sı̀n Siōng-tè ài I ê kiáⁿ-jı̂ tı̄ khòng-iá phiau-liû choē-choē nı̂. I goân-pún ài in tı̄ hoán-hoé ê sı̂ chiū oân-choân hâng-ho̍k, koh hō͘ Sèng Sı̂n chhiong-moá ê seng-oa̍h, í-āu bô koh ū tūi-lo̍h. Khó-sioh, chin chió lâng choè oē kàu; kiat-kó, in tek-khak tio̍h ài keng-kè tē-jı̄ pái ê toā choán-ki, chiū-sı̄ tùi sit-pāi, sit-bāng, lâi koat-sim beh hâng-ho̍k Siōng-tè , oân-choân ūi I lâi oa̍h hit-sı̂. Chiâⁿ-sèng ê sūn-sū ū 3 hāng, chiū-sı̄: 1. Hun-pia̍t. 2. Hōng-hiàn. 3. Chhiong-moá. Thâu nn̄g-hāng sı̄ lâng só͘ tio̍h choè ê, tē 3 hāng chiah sı̄ Siōng-tè ê tāi-chı̀. Hun-pia̍t sı̄ siau-ke̍k--ê, hōng-hiàn sı̄ chek-ke̍k--ê, chit nn̄g hāng lóng sı̄ lâng eng-kai tio̍h choè ê, tng lí choè bêng-pe̍k lí tio̍h choè ê hit pō͘-hūn liáu-āu, Siōng-tè chiū oē choè I hit pō͘-hūn lâi chhiong-moá lí. Ū chin-choē lâng it-tı̍t tui-kiû, thèng-hāu beh hō͘ Sèng Sı̂n chhiong-moá, kiat-kó lóng bô hāu-kó. Che chiū-sı̄ in bô chı̄n-la̍t khı̀ choè Siōng-tè só͘ hoan-hù in tio̍h choè ê hun-pia̍t kap hōng-hiàn. In-ūi tē 3 hāng sı̄ tè-tiâu chêng 2 hāng lâi--ê. 1. Hun-pia̍t tio̍h ài thiat-té. Siōng-tè ài lán oân-choân lı̄-khui ta̍k-hāng ê choē, lı̄-khui sè-kan kap i ê bê-he̍k, lı̄-khui oē hō͘ Sèng Sı̂n iu-būn kap sún-hāi lán sio̍k-lêng khùi-la̍t ê mı̍h. Lán iā boē-thang phiàn I, in-ūi I chai lán sı̍t-chāi ū ı̀-sù beh chiâⁿ-sèng á-bô? 2. Lán tek-khak tio̍h chiong ka-kı̄ ê oa̍h-miā hōng-hiàn hō͘ Siōng-tè . Hun-pia̍t nā bô choè kàu hōng-hiàn, chiū bô oân-choân. Lán tio̍h chiong chū-ngó͘ ê oa̍h-miā kap só͘ ū hō͘ Chú bô hoaⁿ-hí ê tāi-chı̀ hun-khui, chiah oē-thang kui I choè-sèng. Só͘-í hōng-hiàn ê ı̀-gı̄ chiū-sı̄ chiong ka-kı̄ hun-pia̍t chhut-lâi hō͘ Siōng-tè ēng. Lán tio̍h chiâⁿ-choè sèng-kiat, hun-pia̍t chhut-lâi choè Siōng-tè sèng-kiat ê lō͘-ēng. Chit khoán ê hōng-hiàn tio̍h hō͘ i chiâⁿ-choè lán sı̍t-sı̍t chāi-chāi ê keng-giām. Taⁿ lí nā khak-sı̍t, chheng-chhó, í-keng ū choè kàu chit nn̄g hāng, iā tı̄ Siōng-tè ê bı̄n-chêng thèng-hāu, hō͘ I ê Sèng Sı̂n kàm-chhat lí, í-āu bô su-iàu goā-koan ê hián-hiān choè chèng-kù, chí-ū tan-sûn sı̀n-khò I ê Oē, chhim-sı̀n Siōng-tè í-keng oân-sêng i ê kang-chok. Sū-sı̍t, Sı̀n-sim, Kám-kak. Chhian-bān m̄-thang hō͘ Mô͘-kúi phiàn lí, tı̀-kàu sit-khı̀ só͘ tit-tio̍h ê hok-khı̀, in-ūi i siông-siông ài lí koh thèng-hāu pa̍t-hāng chhiau-chū-jiân ê hián-hiān á-sı̄ kám-kak. Lí nā siong-sı̀n, lí chiū beh chai-iáⁿ Sèng Sı̂n ê hoaⁿ-hí kap an-ùi. Siōng-tè tùi chiâⁿ-sèng só͘ tiāⁿ-tio̍h ê chhù-sū kap kiù-un sı̄ saⁿ-tâng ê; tāi-seng sı̄ sū-sı̍t, koh lâi sı̄ sı̀n-sim, tē 3 sı̄ kám-kak. Sat-tàn sı̂-siông chiong Siōng-tè chhù-sū tian-tò, beh hō͘ lí tāi-seng khoàⁿ ū kám-kak á-bô? Siat-sú lí m̄-sı̀n, lí thái-thó oē kám-kak? Siat-sú nā bô sū-sı̍t beh cháiⁿ-iūⁿ hō͘ li thang sı̀n? Ū kúi-hāng sū-sı̍t: “Lán nā jı̄n lán ê choē, I sı̄ chin-sı̍t kong-gı̄, beh sià-bián lán ê choē, soé-tû lán lóng-chóng ê put-gı̄.” (I Iok-hān 1:9). Tı̄ chia ê tiâu-kiāⁿ, chiū-sı̄ ài lán jı̄n-choē, siat-sú lí nā í-keng jı̄n-choē, siáⁿ-sū iáu-kú teh giâu-gı̂ I bô sià-bián lí ê choē? “To̍k-to̍k lán nā kiâⁿ tı̄ kng-bêng, chhin-chhiūⁿ I tiàm tı̄ kng-bêng, chiū lán saⁿ-kap kau-poê, iā I ê Kiáⁿ Iâ-so͘ ê huih soé-tû lán lóng-chóng ê choē.” (I Iok-hān 1:7). Tiâu-kiāⁿ chiū-sı̄ ài lán tio̍h kiâⁿ tı̄ kng-bêng. Hit ê kiat-kó sı̄ “I ê kiáⁿ Iâ-so͘ ê huih soé-tû lán lóng-chóng ê choē.” Lí kiám-chhái beh kóng, Goá bô kám-kak tio̍h í-keng chheng-khı̀. Nā m̄-sı̄ lí tāi-seng sı̀n Siōng-tè ê Oē, koh ēng hêng-ûi hián-chhut lí ê sı̀n-sim, lí choa̍t-tùi bô chit khoán ê kám-kak. Chiâⁿ-sèng iā kap che kāng-khoán. Lí eng-kai tio̍h choè ê, chiū-sı̄ “hun-pia̍t chhut-lâi” kap “hōng-hiàn hō͘ Siōng-tè .” Āu-lâi I chiū beh choè-chiâⁿ I ê kang lâi “chhiong-moá lí.” Án-ni, lí chiū beh thé-giām--tio̍h chiâⁿ-sèng, koh ū chiâⁿ-sèng ê seng-oa̍h.