Siōng-tè Só͘ Beh Ēng Ê Lâng 06

Tē 6 Chiuⁿ Iâ-so͘ Choè Chú Ū choē-choē lâng chiap-siū Iâ-so͘ choè i ê Kiù-chú, nā-sı̄ bô hō͘ I choè Chú; chin-choē tit-tio̍h IÂ-so͘ chín-kiù ê lâng , bô sêng-jı̄n I sı̄ chú-lâng . Chú Iâ-so͘ ū choa̍t-tùi koân thang kui-tēng I beh chiap-la̍p ha̍k-seng ê tiâu-kiāⁿ. Án-ni, lí sui-jiân sio̍k tı̄ Iâ-so͘ Ki-tok choè thian-kok ê peh-sı̀ⁿ, iā oē thang m̄ sêng-jı̄n I choè lí ê Chú-cháiⁿ, bô beh hoaⁿ-hí kam-goān ho̍k-chiông I ê bēng-lēng. chiū-sı̄ kóng lí ū tit-kiù, chóng-sı̄ bô beh choè ha̍k-seng. Chiong Siōng-tè choè tē-it “Thiaⁿ pē-bú khah kè-thâu tı̄ thiaⁿ Goá ê, boē kham-tit tı̄ Goá; thiàⁿ kiáⁿ cha-bó͘-kiáⁿ khah kè-thâu tı̄ thiàⁿ Goá ê, boē kham-tit tı̄ Goá.” (Má-thài 10:37). Chò Chú ha̍k-seng ê tiâu-kiāⁿ, tio̍h ài chiong Siōng-tè choè tē-it. Chhiáⁿ mn̄g: Tı̄ lí ê seng-oa̍h tiong, kim-chı̂ⁿ, gû-lo̍k, chhin-lâng , só͘ thiàⁿ ê lâng choè tē-it, á-sı̄ Siōng-tè choè tē-it? Pàng-sak it-chhè ê koân-lı̄ “Án-ni, lín tiong-kan kı̀ⁿ-nā bô pàng-sak it-chhè só͘ ū ê, boē-oē choè Goá ê ha̍k-seng.” (Lō͘-ka 14:33) Lí kiám-chhái beh kóng che choa̍t-tùi choè boē kàu ê, in-ūi goá iáu ū ka-têng, su-iàu chiàu-kò͘, gı̂n-hâng iáu-koh ū chûn-khoán tio̍h ài chhú-lí, cháiⁿ-iūⁿ thang pàng-sak chiah-ê? “Pàng-sak”, tı̄ kái-e̍k ê Sèng-keng sı̄ pàng-sak koân-lı̄. Siōng-tè ài I ê kiáⁿ-jı̂ tùi it-chhè ê sū-bu̍t lóng pàng-sak koân-lı̄ ê thài-tō͘, ı̀-sù chiū-sı̄ kóng, tùi it-chhè ê mı̍h, pàng-sak it-chhè ê chú-tiuⁿ kap iau-kiû ê koân-lı̄. Ta̍k-hāng mı̍h, liân goá ka-kı̄, lóng sı̄ sio̍k tı̄ Siōng-tè . I nā hoaⁿ-hí, chiū chún goá ēng chiah-ê it-chhè ê mı̍h, chóng-sı̄ I choa̍t-tùi ū koân lâi koán-lí chiah-ê mı̍h. Kı̀-jiân jı̄m-bat chit ê sı̄, goá chiū hoaⁿ-hí kam-goān chiong it-chhè kau hō͘ I chhú-lí. Só͘-í tio̍h chiong it-chhè------ka-kı̄, chhin-lâng , châi-tiāu, sı̂-kan, kim-chı̂ⁿ kap chiong-lâi------lóng khǹg tı̄ Siōng-tè chè-toâⁿ ê téng-bı̄n. 1. Goá Pún-sin Siōng-tè só͘ ài--ê m̄-sı̄ lí ê chı̂ⁿ-châi, ho̍k-sāi, sı̄ ài lí pún-sin, “chiū-sı̄ tāi-seng chiong pún-sin hiàn hō͘ Chú” (II Ko-lı̂m-to 8:5). Chı̍t ê chheng-liân lâng tùi i ê ài-jı̂n kiû-hun, i só͘ ài ê m̄-sı̄ ài-jı̂n ê chhù-the̍h, chhân-hn̂g, á-sı̄ kı̂-thaⁿ ê châi-sán, sı̄ ài i pún-lâng . Iâ-so͘ Ki-tok iā án-ni, I só͘ ài ê sı̄ lán ê lêng, hûn, thé, só͘-í lán tio̍h tāi-seng chiong lán pún-sin hiàn hō͘ Chú, khǹg tı̄ Siōng-tè ê chè-toâⁿ téng. 2. Só͘ Thiàⁿ Ê Lâng Chiong pún-sin hiàn hō͘ Chú liáu-āu, koh tio̍h chiong ka-kı̄ choè chhin-ài ê lâng khǹg tı̄ chè-toâⁿ téng. Só͘-í goá chiong só͘ thiàⁿ ê lâng ------goá ê kiáⁿ, cha-bó͘-kiáⁿ, pē-bú toà lâi Chú ê bı̄n-chêng. Siat-sú I ài goá ê gín-á khı̀ goā-kok thoân-tō, á-sı̄ ài goá tio̍h lı̄-khui pē-bú khı̀ thoân-tō, goá lóng sūn-ho̍k. Chiū-sı̄ I chiong goá só͘ thiàⁿ ê lâng chiap khı̀, goá iā bô oàn-thàn, nga̍uh-nga̍uh liām, chí-ū kóng “Goān Lí ê chí-ı̀ tit chiâⁿ.” Ū chı̍t ê hū-jı̂n-lâng mn̄g Kó͘ Iok-hān Phok-sū (lâi Tiong-kok thoân-tō, úi-tāi ê Soan-kàu-su, Dr. Jonathan Goforth): Siáⁿ-sū goá sı̂-siông ut-chut bô khoài-lo̍k? Kó͘ Phok-sū chiū mn̄g i: Lí ū oân-choân hiàn hō͘ Chú mah? Hū-jı̂n-lâng ı̀n kóng: Chiàu goá só͘ chai lóng ū hōng-hiàn. Kó͘ Phok-sū koh mn̄g i, Lí ū goān-ı̀ hō͘ lí ê cha-bó͘-kiáⁿ khı̀ kàu Tiong-kok thoân-tō mah? Hū-jı̂n-lâng m̄-khéng. Kó͘ Phok-sū kóng: Nā-sı̄ lí kā goá kóng, lí ū lóng hōng-hiàn hō͘ Chú, iáu-kú m̄-kam chiong lí ê kiáⁿ-jı̂ hiàn hō͘ Chú, lí thái-thó oē tit-tio̍h Siōng-tè ê pêng-an kap chiok-hok? Lí kā Siōng-tè kóng, Lí thang tit-tio̍h goá ê chhù, goá ê chı̂ⁿ-châi, goá pún-sin, nā-sı̄ goá ê cha-bó͘-kiáⁿ, Lí chiū chhian-bān m̄-thang kā goá kha̍p--tio̍h. Hū-jı̂n-lâng ah, lí chit khoán ū hān-tō͘ ê hōng-hiàn, cháiⁿ-iūⁿ káⁿ kóng sı̄ oân-choân ê hōng-hiàn? 3. Châi-tiāu Siōng-tè siúⁿ-sù lán choē-choē châi-tiāu, m̄-sı̄ beh hō͘ lán ka-kı̄ ēng. Chiah ê châi-tiāu lóng tio̍h ūi I lâi ēng. Lán ū sím-mı̍h koân thang chū-su lâi ēng? Lán koh-khah m̄-thang chiong lán ê châi-tiāu choè sè-sio̍k ê lō͘-ēng. Lí kiám-chhái ū kháu-châi, ián-soat, piān-lūn ê châi-tiāu. Būn-toê sı̄ lí cháiⁿ-iūⁿ teh ēng i. Sı̄ ūi-tio̍h Siōng-tè teh ēng á-sı̄ ūi-tio̍h gû-lo̍k teh ēng? Lí kiám-chhái ū siá-chok ê châi-tiāu, chóng-sı̄ lí ūi-tio̍h chı̄-chūi teh siá, sè-kan á-sı̄ Siōng-tè ? Sı̄ ūi-tio̍h chı̂ⁿ á-sı̄ Siōng-tè ê kok teh tù-chok? Kiám-chhái lí ū thàn-chı̂ⁿ ê châi-tiāu, chóng-sı̄ lí tio̍h kı̀-tit, sı̄ Siōng-tè hō͘ lí ū ki-hoē tit châi-sán. Án-ni, lí ūi-tio̍h chı̄-chūi teh thàn-chı̂ⁿ, ka-kı̄ á-sı̄ Siōng-tè ? Á-sı̄ lí ū chhiùⁿ-koa ê châi-tiāu, sı̄ Siōng-tè hō͘ lí hó ê siaⁿ-im. Iâ-so͘ Ki-tok oē thang ēng lí chhiùⁿ-koa ê châi-tiāu thoân I ê tō-lí hō͘ tio̍h-boâ taⁿ tāng-tàⁿ, hoān-choē ê lêng-hûn mah? 4. Sı̂-kan “Tio̍h pó-sioh kong-im.” Che chek-jı̄m ū joā toā ah! Lán cháiⁿ-iūⁿ teh ēng lán ê sı̂-kan, te̍k-pia̍t tı̄ ū êng ê sı̂ teh choè sím-mı̍h? Ūi-tio̍h Siōng-tè teh ēng, á-sı̄ choè ka-kı̄ tui-kiû lı̄-ek ê lō͘-ēng? Lán ūi-tio̍h tiàm tı̄ sè-kan ê ta̍k-hāng sū lóng ū sı̂-kan------chia̍h-pn̄g, hioh-khùn, boé-mı̍h, kóng-oē, khoàⁿ pò-choá, chhē-lâng , thit-thô, kang-chok------nā-sı̄ bô sı̂-kan hō͘ Siōng-tè ēng. Lán ê seng-oa̍h ū chhin-chhiūⁿ chhut-goā lâng , kià-kha ê lâng -kheh? Á-sı̄ kap sè-kan ê lâng bô hun-pia̍t? Goān lán ta̍k sı̂-khek lóng ūi-tio̍h Iâ-so͘ lâi oa̍h. 5. Kim-chı̂ⁿ M̄-sı̄ cha̍p-hūn chı̍t, sı̄ só͘-ū ê chı̂ⁿ lóng sio̍k Siōng-tè , in-ūi lán it-chhè só͘ ū ê lóng sio̍k tı̄ I, lán sı̄ I ê koán-ke nā-tiāⁿ, só͘-í lán ū gı̄-bū tio̍h soè-jı̄ ēng chı̂ⁿ. M̄-thang ūi-tio̍h chhia-chhí-phín, bô pit-iàu ê mı̍h lâi ēng, tio̍h ēng tı̄ thoân-tō, Hok-im thoân-piàn choân sè-kan lâi ēng. Lán ēng chı̂ⁿ sı̄ boán-chiok su-iok á-sı̄ ēng tı̄ Siōng-tè ê kang-chok? Lán ê chı̂ⁿ chûn tı̄ gı̂n-hâng sı̄ í-āu beh hō͘ kiáⁿ-sun ēng, á-sı̄ beh hō͘ Siōng-tè ê kang-lâng choè chín-kiù lêng-hûn ê lō͘-ēng? Būn-toê m̄-sı̄ goá ê chı̂ⁿ tio̍h hiàn joā-choē hō͘ Siōng-tè , sı̄ Siōng-tè ê chı̂ⁿ, goá lâu joā-choē beh ka-kı̄ ēng? Lán kı̀-jiân choè I ê koán-ke, ū chı̍t jı̍t lán tio̍h tı̄ I ê bı̄n-chêng siông-sè pò-kò. 6. Goá M̄-Chai Ê Chiong-lâi Goá só͘ ū ê kè-e̍k, goān-bōng, àn-sǹg kap só͘ ài choè ê sū lóng tio̍h khǹg tı̄ Siōng-tè ê chè-toâⁿ. I ê chí-ı̀ tio̍h chiâⁿ-choè goá ê ı̀-sù. I ê kè-e̍k iā sı̄ goá ê. Goá ê chiong-lâi tio̍h kau-tāi tı̄ I ê chhiú. I ài goá khı̀ tó-ūi, goá tio̍h khı̀; goá m̄ eng-kai ū ka-kı̄ ê kè-e̍k. Taⁿ, lí ū chiong lí ê it-chhè lóng khǹg tı̄ chè-toâⁿ mah? Hoaⁿ-hí beh ta̍k-hāng hâng-ho̍k, hōng-hiàn, hun-pia̍t choè sèng mah? Goān lí ū chit ê khai-sí. Tio̍h khak-sı̍t chiong lí ê oa̍h-miā kap seng-oa̍h oân-oân choân-choân hâng-ho̍k tı̄ Siōng-tè , m̄-thang ū lâu sím-mı̍h khí-lâi. Chiong lí ê ı̀-sù kau hō͘ I, chiap-la̍p I ê chí-ı̀. Tı̄ sè-kan bô koh ū pa̍t-hāng oē thang thoè lí hâng-ho̍k kap hōng-hiàn. Che ná chhin chhiūⁿ chı̍t-tiuⁿ bô siá-miâ, bô siá tiâu-kiāⁿ ê khè-iok-su, chhiam lí ê miâ koh khàm-ı̀n, kau hō͘ Siōng-tè , chhiáⁿ I siá hit ê tiâu-kiāⁿ kap chı̍t-pō͘, lí nā kiâⁿ kàu hia, I chiū beh kā lí kóng-bêng ē-bı̄n hit-pō͘. Che iā sı̄ kóng, lí tio̍h chiàu chı̍t-tiuⁿ hong-ba̍t ê bēng-lēng-su khı̀ choè tāi-chı̀. Beh kàu tó-ūi, lí m̄-chai; sím-mı̍h sı̂ beh khı̀, lí boē thang chhap-chhùi. Siáⁿ-sū beh khı̀? Che m̄-sı̄ lí tio̍h chhap ê sū. Beh cháiⁿ-iūⁿ khı̀? Lí m̄-bián hoân-ló. Lí kan-ta tùi I chiap-la̍p hit-tiuⁿ hong-ba̍t ê bēng-lēng-su chiū hó, che sı̄ lí chı̍t-sı̀-lâng ê siat-kè-tô͘, lí ta̍k-pái tio̍h chiàu I ê chí-sı̄ khui khí-lâi tha̍k, lâi khoàⁿ. Che chiū-sı̄ éng-oán tùi Siōng-tè kóng sı̄, tùi ka-kı̄ éng-oán lóng kóng m̄ sı̄. Án-ni choè, chiū-sı̄ choè-āu ê koat-tēng, tı̄ kui-sı̀-lâng lóng ū hāu. Chú ah! Lí ài goá choè sím-mı̍h? Lí ài goá khı̀ sím-mı̍h só͘-chāi? I chí-sı̄, lí chiū sūn-thàn. Thâu chı̍t pái, lí kóng hit kù sı̄ chiū-sı̄ úi-tāi, êng-kng koh sı̄ choè-āu--ê, án-ni būn-toê chiū éng-oán kái-koat lah. Í-āu kiâⁿ thiⁿ-lō͘ ê sı̂, kè-sio̍k tùi I kóng sı̄, lâi hâng-ho̍k I ê chí-ı̀. Kı̀-jiân chin-chiàⁿ pàng-sak só͘ ū ê koân-lı̄, goá chiū pàng-sak ta̍k-hāng, tio̍h pàng-sak goá pún-sin kap goá só͘-ū ê, in-ūi chiah ê m̄ sı̄ goá ê, sı̄ Siōng-tè ê. Só͘-í I choa̍t-tùi ū koân, chiàu I só͘ kah-ı̀ ê lâi chhú-lí. I sím-mı̍h sı̂ kiò goá, tio̍h sı̍t-chāi khı̀-sak goá só͘ pàng-sak ê, goá liân nga̍uh-nga̍uh liām, oàn-thàn iā m̄-thang. Goá chı̍t-ē pàng-sak koân-lı̄, Siōng-tè chiū beh chhı̀-giām, khoàⁿ goá khı̀-koân sı̄ ū-iáⁿ á-bô? A-pek-la̍h-hán ū tú-tio̍h che chhı̀-giām. I chı̍t-ē chai Í-sat sı̄ sio̍k Siōng-tè ê, i chiū khı̀-koân. Siōng-tè iau-kiû i kàu Mô͘-lı̄-a soaⁿ-téng hiàn-chè, A-pek-la̍h-hán lóng bô lún-neh the-sı̂. Án-ni chèng-bêng i ê khı̀-koân sı̄ chin-sı̍t--ê. Khı̀-koân nā chin-sı̍t, chhı̀-giām kàu ê sı̂, chiū lóng bô m̄-kam; khı̀-koân nā bô sı̍t-chāi, chhı̀-giām kàu ê sı̂, chiū kan-khó͘, beh chiong í-keng khı̀-koân ê mı̍h-kiāⁿ lóng siu tò-lâi. Choè Chú ê ha̍k-seng tio̍h pàng-sak it-chhè ê koân-lı̄. Hō͘ Iâ-so͘ Oân-choân Choè Chú Tio̍h hō͘ Iâ-so͘ oân-choân choè Chú, nā bô, I chiū oân-choân m̄-sı̄ choè Chú. Chı̍t ê lâng boē-oē kāng-sı̂ tı̄ nn̄g keng kong-si chia̍h thâu-lō͘. Chı̍t ê lô͘-po̍k iā boē-oē siāng-sı̂ ho̍k-sāi nn̄g ê chú-lâng . Tio̍h soè-jı̄, bián-tit lí chiàu só͘ siūⁿ, chiong tē-jı̄ ūi hō͘ Chú chiū hó. M̄-kú kàu ū chı̍t jı̍t lí chiah hoat-hiān tio̍h, I kun-pún chiū bô tı̄ hia, hit-sı̂ chiū siuⁿ bān lah. In-ūi I tio̍h oân-choân choè Chú, nā bô, I chiū oân-choân m̄-sı̄ choè lí ê Chú. In-ūi “Bô lâng oē ho̍k-sāi nn̄g ê chú-lâng .” Chı̍t ê siàu-liân-lâng beh tè Iâ-so͘, chiū kā I kóng: “Hō͘ goá tāi-seng......” Choa̍t-tùi boē ēng tit, m̄-sı̄ goá tāi-seng, sı̄ Siōng-tè tāi-seng! Goá só͘ ài ê, lóng sı̄ tē-jı̄; choa̍t-tùi boē-thang tē-it tāi-seng. “To̍k-to̍k tāi-seng kiû I ê kok kap I ê gı̄, chiū chiah ê mı̍h lóng beh soà hō͘ lín.” “Lí thiàⁿ Goá khah-iâⁿ chiah-ê mı̍h?” Goá oē siūⁿ tio̍h Iâ-so͘ ēng chńg-thâu-á chí chûn-á, hı̂-bāng-á, pa̍t ê ha̍k-seng, choè-āu chí Pí-tek ê ka-têng kap só͘ thiàⁿ ê lâng . Pı̀-tek, sím-mı̍h sı̄ lí ê tē-it? Sı̄ Goá mah? Lí thiàⁿ Goá khah-iâⁿ chiah-ê mah? Che iā sı̄ hiān-chāi I teh beh mn̄g lán ê būn-toê. Lán kiám m̄ eng-kai hōng-hiàn só͘-ū ê, chún I choè Ông, choè Chú mah?