Siōng-tè Só͘ Beh Ēng Ê Lâng 07

Tē 7 Chiuⁿ Choè Tiōng-iàu Ê Kang-chok Ū chı̍t-pái, goá khiā tı̄ chı̍t ê teh beh sí ê hū-jı̂n-lâng ê bı̂n-chhn̂g piⁿ, ūi-tio̍h i choè lı̂m-chiong ê kı̂-tó. Iáu bē kı̂-tó ê sı̂ goá ū mn̄g i: Kó͘ thài-thài, lí ū pı̄-pān piān thang khı̀ boē? Lí ū sím-mı̍h ǹg-bāng á-bô? I ê ı̀n-tap sı̄: Bô, sím-mı̍h to bô. I sı̄ chı̍t ê hoē-iú, chóng-sı̄ iáu-bē hoán-hoé tit-kiù. Goá chı̄n só͘ oē, chin kán-tan chiong kı̂-biāu ê kiù-un kóng hō͘ i thiaⁿ, koh thoè i kı̂-tó, kı̂-tó liáu-āu, goá chiū soè-siaⁿ chhiùⁿ hit siú Sèng-si, Iâ-so͘ goá lâi chiū Lí. Choè-āu i ka-kı̄ iā tùi sím-toé tè goá gı̂m, Iâ-so͘ goá lâi chiū Lí. Kiat-kó i chiū moá-moá khak-sı̀n, an-jiân lı̄-khui sè-kan. Chit-ê hū-jı̂n-lâng só͘ su-iàu ê, sı̄ hoán-hoé tit-kiù, in-ūi Siōng-tè ê Oē chheng-chhó khak-sı̍t tùi lán kóng: “Goá sı̍t-chāi kā lín kóng, Lín nā bô oa̍t-tńg lâi chiâⁿ-choè chhin-chhiūⁿ soè-hàn gín-ná ê, koat-toàn boē jı̍p thian-kok” (Má-thài 18:3). Chiap-la̍p bô têng-thâu-siⁿ ê lâng jı̍p kàu-hoē choè hoē-iú ê bo̍k-su, goá sı̍t-chāi ūi in ê chit-chek kám-kak kiaⁿ-hiâⁿ, nā siūⁿ tio̍h in, chiū boē bián-tit toā-siaⁿ thó͘-khùi. Tùi hit jı̍t khí, goá chiū koat-sim, beh pàng-sak it-chhè ê tāi-chı̀, choan-sim lâi choè chı̍t-hāng choè tiōng-iàu ê kang-chok, chiū-sı̄ pang-chān lâng khak-sı̍t sı̀n Iâ-so͘ thang jı̍p thian-kok. Kiù lâng Lêng-hûn Ê Kang-chok Goá ná tha̍k Sèng-keng ná khak-sı̀n, lán choè tiōng-iàu ê kang-chok, chiū-sı̄ chín-kiù sit-bê ê Lêng-hûn, sı̀n-khò Iâ-so͘ Ki-tok. Tāi-seng, tùi Siōng-tè chit-bı̄n lâi khoàⁿ, lán chiū chai “Ki-tok Iâ-so͘ lı̂m-kàu sè-kan, beh kiù ū choē ê lâng ” (I Thê-mô͘-thài 1:15). “In-ūi Jı̂n-chú kàu, sı̄ beh chhē sit-lo̍h ê, lâi kiù i” (Lō͘-ka 19:10). Án-ni, Ki-tok kàng-sè choè-toā ê bo̍k-tek chiū-sı̄ beh chhē koh chín-kiù sit-lo̍h ê lâng . I m̄-sı̄ beh choè siā-hoē kang-chok á-sı̄ beh kái-liông siā-hoē, I sı̄ beh hō͘ lâng tit-kiù kap têng-thâu-siⁿ. Koh tùi lâng chit-bı̄n lâi khoàⁿ: “Lâi khui in ê ba̍k-chiu, hō͘ in tùi àm oa̍t-tńg kàu tı̄ kng; lı̄-khui Sat-tàn ê koân-sè, lâi kui-ǹg Siōng-tè ” (Sù-tô͘ Hēng-toān 26:18). Lâng tiàm tı̄ o͘-àm, lán tio̍h khui in ê ba̍k-chiu, hō͘ in tùi àm oa̍t-tńg kàu tı̄ kng. In toà tı̄ Sat-tàn koân-sè ê ē-bı̄n, lán tio̍h chín-kiù tháu-pàng in lâi kui-ǹg Siōng-tè . Án-ni, che kang-chok ê bo̍k-tek tı̄ Sèng-keng ū chheng-chhó kı̀-chài kóng: “Siōng-tè khí-thâu cháiⁿ-iūⁿ koàn-kò͘ goā-pang lâng , tùi in tiong-kan chhú peh-sı̀ⁿ lâi kui tı̄ I ê miâ” (Sù-tô͘ Hēng-toān 15:14). Che iā sı̄ Siōng-tè tı̄ kè-khı̀ 1900 goā nı̂ í-lâi teh choè ê kang, iā sı̄ kin-á-jı̍t Sèng Sı̂n só͘ teh choè ê kang. I tùi thong sè-kan ta̍k cho̍k, ta̍k khiuⁿ-kháu, lâi tiàu kui toā-tı̄n ê lâng , teh chū-chı̍p Ki-tok ê sin-thé------chiū-sı̄ I ê kàu-hoē. Chóng-sı̄ Siōng-tè bat chheng-chhó kóng-bêng I ê chí-ı̀, chiū-sı̄ ài I ê lô͘-po̍k lóng kiat ké-chí. “M̄ sı̄ lín kéng Goá, sı̄ Goá kéng lín, koh siat-lı̍p lín, hō͘ lín khı̀ kiat ké-chí” (Iok-hān 15:16). Só͘-í ū sı̂ lán khı̀ choè iā-chéng ê; ū sı̂ lán choè siu-koah ê. Sat-tàn Ê Bê-he̍k Kı̀-jiân chín-kiù lâng ê Lêng-hûn sı̄ kàu-hoē choè tiōng-iàu ê kang-chok, Sat-tàn chiū chı̄n-la̍t phò-hoāi; i beh bê-he̍k lán tı̀-ı̀ boán-chiok pa̍t-hāng sū. Tùi án-ni ū chin-choē lâng hiàn-sin tı̄ siā-hoē ho̍k-bū, chhin-chhiūⁿ kàu-io̍k, chû-siān kap kái-liông ê kang-chok. Chóng-sı̄ siā-hoē ho̍k-bū m̄-sı̄ kiù-un; kái-liông m̄-sı̄ têng-thâu-siⁿ. Chı̍t ê sı̄ ūi-tio̍h kim-sè, lēng-goā chı̍t ê sı̄ ūi-tio̍h éng-oa̍h. Lán beh chai-iáⁿ chı̍t-keng kàu-hoē sio̍k-lêng ê thêng-tō͘, lán tek-khak tio̍h khoàⁿ i tùi kiù lâng Lêng-hûn kang-chok ê thài-tō͘ lâi toàn-tēng. Kàu-hoē tı̄ múi-nı̂ ê hô-hoē ū pò-kò, chiong choē-choē chı̂ⁿ ēng tı̄ chû-siān sū-gia̍p, nā-sı̄ lóng bô kóng-khí ū koan-hē ēng tı̄ kiù lâng Lêng-hûn ê kang-chok, án-ni lán chiū chai-iáⁿ chit keng kàu-hoē sio̍k-lêng ê thêng-tō͘ sı̄ chin kē. Sı̍t-chāi ū lêng-sèng ê kàu-hoē, it-tēng sı̄ chù-tiōng kiù Lêng-hûn ê kang-chok. Án-ni lán thang chai, chín-kiù lâng ê Lêng-hûn sı̄ lán choè tiōng-iàu ê kang-chok, choè oē thang êng-kng Siōng-tè ê chit-bū. Lán ū hūn tı̄ Siōng-tè choè-toā ê sū-gia̍p, che sı̄ joā-nih kı̂-biāu ah! Lán tio̍h hoê-ho̍k khí-chho͘ lán tùi hiah-ê tı̂m-lûn Lêng-hûn ê thiàⁿ-sim. Lán chá-chêng ê hū-tam taⁿ tı̄ tó-lo̍h? Lán í-chêng chin khún-chhiat ūi-tio̍h beh tı̂m-lûn ê Lêng-hûn kı̂-tó, chiah-ê kám-kak lán kiám lóng boē kı̀-tit mah? Beh lı̂m-kàu tı̄ bı̄-sı̀n-chiá ê toā koh thang kiaⁿ ê chai-ē, kiám bô kám-tōng lán ê sim mah? Sat-tàn kiám ū bê-he̍k lán tı̀-kàu boē-kı̀-tit lán tē-it iàu-kín ê kang-chok mah? Nā-sı̄ án-ni, goān Siōng-tè toā-toā lı̂n-bín lán, khui lán sio̍k-lêng ê ba̍k-chiu, hō͘ lán oē thang kín-kín lı̄-khui Sat-tàn só͘ bê-he̍k lán kiâⁿ ê lō͘-tô͘, koh chı̍t pái oa̍t tò-tńg kàu lán choè tiōng-iàu ê kang-chok------chiū-sı̄ chín-kiù lâng ê Lêng-hûn lâi kui tı̄ Chú Iâ-so͘ Ki-tok.