Siōng-tè Só͘ Beh Ēng Ê Lâng 08

Tē 8 Chiuⁿ Oa̍h-miā Ê Hōng-hiàn Siōng-tè tùi ta̍k-lâng lóng ū chı̍t ê kè-e̍k; Iâ-lı̄-bí iáu-bē chhut-sı̀ ê sı̂, I chiū ūi-tio̍h i tiāⁿ-tio̍h kè-e̍k; “Goá bē chhòng-chō lí tı̄ pak-tó͘-lāi ê tāi-seng, Goá bat lí; lí bē chhut-thai ê tāi-seng, Goá hun-pia̍t lí choè-sèng; siat-lı̍p lí choè lia̍t-kok ê sian-ti” (Iâ-lı̄-bí 1:5). Siōng-tè ūi-tio̍h lán ê seng-oa̍h iā lóng ū bô kāng ê kè-e̍k, nā bô chhē-tio̍h Siōng-tè kā lán tiāⁿ-tio̍h ê kè-e̍k, lán chiū choa̍t-tùi boē thang tit-tio̍h choè-toā ê hoaⁿ-hí kap khoài-lo̍k. Lí bat kám-kak tio̍h bô khoài-lo̍k, choa̍t-bāng, iu-chhiû? Che kiám-chhái sı̄ in-ūi lí kū-choa̍t i ê kè-e̍k, kò͘-chip ka-kı̄ ê ı̀-sù ê iân-kò͘. Phah-sǹg lí beh kóng, Goá thái-thó oē chai-iáⁿ Siōng-tè tùi goá ê kè-e̍k? Goá boē thang kā lí ı̀n-tap, lí ka-kı̄ tio̍h koat-tēng che sū. Chóng-sı̄ tùi Siōng-tè ê pang-chān, oē thang hō͘ lí iông-ı̄ⁿ koat-tēng. Choè Chú Iâ-so͘ ê ha̍k-seng, lí chí-ū chı̍t ê bo̍k-phiau, chiū-sı̄ beh hō͘ Siōng-tè ê kok lı̂m-kàu. Só͘-í choè Ki-tok-tô͘, koan-sim Siōng-tè ê kok, che sı̄ lí seng-oa̍h tiong choè tiōng-iàu ê bo̍k-phiau. Siōng-tè ê kang-chok chiah sı̄ tē-it tiōng-iàu, kı̂-thaⁿ lóng sı̄ chhù-iàu ê. chú Iâ-so͘ m̄-sı̄ chiong che kang-chok kau-tāi bo̍k-su, thoân-tō nā-tiāⁿ, chóng-sı̄ I ū kau-tāi ta̍k ê Ki-tok-tô͘; só͘-í múi chı̍t ê sı̀n-tô͘ lóng ū i ka-kı̄ ê pún-hūn; Siōng-tè sı̀n-jı̄m lí kap goá, I sı̀n-jı̄m lán. Nā-sı̄ án-ni, lán tio̍h chiàu ē-bı̄n ê bo̍k-phiau, ūi-tio̍h Siōng-tè ê kok lâi ho̍k-sāi. Ho̍k-sāi Sı̄ Choè-ko Ê Tōng-ki Ho̍k-sāi Siōng-tè m̄-sı̄ ūi-tio̍h kim-chı̂ⁿ; lâng nā chí-ū kim-chı̂ⁿ lâi chhek-to̍k jı̂n-seng ê sêng-chiū, i chiū bô bêng-pe̍k sêng-chiū sı̍t-chāi ê ı̀-gı̄. Lán tek-khak tio̍h ū khah koân ê phiau-chún! Chhiáⁿ lán thiaⁿ Chú pún-sin ê kéng-kò, “Tio̍h kín-sı̄n, iok-sok ka-kı̄, lóng bô tham-sim; in-ūi lâng ê oa̍h-miā put-chāi i só͘ chek-chū ê hong-sēng” (Lō͘-ka 12:15). Choē-choē lâng kè-e̍k, beh tı̄ seng-lí kài lâi oa̍h-miā, án-ni oē khah ū lı̄-ek tı̄ thian-kok. Chit khoán khoàⁿ-hoat, goá m̄-káⁿ phoe-phêng; goá só͘ iau-kiû ê chiū-sı̄ lí tio̍h chim-chiok, lâi kòng-hiàn ka-kı̄ ê seng-oa̍h ho̍k-sāi Chú. Oāⁿ oē lâi kóng, lí nā choè seng-lí lâng , chiū oē khah kòng-hiàn tı̄ Siōng-tè ê kok, án-ni lí chiū tio̍h choè seng-lí lâng . Á-sı̄ lí nā choè lu̍t-su, i-seng, hō͘-sū, oē hō͘ lí khah kòng-hiàn tı̄ Chú, án-ni, lí chiū khı̀ choè chiah-ê sū-gia̍p. Siōng-tè ê kang-chok, su-iàu kim-chı̂ⁿ chiah oē chı̀n-hêng, I ài lí ū-hāu tı̄ hōng-hiàn kim-chı̂ⁿ ê sū. Chóng-sı̄ lâng nā chiong thàn-chı̂ⁿ choè i ê bo̍k-tek, chek-chū kim-chı̂ⁿ choè chū-su ê lō͘-ēng, bô beh ūi-tio̍h Siōng-tè ê êng-kng lâi ēng kim-chı̂ⁿ, i chiū ū chai-ē. Tio̍h soè-jı̄, kiâⁿ-liáu Siōng-tè teh iau-kiû lí hōng-hiàn oa̍h-miā, lí beh hiàn kim-chı̂ⁿ. Kiám-chhái lí iáu-kú siàu-liân, tı̄ lí ê bı̄n-chêng ū ke̍k toā ê ki-hoē kap chek-jı̄m teh thèng-hāu. Lí tú-tú teh chún-pı̄ beh soán-te̍k it-seng ê kang-chok. Lí tùi sū-gia̍p sêng-kong ê khoàⁿ-hoat chin iàu-kín, in-ūi lí chí-ū chı̍t tiâu oa̍h-miā thang hiàn. Chóng-sı̄ chiân-tô͘ o͘-àm koh ū chin-choē tāi-chı̀ oh koat-tēng, nā-sı̄ tı̄ chit khoán chı̀n-thè lióng-lân ê chêng-hêng, kiám bô chí-sı̄ kap pang-chān? Chiàu goá khoàⁿ, tı̄ hōng-hiàn oa̍h-miā ê sū, chiong choè-toā su-iàu ê khǹg tı̄ tē-it lâi siūⁿ. Kin-á-jı̍t lán sı̄ su-iàu khah choē seng-lí lâng , á-sı̄ thoân-kàu-chiá? Khah choē lu̍t-su á-sı̄ kok-goā soan-kàu-su? Khah choē i-seng tı̄ pún-toē khoàⁿ pı̄ⁿ, á-sı̄ tio̍h khah choē khı̀ Hui-chiu, Ìn-tō͘ choè-kang? Lán lóng oē tông-ı̀, tı̄ seng-lí kài, jı̂n-châi bô chhin-chhiūⁿ pa̍t hong-bı̄n hiah-nih khoat-hoa̍t; goá ài lí kia̍h-ba̍k khoàⁿ Siōng-tè ê chhân-hn̂g. I teh iau-kiû khah choē ê kang-lâng khı̀ choè-kang, in-ūi tı̄-hia ê su-iàu, pí pa̍t só͘-chāi koh-khah toā. Thoân-tō Sū-gia̍p Thoân-tō sū-gia̍p ê su-iàu ke̍k-toā bô-pí! Chheng-liân-lâng ah, lí ū siūⁿ beh kàu chı̍t ê oē tit-tio̍h ke̍k-toā ê pò-siúⁿ koh chin-chiàⁿ oē thang ho̍k-bū ê só͘-chāi mah? Lí tio̍h khı̀ thoân-tō. In-ūi goá chhim-chai bô pa̍t ê tiàu-bēng pí thoân-tō khah oē tit-tio̍h hoaⁿ-hí kap khoài-lo̍k. goá kàu taⁿ bē bat in-ūi ka-kı̄ soán-tek thoân-tō choè goá chı̍t-sı̀-lâng ê kang-chok lâi hō͘-hoé. Lí siáⁿ-sū m̄ choè thoân Hok-im ê sù-chiá? Sı̄ lí khoàⁿ thoân-tō sū-gia̍p chin ko-siōng chin sı̂n-sèng, lí boē kham-tit choè? Goá ài lí oē kı̀-tit, chiah-ê hō͘ Siōng-tè tiàu lâi choè I ê kang ê lâng , lóng chhin-chhiūⁿ lí goá, sı̄ chı̍t-ê phó͘-thong lâng . Á-sı̄ lí iû-goân ēng kim-chı̂ⁿ choè sêng-kong ê phiau-chún? Thoân-kàu-chiá choa̍t-tùi boē hó-gia̍h. Lí kiám káⁿ kóng Bō͘-te̍k (Bí-kok 19 sè-kí ê pò͘-tō-ka, D. L. Mo͘dy) m̄-bat hoat-châi, só͘-í i boē thang kóng sı̄ sêng-kong. Lí kiám káⁿ kóng Su Pò͘-chin (Eng-kok 19 sè-kí ê hùn-heng-ka, Charles H. Spurgoen) sí ê sı̂ lóng bô poàⁿ hāng, só͘-í sı̄ sit-pāi mah? Sêng-kong choa̍t-tùi m̄-sı̄ ēng kim-chı̂ⁿ oē chhek-to̍k tit; sı̄ ēng kòng-hiàn joā-choē lâi phoàⁿ-toàn. Goā-kok Soan-kàu Sè-kài iáu ū 3 hūn 2 ê lâng m̄-bat Iâ-so͘ Ki-tok. Ta̍k-jı̍t ū chheng-bān lâng m̄-bat thiaⁿ tio̍h Iâ-so͘ ê miâ chiū lı̄-khui sè-kan. Ū 2 ek goā jı̂n-kháu tiàm tı̄ kiò-choè Ou-àm Tāi-lio̍k ê Hui-chiu, toā khiàm-ēng kang-lâng . Ū 4 ek 5 chheng bān jı̂n-kháu, kiò-choè chá kè-chhoā, chá chiú-koáⁿ ê só͘-chāi ê Ìn-tō͘, chhun i loán-jio̍k bô la̍t ê chhiú teh chhē chin Kng; nā-sı̄ bô lâng beh khı̀ pang-chān, tı̀-kàu i pún-sin chin sit-bāng bô koh koan-sim che sū lah. Nā-sı̄ Kiù-chú choè-āu ê bēng-lēng sı̄ “Lín tio̍h khı̀ phó͘ thiⁿ-ē, thoân Hok-im hō͘ bān peh-sı̀ⁿ.” Í-keng kè-liáu 1900 goā nı̂, chóng-sı̄ lán iá bô sūn-thàn che bēng-lēng, oân-sêng che sú-bēng. Chheng-liân-lâng ah! Lí nā ài beh keng-kè ho̍k-bū kap hi-seng ê seng-oa̍h, koh ū kóng boē chı̄n ê hoaⁿ-hí kap khoài-lo̍k, goá ǹg-bāng lí ı̀n hái goá iau-kiû ê siaⁿ, bô-lūn lí ū sím-mı̍h châi-tiāu, un-sù, Chú lóng oē ēng lí. Chheng-liân lú-chú siông-siông ēng goá tio̍h lâu tı̄ chhù-lāi choè the-sı̂. I ê lāu-bú iā kóng, goá ài i lâu tı̄ chhù-lāi kap goá choè-phoāⁿ, goá boē thang lı̄-khui i lâi kū-choa̍t, m̄-khéng hō͘ i khı̀ thoân-tō. Nā-sı̄ kàu i kiat-hun hit jı̍t, lí chiū boē thang koh lâu i tı̄ chhù-lāi lah. Án-ni lí beh cháiⁿ-iūⁿ? Lí chiong i kè hō͘ sè-sio̍k lâng , kàu ū chı̍t jı̍t lí kı̀ⁿ Chú ê bı̄n, goá m̄-chai lí beh cháiⁿ-iūⁿ tùi Chú kóng? “Thiàⁿ pē-bú khah kè-thâu tı̄ thiàⁿ Goá ê, boē kham-tit tı̄ Goá; thiàⁿ kiáⁿ cha-bó͘-kiáⁿ khah kè-thâu tı̄ thiàⁿ Goá ê, boē kham-tit tı̄ Goá” (Má-thài 10:37). Lí nā kam-goān chiap-siū Siōng-tè tùi lí só͘ tiāⁿ-tio̍h ê kè-e̍k, lí tio̍h hiàn-sin ho̍k-sāi I, khı̀ kàu tē-it su-iàu ê só͘-chāi. Chú Iâ-so͘ ūi-tio̍h lán pàng-sak it-chhè, lán kiám bô sím-mı̍h thang hiàn hō͘ I mah? Siōng-tè chí-ū chı̍t ê to̍k-siⁿ Kiáⁿ, iáu-kú hō͘ i choè thoân-kàu-chiá, tùi thiⁿ-téng lâi kàu sè-kan, lán kiám boē thang choè sím-mı̍h lâi pò-tap I mah? I bat kóng, choè ha̍k-seng sı̍t-chāi ê ı̀-gı̄ chiū-sı̄, “lâng nā ài tè Goá tio̍h khoàⁿ-bô ka-kı̄, giâ i ê sı̍p-jı̄-kè, lâi tè Goá. In-ūi kı̀ⁿ-nā ài kiù i ê sı̀ⁿ-miā ê, beh sit-lo̍h i; kı̀ⁿ-nā ūi-tio̍h Goá lâi sit-lo̍h i ê sı̀ⁿ-miā ê, beh tit-tio̍h i. lâng mā tit-tio̍h choân sè-kài, lâi sòng-sit i ê sı̀ⁿ-miā, ū sím-mı̍h lı̄-ek? Á-sı̄ lâng beh chhut sím-mı̍h lâi tùi-oāⁿ i ê sı̀ⁿ-miā?” (Má-thài 16:24~26).