Siōng-tè Só͘ Beh Ēng Ê Lâng 09

Tē 9 Chiuⁿ Khı̀ Pò Lâng Chai “Tı̄ siâⁿ-mn̂g hia ū sı̀ ê thái-ko-ê, in saⁿ-kap kóng, Lán siáⁿ-sū chē tı̄-chia thèng-hāu sí ah? Lán nā kóng, Jı̍p siâⁿ khı̀, siâⁿ-lāi ū ki-hng, lán beh sí tı̄-hia; nā tiāⁿ-tiāⁿ chē tı̄-chia, iā sı̄ tio̍h sí. Lâi lah, lán lâi khı̀ tâu-hâng A-lân ê kun-tūi; in nā lâu lán ê oa̍h-miā, lán chiū oē oa̍h; nā thâi-sí lán, kun-tu iā sı̄ sí. Hông-hun ê sı̂, in khí-lâi, beh khı̀ A-lân lâng ê iâⁿ; í-keng kàu A-lân lâng ê iâⁿ ê piⁿ-kak, khoàⁿ ah, khoàⁿ ah, bô chı̍t-lâng tı̄-hia. In-ūi Chú hō͘ A-lân ê kun-tūi thiaⁿ-kı̀ⁿ chhia ê siaⁿ, bé ê siaⁿ, chiū-sı̄ toā kun-tūi ê siaⁿ......Só͘-í......in khí-lâi......cháu-khı̀ pó sı̀ⁿ-miā. Hiah ê thái-ko-ê kàu iâⁿ......iā chia̍h iā lim; tùi hia the̍h kim gûn kap i-chiûⁿ khı̀ siu-khǹg. Hit-sı̂ in saⁿ-kap kóng, Lán só͘-choè-ê m̄-hó; kin-á-jı̍t sı̄ ū hó siau-sit ê jı̍t iā lán chēng-chēng; nā thèng-hāu kàu thiⁿ kng, lán tio̍h siū-choē, lâi ah, lán tio̍h khı̀ ài bı̂n-ke chai” (II Lia̍t-ông-kı̀ 7:3~9). In-ūi chı̍t sı̂ hióng-siū tio̍h chiah-nih choē hó ê hūn-gia̍h, sim chiū kám-kak, koat-tēng khı̀ pò lâng chai. Án-ni choân-siâⁿ ê lâng chiū lóng tit-kiù. Só͘-í lán choè Ki-tok-tô͘ ê pún-hūn chiū-sı̄ khı̀ pò lâng chai. Khı̀ pò lâng chai, che sı̄ Chú Iâ-so͘ kóng, “Tio̍h khı̀ phó͘ thiⁿ-ē, thoân Hok-im”, hit sı̂ kau-tāi I ê kàu-hoē ê sú-bēng; che iā sı̄ I tùi ta̍k ê Ki-tok-tô͘ ê sim-ı̀. Siat-sú Chú Iâ-so͘ kin-á-jı̍t tı̄ chia, khoàⁿ-tio̍h bē-bat thiaⁿ-kı̀ⁿ I ê miâ ê chheng-chheng bān-bān lâng , iā sı̄ beh chhui-pek lí kap goá khı̀ pò lâng chai. Lán Siáⁿ-sū Tio̍h Khı̀ Pò Lâng Chai? 1. In-ūi lán í-keng tit-tio̍h Chit sı̂ ê thái-ko-ê, í-keng ū tit-tio̍h in só͘-ài--ê, in chá-chêng bat iau-gō, taⁿ hiān-chāi tit-tio̍h chia̍h pá; in chá-chêng sı̄ iu-chhiû, loé-chı̀ koh choa̍t-bāng, taⁿ ū hoaⁿ-hí khoài-lo̍k, koh ū sin ê ǹg-bāng. Só͘-í in kóng, “Lán só͘-choè-ê m̄-hó; kin-á-jı̍t sı̄ ū hó siau-sit ê jı̍t, iā lán chēng-chēng bô chhut-siaⁿ mah?” Hiaⁿ-tı̄ chí-bē! In só͘ tit-tio̍h ê kap lán tùi Iâ-so͘ Ki-tok só͘ tit-tio̍h ê, boē thang saⁿ pí-kàu; in só͘ tit-tio̍h ê put-kò chiām-sı̂, jio̍k-thé ê chín-kiù; lán sı̄ lêng-sèng ê, sı̄ éng-oa̍h ê chín-kiù; in tùi iau-gō, thòng-khó͘ tit-tio̍h kái-kiù, lán sı̄ tùi choē-ok ê koân-sè tit-tio̍h tháu-pàng. Lán ê choē tit-tio̍h sià-bián, lán ê sim hō͘ Chú Iâ-so͘ ê pó-huih soé chheng-khı̀, ū Siōng-tè kap lán saⁿ-kap tı̄-teh, tit-tio̍h I ê hoaⁿ-hí, pêng-an, an-ùi kap sí-āu ê ǹg-bāng, chiong-lâi oē thang koh kap chhin-iú saⁿ-kı̀ⁿ tı̄ thiⁿ-nih; iā kı̂-tiong tē-it toā ê hok-khı̀, chiū-sı̄ tit-tio̍h Iâ-so͘ Ki-tok pún-sin. Lán iu-siong ê sı̂, I an-ùi lán; tı̄ o͘-àm tiong choè lán ê ín-chhoā kap chí-sı̄; lán teh-beh lı̂m-chiong ê sı̂, choè lán ê khùi-la̍t kap ǹg-bāng. Lán kı̀-jiân ū chiah choē ê pó-poè, kiám thang chū-su lâu teh, bô sàng hō͘ pa̍t-lâng mah? Á-sı̄ lán beh o̍h chiah-ê thái-ko-ê khı̀ pò hó siau-sit hō͘ hit-ê iau-gō ê siâⁿ mah? Lán goān-ı̀ khı̀ pò lâng chai mah? 2. Ūi-tio̍h in ê su-iàu Chheng-chheng bān-bān ê lâng tı̄ Sat-má-lı̄-a ê siâⁿ-lāi tú-tio̍h ki-hng, iau-gō teh-beh sí, chia̍h-mı̍h pí n̂g-kim khah kùi; ūi-tio̍h ka-kı̄ ê sı̀ⁿ-miā, ū ê choè lāu-bú ê, chia̍h ka-kı̄ ê kiáⁿ-jı̂ lâi tō͘-oa̍h. Kiám ū sím-mı̍h chêng-hêng pí in ê su-iàu khah toā khah pek-chhiat mah? Chin kai-chài ū hit sı̀ ê thái-ko-ê chai-iáⁿ in ê su-iàu, chiū koat-tēng khı̀ pò in chai. Kin-á-jı̍t tı̄ ta̍k só͘-chāi ū choē-choē lâng in-ūi bô tit-tio̍h Oa̍h-miā ê bí-niû teh tı̂m-lûn; nā-sı̄ lán oē thang kióng-kip in ê su-iàu. Tı̄ lán ê chiu-ûi iáu ū choē-choē lâng jı̍t-jı̍t kap lán choè-kang, iáu-kú m̄-bat Iâ-so͘ Ki-tok, lán siáⁿ-sū bô beh pò hō͘ in chai? Lán í-keng thiaⁿ-tio̍h Hok-im koh chiap-la̍p Chú Iâ-so͘ choè lán ê Kiù-chú, lán kiám m̄ eng-kai pò in chai mah? Hái-goā iáu ū kui ek-bān pó-poè ê lêng-hûn, Chú Iâ-so͘ iā-sı̄ ūi-tio̍h in lâi sí, in iáu-bē bat thiaⁿ-kı̀ⁿ Chú Iâ-so͘ ê miâ-jı̄, lán kiám m̄ eng-kai khı̀ pò in chai mah? Lán só͘ thiàⁿ, só͘ ho̍k-sāi ê Ki-tok kiò lán tio̍h khı̀, tān-sı̄ 1900 goā nı̂ í-keng kè-khı̀, Hok-im iáu-bē thoân-piàn choân sè-kài. 3. Lán nā bô khı̀ pò in chai, chiū ū gûi-hiám Chit sı̀ ê thái-ko-ê kóng, “nā thèng-hāu kàu thiⁿ kng, lán chiū siū-choē”. In m̄-káⁿ koh iân-chhiân, iā m̄-káⁿ khàm-ba̍t chit-ê hó siau-sit, in nā iân-chhiân á-sı̄ bô khı̀ pò, chiū tek-khak oē siū hêng-hoa̍t, só͘-í in bô koh iân-chhiân, sûi-sı̂ khı̀ pò hō͘ pa̍t-lâng chai. Hok-im í-keng thoân hō͘ lán, tùi chú Iâ-so͘ ê pó-huih lán í-keng tit-kiù, chóng-sı̄ lán nā bô thoân chhut-khı̀, chiū ū gûi-hiám. Lán nā bô chı̀n-pō͘, chiū thè-pō͘. Beh hō͘ Ki-tok-tô͘ sio̍k-lêng oa̍h-miā tióng-toā ê pı̀-koat, chiū-sı̄ tio̍h oa̍h-tāng. Lán nā chēng-chēng bô ūi Chú choè poàⁿ-hāng, lán ê lêng-sèng chiū jú loán-jio̍k nńg-chiáⁿ, kàu bé lán chiū lóng bô koan-sim. Ki-tok-tô͘ tı̄ seng-oa̍h tiong choè toā ê bo̍k-tek, chiū-sı̄ ho̍k-sāi Chú, ho̍k-bū chèng-lâng . Lán tek-khak tio̍h ūi Chú choè-kang; lán ê tit-kiù m̄ sı̄ beh tô-siám tē-ge̍k khı̀ thian-tông nā-tiāⁿ; nā-sı̄, lán chiū chin chū-su. Lán ê tit-kiù sı̄ beh ho̍k-sāi Chú koh ho̍k-bū lâng . Chin khó-sioh, ū chin choē Ki-tok-tô͘ lóng m̄-bat ūi Chú kóng chı̍t kù oē. I tı̄ chhù-lāi, á-sı̄ kap pêng-iú kóng-oē ê sı̂, kóng tang kóng sai, ı̀n-tap chin sūn-sū, nā-sı̄ tı̄ kiàn-chèng hoē, chiū lóng tiām-tiām. Tı̄ in ê chhù-lāi iáu ū chhin-lâng m̄-bat Iâ-so͘, nā-sı̄ in bē-bat tùi in kóng-khí Iâ-so͘ lâi choè kiàn-chèng. Lán nā bô thoân hō͘ lâng chai, lán chiū pı̀ⁿ-choè chı̍t ê léng-tām bô koan-sim ê lâng , lán ê pò-siúⁿ chiū oē hō͘ pa̍t-lâng tit khı̀, koh lán beh tú-tio̍h chin toā ê sún-sit “Goá tùi pháiⁿ-lâng kóng, Lí tek-khak oē sí; nā lí bô kéng-kài i, bô ēng oē kéng-kài pháiⁿ-lâng hō͘ i lı̄-khui i ê pháiⁿ-lō͘, lâi kiù i ê sı̀ⁿ-miā; chiū hit ê pháiⁿ-lâng beh sí tı̄ i ê choē; chóng-sı̄ Goá beh tùi lí ê chhiú thó i ê sı̀ⁿ-miā” (Í-sek-kiat 3:18). “Goá beh tùi lí ê chhiú thó i ê sı̀ⁿ-miā.” Che sı̄ joā-nih giâm-siok ê kéng-kò ah! Hit sı̀ ê thái-ko-ê kóng, “Lán só͘-choè-ê m̄ hó,...... lâi ah, lán tio̍h khı̀ pò bı̂n-ke chai.” Hiaⁿ-tı̄ chí-bē, lán iā tio̍h khı̀ pò lâng chai, lán nā bô thoân Chú Iâ-so͘ ê tō-lí, sè-kan chiū beh bia̍t-bô. Bô tit-tio̍h Ki-tok ê chín-kiù, lâng chiū oē tı̂m-lûn, só͘-í múi chı̍t-ê choè Ki-tok-tô͘ ê, lóng tio̍h khı̀ pò lâng chai.