Siōng-tè Só͘ Beh Ēng Ê Lâng 10

Tē 10 Chiuⁿ Chhit Ê Chú-iàu Ê Būn-toê Tı̄-chia ū chhit ê būn-toê sı̄ Ki-tok-tô͘ só͘ tio̍h siūⁿ--ê, nā hut-lio̍k chiah ê, chiū oē siong-hāi tio̍h sio̍k-lêng ê oa̍h-miā. Taⁿ lán beh chı̍t-ê chı̍t-ê lâi siūⁿ, goān Siōng-tè pang-chān lán, ēng sêng-sı̍t ê sim lâi ı̀n-tap chiah-ê. 1. Hoān-choē “Goá nā sim-lāi chù-tiōng choē-ok, Chú tek-khak bô beh thiaⁿ” (Si-phian 66:18). Goá nā iáu-kú toà tı̄ choē-ok tiong, bô-lūn goá kóng sím-mı̍h, Chú lóng bô beh thiaⁿ, iā bô beh èng-ún goá ê kı̂-tó. Goá só͘ beh kóng ê choē sı̄ chí Sèng-keng lāi só͘ kóng, “khoài tı̂ⁿ-poàⁿ lán ê choē”. Chit chióng choē kiám-chhái sı̄ chı̍t ê tāng-tàⁿ, á-sı̄ chı̍t ê ngó͘-siōng, chiū-sı̄ lán ta̍k-pái lóng tâu-hâng--ê, che chiū-sı̄ choē. Chú kóng, Lí tek-khak tio̍h pàng-sak i. “Chiū-sı̄ lín ê choē-koà hō͘ lín kap Siōng-tè keh-tn̄g, lín ê choē-ok hō͘ I tùi lín ng-bı̄n, bô thiaⁿ” (Í-sài-a 59:2). Choē-ok hō͘ Siōng-tè ng-bı̄n, kap lán keh-tn̄g, kı̀ⁿ-nā ū choē, chiū boē thang hō͘ lán kap Siōng-tè kau-poê. “Hoān-nā chheng-ho͘ Chú ê miâ ê tio̍h lı̄-khui put-gı̄” (II Thê-mô͘-thài 2:19). Che sı̄ Chú ê bēng-lēng, lán nā siūⁿ beh tit-tio̍h Chú ê o-ló, tio̍h pàng-sak kı̀ⁿ-nā lán só͘ chai ê m̄-tio̍h, koh lı̄-khui kı̀ⁿ-nā oē hō͘ Sèng Sı̂n iu-būn ê tāi-chı̀. lán tio̍h tùi seng-oa̍h tiong tû-khı̀ chiah-ê, in-ūi lán nā bô kap choē-ok toān-choa̍t, lán ê lêng-sèng chiū boē chı̀n-pō͘. Choē-ok chhin-chhiūⁿ chı̍t-ê chio̍h-bō, sı̂-siông hō͘ lán tūi-lo̍h; siat-sú lán nā hâng-ho̍k choē-ok, chiū oē chı̍t-pái koh chı̍t-pái hoān-choē. Beh boán-chiok io̍k-bōng, ná chhin-chhiūⁿ ēng khê-sı̀ⁿ ia̍t teh to̍h ê hé chı̍t-iūⁿ, éng-oán boē hoa. Ki-tok-tô͘ tı̄ seng-oa̍h tiong ê thòng-khó͘, chiū-sı̄ hō͘ choē-ok toà tı̄ i ê sim-lāi, tı̀-kàu sim-lāi kan-khó͘ koh pi-siong. Só͘-í lán tio̍h bô sioh it-chhè ê hi-seng kap i toān-choa̍t, nā bô, lán chiū choa̍t-tùi boē thé-giām tio̍h “Siōng-tè ê pêng-an, poâⁿ-kè it-chhè lâng só͘ siūⁿ oē kàu ê”. Lán nā bô pàng-sak choē-ok, choē chiū beh húi-bia̍t lán. “Choē-jı̂n ê lō͘ sı̄ khám-khia̍t”. Tio̍h kı̀-tit Iâ-so͘ Ki-tok. I oē chām-tn̄g it-chhè ê só-liān, iā oē phah-khui it-chhè ê sok-pa̍k. I oē hō͘ siû-hoān tit chū-iû; chiū-sı̄ tı̂ⁿ-poàⁿ lí ê choē, I oē tháu-pàng hō͘ lí tit chū-iû. I m̄-nā ū koân-lêng beh kiù lí, iā beh pó-siú lí. Oá-khò tiàm tı̄ lí sim-lāi Sèng Sı̂n ê koân-lêng, lí thang iâⁿ-kè só͘ ū tı̂ⁿ-poàⁿ lí ê choē, chiâⁿ-choè chı̍t-ê tek-sèng ê lâng , sı̄ chin ū kè-ta̍t ê sū. 2. Sūn-ho̍k Choè Siōng-tè ê kiáⁿ-jı̂ tio̍h sūn-ho̍k; lán nā beh chiàu ka-kı̄ ê ı̀-sù khı̀ choè, chiū-sı̄ lām-sám choè, I chiū bô beh ēng lán. chun-thàn iâⁿ-kè hiàn-chè; tı̄ Í-sek-lia̍t ê iâⁿ-tiong ū poē-ge̍k ê sū, che sı̄ Siōng-tè boē thang iông-ún--ê. Lán tio̍h oân-choân chı̄n-tiong tı̄ Chú Iâ-so͘. Toā ê kè-sit oē thang khoan-iông, chhò-gō͘ iáu-kú oē thang goân-liōng, nā-sı̄ bô chı̄n-tiong, chiū choa̍t-tùi boē thang iông-ún--tit. Lán nā beh hō͘ Chú ēng, tio̍h sūn-ho̍k; lán tio̍h sûi-sı̂ chún-pı̄ piān, kàu Chú ài lán khı̀ ê só͘-chāi, chiàu Chú ê chí-ı̀, m̄-sı̄ chiàu lán ê ı̀-sù, chiàu Chú só͘ soán-te̍k ê, m̄-sı̄ chiàu lán só͘ ài--ê. Lán nā sı̍t-chāi hâng-ho̍k Siōng-tè , I ê kè-e̍k chiū chiâⁿ-choè lán ê, lán chiū oē hoaⁿ-hí chun-thàn I ê chí-ı̀. Lán koat-toàn m̄-thang siūⁿ I sı̄ chı̍t ê giâm-hat ê chú-lâng , á-sı̄ chı̍t ê thâu-ke, put-sı̂ teh kiò lán tio̍h choè só͘ bô-ài ê sū. I oân-choân m̄-sı̄ chit khoán ê chú-lâng . I sı̄ lán ê Thiⁿ-pē, I beh chhoā lán kàu an-chēng ê chúi-piⁿ. I chiong oē hō͘ I hoaⁿ-hí ê gim-goān khǹg tı̄ lán ê sim-lāi. I só͘ iau-kiû ê, chiū-sı̄ ài lán tio̍h hâng-ho̍k I; in-ūi lán ê lêng, hûn, thé, lóng sı̄ I ê, só͘-í lán nā bô sūn-thàn I, chiū boē thang kap I kau-poê. 3. Kı̂-tó Ki-tok-tô͘ nā bô kı̂-tó, chiū boē thang tek-sèng, nā hut-lio̍k kı̂-tó, i ê lêng-sèng chū-jiân chiū loán-jio̍k boē chı̀n-pō͘, “To̍k-to̍k oá-khò (choan-sim thèng-hāu) Iâ-hô-hoa--ê beh tit-tio̍h sin ê khùi-la̍t.” Lán bô sı̂-siông kı̂-tó, chiū hō͘ Mô͘-kúi ū ki-hoē kong-kek lán. Iâ-so͘ sı̂-siông kı̂-tó, iā bat thong-mı̂ kı̂-tó; sù-tô͘ Pó-lô iā siông-siông kı̂-tó, chho͘-tāi kàu-hoē iá-sı̄ kı̂-tó ê kàu-hoē. Kı̀ⁿ-nā hō͘ Siōng-tè ēng ê lâng lóng sı̄ kı̂-tó ê lâng . Chhiáⁿ lán ka-kı̄ tio̍h mn̄g: Goá ū sı̂-siông teh kı̂-tó á-bô? Goá kiám ū kap Chú kau-poê? Goá ū ta̍k-jı̍t tı̄ kò͘-tēng ê sı̂-kan kap I saⁿ kı̀ⁿ-bı̄n? Siōng-tè kiám ū khoàⁿ goá choè chı̍t-ê kı̂-tó ê lâng ? Á-sı̄ chı̍t-ê hō͘ I sit-bāng ê lâng ? Goān Chú hō͘ goá koh chı̍t pái kap I lı̍p-iok, ta̍k chá-khí kap I kau-poê, bián tit I lâi ê sı̂, goá iáu-kú teh khùn. 4. Tha̍k Sèng-keng Hut-lio̍k Sèng-keng, chiū-sı̄ chhiat-tn̄g ka-kı̄ bô ki-hoē thiaⁿ-kı̀ⁿ Chú ê siaⁿ-im, in-ūi Siōng-tè thong-kè I ê Oē------Sèng-keng, kap lán kóng-oē. Siat-sú goá nā bô teh tha̍k, teh gián-kiù Sèng-keng, chiū sit-khı̀ I ê ín-chhoā. Choē-choē lâng oē bê-lō͘, chiū-sı̄ in-ūi hut-lio̍k tha̍k Siōng-tè ê Oē. Tı̄ chit sè-kan bô ū pa̍t-hāng oē thang tùi lâng só͘ beh kóng ê Oē. Goá nā sı̍t-chāi jı̄m-bat I, goá chiū ài gián-kiù Sèng-keng, koh ná tha̍k ná ū chu-bı̄, āu-lâi chiū oē chai-iáⁿ bô Sèng-keng boē ēng-tit. In-ūi Sèng-keng sı̄ lêng-sèng ê bí-niû, sı̄ kang-chok le̍k-liōng ê lâi-goân. Goá chho͘-chho͘ sı̀n Chú liáu-āu, ta̍k-jı̍t lóng ū tha̍k Sèng-keng, chóng-sı̄ hiān-sı̂ teh tha̍k Sèng-keng kiám ū chim-chiok teh siūⁿ lāi-bı̄n ê kà-sı̄? Teh tha̍k ê sı̂, kiám ū kám-kak tio̍h chhin-chhiūⁿ khí-thâu ê sı̂, hiah-nih sin-sian? Sù-tô͘ kap sian-ti só͘ keng-giām ê tāi-chı̀, goá tha̍k liáu ū siū kám-tōng á-bô? Goá tha̍k Si-phian ū tit-tio̍h an-ùi mah? Sèng-keng kı̀-jiân sı̄ Siōng-tè ê Oē, sı̄ oa̍h-miā ê Oē, goá ê lêng-sèng ta̍k-jı̍t lóng ū tit-tio̍h I ê iúⁿ-chhı̄ mah? Siōng-tè kı̀-jiân phı̀-jū I ê Oē sı̄ lin kap bah, goá tio̍h sı̂-siông lâi lim, lâi chia̍h, goá ê lêng-sèng chiah oē ióng-kiāⁿ. Goān Siōng-tè hō͘ goá chiâⁿ-choè chı̍t ê un-khûn teh gián-kiù, teh tha̍k I ê Oē ê lâng . 5. Sêng-jı̄n Ki-tok Goá khí-chho͘ sı̀n Chú ê sı̂, chin jia̍t-sim tı̄ kiù lêng-hûn ê kang-chok, goá chin ài kap Siōng-tè ê peh-sı̀ⁿ saⁿ-kap tı̄ ke-thâu ūi Chú choè kiàn-chèng. Pò͘-tō-hoē, kı̀ⁿ-nā ū hūn tı̄ kiù lâng lêng-hûn ê kang, á-sı̄ ín-chhoā lâng lâi bat Chú ê ki-hoē, goá lóng chin tı̀-ı̀ khı̀ choè. Bı̄-sı̀n-chiá iáu-bē tit-kiù ê lâng , in lêng-hûn ê khó͘-kéng, chiâⁿ-choè goá ke̍k-tāng ê hū-tam. Ēng khí-thâu thiàⁿ Chú ê jia̍t-sim, goá kàu ta̍k só͘-chāi pò lâng chai-iáⁿ Siōng-tè kā goá choè-chiâⁿ ê sū, ná chhin-chhiūⁿ hoat-kông khí-siáu chı̍t-iūⁿ. Chóng-sı̄ kin-á-jı̍t cháiⁿ-iūⁿ? Goá m̄-chai ū sit-lo̍h khí-chho͘ ê thiàⁿ-sim á-bô? Goá m̄-chai ū chiâⁿ-choè léng-tām koh bô koan-sim chiah-ê sū ê lâng mah? Siōng-tè ê thiàⁿ ū tı̄ goá ê sim-lāi chhin-chhiūⁿ hé teh to̍h á-bô? Sui-jiân ū khı̀ kàu-hoē, choè lé-pài, gı̂m-si, kı̂-tó, nā-sı̄ lóng bô koan-sim tı̂m-lûn ê lêng-hûn; siáⁿ-sū pı̀ⁿ-choè án-ni? Goá ê chhùi ū teh gı̂m, Tio̍h chín-kiù beh tı̂m-lûn ê lâng , chóng-sı̄ goá ū teh choè sím-mı̍h lâi kiù lâng ê lêng-hûn? Goá sui-jiân ū teh gı̂m kóng, Tio̍h koan-sim beh bia̍t-bông--ê, nā-sı̄ goá ū chin-chiàⁿ koan-sim in mah? Goá kap hoē-iú chê-siaⁿ gı̂m kóng, Ūi-tio̍h bê-lō͘ ê lâng thı̂-khàu, nā-sı̄ goá ê ba̍k-chiu ta-ta, goá kiám bat ūi-tio̍h teh tı̂m-lûn ê lâng sı̍t-chāi thı̂-khàu mah? Tùi chín-kiù lêng-hûn ê kang-chok, goá tùi sim-toé teh koan-sim mah? Nā bô, sı̄ ū chin giâm-tiōng ê mâu-pēng, goá tek-khak tio̍h chiong hit-ê goân-in chhē chhut-lâi kái-chèng chiah tio̍h. Goá tio̍h tı̄ kong-chiòng ê bı̄n-chêng sêng-jı̄n Ki-tok. Goá tek-khak tio̍h pò lâng lâi bat Chú Iâ-so͘. I ū hoan-hù goá tio̍h choè kan-chèng, só͘-í goá tio̍h koh chı̍t-pái khí-lâi ūi Chú choè kan-chèng. Goá thang pun Hok-im thoân-toāⁿ, iā thang siá-phoe hō͘ pêng-iú khó͘-khǹg in sı̀n Chú. Chı̀-chió ê hān-tō͘, goá tio̍h tùi goá ê tông-sū kóng-khí Iâ-so͘ ê kiù-un. Goá nā-sı̄ Siōng-tè ê chhe-ēng, goá tio̍h chı̄n-tiong khı̀ choè. 6. Hōng-hiàn “Hō͘ lâng , chiū beh hō͘ lín” (Lō͘-ka 6:38). Lán hō͘ pa̍t-lâng , Siōng-tè iā beh hō͘ lán, in-ūi I kàu-taⁿ m̄-bat khiàm lâng ê chè. Chı̀-chió, ūi-tio̍h Siōng-tè ê kang tio̍h hiàn chia̍p-hun-chı̍t; í-goā, I ài beh-tı̍h joā-choē, lán iā tio̍h hiàn. Lí nā sı̀n-sı̍t tı̄ I, I iā beh ēng sı̀n-sı̍t khoán-thāi lí. Kin-á-jı̍t ū choē-choē lâng sàn-chhiah khùn-khó͘, chiū-sı̄ in-ūi tı̄ in hù-jū 5 sı̂, bô beh pò-tap Siōng-tè . Chóng-sı̄ lâng tı̄ heng-thong ê sı̂, chiàu kui-tēng, tiong-sı̍t hōng-hiàn tı̄ Siōng-tè ê kang, chiū chin hán-tit khoàⁿ-tio̍h in í-āu teh sàn-chhiah. “Ài siá-sı̀--ê, beh tit-tio̍h hong-sēng; Lūn-te̍k lâng -ê, beh tit-tio̍h lūn-te̍k” (Chim-giân 11:25). Chóng-sı̄ lí beh hōng-hiàn ê sı̂, tio̍h khak-sı̍t che chı̂ⁿ sı̄ beh ēng tı̄ kiù lâng lêng-hûn ê kang-chok, m̄-sı̄ tı̄ pa̍t hong-bı̄n. In-ūi Siōng-tè ū chı̍t-jı̍t beh kap lí sǹg-siàu, khoàⁿ lí só͘ hōng-hiàn ê chı̂ⁿ ū cháiⁿ-iūⁿ teh ūn-iōng, só͘-í lí beh hōng-hiàn ê sı̂ ū chek-jı̄m. Hōng-hiàn tio̍h chhut tı̄ hoaⁿ-hí kam-goān, “in-ūi hoaⁿ-hí the̍h chhut ê, Siōng-tè thiàⁿ i”. Hōng-hiàn tio̍h chiàu kui-kú, tio̍h kò͘-tēng ta̍k ge̍h-jı̍t á-sı̄ ta̍k lé-pài chı̍t pái. Hōng-hiàn ê siàu-hāng tio̍h kap Siōng-tè chheng-chhó . Bô-lūn cháiⁿ-iūⁿ, lí tio̍h hōng-hiàn, in-ūi “nā m̄ sı̄ hōng-chhe thái-thó oē thoân?” Hok-im nā beh thoân-piàn choân sè-kan, tio̍h ū lâng hōng-hiàn kim-chı̂ⁿ lâi chi-chhı̂; chhin-chhiūⁿ chúi-tō-chúi chı̍t-poaⁿ-iūⁿ, chúi pún-sin sı̄ bián-hùi, chóng-sı̄, chúi-kóng, chúi-chhiúⁿ siat-pı̄ ê hùi-iōng, lí tio̍h tàu hū-tam. Kiù-un iā-sı̄ án-ni, sı̄ bián-chı̂ⁿ--ê, chóng-sı̄ beh chiong i thoân chhut-khı̀, chiū tio̍h ài só͘-hùi, iā lán tio̍h koáⁿ-kín thoân kàu choân sè-kài chiah tio̍h. Só͘-í Pó-lô kóng: “Hōng-hiàn sı̄ Ki-tok-tô͘ ê un”. Lán taⁿ sı̄ choè chı̍t ê Sin-iok sı̂-tāi ê Ki-tok-tô͘, hoaⁿ-hí kam-goān lâi hōng-hiàn chiah tio̍h. 7. Choè Chú Ê Kang Goá nā siūⁿ beh hō͘ Chú ēng, chiū tio̍h khı̀ chı̍t keng chún goá kong-khai choè kan-chèng ê kàu-hoē, chham-ka chū-hoē, bián tit siū lâng kı̀m-chí. Tı̀-ı̀ kiù lâng lêng-hûn ê kàu-hoē, chiū-sı̄ goá sio̍k-lêng ê ke, goá tit-kiù sı̄ beh ho̍k-sāi Chú Iâ-so͘, goá nā bô ūi I choè kang chiū-sı̄ ûi-poē I só͘ hō͘ goá ê sú-bēng. Goá sui-jiân bô chin-choē un-sù kap châi-tiāu, nā-sı̄ goá oē thang ūi-tio̍h I choè-kang, goá thang hóng-būn piⁿ-lâng , pun Hok-im thoân-toaⁿ, ūi Chú choè kan-chèng, choè kò-jı̂n pò͘-tō, goá oē-thang ūi Chú choè-kang. Ū lâng , lóng sı̄ khiā teh thèng-hāu pa̍t-lâng chhiáⁿ i khı̀ choè Siōng-tè ê kang. Chóng-sı̄ in nā chin-chiàⁿ ū tit-kiù, in chiū oē ka-kı̄ chū-tōng khı̀ chhē ki-hoē ūi Chú choè-kang. Pó-lô tit-kiù liáu, thâu chı̍t kù sı̄ “Chú ah! Lí ài goá choè sím-mı̍h?” Múi chı̍t-ê têng-thâu-siⁿ ê lâng , lóng tio̍h án-ni kóng. Thiàⁿ, tio̍h ho̍k-sāi; kı̀ⁿ-nā chin-chiàⁿ thiàⁿ Chú Iâ-so͘ ê lâng , chiū ài ho̍k-sāi I, in choa̍t-tùi boē the-sı̂, pı̂n-toāⁿ, bô ài choè-kang. Lán m̄-thang thèng-hāu bo̍k-su á-sı̄ pa̍t-lâng lâi kiò lán choè-kang, lán tio̍h tı̍t-chiap mn̄g Siōng-tè , tùi I lâi tit-tio̍h chí-sı̄. Kiám-chhái I ài lí kà Chú-jı̍t-o̍h, nā án-ni, lí chiū ka-kı̄ khı̀ chhē hāu-tiúⁿ; lí ū hó ê siaⁿ-im, chiū chham-ka Sèng-koa-tūi; oē hiáu ián-chàu ga̍k-khı̀, chiū chham-ka kàu-hoē ê ga̍k-tūi; ū lâng tio̍h choè chiau-thāi; á-sı̄ tı̄ Chheng-liân thoân-khè ho̍k-bū; á-sı̄ choè tāi-tó ê lâng , sı̂-siông ūi Chú ê kang-chok kı̂-tó. Kiám-chhái Chú beh tiàu lí khı̀ goā-kok choè thoân-kàu á-sı̄ kı̂-thaⁿ ê kang-chok. Chú ài lí khı̀ chiap-siū hùn-liān, lí chiū tio̍h khı̀. Chı̍t-ê têng-thâu-siⁿ ê lâng , nā bô ūi Chú Iâ-so͘ choè-kang, i chiū choa̍t-tùi boē pêng-an. Lán beh tit-tio̍h Chú ê o-ló, tio̍h chiàu í-siōng chhit ê būn-toê khı̀ sı̍t-hêng. Sèng-keng ū kı̀-chài, “Lí tio̍h tı̀-ı̀ hō͘ Siōng-tè khoàⁿ lí choè khó-chhú ê, choè bián kiàn-siàu ê choè-kang lâng ” (II Thê-mô͘-thài 2:15). Lán beh tit-tio̍h I hong-sēng ê siúⁿ-sù, siūⁿ beh thiaⁿ I kóng: “Hó ah, hó koh chı̄n-tiong ê lô͘-po̍k”, lán chiū tio̍h ka-kı̄ hoán-séng, khoàⁿ ū ha̍h I ê iau-kiû á-bô?