Siōng-tè Só͘ Beh Ēng Ê Lâng 11

Tē 11 Chiuⁿ Sin Oa̍h-miā Ê 4 Hāng Su-iàu Chı̍t-ê eⁿ-á chhut-sı̀, chiū-sı̄ chı̍t-ê sin oa̍h-miā ê khai-sí; lí tio̍h chiàu-kò͘ i, iúⁿ-chhı̄ i, thoè i soé seng-khu, kā i chhēng-sio, tio̍h ta̍k-jı̍t koan-sim chù-ı̀ i ê su-iàu, in-ūi i iáu boē-hiáu siat-hoat ki-kı̄ ê tāi-chı̀. Lí khui sim-mn̂g, ngiâ-chih Iâ-so͘ Ki-tok, chiap-la̍p I choè lí ê Kiù-chú hit sı̂, lí chiū têng-thâu-siⁿ tı̄ Siōng-tè ê kok. I chiū chiong lí í-chêng só͘ bô ê oa̍h-miā------Siōng-tè ê oa̍h-miā, sio̍k-lêng ê oa̍h-miā------éng-oán ê oa̍h-miā siúⁿ-sù lí. Taⁿ í-āu lí beh cháiⁿ-iūⁿ chiàu-kò͘ chı̍t-ê sin oa̍h-miā? Lí chiū-sı̄ tiàm-tı̄ Ki-tok lāi-bı̄n ê eⁿ-á. Sin oa̍h-miā só͘ su-iàu ê sı̄ sím-mı̍h? Chiū-sı̄ kap jio̍k-thé ê eⁿ-á kāng-khoán. 1.Chia̍h-mı̍h EN-á tio̍h ta̍k-jı̍t kā i iúⁿ-chhı̄; Siōng-tè só͘ siúⁿ-sù lí ê sin oa̍h-miā, iā su-iàu chia̍h-mı̍h. EN-á ê chia̍h-mı̍h sı̄ lin; sio̍k-lêng ê eⁿ-á só͘ ài ê sı̄ sio̍k-lêng ê lin. “Chiū tio̍h chhin-chhiūⁿ tú-á siⁿ ê eⁿ-á him-bō͘ sim-lêng choân ê lin, hō͘ lín tùi tióng-toā kàu tit-tio̍h kiù” (I Pí-tek 2:2). Goá tùi 1906 nı̂ hoán-hoé sı̀n Chú hit jı̍t kàu-taⁿ, ta̍k-jı̍t lóng teh tha̍k Siōng-tè ê Oē, m̄-bat ū chı̍t jı̍t bô tha̍k Sèng-keng. Kàu-taⁿ, Sèng-keng sı̄ goá lêng-sèng ê chia̍h-mı̍h, ná gián-kiù chiū jú kám-kak pó-poè, tı̄ chit sè-kan bô chı̍t pún chheh oē thang kap i pí-kàu tit. Sat-tàn ê kong-kek chin lı̄-hāi ê sı̂, Siōng-tè ê Oē, chiū-sı̄ goá ê an-ùi kap kú-tn̂g thun-lún ê khùi-la̍t. Jú-lâi hō͘ goá oē khak-sı̀n Sèng-keng sı̄ Siōng-tè ê Oē. Bat ū choē-choē chhı̀-liān beh chó͘-tòng goá ho̍k-sāi Chú, nā-sı̄ Siōng-tè ê Oē ū èng-ún, tı̀-kàu hō͘ goá khah-iâⁿ. Iu-chhiû, á-sı̄ pi-siong lı̂m-kàu goá, Siōng-tè chiū tùi Sèng-keng kap goá kóng-oē: “Kui-mı̂ sui-jiân ū thı̂-khàu, Chá-khí sı̂ chiū ū hoaⁿ-hí” (Si-phian 30:5). Goá sim-lāi toā kiaⁿ-hiâⁿ ê sı̂, goá chiū thiaⁿ-kı̀ⁿ I ê siaⁿ kóng: “Goá ê sim ah, lí siáⁿ-sū ut-chut? Siáⁿ-sū tı̄ goá ê lāi-bı̄n tio̍h-kip? Lí tio̍h ǹg-bāng Siōng-tè ; in-ūi goá iáu-kú beh o-ló I” (Si-phian 42:11). 2. Kau-poê EN-á ài kap lâng kau-poê, i tio̍h oē-hiáu hō͘ pa̍t-lâng chai-iáⁿ i ê su-iàu, i iau-gō͘ á-sı̄ thàng-thiàⁿ ê sı̂, i chiū khàu; lāu-bú chiū sûi-sı̂ lâi chiàu-kò͘. Lí iā su-iàu kap lâng kau-poê, lí têng-thâu-siⁿ í-āu, sim-lāi it-tēng ū chı̍t khoán âu-kiò ê siaⁿ, che chiū-sı̄ kı̂-tó. Goá khǹg lí tı̄ chı̍t-sı̀-lâng ta̍k-jı̍t tio̍h kap Siōng-tè saⁿ kau-poê kı̂-tó, chiong lí it-chhè lóng bô am-khàm kā I kóng, ná chhin-chhiūⁿ teh kap hó pêng-iú kóng-oē chı̍t-iūⁿ. Lí teh tha̍k Sèng-keng, chiū-sı̄ Siōng-tè tùi lí kóng-oē; lí teh kı̂-tó chiū-sı̄ lí teh kap Siōng-tè kóng-oē, án-ni lí kap Siōng-tè chiū ū kau-poê, lí oē jú bat Siōng-tè , chhin-chhiūⁿ lí teh bat pêng-iú chı̍t-iūⁿ. Kap Chú kau-poê jú-chhim, jı̄m-bat iā jú-chhim, só͘-í tio̍h ta̍k-jı̍t kap I kau-poê, sı̂-siông kı̂-tó. 3. Un7-tōng EN-á su-iàu ūn-tōng. I sı̂-siông teh tín-tāng i ê kha-chhiú, chiū-sı̄ ài ūn-tōng. Beh hō͘ lí ê lêng-sèng ióng-chòng, tióng-chı̀n, lí iā tio̍h ūn-tōng. Lêng-sèng ê ūn-tōng, chiū-sı̄ ūi chú choè kiàn-chèng, choè kò-jı̂n pò͘-tō ê kang, tı̄ chèng-lâng ê bı̄n-chêng sêng-jı̄n Ki-tok. Lí nā bô ūn-tōng chiū oē tūi-lo̍h. Lí nā sı̍t-chāi thiàⁿ Chú, lí chiū beh choè kiàn-chèng, tùi án-ni, lí ê lêng-sèng beh ióng-chòng. “Iâ-hô-hoa só͘ kiù-sio̍k--ê tio̍h kóng che oē” (Si-phian 107:2). Lí tiû-tû chiàu i só͘ kā lí chiâⁿ ê sū lâi kóng. Lí tio̍h lia̍h Kiù-chú choè êng-kng, ná chhin-chhiūⁿ lí khoàⁿ lí ê kok-ka kap goân-siú choè êng-kng chı̍t-iūⁿ. Tı̄ chiàn-tiûⁿ lí choa̍t-tùi bô kiàn-siàu ka-kı̄ ê kok-ka, hoán-tńg ı̀-ài beh khah-kín tián-khui ka-kı̄ ê kok-kı̂ chı̀n-chêng. Án-ni, lí siáⁿ-sū teh tiû-tû bô beh kia̍h-khí Chú Iâ-so͘ ê kun-kı̂? In-ūi án-ni choè, chiū hō͘ choân sè-kài lóng chai lí sio̍k tı̄ tó chı̍t pêng. Lí kiám ài I tı̄ sím-phoàⁿ ê jı̍t-chí, tı̄ Pē Siōng-tè kap chèng sù-chiá ê bı̄n-chêng lia̍h lí choè kiàn-siàu mah? Án-ni, lí hiān-chāi chiū m̄ eng-kai lia̍h I choè kiàn-siàu. Chú kóng, “Ēng chhùi jı̄n, tı̀-kàu tit-tio̍h kiù” (Lô-má 10:10). Bô chı̍t hāng pí tı̄ chèng-lâng ê bı̄n-chêng sêng-jı̄n Iâ-so͘ choè Kiù-chú, koh-khah oē hō͘ sı̀n-chiá tit-tio̍h khùi-la̍t, lêng-sèng ióng-chòng khí-lâi. Lí nā ài hō͘ lí ê lêng-sèng ū tióng-chı̀n, chiū tio̍h tı̄ chèng-lâng ê bı̄n-chêng sêng-jı̄n Ki-tok. Sat-tàn bô koan-sim tı̄ hiah-ê tiām-tiām m̄ thoân tō-lí ê Ki-tok-tô͘, chóng-sı̄ i beh chin hiông lâi tí-tng hiah-ê kong-khai kóng, chı̄n-tiong tı̄ Ki-tok ê lâng . Sui-jiân sı̄ án-ni, kong-khai sêng-jı̄n chú ê hêng-tōng, hō͘ Sat-tàn ê kong-kek pı̀ⁿ-choè loán-jio̍k bô la̍t. Lí choè kiàn-chèng chiū m̄-bián lı̄-khui sè-sio̍k ê pêng-iú, kan-ta chiong Iâ-so͘ ê tāi-chı̀ kóng hō͘ in chai, chhiáⁿ in kap lí kūi--teh, thoè in kı̂-tó, sàng hok-im thoân-toaⁿ hō͘ in, chhiáⁿ in chham-ka pò͘-tō-hoē; lí nā án-ni choè, ū lâng chiū kap lí toān-choa̍t koan-hē; chóng-sı̄ ū lâng chiū tit-kiù. Siāng-sı̂ lí oē tit tio̍h sin ê pêng-iú, kap lí kāng chhù-bı̄, siāng ı̀-ài ê Ki-tok-tô͘. Chit khoán ê iú-gı̂ oē thang kàu éng-oán. 4. Khiân-kèng Choè lāu-bú--ê choa̍t-tùi boē chiong ka-kı̄ tú-á chhut-sı̀ ê eⁿ-á, khǹg tı̄ peng-siuⁿ ê lāi-bı̄n. I it-tēng oē chim-chiok pâng-keng lāi boē siuⁿ joa̍h, á-sı̄ siuⁿ koâⁿ. Khiân-kéng tek-khak tio̍h sek-ha̍p eⁿ-á ê su-iàu chiah tio̍h. Siat-sú, lí nā chham-ka tı̄ chı̍t keng bô oa̍h-khı̀ kan-ta chù-tiōng hêng-sek ê kàu-hoē, lí ê sı̀n-gióng m̄-sı̄ koâⁿ-sí, chiū oē iau-sí. Lí tio̍h khı̀ chham-ka chı̍t keng thoân Hok-im, sı̀n-gióng pó-siú, tı̀-ı̀ choè kiàn-chèng, kı̂-tó ê kàu-hoē, che chiah sı̄ lí só͘ su-iàu ê. Só͘-í goá khǹg lí m̄-nā chham-ka kàu-hoē chiū hó, koh tio̍h ài chham-ka chín-kiù lêng-hûn ê kang-chok, kap hiah-ê thiàⁿ Chú, hoan-gêng lí ūi Chú choè kan-chèng, toā-siaⁿ kı̂-tó ê lâng saⁿ-kap choè phoāⁿ. Í-siōng só͘ kóng ê chiū-sı̄ sin oa̍h-miā ê su-iàu. Taⁿ chek-jı̄m chiū kau-tāi hō͘ lí lah. Só͘-í tio̍h khı̀ siat-hoat, chiàu-kò͘, iúⁿ-chhı̄ i, hō͘ i ū ki-hoē kau-poê, kap ūn-tōng, thoè i an-pâi só͘ su-iàu ê khiân-kéng. Án-ni, lí chiū thang kap Chú Iâ-so͘ tâng-kiâⁿ, tit-tio̍h I só͘ èng-ún lóng-chóng ê hok-khı̀.