Siōng-tè Só͘ Beh Ēng Ê Lâng 12

Tē 12 Chiuⁿ Chá-khí-sı̂ Ê Lêng-siu Tı̄ goá khí-chho͘ ê Ki-tok-tô͘ seng-oa̍h tiong, chiū khai-sí siú chá-khí-sı̂ ê lêng-siu. Ta̍k chá-khí goá chiū kap Chú kau-poê. M̄ bat bô kap chú kau-poê chiū khı̀ choè-kang. Chia̍h chá-khí-tǹg liáu-āu, goá chiū jı̍p-khı̀ tha̍k-chheh-pâng, chiong mn̂g koaiⁿ teh, ēng chı̍t tiám-cheng ê sı̂-kan kap Siōng-tè kau-poê. 50 goā nı̂ í-lâi m̄ bat ū tn̄g-chām. Tı̄ kè-khı̀ ê jı̍t-chí, Siōng-tè só͘-í ēng goá, chiū-sı̄ in-ūi goá ta̍k-jı̍t ū siú chá-khí-sı̂ ê lêng-siu, kap I kau-poê. Būn-toê iáu bē kàu í-chêng, chiū lóng tı̄ Chú ê bı̄n-chêng kái-koat. Nā bô siú chá-khí-sı̂ ê lêng-siu, goá só͘ choè ê kang, chiū bô hāu-kó. Goá chiū loán-jio̍k bô khùi-la̍t. Chiū-sı̄ goá tı̄ Chú ê bı̄n-chêng thèng-hāu, goá ê lêng-sèng chiah oē ióng-chòng. Lí Tio̍h Poah Sı̂-kan Lí beh kā goá kóng, lí bô sı̂-kan; ūi-tio̍h Chú ê kang-chok, bô-êng kàu bô sı̂-kan thang tı̄ I ê bı̄n-chêng thèng-hāu I. Chóng-sı̄ goá kā lí kóng, Su-san-ná Oē-su-lí, sı̄ chı̍t-ê chin bô-êng ê hū-jı̂n-lâng , i ū 19 ê kiáⁿ-jı̂. Tng-sı̂ bô ha̍k-hāu, i tio̍h pún-sin kàu-io̍k in. I boē thang kā in boé saⁿ, só͘-í tio̍h ka-kı̄ chit-pò͘ lâi choè saⁿ. M̄-nā án-ni, ta̍k-jı̍t tio̍h chún-pı̄ saⁿ-tǹg lâi thoa-boâ. Sui-jiân sı̄ án-ni, i iáu-kú tı̄ ta̍k-jı̍t ē-po͘ chı̍t tiám kàu nn̄g tiám, chiong pâng-keng mn̂g koaiⁿ--teh, kūi--teh kap Chú kau-poê. Tı̄ chit-ê sı̂-kan, bô chı̍t-ê kiáⁿ-jı̂ káⁿ khı̀ kiáu-jiáu i. In-ūi in lóng chai-iáⁿ lāu-bú teh choè sím-mı̍h. Só͘-í, chit-ê lāu-bú ū chō-chiū 2 ê chong-kàu úi-tāi ê jı̂n-bu̍t, chiū-sı̄ Iok-hān Oē-su-lí kap Cha-lí-sū Oē-su-lí, kòng-hiàn tı̄ choân sè-kan. In-ūi i chai kap Siōng-tè kau-poê sı̄ ū lı̄-ek ê sū. Su-san-ná Pē-su-lí hiah bô-êng, choè 19 ê kiáⁿ-jı̂ ê lāu-bú, iáu-kú oē thang poah chı̍t tiám-cheng ê sı̂-kan lâi kı̂-tó kap Siōng-tè kau-poê; lí, goá tı̄ chit-ê ki-khı̀ ê sı̂-tāi, koh-khah choè oē kàu chiah tio̍h; sı̂-kan éng-oán sı̄ bô kàu thang ēng, chóng-sı̄ lán tio̍h poah sı̂-kan. Lán nā bô poah sı̂-kan, chiū boē thang ūi Siōng-tè choè toā-sū. Beh bat pêng-iú iā tio̍h án-ni; lán tio̍h ēng sı̂-kan kap in kı̀ⁿ-bı̄n, án-ni lán chiah oē thang bat in. Chı̍t-ê chheng-liân lâng tı̄ kiat-hun í-chêng, iā tio̍h tāi-seng ū sı̂-kan kap i sim-lāi só͘ thiàⁿ ê lú-chú sı̂-siông iok-hoē. Sui-jiân chit-ê chheng-liân chin bô-êng, chóng-sı̄ i koat-sim beh hi-seng, poah sı̂-kan, kap i choè phoāⁿ. In sı̂-siông an-pâi sı̂-kan saⁿ-kap kı̀ⁿ-bı̄n kóng-oē, hit-sı̂ in chin khoài-lo̍k; hun-khui í-āu koh ǹg-bāng āu-hoê koh-chài iok-hoē saⁿ-kı̀ⁿ. Án-ni chiū chiām-chiām se̍k-sāi, tùi se̍k-sāi lâi jı̄m-bat, tùi jı̄m-bat lâi saⁿ lí-kái, tùi lí-kái kàu kiat-hun chiâⁿ-choè hu-hū. Lán tùi Iâ-so͘ Ki-tok iā-sı̄ án-ni. Lí nā ài beh sı̍t-chāi bat Chú, lí tio̍h poah sı̂-kan hō͘ Chú. Ū chin-choē lâng kap Chú Iâ-so͘ kan-ta ū kı̀ⁿ-bı̄n nā-tiāⁿ, chóng-sı̄ lóng m̄-bat I. Lí tit-kiù ê sı̂ í-keng kı̀ⁿ-tio̍h Chú Iâ-so͘, chóng-sı̄ lí nā bô sı̂-kan kap I se̍k-sāi, lí chiū sı̍t-chāi m̄-bat I. Ū-sı̂ lí bat siūⁿ, siáⁿ-sū tı̄ lí teh su-iàu ê sı̂, boē-oē tı̍t-chiap kàu Siōng-tè ê bı̄n-chêng, kiû I kā lí thiàⁿ? Lí tú-tio̍h khùn-lân ê sı̂, kiám beh khı̀ chhē siⁿ-hūn-lâng lâi pang-chān lí? Siat-sú lí m̄-bat Siōng-tè , iā I lı̄-khui lí hn̄g-hn̄g, lí beh cháiⁿ-iūⁿ sûi-sı̂ khı̀ chhē I? Só͘-í lí tio̍h jı̄m-bat I, kap I chhin-kūn. Tı̄ lí tú-tio̍h hoān-lān ê sı̂, chiū thang sûi-sı̂ kiû-kiò I, I iā beh thiaⁿ lí. Lí tio̍h tāi-seng sı̍t-chāi jı̄m-bat Siōng-tè , chiah oē thang chiong it-chhè ê sū kap I chham-siông. Só͘-í tio̍h poah sı̂-kan kap I kau-poê chiah oē thang sı̍t-chāi bat I. Goá siú chá-khí-sı̂ ê lêng-siu, chiū-sı̄ tāi-seng tha̍k Sèng-keng, āu-lâi chiah kı̂-tó. Tha̍k Sèng-keng Tùi lí hoán-hoé sı̀n Chú ê jı̍t khí, lí m̄-chai ū hun-lio̍k Sèng-keng á-bô? Ta̍k-jı̍t lí kiám ū teh tha̍k Sèng-keng, tùi hit lāi-bı̄n tit-tio̍h kà-sı̄ mah? Goá m̄-bat ū chı̍t-jı̍t bô tùi Siōng-tè ê Oē lâi chhē I ê ín-chhoā. I ê Oē sı̄ goá lêng-sèng ê bí-niû, Sèng-keng sı̄ goá kiâⁿ-ta̍h ê kun-kù. “Chiū tio̍h chhin-chhiūⁿ tú-á siⁿ ê eⁿ-á him-bō͘ sı̂n-lêng choân ê lin, hō͘ lín tùi tióng-toā kàu tit-tio̍h kiù” (I Pí-tek 2:2). Goá chiap-la̍p Chú Iâ-so͘ choè goá Kiù-chú ê keh-jı̍t, ū chı̍t-ê choè kò-jı̂n pò͘-tō ê sı̀n-tô͘, chhiáⁿ goá chiong Sèng-keng hō͘ i. I tı̄ goá hit-pún Sèng-keng ê thâu-chı̍t-ia̍h, siá chı̍t-kù Pún-jı̂n Iok-hān só͘ kóng ê oē: Sèng-keng beh pó-siú lí lı̄-khui choē-ok, nā-bô, choē-ok beh hō͘ lí lı̄-khui Sèng-keng. Tùi hit-jı̍t khí, goá ta̍k-pái nā boé Sèng-keng, tek-khak chiong chit kù bêng-giân siá tı̄ hit téng-bı̄n. In-ūi goá khak-sı̍t chai, chit kù oē sı̄ chin-lí. Choē kap Sèng-keng boē thang saⁿ-kap chûn-chāi. Chiū Sèng-keng kap choē chit nn̄g-hāng, lí tek-khak tio̍h pàng-sak chı̍t-hāng. Lí nā tha̍k Sèng-keng, chiū oē lı̄-khui choē-ok. Lí nā hòng-chhiòng tı̄ choē-ok, chiū bô ài tha̍k Sèng-keng. In-ūi Sèng-keng beh pó-siú lí lı̄-khui choē-ok, nā-bô, choē-ok beh hō͘ lí lı̄-khui Sèng-keng. Goá kiàn-gı̄ lí khı̀ boé chı̍t-pún khah toā-jı̄ ê Sèng-keng, kàu nı̂-lāu ba̍k-chiu hoe ê jı̍t-chí, lí nā-sı̄ tı̄ Sèng-keng lāi ū choè kı̀-hō, kàu hit-sı̂, in-ūi jı̄ chin toā, lí chiū iáu oē thang khoàⁿ lâi tha̍k. Lí choa̍t-tùi boē hut-lio̍k chit-pún Sèng-keng. Lí tha̍k Sèng-keng ê sı̂, choè hó tio̍h gia̍h chı̍t-ki pit thang choè kı̀-hō. Goá chiong kı̀ⁿ-nā kám-tōng goá ê ta̍k-kù Sèng-keng-chat choè kı̀-hō. Lí beh kā goá kóng, Sèng-keng ta-sò bô sim-sek, só͘-í lí chiū bô teh tha̍k. Che chiū-sı̄ lí m̄-bat chit-pún Sèng-keng ê chok-chiá, lí nā chin-chiàⁿ kap i se̍k-sāi liáu-āu, kı̀ⁿ-nā chhut tı̄ I só͘ kóng ê, lí lóng oē kám-kak tio̍h sim-sek koh ū chu-bı̄. Ū chı̍t-ê siàu-liân lú-chú teh tha̍k chı̍t-pún si-chı̍p. Chóng-sı̄ i kám-kak tio̍h ta-sò lóng bô sim-sek, chiū bô koh-chài tha̍k. Āu-lâi i chiū kap chit-pún si-chı̍p ê chok-chiá loân-ài. Taⁿ koh chı̍t-pái the̍h chit-pún si-chı̍p lâi tha̍k, sı̍t-chāi chin kı̂-koài, chit-pái chiū kám-kak tio̍h sı̄ chı̍t-sı̀-lâng só͘ tha̍k kè tē-it ū chhù-bı̄ ê si. Só͘ cheng-chha ê chiū-sı̄ i taⁿ ū kı̀ⁿ-tio̍h chit-ê choè si ê lâng , teh tha̍k ê sı̂ chiū siūⁿ-tio̍h i. Kap che kāng-khoán ê lí-iû, lí nā jı̄m-bat chit-ūi chok-chiá------Chú Iâ-so͘ Ki-tok, lí chiū bô tha̍k I ê oē boē ēng-tit. Lí chiū oē chai Sèng-keng pí sím-mı̍h chheh koh-khah ū ı̀-gı̄. Lí ná tha̍k chiū ná ài tha̍k. Chin hán-tit ū chı̍t-pún chheh oē hō͘ goá tha̍k nn̄g pái í-siōng ê, in-ūi lâng só͘ siá ê chheh khoài liáu-kái, tha̍k liáu chiū bô kám-kak chhù-bı̄. Siōng-tè ê oē chiū oân-choân bô kāng-khoán; in-ūi sı̄ tùi Siōng-tè lâi chhiau-oa̍t chū-jiân--ê. Goá boē thang chhek-to̍k i chhim-tı̂m ê loē-iông kap ò-biāu; sı̄ éng-oán sin koh ū chu-bı̄ ê, goá tha̍k ê sı̂, lóng ū chhē tio̍h sin ê chin-lí. goá teh tha̍k Kū-iok Sèng-keng ê sı̂, lāi-bı̄n ê jı̂n-bu̍t chiū-sı̄ chiong-lâi goá beh tı̄ Thian-tông kap in saⁿ-kı̀ⁿ ê, só͘-í goá chiū chı̄n só͘-ū--ê ài beh chai in ê tāi-chı̀. Án-ni goá chiū chai Kū-iok Sèng-keng ū khip-ín-la̍t; Sin-iok Sèng-keng iā-sı̄ án-ni. Tio̍h Cháiⁿ-iūⁿ Tha̍k Sèng-keng M̄-nā án-ni, goá ta̍k-jı̍t tha̍k Sèng-keng, chhin-chhiūⁿ Í-sek-lia̍t peh-sı̀ⁿ ta̍k-jı̍t khioh Má-ná. In boē-thang khioh chı̍t-jı̍t hūn lâi choè nn̄g-jı̍t ê lō͘-ēng. In ta̍k-chá-khí tio̍h chhut-khı̀ khioh. Beh iúⁿ-chhı̄ lí lêng-sèng ê oa̍h-miā iā-sı̄ án-ni. Lí tio̍h ta̍k-jı̍t tha̍k Sèng-keng lâi gián-kiù. Siōng-tè kóng, “tio̍h mı̂-jı̍t siūⁿ i” (Iok-su-a 1:8). Kiám-chhái lí bô teh tha̍k Sèng-keng, in-ūi lí boē liáu-kái; ū-sı̂ lí oē tú-tio̍h boē liáu-kái ê Sèng-keng-chat. Chóng-sı̄ lí tio̍h chhin-chhiūⁿ teh chia̍h hı̂ ê hoat-tō͘ lâi tha̍k i. Goá teh chia̍h hı̂ ê sı̂, nā tú-tio̍h hı̂-chhı̀, choa̍t-tùi boē in-ūi hı̂-chhı̀ chiū bô-ài chia̍h, kui-bé phâng khı̀ tàn-tiāu; kan-ta chiong hı̂-chhı̀ the̍h khí-lâi chiū soà-chiap koh chia̍h. Só͘-í m̄-thang in-ūi tú-tio̍h boē bêng-pe̍k ê Sèng-keng-chat, chiū bô beh tha̍k Sèng-keng. Boē bêng-pe̍k ê, chiū lâu tı̄ hia, koh soà-chiap tha̍k lo̍h-khı̀. Goá tha̍k Sèng-keng ná chhin-chhiūⁿ teh tha̍k phoe chı̍t-iūⁿ. Goá chiap tio̍h phoe í-āu, choa̍t-tùi boē kan-ta tha̍k tē-it ia̍h ê chı̍t-toāⁿ, āu-lâi chiong i siu khí-lâi, koh kè chı̍t lé-pài āu, chiah the̍h khí-lâi tha̍k tē-saⁿ ia̍h, tha̍k liáu koh siu khí-lâi, kè bô kúi-jı̍t koh the̍h khí-lâi khoàⁿ sı̄ sím-mı̍h lâng kià lâi ê. Goá it-tēng tùi thâu kàu bé lóng choè chı̍t-pái khoàⁿ liáu. Án-ni chia̍h oē chai phoe ê loē-iông. Tha̍k Sèng-keng iā tio̍h án-ni, in-ūi bô koh-chài ū pa̍t ê hoat-tō͘. Lí tio̍h tùi thâu kàu bé soà-chiap lâi tha̍k, chiah oē chai Sèng-keng ê loē-iông. Goá tùi Chhòng-sè-kı̀ ê thâu-chı̍t-jı̄ khai-sí, ta̍k-jı̍t tha̍k 2 chiuⁿ á-sı̄ 3 chiuⁿ, it-tı̍t tha̍k kàu Khé-sı̄-lio̍k choè-āu chı̍t-jı̄. Tha̍k chı̍t-pái liáu-āu, keh-jı̍t koh tùi thâu khai-sí. Án-ni chı̍t-pái koh chı̍t-pái it-tı̍t tha̍k, goá chiah oē bêng-pe̍k i ê ı̀-sù, liáu-kái i ê loē-iông. Lí nā beh chai-iáⁿ Sèng-keng ê loē-iông, chiū tio̍h tha̍k Sèng-keng chhin-chhiūⁿ tha̍k phoe ê khoán-sit. Kı̂-tó Lí tha̍k Sèng-keng ê sı̂, Siōng-tè tùi lí kóng-oē. Kı̂-tó chiū-sı̄ lí tùi Siōng-tè kóng-oē. Goá tha̍k Sèng-keng í-āu chiū kı̂-tó, che sı̄ goá ta̍k-jı̍t siú chá-khí-sı̂ ê lêng-siu ê hong-hoat. “Iâ-hô-hoa ah, chá-khí-sı̂ Lí oē thiaⁿ goá ê siaⁿ; Chá-khí-sı̂ goá beh tùi Lí pâi-lia̍t goá ê sim-ı̀, soà beh liâu-bāng” (Si-phian 5:3). Che chiū-sı̄ goá chá-khí-sı̂ lêng-siu koan-hē kı̂-tó ê kun-kù. Tı̄ kı̂-tó ê seng-oa̍h ū 3 ê that-gāi, chiah-ê that-gāi chiū-sı̄ kiû-siû, lán tio̍h tí-tng in. Siat-sú lí ê kı̂-tó chiū-sı̄ chá-khí-sı̂ kūi tı̄ bı̂n-chhn̂g-piⁿ, tı̄ chhùi-lāi kóng kúi-kù oē, chiū khí-lâi koáⁿ-kín khı̀ siōng-pan, á-sı̄ kàu ê-hn̂g liām kúi-kù kı̂-tó ê oē, chiū sûi-sı̂ tó lo̍h-khı̀ khùn, án-ni lí chiū boē liáu-kái goá ê ı̀-sù. Goá só͘ teh kóng ê, chiū-sı̄ chin-chiàⁿ ê kı̂-tó, chhin-chhiūⁿ chit-khoán ê kı̂-tó, chiū ū 3 hāng that-gāi. 1. Kiáu-jiáu Teh kı̂-tó ê sı̂, siông-siông ū lâng khà tiān-oē lâi, gín-ná khàu, á-sı̄ pêng-iú lâi pài-hóng......ū ta̍k-iūⁿ ê kiáu-jiáu. Sat-tàn chai-iáⁿ tio̍h tı̄ sím-mı̍h sı̂ lâi kiáu-jiáu lí. Siat-sú tı̄ lí teh kı̂-tó ê sı̂, i ê kiáu-jiáu nā sêng-kong, án-ni i chiū í-keng phò-hoāi lí kı̂-tó ê hāu-kó. Taⁿ, goá tio̍h cháiⁿ-iūⁿ tû-khı̀ chiah-ê kiáu-jiáu neh? Chiū-sı̄ kı̂-tó tio̍h ū it-tēng ê sı̂-kan kap só͘-chāi. Goá kı̂-tó ê só͘-chāi chiū-sı̄ goá ê tha̍k-chheh-pâng, sı̂-kan sı̄ chia̍h chá-khí-tǹg í-āu thâu chı̍t tiám-cheng. Ta̍k ê lâng lóng chai-iáⁿ hit ê sı̂-kan goá tı̄ tha̍k-chheh-pâng teh kı̂-tó. Só͘-í chiū bô lâng lâi kiáu-jiáu. Lí iā tio̍h tı̄ it-tēng ê sı̂-kan kap só͘-chāi lâi kı̂-tó. Goá chhut-goā chē chûn ê sı̂, chiū tı̄ chûn téng chhē chı̍t ūi chin-chió lâng kàu ê só͘-chāi choè goá kı̂-tó ê toē-tiám. Ū kò͘-tēng ê sı̂-kan kap só͘-chāi lâi siú chá-khí-sı̂ ê lêng-siu, goá chiū tû-khı̀ chin-choē kiáu-jiáu. 2. Tuh-ka-chē Lí teh kı̂-tó ê sı̂, kiám bat in-ūi seng-khu loán-jio̍k, ià-siān, tı̀-kàu boē thang hō͘ lí chı̍p-tiong cheng-sı̂n, chiū tuh-ka-chē, ū-sı̂ soà khùn-khı̀. Án-ni tuh-ka-chē chiū chiâⁿ-choè lí kı̂-tó ê that-gāi. Goá khek-ho̍k tuh-ka-chē ê hong-hoat, chiū-sı̄ goá ka-kı̄ kı̂-tó á-sı̄ siú chá-khí-sı̂ lêng-siu ê sı̂, lóng m̄-bat kūi--teh, chē--teh, á-sı̄ khiā--teh. Goá kiâⁿ-lâi kiâⁿ-khı̀, ná kiâⁿ ná kı̂-tó. Chiah-nih choē nı̂ lâi, goá tı̄ kı̂-tó ê sı̂ í-keng kiâⁿ-kè só͘-pah-lí ê lō͘ lah. Tı̄ chit tiong-kan só͘ tit-tio̍h ê hok-khı̀, sı̍t-chāi chin-choē, só͘-í goá chiū án-ni teh kè-sio̍k. Kiâⁿ-lō͘ sı̄ beh hō͘ seng-khu ióng-chòng choè hó ê ūn-tōng. 3. Lām-sám siūⁿ Tng lí siūⁿ beh choan-sim kı̂-tó ê sı̂, lí chiū teh siūⁿ, kè-e̍k, an-pâi ka-kı̄ chiong-lâi ê sū. Án-ni, Sat-tàn hō͘ lí ê sim lām-sám siūⁿ, bô teh siūⁿ kı̂-tó ê tāi-chı̀. Só͘-í goá chiū toā-siaⁿ kı̂-tó, ná kiâⁿ ná toā-siaⁿ, chiong goá só͘ beh kiû ê sū kı̂-tó, án-ni chiū boē lām-sám siūⁿ. Goá kap Siōng-tè kóng-oē tio̍h chı̍p-tiong goá ê sim-ı̀, chhin-chhiūⁿ goá tı̄ káng-tâi teh káng-tō chı̍t-iūⁿ. Lí nā toā-siaⁿ kı̂-tó, chiū boē lām-sám siūⁿ, oē choan-sim tı̀-ı̀, koh oē chiàu lí eng-kai tio̍h kı̂-kiû ê sū lâi kı̂-tó. Lí kūi--teh tiām-tiām kı̂-tó kap Siōng-tè kau-poê ê sı̂, kám-kak tio̍h sı̂-kan ná oē keng-kè chin bān, ū-sı̂ kı̂-tó soah, chı̍t-ē khoàⁿ sı̂-kan, chiah kè 5 hun-cheng á-sı̄ 10 hun-cheng nā-tiāⁿ. Chóng-sı̄ ná kiâⁿ ná toā-siaⁿ kı̂-tó, lí chiū m̄-chai sı̂-kan keng-kè hiah-nih kín. Án-ni, tio̍h kı̂-tó joā kú? Tio̍h kı̂-tó kàu kái-koat it-chhè ê būn-toê, kı̂-tó kàu Siōng-tè ū èng-ún. Chit-hō ê kı̂-tó, chiū chiâⁿ-choè kóng boē chı̄n ê hoaⁿ-hí kap khoài-lo̍k.