Siōng-tè Só͘ Beh Ēng Ê Lâng 15

Tē 15 Chiuⁿ Tek-sèng Ê Seng-oa̍h “Chóng-sı̄ kám-siā Siōng-tè , I hō͘ lán tùi lán ê Chú Iâ-so͘ Ki-tok tit-tio̍h khah-iâⁿ” (I Ko-lı̂m-to 15:57). Choè chı̍t-ê Ki-tok-tô͘, tē-it pi-siong ê keng-giām chiū-sı̄ choē ê chûn-chāi kap i ê koân-sè. Kin-á-jı̍t ū Lô-má Jı̂n-su tē 8 chiuⁿ só͘ kı̀-chài koân-soaⁿ-téng ê seng-oa̍h, bı̂n-á-jı̍t tò-tńg kàu Lô-má Jı̂n-su tē 7 chiuⁿ só͘ kóng chhin-chhiūⁿ soaⁿ-kok ê seng-oa̍h; kin-á-jı̍t tı̄ èng-ún ê toē tek-sèng, bı̂n-á-jı̍t beh tò-tńg kàu khòng-iá keng-kè sit-pāi ê seng-oa̍h,------che chiū-sı̄ goá só͘ teh kóng tē-it pi-siong ê keng-giām. Siōng-tè kóng: “Choē-ok bô koh koán-hat lín.” Pó-lô tı̄ Lô-má Jı̂n-su tē 7 chiuⁿ ê lō͘-bé, chin khó͘-thàng án-ni kóng: “Khó͘ ah, goá ê choē lâng ! Chı̄-chūi beh kiù goá thoat-chhut chit ê tı̀-kàu sí ê thé ah?” Sûi-sı̂ chiū ū chhin-chhiūⁿ tùi thiⁿ-téng lâi ê siaⁿ kā i kóng: “Kám-siā Siōng-tè sı̄ tùi lán ê Chú Iâ-so͘ Ki-tok”. Chí-ū oá-khò I, lán chiah oē khah-iâⁿ choē-ok ê koân-sè. Nn̄g Chióng Ê Choē Choē hun choè 2 chióng; chı̍t chióng sı̄ goā-bı̄n ê, chiū-sı̄ lán só͘ chai ê, chhin-chhiūⁿ thâi-lâng , chiú-chùi, kan-ı̂m, lán khoàⁿ oē tio̍h ê choē; iáu hı̍t chióng sı̄ lāi-bı̄n ê, chiū-sı̄ hoân-ló, iu-chhiû, oàn-hūn, siū-khı̀, oàn-tō͘, ok-to̍k, bô chheng-khı̀ ê liām-thâu, bô beh sià-bián pa̍t-lâng ê kè-sit, chiah-ê sı̄ ún-ba̍t ê choē. Lán tı̄ chia só͘ beh kóng ê, m̄-sı̄ goā-bı̄n ê choē, in-ūi tit-kiù ê lâng , í-keng tùi khoàⁿ oē tio̍h ê choē tit-tio̍h tháu-pàng, nā bô chiū boē thang chèng-bêng í-keng chhut-sí jı̍p-oa̍h lah. Taⁿ iáu ū khoài-khoài tı̂ⁿ-poàⁿ lí ê choē, chhin-chhiūⁿ lí ka-kı̄ ê iáⁿ, tè-tiâu tı̄ lí, lí nā tâu-hâng chiah-ê, Siōng-tè boē thang ēng lí. “Goá nā sim-lāi chù-tiōng choē-ok, Chú tek-khak bô beh thiaⁿ”. Ap-chè Choē-ok Kap Bô Choē Ê Oân-choân Ap-chè choē-ok á-sı̄ tû-khı̀ choē-ok ê pún-sèng, hit nn̄g-kù oē lóng bô kı̀-chài tı̄ Sèng-keng, só͘-í goá bô beh kóng i. Goá kam-goān hō͘ goá ê siūⁿ-hoat ū chhò-gō͘, iā bô beh hō͘ goá ê sim ū m̄-tio̍h; goá kam-goān hō͘ goá ê lí-lūn ū chhò-gō͘, iā m̄-ài goá ê só͘ choè ū m̄-tio̍h. Goá beh choè chı̍t-ê tek-sèng ê Ki-tok-tô͘. Ta̍k-pái goá nā siūⁿ tio̍h ap-chè choē-ok, goá chiū siūⁿ tio̍h chı̍t-ê kò͘-sū. Ū chı̍t-ê Kùi-keh-hoē ê lāu hū-jı̂n-lâng , tı̄ i chin siū-khı̀ ê sı̂, iáu-kú oē thang bı̄n ū chhiò-iông. Ū chı̍t-ê chheng-liân lâng mn̄g i kóng: Goá sı̍t-chāi boē bêng-pe̍k, tı̄ chit khoán chêng-hêng lí iáu oē thun-lún bô siū-khı̀. Chit-ê ka-kı̄ lia̍h-choè chai-iáⁿ tek-sèng pı̀-koat ê lāu hū-jı̂n-lâng kā i kóng: Chóng-sı̄ lí bô khoàⁿ tio̍h goá sim-lāi moá-pak ê siū-khı̀. Bô-lūn khoàⁿ oē tio̍h, á-sı̄ ún-ba̍t tı̄ sim-lāi ê, lóng kāng-khoán sı̄ siū-khı̀. Sui-jiân lí oē ap-chè i, bô hō͘ pa̍t-lâng khoàⁿ tio̍h, chóng-sı̄ Siōng-tè lóng ū khoàⁿ tio̍h; kàu ū chı̍t jı̍t hiah-ê siū-khı̀ lóng beh lō͘-hiān. Lí ê siū-khı̀ bô-lūn sı̄ khoàⁿ oē tio̍h, á-sı̄ ún-ba̍t tı̄ lāi-bı̄n, hoān-nā siū-khı̀, chiū m̄-sı̄ tek-sèng. Koh ū chı̍t-ê kò͘-sū. Ū nn̄g ê gín-ná teh sio-ián, chóng-sı̄ hō͘ lâng siūⁿ boē kàu, hit-ê soè-hàn ê ián-tó pí i khah toā-hàn ê, koh khiâ tı̄ i ê téng-bı̄n. Khiā tı̄ piⁿ-á ê lâng mn̄g kóng: Lí í-keng iâⁿ i lah, siáⁿ-sū iáu-kú khiâ tı̄ i ê seng-khu, m̄ hō͘ i khí-lâi nih? Hit ê gín-ná kóng: Goá ū kám-kak tio̍h i chún-pı̄ beh hoan-sin khí-lâi ián goá. Hiaⁿ-tı̄ chí-bē, Chú Iâ-so͘ oē tháu-pàng lí, hō͘ lí lāi-bı̄n ê choē bô ká-kún, boē hoan-sin khí-lâi. Ki-tok-kàu Soan-tō-hoē ê chhòng-pān-jı̂n, Soan-sı̀n Phok-sū (Dr. A. B. Simpson) án-ni kóng: Tı̄ Iâ-so͘ ū it-chhè ê hong-sēng, Iâ-so͘ sı̄ it-chhè. Ū choē-choē lâng teh siūⁿ, sı̀n tō-lí chiū oē tek-sèng, nā-sı̄ āu-lâi chiah chai, tek-sèng sı̄ tı̄ Chú Iâ-so͘, chiū tùi in ê sit-pāi chhut-lâi, jı̍p tı̄ pó-huih só͘ sio̍k-hoê êng-kng ê tek-sèng. Kū-iok Ê Lē “M̄-bián kiaⁿ, choè lín khiā-teh, khoàⁿ Iâ-hô-hoa kin-á-jı̍t ūi-tio̍h lín só͘ beh kiâⁿ ê chín-kiù;......Iâ-hô-hoa beh ūi lín kau-chiàn, choè lín tiām-tiām, bo̍h choè-siaⁿ” (Chhut Ai-kı̍p-kı̀ 14:13, 14). Siat-sú ta̍k ê Ki-tok-tô͘ tı̄ lêng-sèng ê lō͘-tô͘, chı̍t-pō͘ chı̍t-pō͘ teh kiâⁿ ê sı̂, lóng oē kóng, kau-chiàn m̄-sı̄ goá ê, sı̄ Siōng-tè ê, án-ni sit-pāi kap tek-sèng chiū oē hun chin bêng. “Iok-su-a oá-kūn Iâ-lı̄-ko ê sı̂ kia̍h-ba̍k khoàⁿ, khoàⁿ-kı̀ⁿ ū chı̍t-lâng chhiú pu̍ih-to, khiā tı̄ i ê tùi-bı̄n; Iok-su-a kūn-oá i, mn̄g i kóng, Lí sı̄ ūi goán ê, á-sı̄ ūi goán ê tùi-te̍k ah? I ı̀n kóng, Bô, goá lâi sı̄ choè Iâ-hô-hoa ê kun-tiúⁿ” (Iok-su-a 5:13,14). Iok-su-a hit sı̂ bô kóng: Kun-tiúⁿ, goá chin hoaⁿ-hí lí lâi, nā-sı̄ goán bô su-iàu lí ê pang-chān, goá ū toā-tı̄n ê kun-tūi, Iâ-lı̄-ko put-kò sı̄ chı̍t-ê sió-siâⁿ nā-tiāⁿ, m̄-bián lô-hoân lí goán iā oē kong-chhú i. Siat-sú i nā án-ni kóng, Iâ-lı̄-ko siâⁿ kiám-chhái boē tó-hoāi. Chóng-sı̄ Iok-su-a kóng: “Goá ê Chú bēng-lēng lô͘-po̍k sím-mı̍h?” Kiat-kó Iâ-hô-hoa ê kun-tiúⁿ ū toā koân-lêng, Chú ê sù-chiá chiong Iâ-lı̄-ko ê siâⁿ-chhiûⁿ phah tó kàu pı̂ⁿ-pı̂ⁿ. Hiān-chāi, Iâ-hô-hoa ê kun-tiúⁿ khiā tı̄ chia tùi lán kóng: Lí í-keng sit-pāi, hit-ê khoài-khoài tı̂ⁿ-poàⁿ lí ê choē khah iâⁿ lí, taⁿ hō͘ goá lâi choè, goá beh thoè lí kau-chiàn, hō͘ goá choè lí ê Tek-sèng-chiá. Goá beh thoè lí phah iâⁿ tùi-te̍k, hō͘ lí ū-hūn tı̄ chit-ê tek-sèng. Lí khoàⁿ, che kiám m̄-sı̄ kı̂-biāu ê sū mah? Goá Beh Chhiáⁿ Iâ-so͘ Khı̀ Khui-mn̂g Ū chı̍t ê sian-siⁿ, mn̄g chı̍t-ê tit-kiù bô kú ê cha-bó͘ gín-ná kóng: Hiān-chāi Iâ-so͘ tı̄ tó-lo̍h? I siūⁿ-liáu chiū chhiò-chhiò kóng: Tı̄ goá ê sim-lāi. Sian-siⁿ koh mn̄g i kóng: Siat-sú bı̂n-á-jı̍t Sat-tàn lâi phah lí ê sim-mn̂g, lí beh cháiⁿ-iūⁿ? I ı̀n kóng: Goá beh chhiáⁿ Iâ-so͘ khı̀ khui-mn̂g. Lí nā iáu m̄-chai tek-sèng ê pı̀-koat, Sat-tàn ēng goân-lâi ê chhı̀-thàm, ēng khoài-khoài tı̂ⁿ-poàⁿ lí ê choē lâi phah lí ê sim-mn̂g, lí it-tēng oē koáⁿ-kín cháu-khı̀ khui-mn̂g. Sat-tàn tùi só-sı̂-khang khoàⁿ-kı̀ⁿ chiū àm-tiong hoaⁿ-hí, in-ūi í-chêng bat chin-choē pái khah-iâⁿ lí, i chai-iáⁿ chit pái iā oē koh khah-iâⁿ lí. Lí chiong mn̂g khui chı̍t-phāng, kap i kóng-oē, tı̄ lí iáu-kú teh siūⁿ chiah-ê chhı̀-thàm ê sı̂, bô tiûⁿ-tı̂ ê tiong-kan, i ê kha chiū ta̍h jı̍p mn̂g lâi, choân-sin iā lóng jı̍p-lâi, án-ni, lí chiū koh sit-pāi lah. Siat-sú lí í-keng chai tek-sèng ê pı̀-koat, Sat-tàn lâi phah lí ê sim-mn̂g, lí chiū beh chhiáⁿ Iâ-so͘ khı̀ khui-mn̂g. Hit-sı̂ Chú beh kóng, Lí thang tiām-tiām toà chia, sı̀n-khò Goá, Goá beh khı̀ tùi-hù lí ê kiû-siû. Sat-tàn tùi só-sı̂-khang khoàⁿ-tio̍h ta̍k pái kau-chiàn lóng tek-sèng ê Iâ-so͘ beh lâi khui-mn̂g, Sat-tàn chiū koáⁿ-kín tô-cháu. Iâ-so͘ toā khui lí ê sim-mn̂g, khoàⁿ-kı̀ⁿ Sat-tàn í-keng cháu khı̀, chiū beh tùi lí kóng: Lí í-keng tek-sèng lah. Hit sı̂ lí beh chin gông-ngia̍h kóng: Chú ah! Goá kan-ta chē tı̄ chia sı̀n-khò Lí nā-tiāⁿ, goá lóng bô choè sím-mı̍h, sı̄ lí khah iâⁿ i. Chú beh kóng: Tùi taⁿ í-āu, lí kap Goá án-ni lâi kau-chiàn, lí tiām-tiām chē teh, sı̀n-khò Goá, Goá chiū chhut-khı̀ kau-chiàn, āu-lâi tńg-lâi chiū chiong tek-sèng ê kong-lô hō͘ lí. Hiaⁿ-tı̄ chí-bē, ū lâng thoè lán kau-chiàn, che kiám m̄-sı̄ êng-kng koh kı̂-biāu ê sū mah? Kı̀-jiân ū lâng thoè lán kau-chiàn, lán chiū boē tio̍h-siong, khó-sioh choē-choē Ki-tok-tô͘ bô beh án-ni choè, lán lóng ài ka-kı̄ kap tùi-te̍k kau-chiàn, bô ài hō͘ pa̍t-lâng thoè lán kau-chiàn. Khah-iâⁿ Sat-tàn ê, chí-ū Chú Iâ-so͘ Ki-tok, Sat-tàn nā lâi beh chhē lí, lí tio̍h khı̀ chhiáⁿ I thoè lí kau-chiàn, Sat-tàn chiū oē su. Chú thoè lí kau-chiàn, sèng-lı̄ chiū-sı̄ lí ê, lí siūⁿ, kiám ū pí che koh-khah hó ê tāi-chı̀ mah? Chit Khoán Ê Seng-oa̍h Kiám Ū Khó-lêng mah? Iâ-so͘ Ki-tok ū pó-siú lí tit-tio̍h tia̍p-á-kú ê tek-sèng, I kiám boē pó-siú lí chı̍t jı̍t, chı̍t ge̍h-jı̍t á-sı̄ chı̍t nı̂ kú lóng tek-sèng mah? Pí-tek chù-sı̂n khoàⁿ Iâ-so͘, i chiū oē tı̄ chúi-bı̄n kiâⁿ, chóng-sı̄ i ê ba̍k-chiu chı̍t-ē lı̄-khui Iâ-so͘, chiū tı̍t-tı̍t tı̂m lo̍h-khı̀; nā-sı̄ i koh-chài chù-sı̂n khoàⁿ Iâ-so͘, i chiū oē thang koh tı̄ chúi-bı̄n kiâⁿ. Lí nā sı̂-siông kap Chú Iâ-so͘ choè-hoé, lí chiū ta̍k-sı̂ lóng oē tek-sèng. Ū chı̍t-ê Sèng-si ê chok-chiá Hoâi-thek (Major Whittle), tha̍k tio̍h Sèng-si Si-khek goá khiàm-ēng Chú, i chiū tit-tio̍h kám-tōng kóng, Ta̍k-sı̂ goá lóng khiàm-ēng I. Āu-lâi, chiū koh siá chı̍t siú Sèng-si Sı̂-sı̂ tit pó-siú tı̄ I ê thiàⁿ-thàng. Tio̍h sı̂-sı̂ tiàm tı̄ Chú Iâ-so͘, lí chiū oē chiâⁿ-choè chı̍t-ê tek-sèng ê Ki-tok-tô͘. Tit-tio̍h chı̍t-pái ê tek-sèng ê keng-giām, choa̍t-tùi m̄-sı̄ hō͘ lí tòng kàu kui-sı̀-lâng . Beh Cháiⁿ-iūⁿ Choè? Tāi-seng tio̍h ka-kı̄ tı̄ Siōng-tè ê bı̄n-chêng, jı̄n kè-khı̀ it-chhè ê choē, koh tio̍h thiat-tí hoán-hoé, in-ūi Chú kóng: “Lán nā jı̄n lán ê choē, I sı̄ chin-sı̍t kong-gı̄, beh sià-bián lán ê choē”. lâng nā jı̄n choē, chiū tit-tio̍h sià-bián; choē tit-tio̍h sià-bián chiū tit-tio̍h soé-chheng-khı̀. “I ê Kiáⁿ Iâ-so͘ ê huih soé-tû lán lóng-chóng ê choē” (I Iok-hān 1:7). Ū oân-choân koh thiat-tí ê jı̄n-choē, tit-tio̍h soé chheng-khı̀ sià-bián í-āu, lí chiū hó-táⁿ chiap-la̍p Iâ-so͘ Ki-tok choè lí tek-sèng ê Chú. Chêng lí bat chiap-la̍p I choè Kiù-chú, taⁿ tio̍h khui lí ê sim-mn̂g, chiap-siū I choè lí tek-sèng ê Chú. Í-sek-laı̍t peh-sı̀ⁿ chhut Ai-kı̍p liáu-āu, m̄-nā kè Âng-hái, koh tio̍h kè Iok-tàn-hô. Lí ê tit-kiù chhin-chhiūⁿ kè Âng-hái, chóng-sı̄ lí tio̍h ài koh kè Iok-tàn-hô-------chiū-sı̄ tek-sèng ê seng-oa̍h. Lí ū chiap-la̍p Iâ-so͘ Ki-tok choè lí tek-sèng ê Chú mah? Kiám-chhái lí tı̄ Chú ê un-tián lâi chı̀n-pō͘, chóng-sı̄ tek-khak tio̍h ū chı̍t-ê chhut-hoat tiám. Hoān-sū lóng ū khí-tiám, lí nā bô khai-sí, chiū boē thang choè sím-mı̍h. Tek-sèng iā tio̍h ū chı̍t-ê khai-sí, hiū-sı̄ lı̄-khui khòng-iá kàu èng-ún ê só͘-chāi; iā sı̄ tùi sit-pāi chhut-lâi ta̍h jı̍p tı̄ tek-sèng ê sı̂. Lí Nā Sit-pāi Beh Cháiⁿ-iūⁿ? Lí khai-sí kiâⁿ thiⁿ-lō͘, siūⁿ beh kè tek-sèng ê seng-oa̍h, chóng-sı̄, ū-sı̂ kiám-chhái koh-chài sit-pāi, hit sı̂ lí chiū chin sit-chı̀ kóng: Kó-jiân boē thang sı̍t-hêng, goá boē thang khah-iâⁿ. Nā-sı̄ hiaⁿ-tı̄ chí-bē, chı̍t-ê khai-sí teh o̍h kiâⁿ ê gín-ná, siông-siông oē poa̍h-tó. I boē tó tı̄ thô͘-kha kóng: Bô lō͘-ēng, goá khoàⁿ pa̍t-lâng teh kiâⁿ-lō͘, nā-sı̄ goá chiū lóng boē hiáu kiâⁿ. I oē khàu chin thiám, āu-lâi beh koh khí-lâi kiâⁿ, i iā oē koh poa̍h-tó kúi-nā-pái, chóng-sı̄, kàu-bé, i chiū ka-kı̄ oē kiâⁿ lah. I o̍h kiâⁿ ê sı̂ oē poa̍h-tó, in-ūi i ê kha iáu nńg-chiáⁿ, bô la̍t, tio̍h ióng-chòng chiah oē kiâⁿ. Lí sio̍k-lêng ê kha iáu nńg-chiáⁿ, tı̄ kè-khı̀ m̄-bat kiâⁿ tek-sèng ê lō͘, só͘-í tı̄ khí-thâu ū poa̍h-tó iā m̄-thang loé-chı̀. Lí ū sı̀n Iâ-so͘ choè lí tek-sèng ê Chú, tùi Siōng-tè jı̄n-choē, kiû I sià-bián, chhiáⁿ I pang-chān, āu-lâi koh khai-sí. Kiat-kó, chiū boē koh poa̍h-tó lah, iā in-ūi Chú Iâ-so͘ tiàm tı̄ lí ê sim-lāi teh oa̍h, lí chiū chiâⁿ-choè chı̍t-ê tek-sèng ê Ki-tok-tô͘. Lí Thang Keng-kè Tek-sèng Ê Seng-oa̍h Tio̍h kı̀-tit, lí m̄-bat ū tek-sèng ê seng-oa̍h, lí ka-kı̄ iā bô hoat-tō͘, chí-ū Chú Iâ-so͘ Ki-tok bat keng-kè tek-sèng ê seng-oa̍h. Nā án-ni, tek-sèng ê seng-oa̍h sı̄ sím-mı̍h? Tek-sèng ê seng-oa̍h chiū-sı̄ loē-chāi ê Ki-tok, tùi goā-bı̄n khoàⁿ oē tio̍h ê seng-oa̍h. I tùi Sèng Sı̂n ê koân-lêng lâi tiàm tı̄ lán ê sim-lāi, chiū tùi lāi-bı̄n oa̍h-chhut I ê khoán-sit, án-ni, pa̍t-lâng chiū oē khoàⁿ-tio̍h tek-sèng ê seng-oa̍h. Lí chiū chai, che m̄-sı̄ ka-kı̄ teh oa̍h, chiū-sı̄ Iâ-so͘ Ki-tok tiàm tı̄ lí, thong-kè lí teh oa̍h-chhut tek-sèng ê seng-oa̍h. Che m̄ sı̄ lí ka-kı̄ choè oē kàu ê seng-oa̍h, chóng-sı̄ I chiū oē. Só͘-í tio̍h hō͘ Siōng-tè choè kang, hō͘ I tiàm tı̄ lí ê lāi-bı̄n, che chiū-sı̄ tek-sèng ê seng-oa̍h. “Chóng-sı̄ kám-siā Siōng-tè , I hō͘ lán tùi lán ê Chú Iâ-so͘ Ki-tok tit-tio̍h khah-iâⁿ”. Tit-tio̍h khah-iâⁿ m̄ sı̄ tùi lán ê ló͘-le̍k, hùn-tò͘, khó͘-chiàn, sı̄ tùi lán ê Chú Iâ-so͘ Ki-tok lâi khah-iâⁿ. Che sı̄ un-tián, sı̄ lé-mı̍h, lí boē thang thàn lâi tit-tio̍h, iā boē kham-tit tit-tio̍h ê, sı̄ I siúⁿ-sù ê, tùi Chú Iâ-so͘ siúⁿ-sù hō͘ lán ê. Lí nā siūⁿ beh choè chı̍t ê tek-sèng ê Ki-tok-tô͘, tio̍h chiap-la̍p I choè tek-sèng ê Kiù-chú, tio̍h hō͘ I tiàm tı̄ lí ê lāi-bı̄n, siông-siông tı̄ kı̂-tó, tha̍k Sèng-keng kap Chú Iâ-so͘ kau-poê. Án-ni kap I saⁿ-tâng kiâⁿ, I chiū beh thong-kè lí, hián-bêng I pún-sin, che chiū-sı̄ tek-sèng ê seng-oa̍h. Lí ū ài chit khoán ê seng-oa̍h á-bô? Nā ū, tio̍h sêng-jı̄n lí ê sit-pāi, chiap-la̍p Ki-tok choè lí tek-sèng ê Chú, hō͘ I tı̄ lí lāi-bı̄n thong-kè lí oa̍h-chhut I êng-kng koh tek-sèng ê seng-oa̍h.