Siōng-tè Só͘ Beh Ēng Ê Lâng 16

Tē 16 Chiuⁿ Lâng Ê Tı̀-hūi Kap Siōng-tè Ê Koân-lêng Pó-lô tùi Hui-lı̍p-pí ê kàu-hoē kóng: “Bô oá-khò jio̍k-thé.” Chit kù oē iā-sı̄ lán hiān-kim choè su-iàu ê. Iâ-so͘ Ki-tok ê kàu-hoē tú-tio̍h toā koh giâm-tiōng ê gûi-hiám, chiū-sı̄ ná lâi ná choē lâng teh khò sè-sio̍k ê tı̀-hūi, m̄-sı̄ teh khò Siōng-tè ê toā koân-lêng. Lán ēng chı̍t-ê lē lâi kóng. Ū chı̍t-ê ài piān-lūn ê lâng , siat-sú lí mn̄g i kóng: Lí sı̄ Ki-tok-tô͘ mah? I chiū ı̀n kóng: Goá chin ài chai-iáⁿ Kai-ún ê bó͘ sı̄ tùi tá-lo̍h lâi? Lí koh mn̄g i: Pêng-iú ah, lí ê lêng-hûn tit-kiù á-bô? I chiū ı̀n kóng: Lí tùi soé-lé ê khoàⁿ-hoat cháiⁿ-iūⁿ? Lí koh kóng: Lí tāi-seng tio̍h chiap-siū Ki-tok choè Kiù-chú, chiah lâi kóng chit-ê, in-ūi soé-lé kap lí ê tit-kiù bô koan-hē. I beh mn̄g: Sèng-keng lāi ū kóng, jı̍t-thâu bat thêng tı̄ thiⁿ ê tiong-ng, lí ū sı̀n á-bô? Lí koh kóng: Pêng-iú ah, lí su-iàu Iâ-so͘, goá beh khǹg lí chit-sı̂ tio̍h chiap-la̍p I choè Kiù-chú. I beh ı̀n kóng: Án-ni tio̍h jı̍p tı̄ tó chı̍t-keng kàu-hoē? Choè-āu lí kóng: Nā bô sı̀n Chú Iâ-so͘, jı̍p tı̄ sím-mı̍h kàu-hoē to bô lō͘-ēng, lí ū beh chiap-la̍p I choè Kiù-chú mah? Án-ni lí beh kap i thó-lūn, beh hō͘ i khoàⁿ-tio̍h ka-kı̄ ê su-iàu; in-ūi lí nā ı̀n-tap i ê būn-toê, i chiū beh kap lí piān-lūn. Chí-ū kap i kóng-khí i lêng-hûn tit-kiù ê sū, Sèng Sı̂n kín-bān chiū oē kám-tōng i hoán-hoé. Chı̍t Ê Chho͘-sı̀n Ê Ki-tok-tô͘ Ū chı̍t ê sı̀n Chú bô-joā-kú ê lâng , i lóng m̄-chai beh cháiⁿ-iūⁿ choè kò-jı̂n pò͘-tō ê kang, chóng-sı̄ i chí-ū kı̀-tiâu chı̍t-chat Sèng-keng. Ū chı̍t pái i chio chı̍t ê lâng sı̀n Chú. Hit lâng ı̀n kóng: Goá bô sı̀n Ki-tok. Chho͘-sı̀n ê Ki-tok-tô͘ kóng: “M̄ sı̀n ê lâng í-keng siū sím-phoàⁿ.” Hit lâng koh kóng: Goá iā bô sı̀n Sèng-keng. Hit ê Ki-tok-tô͘ kóng: Án-ni iā boē kái-piàn che sū-sı̍t, in-ūi Siōng-tè kóng: “M̄ sı̀n ê lâng í-keng siū sím-phoàⁿ.” Hit lâng chiū siū-khı̀ kóng: Siōng-tè ? Goá kiám bô kā lí kóng goá bô sı̀n Siōng-tè mah? Goá kā lí kóng, sè-kan bô Siōng-tè . Chho͘-sı̀n ê lâng kóng: Nā-sı̄ goá beh koh kóng, “M̄ sı̀n ê lâng í-keng siū sím-phoàⁿ.” Kiat-kó hit-ê bô sı̀n Siōng-tè ê, chin siū-khı̀ ná kiâⁿ ná mā koh chiù-chó͘, chiū chhut-khı̀. Só͘-í chit-ê chho͘-sı̀n ê Ki-tok-tô͘ siū-chı̀ koh kiàn-siàu, ai-siong ka-kı̄ ê bô tı̀-sek. I koh sêng-sim pek-chhiat kı̂-tó kiû Sèng Sı̂n choè kang. Sèng Sı̂n kó-jiân choè kang. Hit-ê m̄ sı̀n ê lâng tńg-khı̀, hit àm boē khùn tit, tı̄ bı̂n-chhn̂g hoan-lâi hoan-khı̀, i só͘ khoàⁿ tāng ài kap lâng piān-lūn ê būn-toê, chı̍t-tiâu chı̍t-tiâu koh siūⁿ khí-lâi. Chóng-sı̄ i chiū thiaⁿ-kı̀ⁿ chit-kù giâm-siok ê oē, “M̄ sı̀n ê lâng í-keng siū sím-phoàⁿ.” Kàu-bé i tòng boē tiâu, chiū khí-lâi kūi tı̄ thô͘-kha kı̂-tó kóng: Siōng-tè ah, nā-sı̄ chin-chiàⁿ ū Siōng-tè , kiû Lí kiù goá, chiong Lí ê Kiáⁿ hián-bêng hō͘ goá khoàⁿ, koh pang-chān goá sı̀n I. Bô kú i chiū tit-tio̍h tiàm tı̄ Chú Iâ-so͘ lāi-bı̄n ê hoaⁿ-hí kap khoài-lo̍k. Siōng-tè ê Oē pí it-chhè siang-bı̄n ê kiàm khah lāi koh ū khùi-la̍t. Siōng-tè chí-ū èng-ún beh chiok-hok I ê Oē. M̄-thang piān-lūn, tio̍h ēng Siōng-tè ê Oē. Sèng-keng kóng, Siōng-tè beh hō͘ I ê Oē heng-thong. Só͘-í tio̍h thoân Siōng-tè ê Oē. Pó-lô Ê Thoân-tō “Hiaⁿ-tı̄ ah, goá chêng chiū-kūn lín, bô ēng chhim-tı̂m ê giân-gú, á-sı̄ tı̀-hūi, lâi tùi lín thoân Siōng-tè ê ò-biāu” (I Ko-lı̂m-to 2:1). Pó-lô sı̄ chı̍t ê chin ū ha̍k-būn koh chin ū tı̀-hūi ê lâng , i ū siū chin giâm-keh ê chong-kàu hùn-liān koh chin ū châi-tiāu. Chóng-sı̄ i bô ló͘-le̍k beh choè ū kháu-châi ê lâng , in-ūi i chai-iáⁿ gâu kóng-oē boē-thang kám-tōng lâng hoán-hoé sı̀n Iâ-so͘; tı̀-hūi iā boē-oē. Só͘-í chiū pàng-sak i ê toā ha̍k-būn lâi thoân Chú ê Hok-im. “In-ūi goá koat-toàn tı̄ lín tiong-kan m̄ chai pa̍t hāng, chí ū chai Iâ-so͘ Ki-tok tèng sı̍p-jı̄-kè ê nā-tiāⁿ” (I Ko-lı̂m-to 2:2). Chit khoán ê kò-pe̍k, bo̍k-koài Siōng-tè toā sú-iōng i, in-ūi i bô oá-khò jio̍k-thé. Chiū-sı̄ kóng, i chiong ka-kı̄ ê toā ha̍k-būn lóng khǹg-ba̍t hō͘ lâng khoàⁿ-choè i sı̄ chı̍t ê bô ha̍k-būn ê. I koat-ı̀ m̄ chai pa̍t-hāng, chí-ū chai chı̍t hāng, chiū-sı̄ Iâ-so͘ Ki-tok kap I tèng sı̍p-jı̄-kè nā-tiāⁿ. Tı̄ tng-sı̂, tèng sı̍p-jı̄-kè sı̄ chèng-lâng só͘ khoàⁿ-khin, khoàⁿ-choè hā-chiān ê sū, nā-sı̄ Pó-lô chiū koat-ı̀ beh thoân sı̍p-jı̄-kè ê tō-lí, in-ūi i chai sı̍p-jı̄-kè ū khùi-la̍t, sı̍p-jı̄-kè chiū-sı̄ Hok-im ê tiong-sim kap koân-lêng, nā bô sı̍p-jı̄-kè, chiū bô Hok-im. Pó-lô chai-iáⁿ Siōng-tè ê koân-lêng, só͘-í chiū khı̀ thoân, kiat-kó i ū tit-tio̍h chin-choē hó ê ké-chí. “In-ūi sı̍p-jı̄-kè ê tō-lí, tı̂m-lûn ê lâng khoàⁿ choè gōng, lán tit-kiù ê lâng khoàⁿ choè Siōng-tè ê koân-lêng” (I Ko-lı̂m-to 1:18). “Goá só͘ kóng só͘ thoân ê put-chāi tı̀-hūi hó thiaⁿ ê oē, sı̄ chāi-tı̄ Sèng Sı̂n kap koân-lêng ê chhián-bêng” (I Ko-lı̂m-to 2:4). Pó-lô ê pı̀-koat bô ēng lâng ê tı̀-hūi, ha̍k-būn, hó thiaⁿ ê oē, chí-ū khò Sèng Sı̂n, in-ūi Sèng Sı̂n chiah oē chhián-bêng Hok-im ê koân-lêng. “Nā-sı̄ sio̍k hiat-khı̀ ê lâng bô sêng-siū Siōng-tè ê Sı̂n ê sū; in sı̄ khoàⁿ choè gōng; iā boē-oē bat I, in-ūi tio̍h tùi sı̂n chiah oē chhún-to̍k” (I Ko-lı̂m-to 2:14). Bô têng-thâu-siⁿ, chiū-sı̄ iáu-kú sio̍k hiat-khı̀ ê lâng , in boē bêng-pe̍k Siōng-tè ê sū, in-ūi sio̍k-lêng ê sū in lóng boē koàn-sı̀, koh m̄-chai só͘-í ēng lâng ê lí-lūn, choa̍t-tùi boē-thang ín-chhoā in lâi sı̀n Chú Iâ-so͘. “In-ūi sè-kan kı̀-jiân tùi in ê tı̀-hūi m̄-bat Siōng-tè , Siōng-tè chiū hoaⁿ-hí tùi só͘ soan-thoân ê gōng lâi kiù chiah-ê sı̀n ê lâng ; che lóng sı̄ Siōng-tè ê tı̀-hūi. Nā-sı̄ Siōng-tè kéng sè-kan ê gōng ê, lâi hō͘ tı̀-hūi ê lâng kiàn-siàu; Siōng-tè iā kéng sè-kan ê loán-jio̍k ê lâi hō͘ ióng-chòng ê kiàn-siàu; Siōng-tè iā kéng sè-kan pi-chiān ê, lâng khoàⁿ m̄ chiūⁿ ba̍k ê, í-kı̍p hiah ê bô ê, lâi hoè-bô hiah ê ū-ê; hō͘ kı̀ⁿ-nā ū jio̍k-thé ê tı̄ Siōng-tè ê bı̄n-chêng bô thang khoa-kháu” (I Ko-lı̂m-to 1:21, 27~29). Chiah nih chheng-chhó koh bêng-pe̍k ê oē, nā-sı̄ Pó-lô koh kóng: Sè-kan lâng in só͘ ū ê tı̀-hūi, iā m̄-bat Siōng-tè , i koh kóng: Kiù-un ê kiat-kó sı̄ hō͘ ta̍k ê sı̀n-tô͘ lóng oē hiáu thoân ê------beh thoân Chú Iâ-so͘. Chóng-sı̄ Siōng-tè só͘ beh kéng ê lâng ------chiū-sı̄ sè-kan ê gōng ê, loán-jio̍k ê, pi-chiān ê, kap hiah ê bô ê------lóng-sı̄ “bô oá-khò jio̍k-thé ê”; beh hō͘ hiah ê ū tı̀-hūi ê, ióng-chōng ê, ū tē-ūi, ū sè-le̍k ê lâng kiàn-siàu. Só͘-í lán tio̍h êng-kng I, in-ūi Siōng-tè sı̄ eng-kai tit-tio̍h o-ló ê. Hok-im “In-ūi goá bô lia̍h Hok-im choè kiàn-siàu, in-ūi sı̄ Siōng-tè ê koân-lêng, beh kiù lóng-chóng sı̀n ê lâng ” (Lô-má 1:16). Hok-im chiah sı̄ Siōng-tè ê toā koân-lêng; m̄ sı̄ lí ê tı̀-hūi, ha̍k-būn, hùn-liān, châi-tiāu......Tio̍h kín-sı̄n, m̄-thang hō͘ sio̍k hiat-khı̀ ê tı̀-hūi jia-cha̍h lí ê ba̍k-chiu bô khoàⁿ-tio̍h Hok-im ê toā koân-lêng kap êng-kng. “Lín khı̀ phó͘ thiⁿ-ē, thoân Hok-im hō͘ bān peh-sı̀ⁿ” (Má-khó 16:15). Bô-lūn hù-kùi pı̂n-chiān, lâm-hū ló-iù, ū ha̍k-būn ê á-sı̄ bô tı̀-sek ê, kun-ông, peh-sı̀ⁿ, tı̄ Siōng-tè ê bı̄n-chêng lóng kāng-khoán, “í-keng hoān-choē”, lóng su-iàu Kiù-chú ê chín-kiù. “Goá ê chhùi só͘ kóng-chhut ê oē ia̍h beh án-ni; koat-toàn bô khang-khang tò-tńg lâi Goá chia, sı̄ beh chiâⁿ Goá só͘ hoaⁿ-hí--ê, beh hō͘ Goá só͘ chhe i choè ê sū tit-tio̍h heng-thong” (Í-sài-a 55:11).