Siōng-tè Só͘ Beh Ēng Ê Lâng 18

Tē 18 Chiuⁿ Tio̍h Kín-sı̄n Lí Pún-sin Sù-tô͘ Pó-lô kā Thè-mô͘-thài kóng: “Tio̍h kín-sı̄n lí pún-sin”, chiah-ê sı̄ chin iàu-kín ê oē. Ngá-ko ê chok-chiá án-ni kóng: “In hō͘ goá kò͘-siú phû-tô-hn̂g; Chóng-sı̄ goá ka-kı̄ ê phû-tô-hn̂g, goá bô kò͘-siú” (Ngá-ko 1:6). Choē-choē thoân-kàu-chiá teh kò͘-siú pa̍t-lâng ê phû-tô-hn̂g, chóng-sı̄ hut-lio̍k ka-kı̄ ê phû-tô-hn̂g. Tio̍h kín-sı̄n lí pún-sin. Chúi chí-ū oē tiòng kàu i chúi-goân ê koâiⁿ nā-tiāⁿ, boē oē koh chhèng koâiⁿ. Kāng-khoán, thoân-kàu-chiá ê lêng-sèng cháiⁿ-iūⁿ, boē-iú ê lêng-sèng iā kàu-hia nā-tiāⁿ. Bo̍k-chiá nā sio̍k-lêng, hoē-iú iā sio̍k-lêng; bo̍k-chiá nā sio̍k-sè, hoē-iú iā sio̍k-sè; bo̍k-chiá nā sio̍k hiat-khı̀, hoē-iú iā sio̍k hiat-khı̀; bo̍k-chiá nā ū kiù lêng-hûn ê jia̍t-chêng, hoē-iú iā it-tēng sı̄ chin jia̍t-sim teh kiù lâng ê lêng-hûn; bo̍k-chiá nā ū tı̀-ı̀ goā-kok thoân-tō, hoē-iú iā ū goā-kok soan-kàu ê sim. Sio̍k-gú án-ni kóng: Ū chit khoán ê sian-siⁿ chiū ū hit khoán ê ha̍k-seng. Sı̍t-chāi sı̄ án-ni! Ū sím-mı̍h khoán ê bo̍k-su, chiū ū hit khoán ê hoē-iú. Siat-sú lí chhe-phài chı̍t ê sio̍k hiat-khı̀ ê soan-kàu-su khı̀ goā-kok thoân-tō, gō͘ nı̂ āu, lí khı̀ sı̄-chhat, chiū oē hoat-hiān tio̍h i ê hoē-iú iā-sı̄ sio̍k hiat-khı̀ ê. Tò-péng lâi kóng, lí nā chhe-phài chı̍t-ê sio̍k-lêng ê soan-kàu-su khı̀ goā-kok, goā-nı̂ āu, lí khı̀ khoàⁿ chiū oē khoàⁿ-tio̍h hiah-ê hoē-iú iā-sı̄ sio̍k-lêng ê. Ū hit khoán ê bo̍k-su, chiū ū hit khoán ê hoē-iú. Án-ni thang chai, choè chı̍t-ê sio̍k-lêng ê chí-tō-chiá ê chek-jı̄m, sı̍t-chāi chin tāng. “Tùi jio̍k-thé siⁿ ê sı̄ jio̍k-thé; tùi Sı̂n siⁿ ê sı̄ sı̂n” (Iok-hān 3:6). Tùi chhài-soe siⁿ ê chiū-sı̄ chhài-soe; tùi hı̂ siⁿ ê chiū-sı̄ hı̂; cheng-siⁿ siⁿ cheng-siⁿ, lâng siⁿ lâng ; lóng chiàu i ê lūi, boē thang chham-chhap. Tı̄ chia ū chı̍t ê chin tiōng-iàu ê kà-sı̄, chóng-sı̄ chin chió lâng chai-iáⁿ. Chiū-sı̄ lí choa̍t-tùi boē thang ín-chhoā pa̍t-lâng kàu lí só͘ káng-tō, á-sı̄ só͘ kà-sı̄ ê chúi-chún. Lí chí-ū oē chiong i ín-chhoā kàu lí pún-sin sio̍k-lêng ê chúi-chún nā-tiāⁿ. Lí ka-kı̄ sím-mı̍h khoán, in iā kàu hia nā-tiāⁿ, só͘-í, lí ka-kı̄ tek-khak tio̍h ū chhim-tı̂m ê sio̍k-lêng keng-giām, koh tio̍h pó-chhı̂ che lêng-sèng. Ū choē-choē bo̍k-su kóng chhim-tı̂m ê tō-lí, nā-sı̄ i ê seng-oa̍h bô teh sı̍t-hêng teh chèng-bêng i ê tō-lí; só͘-í hoē-iú iā boē kàu i só͘ kóng ê thêng-tō͘; che choa̍t-tùi choè boē kàu. Bo̍k-su chí-ū oē ín-chhoā hoē-iú kàu i ka-kı̄ ê thêng-tō͘, boē thang chhoā in kàu káng-tō loē-iông ê thêng-tō͘. Lí nā siūⁿ beh tit-tio̍h sio̍k-lêng ê hāu-kó, tio̍h ka-kı̄ tāi-seng sio̍k-lêng. Lí só͘ kà-sı̄, só͘ kóng ê tō-lí, chin hó koh ū loē-iông, chóng-sı̄ hoē-iú bô tùi lí ê káng-tō lâi kái-piàn. In-ūi lí ê seng-oa̍h ka-kı̄ bô teh sı̍t-hêng teh chèng-bêng che tō-lí; lí ê lêng-sèng kàu sím-mı̍h thêng-tō͘, chiah sı̄ koh-khah iàu-kín. Siōng-tè só͘ tiāⁿ-tio̍h ê chhù-sū, sı̄ boē thang kái-piàn ê; lí só͘ chhı̄ ê káu-á, choa̍t-tùi boē piàn-choè lí ê kiáⁿ-jı̂; káu éng-oán sı̄ káu; lí cháiⁿ-iūⁿ teh kà-sı̄, teh hùn-liān i, lóng bô koan-hē. Ké-chí siⁿ ké-chí nā-tiāⁿ, boē koh siⁿ pa̍t-hāng mı̍h. “Tùi jio̍k-thé siⁿ ê sı̄ jio̍k-thé”. Chóng kóng chı̍t kù, tùi sím-mı̍h lâi siⁿ chiū-sı̄ sím-mı̍h. Lí ka-kı̄ nā-sı̄ sio̍k-lêng, só͘ kiat ê ké-chí chiū sio̍k-lêng. Só͘-í Pó-lô tùi Thê-mô͘-thài kóng: “Tio̍h kín-sı̄n lí pún-sin”. Í-siōng só͘ kóng ê, kiat-lūn chiū-sı̄ Pau Un-tek (E. M. Bo͘nds) só͘ kóng chiah ê úi-tāi ê oē: Thoân-kàu-chiá sı̄ lâng , só͘-í Siōng-tè tio̍h chō-chiū chit-ê lâng . Thoân oē ê lâng pí só͘ thoân ê oē khah iàu-kín. Thoân-kàu-chiá pí tō-lí khah iàu-kín. Káng-tō m̄-sı̄ chı̍t, nn̄g tiám-cheng ê piáu-ián nā-tiāⁿ, sı̄ oa̍h-miā ê lâu-chhut. Tio̍h ēng 20 nı̂ ê sı̂-kan, chiah oē hō͘ lâng chiâⁿ-lâng ; chin-sı̍t ê káng-tō sı̄ kui-sı̀-lâng ê tāi-chı̀. In-ūi lâng chı̀n-pō͘, káng-tō iā chı̀n-pō͘; lâng ū khùi-la̍t, só͘ kóng ê tō-lí chiū ū khùi-la̍t; lâng ū sèng-kiat, só͘ kóng ê tō-lí iā sèng-kiat; lâng ū Sèng Sı̂n ê chhiong-moá koh ū iû boah i, só͘ kóng ê tō-lí iā sı̄ Sèng Sı̂n chhiong-moá koh ū boah iû. Só͘ kóng ê tō-lí boē thang ín-chhoā lâng poâⁿ-kè pí káng-tō-chiá koh-khah koâiⁿ ê lêng-sèng. Lêng-sèng sí khı̀ ê lâng , kóng sí ê tō-lí, iā sí ê tō-lí oē hāi-sí lâng . Só͘-í hoān-sū lóng chāi tı̄ káng-tō-chiá lêng-sèng ê thêng-tō͘. Thoân-kàu-chiá chin khoài piàn-choè chit-gia̍p hoà; lâng nā ūi-tio̍h seng-oa̍h lâi thoân tō-lí, chiū choa̍t-tùi boē sêng-kong; chóng-sı̄ i chı̄n-tiong tı̄ só͘ tit-tio̍h ê sú-bēng, chiū-sı̄ bô pò-siû iā beh hoaⁿ-hí thoân tō-lí, chit khoán ê lâng chiū beh toā sêng-kong. Siōng-tè ê Oē, chiū-sı̄ chiâⁿ-choè hé tı̄ i ê kut-lāi teh to̍h, só͘-í bô thoân chiū tòng boē tiâu. I beh put-sı̂ jia̍t-sim thoân tō-lí, nā bô án-ni, chiū sit-lo̍h khí-chho͘ ê thiàⁿ. I beh jı̄n-chin choè i ê kang, Siōng-tè iā beh ēng i lâi chiok-hok pa̍t-lâng . Só͘-í tio̍h kín-sı̄n lí pún-sin.