Siōng-tè Só͘ Beh Ēng Ê Lâng 19

Tē 19 Chiuⁿ Siōng-tè Só͘ Beh Ēng Ê Lâng Siōng-tè só͘ beh ēng ê lâng tio̍h chiâu-pı̄ sím-mı̍h tiâu-kiāⁿ? Goá gián-kiù Siōng-tè ê Oē chiū chhē tio̍h ē-bı̄n só͘ kóng ê tiâu-kiāⁿ: 1. Tio̍h Chai Jı̂n-lūi Ke̍k-kı̂ Pāi-hoāi Nā m̄-sı̄ Siōng-tè hō͘ lán khoàⁿ-bêng jı̂n-lūi ê pún-sèng ke̍k-kı̂ pāi-hoāi, lán thoân Hok-im ê kang-chok chiū choè boē kú-tn̂g. Lán tio̍h chai, jı̂n-lūi í-keng phò-sán lah. Lán tio̍h bêng-pe̍k, jı̂n-lūi lóng sí tı̄ in ê kè-sit kap choē-koà, in-ūi tı̄ lán jio̍k-thé ê lāi-bı̄n bô hó tı̄-teh. Lán tio̍h jı̄m-bat lâng ê sim í-keng pháiⁿ kàu ke̍k-thâu. Lán nā siūⁿ tı̄ lâng ê sim-lāi iáu koh ū tām-po̍h sèng-kiat ê oa̍h-miā, lán thoân Hok-im ê kang-chok chiū boē sêng-kong. In-ūi án-ni lán chiū oē toàn-tēng: Lán chí-ū chiong che tām-po̍h ê hé-chhiⁿ------sèng-kiat ê oa̍h-miā pûn hō͘ i to̍h, í-āu bān-sū lóng oē hó-sè lah. Án-ni chiū oân-choân m̄-bián têng-thâu-siⁿ, bô su-iàu hoán-hoé, in-ūi lâng kı̀-jiân ū oa̍h-miā, chiū m̄-bián koh chiap-siū Siōng-tè ê oa̍h-miā; lâng put-kò sı̄ poē-ge̍k Thiⁿ-pē Siōng-tè teh hòng-tōng, nā hoê-thâu tò-lâi chiū hó! Só͘-í thoân-kàu-chiá ê kang-chok chiū-sı̄ khǹg lâng 180 tō͘ ê kái-piàn, tò-tńg lâi chhē Siōng-tè . Chit khoán ê khoàⁿ-hoat iā sı̄ án-ni kóng, lán lóng sı̄ Siōng-tè ê kiáⁿ-jı̂. Kı̂-sı̍t, che kap Sèng-keng ê kà-sı̄ ū cheng-chha. Lán nā iáu-bē têng-thâu-siⁿ, chiū-sı̄ Sat-tàn ê kiáⁿ-jı̂, oân-choân m̄-sı̄ sio̍k tı̄ Siōng-tè ke-lāi ê lâng , chí-ū tio̍h têng-thâu-siⁿ chiah oē hō͘ lán choè Siōng-tè ê kiáⁿ-jı̂. Só͘-í lán tio̍h jı̄m-bat jı̂n-lūi sı̄ oân-choân pāi-hoāi, tio̍h chai lâng í-keng sí, tit-tio̍h oa̍h-miā chiah oē koh-oa̍h khí-lâi, ka-kı̄ oân-choân bô ǹg-bāng, chí-ū Siōng-tè chiah oē kiù i. Che sı̄ chin iàu-kín ê tiâu-tiāu, thoân-kàu-chiá nā bô tit-tio̍h, chiū boē sêng-kong. 2. Tio̍h Jı̄m-bat Siōng-tè Ê Kiù-un Chiâu-chn̂g Jı̂n-lūi sui-jiân ke̍k-kı̂ pāi-hoāi, nā-sı̄ Siōng-tè ê kiù-un chiâu-chn̂g, oē kái-koat lâng ê su-iàu. Oāⁿ oē lâi kóng, Siōng-tè ū i-tı̄ ê pān-hoat, I ū chiâu-chn̂g ê chún-pı̄, beh hō͘ lâng chhut-sí jı̍p-oa̍h. Ūi-tio̍h ke̍k-kı̂ pāi-hoāi ê jı̂n-lūi, chiū-sı̄ sí tı̄ in ê kè-sit kap choē-koà ê, Siōng-tè ū pı̄-pān beh chín-kiù lâng . Tı̄ 1900 goā nı̂ chêng, tùi I ê to̍k-siⁿ Kiáⁿ, lán ê Chú, I ū pı̄-pān; só͘-í lí, goá teh choè thoân Hok-im ê kang-chok, tio̍h chai-iáⁿ lâng í-keng sí tı̄ in ê kè-sit kap choē-koà, oân-choân bô pān-hoat, pún-sin bô ǹg-bāng. Koh jı̂n-lūi khak-sı̍t phò-sán, nā-sı̄ lán tio̍h bêng-pe̍k, lán ū êng-kng ê Hok-im, chit ūi kı̂-biāu ê Kiù-chú ū siūⁿ boē kàu ê pı̄-pān------oân-choân oē kái-koat jı̂n-lūi choa̍t-bāng ê khó͘-kéng. Tı̄ choân sè-kài bô koh ū chit khoán ê tō-lí, lán tio̍h ēng hoaⁿ-hí kap pá-ak ê sim, khı̀ thoân Chú Iâ-so͘ Ki-tok ê Hok-im, in-ūi khak-sı̀n Hok-im sı̍t-chāi ū kong-hāu. Chiū-sı̄ tē-it bô ǹg-bāng, lı̄-khui Siōng-tè tē-it hn̄g ê lâng , tı̄ choē-ok chhim-ian ê lâng , lóng oē tùi Iâ-so͘ Ki-tok Hok-im ê koân-lêng lâi tit-kiù. Só͘-í Pó-lô kóng, “In-ūi goá bô lia̍h Hok-im choè kiàn-siàu, in-ūi sı̄ Siōng-tè ê koân-lêng beh kiù lóng-chóng sı̀n ê lâng ” (Lô-má 1:16). Hok-im í-goā bô koh ū i-tı̄ ê pān-hoat, che chiah sı̄ lán tio̍h thoân ê tō-lí. Siōng-tè ê Hok-im, chiū-sı̄ jı̂n-lūi ê ǹg-bāng------“Chiū-sı̄ Ki-tok ūi-tio̍h lán ê choē sí” (I Ko-lı̂m-to 15:3). Hok-im oē kái-koat só͘ ū ê būn-toê. Kám-siā Siōng-tè , lán thang ēng choè toā ê khak-sı̀n khı̀ thoân chit-ê Hok-im. Taⁿ, lí nā bô án-ni chhim-sı̀n, tı̄ thoân Hok-im ê kang-chok chiū boē kú-tn̂g, chiū-sı̄ tio̍h bêng-pe̍k jı̂n-lūi ka-kı̄ bô pān-hoat, bô ǹg-bāng, oân-choân phò-sán, nā m̄ sı̀n-khò Hok-im chiū boē tit-tio̍h i-tı̄; nā bô che khak-sı̀n, lí chiū boē sêng-kong. Lí nā m̄-sı̀n jı̂n-lūi sı̍t-chāi pāi-hoāi, sí tı̄ in ê kè-sit kap choē-koà, iā lí ū tit-tio̍h chí-ū chı̍t ê i-tı̄ ê pān-hoat------chiū-sı̄ Chú Iâ-so͘ Ki-tok ê Hok-im, oē kái-koat lâng tē-it thang kiaⁿ ê chêng-hêng, oē hō͘ choē-choē bô ǹg-bāng--ê ū ǹg-bāng; chiū lí thoân Hok-im hō͘ in iā boē sêng-kong. 3. Hiàn-sin Tı̄ Chı̍t-ê Úi-tāi Ê Bo̍k-phiau Pó-lô kóng, “to̍k-to̍k choan-bûn chı̍t hāng,” Pó-lô kui-sı̀-lâng teh choè chı̍t hāng sū nā-tiāⁿ. Lí tı̄ ò͘-tō kiù lêng-hûn ê kang, nā beh sêng-kong, tio̍h bô chhap pa̍t-mı̍h, kui-sı̀-lâng chí-ū choè chı̍t hāng sū, ūi-tio̍h chí-ū chı̍t-ê bo̍k-phiau lâi ló͘-le̍k. Nā koan-sim to-hong-bı̄n, ū choē-choē àn-sǹg, kè-e̍k, koh ài chhap pa̍t-hāng sū, i chiū choè poè-tō ê kang iā boē sêng-kong. Tı̄ jı̂n-seng ê lō͘-thêng ài beh sêng-kong, tio̍h kui-sı̀-lâng chí-ū chı̍t-ê toā bo̍k-phiau, ūi-tio̍h che lâi ló͘-le̍k. Tı̄ kiû-ha̍k ê sı̂-tāi, choa̍t-tùi m̄-thang siūⁿ beh kiat-hun; in-ūi chı̍t hong-bı̄n tha̍k-chheh, chı̍t hong-bı̄n koh hū-khí ka-têng ê chek-jı̄m, tı̄ keng-chè siōng sı̍t-chāi sı̄ chı̍t-ê chin tāng ê tàⁿ. Koh án-ni oē hun-sim, boē thang tı̀-ı̀ ha̍k-gia̍p, thái oē tı̄ i ê sū-gia̍p ū sêng-kong? Oân-sêng ha̍k-gia̍p chiah lâi kiat-hun, kiám m̄-sı̄ khah hó mah? Goá boē liáu-kái cháiⁿ-iūⁿ ū ê thoân-kàu-chiá chı̍t hong-bı̄n thoân-tō, chı̍t hong-bı̄n koh teh choè seng-lí. Siōng-tè kı̀-jiân tiàu lâng lâi thoân Hok-im, i eng-kai tùi thoân Hok-im lâi oa̍h chiah tio̍h, i bô lí-iû tio̍h khı̀ thàn tām-po̍h chı̂ⁿ. I khı̀ choè seng-lí, āu-lâi chiū koan-sim seng-lí, só͘ siūⁿ ê sı̄ seng-lí, chiū boē thang choan-sim thoân-tō, in-ūi thoân-tō kap seng-lí lóng tio̍h ēng sı̂-kan. Thoân tō-lí ê kang su-iàu choan-sim, chiah oē thang choè. Sı̂-kan, cheng-sı̂n, khùi-la̍t lóng tio̍h ēng tı̄ thoân-tō ê kang-chok, koh tio̍h mı̂-jı̍t gián-kiù chiah oē ēng tit. Tio̍h choa̍t-tùi chı̄n-tiong tı̄ Siōng-tè tiàu i lâi choè úi-tāi ê kang-chok. I nā siūⁿ beh thàn tām-po̍h chı̂ⁿ, koan-sim tı̄ chı̍t hāng seng-lí, i chiū boē choan-sim tı̄ Siōng-tè siat-lı̍p i tio̍h choè úi-tāi ê kang-chok. Siu-tō-jı̂n ê khoàⁿ-hoat chin tio̍h; in siūⁿ, tio̍h koaiⁿ tı̄ siu-tō-ı̄ⁿ ê lāi-bı̄n, kap sè-kan bô kan-sia̍p, án-ni chiah oē ēng choân-pō͘ ê sı̂-kan, tı̀-ı̀ tı̄ in ê kang-chok. In siūⁿ tio̍h pàng-sak it-chhè só͘ ài ê, bô chhap sè-kan chiah oē oân-choân ho̍k-sāi Siōng-tè . Sui-jiân in ê hong-hoat m̄-tio̍h, chóng-sı̄ in ê bo̍k-tek kap bo̍k-phiau chin hó. Siōng-tè ê kè-e̍k sı̄ ài lán kap pa̍t-lâng ū óng-lâi, chóng-sı̄ tio̍h choan-sim tı̀-ı̀ tı̄ I. Choè hū-jı̂n-lâng ê, nā bô choan-sim thiàⁿ i ê tiōng-hu, teh loân-bō͘ pa̍t-lâng, i chiū m̄-sı̄ chı̍t-ê hó lú-tek ê; tiōng-hu nā teh ài pa̍t ê hū-jı̂n-lâng , i iā m̄-sı̄ hó ê tiōng-hu. Thoân-kàu-chiá nā teh keng-êng choē-choē sū-gia̍p, thái oē choè chı̍t-ê chı̄n-tiong ê kang-lâng ? Thoân-kàu-chiá tio̍h choè chı̍t-ê kui-sı̀-lâng ū toā bo̍k-phiau ê lâng , i tio̍h kap Pó-lô tâng-sim kóng: “To̍k-to̍k choan-bûn chı̍t hāng”. Pó-lô kóng: “Kı̀ⁿ-nā chhut-kun ê peng bô hō͘ sè-sū tı̂ⁿ-poàⁿ, thang hō͘ chio-bō͘ i ê hoaⁿ-hí” (II Thê-mô͘-thài 2:4). Thê-mô͘-thài tio̍h choè chı̍t-ê choan-sim tı̀-ı̀ ê lâng . Pó-lô kā i kóng, nā siūⁿ beh choè chı̍t-ê sêng-kong ê peng-teng, tio̍h bô hō͘ sè-sū tı̂ⁿ-poàⁿ. Thoân-kàu-chiá iā tio̍h án-ni, i nā beh chiàu Siōng-tè só͘ ài ê lâi ho̍k-sāi I, chiū m̄-thang hō͘ sè-sū tı̂ⁿ-poàⁿ, koan-sim pa̍t-hāng. Lí ài hō͘ Siōng-tè ēng mah? Án-ni, lí beh hoaⁿ-hí hi-seng mah? Lí kiám beh pàng-sak it-chhè, kui-sı̀-lâng choan-bûn chı̍t hāng sū? Lí ū beh hōng-hiàn lí choân-pō͘ ê oa̍h-miā, lâi choè chı̍t hāng sū, bô iông-ún pa̍t-hāng lâi hūn-cha̍p lí ê koan-sim kap chú-ı̀? Lí ū beh chı̍p-tiong sim-ı̀, oân-choân hōng-hiàn pún-sin ho̍k-sāi Siōng-tè mah? Lí kı̀-jiân án-ni choè, Siōng-tè beh ūi-tio̍h I ê êng-kng kap chun-kùi lâi ēng lí, lí thoân-tō ê kang iā oē sêng-kong. 4.Tû-khı̀ Seng-oa̍h Tiong Só͘-ū Ê That-gāi “Goá nā sim-lāi chù-tiōng choē-ok, Chú tek-khak bô beh thiaⁿ”. Che kiám-chhái sı̄ Siōng-tè bô beh ēng lí ê goân-in, phah-sǹg tı̄ lí ê sim-lāi ū ngó͘-siōng, tı̄ lí ê iâⁿ-lāi ū A-kan. Kiám-chhái ū sím-mı̍h tāng-tàⁿ, á-sı̄ sı̍p-koàn lí m̄-khéng pàng-sak, bô tiāⁿ-tio̍h lí m̄ sêng-jı̄n che sı̄ choē-ok, chóng-sı̄ in-ūi che tı̄ lí kap Siōng-tè ê tiong-kan, tı̀-kàu Siōng-tè boē thang ēng lí. Jı̍t-jı̍t lí siūⁿ beh chı̀n-pō͘, chóng-sı̄ ū sím-mı̍h teh thoa lí tò-tńg? Ū sím-mı̍h tāng-tàⁿ beh hō͘ lí tı̂m-lo̍h-khı̀, hō͘ lí boē thang chiàu Siōng-tè só͘ ài lâi cháu hit-ê lō͘-chām? Lí khoàⁿ-choè bô sím-mı̍h lı̄-hāi ê sı̍p-koàn teh chó͘-tòng Siōng-tè ê koân-lêng hián-bêng tı̄ lí ê seng-oa̍h, in-ūi lí m̄-khéng oân-choân pàng-sak, só͘-í Siōng-tè boē thang ēng lí. Choē-ok teh chó͘-tòng lí lêng-sèng ê chı̀n-pō͘, hō͘ Sèng Sı̂n iu-būn; lí nā bô beh éng-oán pàng-sak koh lı̄-khui, choa̍t-tùi bô koh hòng-chhiòng, lí ê seng-oa̍h, kang-chok chiū boē tit-tio̍h Siōng-tè ê koân-lêng kap chiok-hok. Lí nā ài choè chı̍t-ê sêng-kong ê thoân-kàu-chiá, tùi lí só͘ choè ê kang-chok hō͘ lâng hùn-heng, lí tio̍h kap choē-ok toān-choa̍t koan-hē. “Siōng-tè ah, kiû Lí kàm-chhat goá, chai goá ê sim-su; Chhı̀-giām goá, chai goá ê ı̀-sù. Khoàⁿ goá ū sím-mı̍h pháiⁿ só͘-kiâⁿ bô, Chhoā goá kiâⁿ éng-oa̍h ê lō͘” (Si-phian 139:23~24). Kiám-chhái lí chin ū thian-châi, châi-tiāu kap ha̍k-būn, chóng-sı̄ tı̄ lí thoân-tō ê kang-chok, oân-choân sit-pāi; in-ūi tı̄ lí ê seng-oa̍h, tı̄ lí ê sim-lāi ū sím-mı̍h teh hō͘ Sèng Sı̂n iu-būn, tı̀-kàu hō͘ Iâ-so͘ Ki-tok boē thang chiàu I ê sim-ı̀, ūi-tio̍h I ê êng-kng kap chun-kùi lâi ēng lí. Tio̍h hō͘ Siōng-tè kàm-chhat lí, chhı̀-giām lí, hián-bêng lí sim-lāi ê A-kan. Āu-lâi jı̄n-choē hoán-hoé, chheng-khı̀ tı̄ Siōng-tè ê bı̄n-chêng, hō͘ I chiok-hok lí ê kang-chok. 5. Piān-piān Thang Hō͘ Siōng-tè Ēng Kàu taⁿ só͘ kóng ê, sı̄ siau-ke̍k hong-bı̄n ê sū. Siōng-tè choè-toā ê bo̍k-tek chiū-sı̄ ài lán chiong it-seng oân-choân kau hō͘ I, I chiū chiàu I ê chí-ı̀ lâi ēng lán. só͘-í Sèng-keng chı̍t-pái koh chı̍t-pái kà-sı̄ lán kóng: “Tio̍h chiong pún-sin hiàn hō͘ Siōng-tè ”. Sio-hûi sai-hū beh ēng thô͘ choè khı̀-kū ê sı̂, thô͘ nā boē chiàu sai-hū ê ı̀-sù, chiū choè boē sêng. Sai-hū boē thang chiàu i ê ı̀-sù choè só͘ ài ê hûi, in-ūi thô͘ ū mâu-pēng. Hit-ê chó͘-tòng chı̍t-ê tû-khı̀, thô͘ chiū oân-choân hâng-ho̍k sai-hū, i chiū oē chiâⁿ-choè só͘-ài ê hûi. Lí, goá ê seng-oa̍h iā sı̄ án-ni, tio̍h oân-choân kau hō͘ Siōng-tè piān-piān thang ēng, I ê koân-lêng chiah oē tiàm tı̄ lán, koh ūi-tio̍h i ê êng-kng kap chun-kùi I beh ēng lán. I chiah oē chiok-hok lán thoân tō-lí kiù lêng-hûn ê kang-chok. Lán nā iáu ū ka-kı̄ ê ı̀-sù, Siōng-tè chiū boē choè sím-mı̍h. I ê chí-ı̀ tio̍h pı̀ⁿ-choè lán ê ı̀-sù, hit sı̂ I chiah oē chiok-hok lán. Án-ni lán chiū oē kap Chú Iâ-so͘ saⁿ-kap kóng: “Goá ê Siōng-tè ah, Lí ê chí-ı̀, goá hoaⁿ-hí thàn”. Siōng-tè m̄-sı̄ giâm-hat ê chú-lâng , I m̄-bat bián-kióng lán khı̀ choè só͘ m̄-ài ê sū. Tāi-seng I beh kám-tōng lán hō͘ lán kam-goān, āu-lâi lán chiū hoaⁿ-hí sūn-ho̍k I. Oāⁿ oē lâi kóng, I ê chí-ı̀, chiâⁿ-choè lán ê ı̀-sù, āu-lâi lán chiū-sı̄ beh sūn-ho̍k I. Só͘-í lán tio̍h chiong pún-sin oân-choân kau hō͘ Siōng-tè piān-piān thang ēng. Pı̄ⁿ-lâng nā kū-choa̍t i-seng ê i-tı̄, i-seng chiū bô pān-hoat. Pı̄ⁿ-lâng tio̍h chiong pún-sin oân-choân kau hō͘ i-seng, koh tio̍h chiàu i-seng ê chí-tō chia̍h io̍h, án-ni i chiah ū tit-tio̍h i-hó ê ǹg-bāng. Pı̄ⁿ-lâng nā chiàu ka-kı̄ ê ı̀-sù chia̍h i só͘ ài ê io̍h-á, bô beh chiap-la̍p i-seng só͘ khui ê io̍h-á, i-seng chiū boē thang kā i i-tı̄. I tio̍h chiong pún-sin oân-choân kau hō͘ i-seng chiah oē ēng-tit. Lí, goá iā sı̄ án-ni, nā bô chiong pún-sin oân-choân kau hō͘ Siōng-tè piān-piān thang ēng, I chiū boē thang kā lán choè sím-mı̍h. Siōng-tè ài lí oân-choân hâng-ho̍k I, nā bô, I chiū choa̍t-tùi boē boán-chiok, tio̍h chhin-chhiūⁿ chı̍t-ê hoaⁿ-hí kam-goān ê lô͘-châi, chiong pún-sin lóng kau hō͘ I, piān-piān thang ēng, I chiū ūi-tio̍h I ê êng-kng beh ēng lí. 6. Tek-sèng Ê Kı̂-tó Ngá-kok tı̄ kı̂-tó kap Siōng-tè tàu su-iâⁿ. Kin-á-jı̍t, lán teh kı̂-tó ê sı̂, chin chió kap Siōng-tè tàu su-iâⁿ. Lán chá-khí-sı̂ khí-lâi, chiū kūi tı̄ bı̂n-chn̂g, chhùi-lāi kóng kúi-kù chiū sǹg-choè í-keng kı̂-tó liáu; āu-lâi seng-khu ià-siān, ū-sı̂ án-ni chhı̀n-chhái kı̂-tó kúi-kù chiū tó teh khùn. Lán só͘ siūⁿ ê kı̂-tó chiū-sı̄ chı̍t-khoán. Chóng-sı̄ Ngá-kok ê kı̂-tó m̄-sı̄ án-ni, i kui-mı̂ kap Siōng-tè tàu su-iâⁿ, āu-lâi kóng, “Lí nā bô kā goá chiok-hok, goá m̄ pàng Lí khı̀.” Ū lâng lóng m̄-chai kı̂-tó chiū-sı̄ kap Siōng-tè tàu su-iâⁿ, iā m̄-chai tio̍h cháiⁿ-iūⁿ chiah oē khah iâⁿ. Lán nā bô khah iâⁿ Siōng-tè , chiū boē thang khah-iâⁿ lâng ; nā beh khah-iâⁿ lâng , chiū tio̍h tam-tng seng-sán ê kan-khó͘. Chú Iâ-so͘ chai-iáⁿ tı̄ kı̂-tó tio̍h keng-kè seng-sán ê kan-khó͘. I bat thong-mı̂ kı̂-tó; I ê ha̍k-seng siông-siông tı̄ phian-phiah ê só͘-chāi, khoàⁿ-tio̍h I teh kap Siōng-tè kau-poê, piàⁿ-chhut I ê sim-sı̂n, thòng-khó͘ pek-chhiat kı̂-tó. Lí, goá bô sím-mı̍h chai chit-khoán ê kı̂-tó, chóng-sı̄ lán nā bô ha̍k-sı̍p tio̍h cháiⁿ-iūⁿ kap Siōng-tè kau-poê, tı̄ kı̂-tó tam-tng seng-sán ê thòng-khó͘, lán chiū boē sêng-kong. Nā bô án-ni, Siōng-tè chiū boē thang ēng lán, boē thiaⁿ lán ê kı̂-tó, tı̄ lán ê kang-chok êng-kng I pún-sin. Cha-lí-sū Hun-nı̂ (19 sè-kí ê hùn-heng-ka, Charles G. Fiⁿy) chiū ū chit-khoán kı̂-tó ê tāng-tàⁿ. I sı̂-siông kàu chhiū-nâ lāi á-sı̄ phian-phiah ê só͘-chāi, tı̄ Siōng-tè ê bı̄n-chêng thòng-khó͘ kı̂-tó, ū-sı̂ i boē thang ēng oē kóng-chhut i ê kı̂-kiû, chí-ū thó͘-khùi lâu ba̍k-sái, in-ūi sim-lāi kám-kak kı̂-tó ê tāng-tàⁿ kàu hiah tāng. Só͘-í Siōng-tè toā-toā sú-iōng i, hō͘ i chiâⁿ-choè tē-it úi-tāi ê hùn-heng-ka, che lóng m̄ sı̄ thang kı̂-koài ê sū. Siōng-tè pún-sin tùi i ê kang-chok tit-tio̍h êng-kng, in-ūi i chai-iáⁿ tio̍h cháiⁿ-iūⁿ thòng-khó͘ kı̂-tó. kı̀ⁿ-nā Siōng-tè só͘ ēng ê lâng , lóng sı̄ kı̂-tó ê lâng . Lí nā m̄-chai beh cháiⁿ-iūⁿ kı̂-tó, cháiⁿ-iūⁿ kap Siōng-tè tàu su-iâⁿ, cháiⁿ-iūⁿ thòng-khó͘ kı̂-tó, chiū iáu m̄-chai lêng-hûn seng-sán ê kan-khó͘, án-ni, lí chiū m̄-chai beh tit-tio̍h sio̍k-lêng hāu-kó ê ı̀-gı̄. Lí nā ài tı̄ lí ê kang-chok khoàⁿ-tio̍h Siōng-tè ê êng-kng, tē-it iàu-kín, lí tio̍h choè chı̍t-ê oē-hiáu kı̂-tó ê lâng . 7. Chhiong-moá Siōng-tè Ê Oē Ê Chit-bū Ū chin-choē bo̍k-su, ūi-tio̍h beh chún-pı̄ tō-lí chiah hian-khui Sèng-keng lâi tha̍k. Chit khoán lâng tı̄ thoân Hok-im ê kang-chok boē thang chı̀n-pō͘. Lí, goá beh hō͘ lêng-sèng chı̀n-pō͘, lóng tio̍h tha̍k Sèng-keng ê oē. Lán tio̍h chin se̍k Sèng-keng ê loē-iông; beh se̍k, chí-ū chı̍t-ê hong-hoat, chiū-sı̄ tio̍h tha̍k i; tùi Chhòng-sè-kı̀ tha̍k kàu Khé-sı̄-lio̍k, chı̍t pái koh-chài chı̍t-pái it-tı̍t tha̍k, teh tha̍k ê sı̂ tio̍h siūⁿ hit-ê ı̀-sù, tio̍h choè kı̀-hō, tio̍h gián-kiù, hō͘ Siōng-tè ê Oē chhiong-moá lí, koh chiâⁿ-choè lí pún-sin ê. Án-ni, Siōng-tè chiah oē chiàu I ê ı̀-sù ēng lí. Siat-sú lí só͘ beh ēng ê bú-khı̀ bô se̍k, kàu lí beh ēng ê sı̂, chiū put-lı̄ koh toā sún-sit. Lán ê bú-khı̀ chiū-sı̄ Siōng-tè ê Oē, lán nā bô se̍k, koh m̄-chai beh cháiⁿ-iūⁿ ēng, chiū tı̄ thoân Hok-im ê kang-chok boē sūn-lı̄. Siōng-tè ê Oē tio̍h put-sı̂ khǹg tı̄ lán ê sim-lāi, hō͘ lán sûi-sı̂ oē kóng chhut chiah tio̍h. ln2 tio̍h chai-bat Siōng-tè ê Oē, lâi siūⁿ i, hō͘ i chiâⁿ-choè lán pún-sin ê. Só͘-í tı̄ poàⁿ-mı̂ cheng-sı̂n ê sı̂, iā oē-hiáu chı̍t-pái koh chı̍t-pái àm-liām lâi chhiong-moá i chiah tio̍h. Siōng-tè só͘ beh ēng ê, chiū-sı̄ I ê Oē, m̄ sı̄ lán ê oē. Siōng-tè só͘ kóng ê Oē chiah ū koân-lêng. Lán tio̍h ēng Siōng-tè ê Oē, jú ēng chiah oē jú bat i. Só͘-í goá beh koh kóng, lán tio̍h tha̍k Sèng-keng kàu i chiâⁿ-choè lán pún-sin ê, in-ūi bô pa̍t-mı̍h oē thang thoè-oāⁿ jı̄m-bat Siōng-tè ê Oē. 8. Tio̍h Thoân Ū Oa̍h-miā Ê Tō-lí Bô-lūn choè soan-kàu-su khı̀ goā-kok thoân tō-lí, á-sı̄ choè thoân-kàu-chiá thoân Hok-im, nā bô pá-ak só͘ beh thoân ê tō-lí, chiū m̄-thang khı̀ thoân. Che tō-lí chiū-sı̄ “In-ūi Siōng-tè chiong to̍k-siⁿ ê Kiáⁿ siúⁿ-sù sè-kan, hō͘ kı̀ⁿ-nā sı̀n I ê lâng boē tı̂m-lûn, oē tit-tio̍h éng-oa̍h; I thiàⁿ sè-kan kàu án-ni” (Iok-hān 3:16). Lí nā m̄ ài thoân Siōng-tè ê kiù-un hō͘ tı̂m-lûn ê sè-kan lâng ; tùi hiah ê seng-oa̍h tı̄ o͘-àm ê choē-jı̂n soan-kò oē tit-tio̍h éng-oa̍h; lí chiū m̄-thang khı̀ thoân. Lí siáⁿ-sū beh choè thoân tō-lí ê kang? Lí teh thoân Chú ê Hok-im, hit ê bo̍k-tek sı̄ sím-mı̍h? Ūi-tio̍h seng-oa̍h? Khoàⁿ choè ko-siōng ê thâu-lō͘? Hō͘ lí ū miâ-siaⁿ oē kám-tōng lâng ? Nā án-ni, lí khah hó tio̍h khı̀ chhē pa̍t-khoán ê chit-gia̍p, in-ūi Siōng-tè boē thang chiok-hok lí. Lí nā m̄-sı̄ beh thoân Siōng-tè ê tō-lí, beh tùi hiah ê seng-oa̍h tı̄ choē-ok kap o͘-àm ê lâng thoân chin oa̍h ê Kiù-chú, koh tùi in soan-kò “Ki-tok ūi-tio̍h lán ê choē sí”, nā bô beh pò hiah-ê tı̂m-lûn ê chai, “Lí khoàⁿ, Siōng-tè ê iûⁿ-ko, chiū-sı̄ tam-tng sè-kan ê choē ê”, nā bô beh án-ni choè, khah hó tio̍h khı̀ choè pa̍t-hāng, in-ūi thoân-tō ê kang lí bô hūn. Lí káng-tō liáu-āu, hō͘ thiaⁿ-chiòng ê ı̀n-siōng sı̄ sím-mı̍h? Chin hó ê kà-sı̄, á-sı̄ Taⁿ goá chai Iâ-so͘ Ki-tok chin kı̂-biāu! Lí ê bo̍k-tek nā-sı̄ beh kà-sı̄, khah hó tio̍h pàng-sak, in-ūi sè-kan bô su-iàu kà-sı̄, sı̄ su-iàu ū oa̍h-miā ê tō-lí. Ū oa̍h-miā ê tō-lí kap kà-sı̄ oân-choân bô sio-siāng. Lí oē thang khı̀ Sı̂n-ha̍k-ı̄ⁿ ha̍k-sı̍p beh cháiⁿ-iūⁿ kà-sı̄, chóng-sı̄ lí tio̍h khı̀ chhē Siōng-tè chiah oē tit-tio̍h oa̍h-miā ê tō-lí. Kà-sı̄ boē kám-tōng hoē-iú, chóng-sı̄ ū oa̍h-miā ê tō-lí chiū oē. Kà-sı̄ kám-hoà lâng ê tı̀-sek, nā-sı̄ ū oa̍h-miā ê tō-lí chiū kám-tōng lâng ê sim. Só͘-í lán tek-khak tio̍h thoân Ki-tok sı̄ chin koh sı̄ oa̍h ê Kiù-chú. Nā-sı̄ ūi-tio̍h seng-oa̍h, thàn-chı̂ⁿ, miâ-siaⁿ, toē-ūi lâi hiàn-sin tı̄ thoân-tō ê, goá siūⁿ sı̄ thàn-chá lı̄-khui chit tiâu thoân-tō ê lō͘ chiah hó. In-ūi Siōng-tè ê hok-khı̀, choa̍t-tùi boē kàng-lo̍h tı̄ chûn chit-khoán sim ê lâng . Chit sè-kan teh khiàm-ēng thoân Siōng-tè tō-lí ê lâng . Lí tı̄ káng-tâi teh thoân Ki-tok, teh soan-iông chit ūi chin koh sı̄ oa̍h ê Ki-tok, I ê chûn-chāi sı̄ ūi-tio̍h beh bia̍t-bông ê sè-kan, án-ni Siōng-tè tek-khak beh chiok-hok lí, koh ūi-tio̍h I ê êng-kng lâi ēng lí. Án-ni, lí chiū tam-tng tē-it toā ê sú-bēng kap kang-chok, iā chhim-sı̀n lí choa̍t-tùi boē hō͘-hoé khí-thâu ı̀n-tap Siōng-tè ê tiàu-bēng. Kàu lí jı̂n-seng ê kiat-kio̍k, lâi hoê-kò͘ lí ūi-tio̍h Siōng-tè só͘ choè ê kang, lí chiū oē kám-siū Siōng-tè , hō͘ lí it-seng thang ho̍k-sāi Chú Iâ-so͘ Ki-tok. 9. Tio̍h Ū Sèng Sı̂n Ê Iû Kā Lán Boah Kin-á-jı̍t ū choē-choē lâng m̄-káⁿ kóng-khí Sèng Sı̂n ê tāi-chı̀, in-ūi tı̄ kè-khı̀ ū chin-choē lâng tùi Sèng Sı̂n kè-thâu pó-siú, á-sı̄ kè-thâu jia̍t-kông lām-sám sı̀n, só͘-í chiū m̄-káⁿ koh kóng-khí. Sui-jiân sı̄ án-ni, I sı̄ Sam-ūi it-thé ê chin Sı̂n, sı̄ Siōng-tè éng-oán kè-e̍k ê chip-hêng-chiá. Tı̄ Sin-iok Sèng-keng, Sù-tô͘ Hēng-toān lán chiū khoàⁿ-kı̀ⁿ I cháiⁿ-iūⁿ teh chí-tō, teh choè-kang. I ín-chhoā, chí-sı̄ sù-tô͘; it-chhè lóng sı̄ I teh léng-tō. Sèng Sı̂n kám-tōng lâng chai choē, kā lâng hùn-heng. Sèng Sı̂n chiū-sı̄ Siōng-tè , I chhòng-siat chho͘-tāi kàu-hoē. Kin-á-jı̍t toā-pō͘-hūn ê lâng lóng hut-lio̍k Sèng Sı̂n. Lán siūⁿ bô I ê pang-chān, lán iā oē sêng-kong; ha̍k-būn, hùn-liān oē thoè-oāⁿ I ê chûn-chāi kap I ê koân-lêng, oân-choân bô khò Sèng Sı̂n, khò jio̍k-thé ê khùi-la̍t ló͘-le̍k teh choè-kang. Taⁿ hiān-chāi chiū-sı̄ lán tio̍h hō͘ Sèng Sı̂n tit I goân-lâi tē-ūi ê sı̂, in-ūi I tek-khak tio̍h choè-kang. Lí, goá tio̍h chai-iáⁿ, Siōng-tè ê Sı̂n beh ēng iû boah lán; nā bô, tı̄ ho̍k-sāi Siōng-tè ê sū, lán chiū boē oân-choân. Kı̀ⁿ-nā Siōng-tè só͘ ēng ê lâng , lóng ū tit-tio̍h Sèng Sı̂n ēng iû boah in. Ta̍k ê pò͘-tō-ka tı̄ in ê seng-oa̍h lóng ū tú-tio̍h gûi-ki, nā-sı̄ Sèng Sı̂n chiū lâi choè Chú koán-lí in, ēng in. Le̍k-tāi hō͘ Siōng-tè ēng ê lâng , lóng oē liáu-kái Sèng Sı̂n ēng iû boah in ê ı̀-gı̄, in choa̍t-tùi boē boán-chiok só͘ siū ê kàu-io̍k kap hùn-liān. In-ūi chai-iáⁿ chiah ê í-goā, iáu koh su-iàu pa̍t-hāng, chiū-sı̄ Sèng Sı̂n ēng iû boah in, Siōng-tè chiah oē ēng in. Só͘-í in chiū tı̄ Siōng-tè ê bı̄n-chêng thèng-hāu kàu tit-tio̍h tùi téng-bı̄n lâi ê koân-lêng, āu-lâi chiū chhut-khı̀, tı̄ kúi lé-pài, kúi ge̍h jı̍t hián-bêng Sèng Sı̂n ê koân-lêng lâi choè-kang, iā só͘ oân-sêng ê kang sı̄ pí in khò jio̍k-thé ê khùi-la̍t choè chı̍t nı̂ koh-khah choē. Siōng-tè kin-á-jı̍t ài beh ēng iû boah lâng , lí nā m̄-chai goá hiān-chāi teh kā lí kóng, nā bô Sèng Sı̂n ê iû, tı̄ thoân tō-lí ê kang-chok, lí chiū boē chin sêng-kong. Chit hāng sū m̄ sı̄ hō͘ lí pı̀ⁿ-choè jia̍t-kông ê sı̀n-gióng. Ta̍k hāng lóng ū tiong-iông chi tō, bô cháu tı̄ lióng ke̍k-toan. Lí thang chiàu Sèng-keng só͘ kà-sı̄ lán, iā sı̄ chū-kó͘ í-lâi Siōng-tè ê lô͘-po̍k só͘ sêng-jı̄n ê, lâi tit-tio̍h che keng-giām. Lí nā sı̍t-chāi khoàⁿ-tāng ho̍k-sāi Siōng-tè ê sū, lí tek-khak beh siūⁿ pān-hoat lâi tit-tio̍h che keng-giām, hō͘ lí iā chiâⁿ-choè Siōng-tè ēng iû boah ê lâng . Lí nā ài hō͘ Siōng-tè ēng, tı̄ lí ê kang-chok hō͘ choē-jı̂n chai choē, hoán-hoé, lí tio̍h tı̄ I ê bı̄n-chêng thèng-hāu tùi téng-bı̄n lâi ê koân-lêng, chhin-chhiūⁿ saⁿ kā lí chhēng. Lí chiū beh chiâⁿ-choè Siōng-tè ēng iû boah ê lâng . 10. Tio̍h Ū Sı̀n-sim Teh Kı̂-thāi Thèng-hāu Eng-kok ê hùn-heng-ka, Su Pò͘-chin ū chı̍t-pái phài i ê ha̍k-seng tı̄ Lûn-tun ê choē-choē tiâu koe-lō͘ piⁿ khui pò͘-tō-hoē. Ha̍k-seng ta̍k-jı̍t tńg-lâi pò-kò, ū ê sêng-kong, ū ê bô. Ū chı̍t-jı̍t chit ê un-sù, châi-tiāu khah chió ê chheng-liân-lâng , chin sit-chı̀ lâi kı̀ⁿ Su Pò͘-chin kóng, Su Pò͘-chin Sian-siⁿ, goá boē liáu-kái siáⁿ-sū goá boē tit-tio̍h lâng sı̀n Chú Iâ-so͘ Ki-tok, goá ū hūn tı̄ koe-lō͘ piⁿ pò͘-tō ê kang, chı̄n-tiong thoân Hok-im, koh chı̄n goá choè toā ê ló͘-le̍k teh choè-kang, chóng-sı̄ goá teh chhiáⁿ lâng lâi sı̀n Chú ê sı̂, chiū bô sím-mı̍h hoán-èng, nā ū iā chin-chió. Su Pò͘-chin lia̍h i khoàⁿ, āu-lâi chiah tùi i kóng, Lí siūⁿ, ta̍k-pái lí teh thoân tō-lí ê sı̂, choân-lêng ê Siōng-tè beh chín-kiù lâng ? Hit-ê chheng-liân chiah chhíⁿ-ngō͘ kóng, Bô, goá m̄-káⁿ án-ni kı̂-thāi, goá tı̄ ha̍k-hāu ê hùn-liān iáu-bē oân-sêng, goá ê un-sù kap châi-tiāu m̄ ta̍t-tio̍h pa̍t-lâng . Taⁿ goá chai goá ê chhò-gō͘, goá m̄ eng-kai án-ni kı̂-thāi. Lí nā bô teh kı̂-thāi hāu-kó, chiū boē tit-tio̍h. Lí chiūⁿ káng-tâi téng beh thoân Hok-im ê sı̂, chiū tio̍h khak-sı̀n ū hāu-kó, tek-khak ū choē-choē lâng beh hoán-hoé chiap-la̍p Iâ-so͘ Ki-tok choè Kiù-chú. Tùi goá khai-sí thoân tō-lí ê kang-chok í-lâi, goá tı̄ káng-tō soah, chiū chhiáⁿ lâng lâi sı̀n Iâ-so͘, hō͘ thiaⁿ-chiòng ū ki-hoē thang piáu-sı̄ in ê koat-sim. Só͘-í goá chiū boē lí-kái, choè chı̍t ê thoân-kàu-chiá, thoân Hok-im, káng-tō soah, chiū chiok-tó soàⁿ-hoē, tńg-khı̀ chhù, bô khoàⁿ-tio̍h sím-mı̍h hāu-kó, lia̍h-choè án-ni chiū kàu-gia̍h. Che sı̄ thang kiaⁿ ê sū. Thoân-tō ná chhin-chhiūⁿ chia̍h-mı̍h pâi tı̄ toh-téng, tio̍h hō͘ lâng ū ki-hoē, chhiáⁿ in lâi hióng-siū; goá nā bô án-ni choè, chiū-sı̄ tı̄ goá ê kang-chok boē kı̀-tit choè chı̍t-hāng chin tiōng-iàu ê sū. Goá ta̍k lé-pài-jı̍t tı̄ káng-tō soah, lóng ū kiò lâng tio̍h hoán-hoé, chiap-la̍p Ki-tok choè Kiù-chú, koh hō͘ lêng-sèng tūi-lo̍h ê sı̀n-tô͘ ū ki-hoē thang hoán-hoé. Kui-nı̂ tiong m̄-bat ū chı̍t-ê lé-pài àm bô khoàⁿ-tio̍h hāu-kó; chiah ê lâng chhut-lâi piáu-sı̄ in ê hoán-hoé í-āu, chiū ū kò-jı̂n tâm-tō jı̂n-oân chı̍t-ê chı̍t-ê phoāⁿ in kàu tâm-tō-sek, tı̄ hia koh siông-sè kap in tâm-tō. Só͘-í nā bô kiat-kó, goá chiū chin tio̍h-kiaⁿ; in-ūi goá thoân Hok-im, chhiáⁿ lâng lâi hoán-hoé, nā bô kiat-kó, goá tek-khak beh kı̂-koài. Goá kı̀-jiân ū thoân, chiū teh kı̂-thāi ū hāu-kó. Goá m̄-sı̄ kóng, kı̀ⁿ-nā chhut-lâi piáu-sı̄ koat-sim ê lâng lóng ū tit-kiù. Chóng-sı̄ tı̄ in tiong-kan ū lâng tit-tio̍h Iâ-so͘ Ki-tok, iā choè Siōng-tè ê kiáⁿ-jı̂. Goá khiā tı̄ káng-tâi beh káng-tō ê sı̂, Siōng-tè chiū hō͘ goá ū sı̀n-sim teh kı̂-thāi, chiū-sı̄ goá só͘ teh kā lí kóng ê, só͘-í goá chiū khak-sı̀n tı̄ goá káng-tō soah, chhiáⁿ lâng lâi hoán-hoé ê sı̂, tek-khak ū hoán-èng. 11. Oân-choân Tı̀-ı̀ Tı̄ Siōng-tè Ê Êng-kng. Lí teh ho̍k-sāi Siōng-tè ê bo̍k-tek, nā m̄-sı̄ ūi-tio̍h Siōng-tè ê êng-kng, iáu koh ū pa̍t ê bo̍k-tek chiū bô sím-mı̍h ı̀-sù. Lí choè thoân tō-lí ê kang, nā-sı̄ ūi-tio̍h beh tùi che lâi tit-tio̍h ka-kı̄ ê lı̄-ek, beh thê-ko miâ-siaⁿ, phín-keh, tē-ūi, lâi tô͘-bô͘ ka-kı̄ ê seng-oa̍h; sui-jiân tı̄ goā-piáu ū sêng-kong, chóng-sı̄ lí choa̍t-tùi boē tit-tio̍h Siōng-tè ê chiok-hok. Beh êng-kng Siōng-tè í-goā, nā iáu koh ū pa̍t khoán ê tōng-ki, lí chiū boē thang tit-tio̍h Siōng-tè goân-lâi beh hō͘ lí ê hāu-kó. Só͘-í lí teh ho̍k-sāi Siōng-tè , tek-khak tio̍h ūi-tio̍h I ê êng-kng. Siat-sú lí ho̍k-sāi Siōng-tè ê bo̍k-tek m̄ sı̄ án-ni, chiū tio̍h kūi-lo̍h tı̄ Siōng-tè ê bı̄n-chêng, ka-kı̄ khiam-pi kàu I tû-khı̀ chiah-ê m̄-tio̍h ê tōng-ki. Goá beh kiû Siōng-tè phah-phoà goá pún-sin, hō͘ goá oē thang êng-kng I, in-ūi lí nā m̄-sı̄ beh êng-kng Siōng-tè choè tē-it iàu-kín, chiū beh sit-pāi, lí choa̍t-tùi boē tit-tio̍h sı̍t-chāi ê sêng-kong. Lí chhut-khı̀ choè-kang nā pún-sin beh hióng-siū, Siōng-tè chiū boē êng-kng lí só͘ choè ê kang. Lí tio̍h phah-phoà pún-sin, I chiah oē thang ēng lí, nā bô, chá-bān lí oē sit-pāi kàu chin chhiⁿ-chhám. Taⁿ goá í-keng kā lí kóng Siōng-tè só͘ hián-bêng hō͘ goá 11 ê tiâu-kiāⁿ. Chhiáⁿ lí chı̍t-tiâu chı̍t-tiâu siông-sè koh tha̍k, kiû Siōng-tè kàm-chhat lí ê sim. Goá khak-sı̀n, lí ài hō͘ Siōng-tè ēng, lí ài choè chı̍t-ê sêng-kong ê thoân-kàu-chiá, lí him-bō͘ pún-sin kap kàu-hoé lóng hùn-heng, chhiáⁿ lí kiû Siōng-tè pang-chān, hō͘ lí chiàu ta̍k tiâu ê loē-iông khı̀ sı̍t-hêng. Siōng-tè ài beh ēng lí. I ài chiok-hok lí ê kang-chok, chóng-sı̄ nā ū sím-mı̍h that-gāi, I chiū boē chiok-hok; lí nā ài chiâⁿ-choè Siōng-tè só͘ beh ēng ê lâng , tio̍h tû-khı̀ chiah ê chó͘-tòng kap that-gāi.