V Chín-kiú ê Thâu-khoe.
Lūn chit hù chiàn-kah, tı̄ chiah-ê peng ê phoe ê lāi-tiong, lán í-keng káng-kiù sı̀-hāng, chiū-sı̄ Io-toà, Hō͘-sim-kiàⁿ, Oê kap Tı̂n-pâi. Taⁿ kan-ta chhun nn̄g hāng, chiū-sı̄ Thâu-khoe kap Kiàm. Thâu-khoe sı̄ sím-mı̍h? Sèng-chheh kóng, “Tio̍h niá-siū Chín-kiù ê Thâu-khoe.” Taⁿ chín-kiù sı̄ sím-mı̍h? Lán siông-siông ēng chit kù-oē, m̄ chai lín bat sió-khoá chù-ı̀ kā i siūⁿ, sı̄ sím-mı̍h ı̀-sù mah? Lín nā bô bêng-bêng chai hit ê ı̀-sù, lín chiū lóng boē tit thang tı̀ chit ê thâu-khoe.
Goá beh soat-bêng chín-kiù ê ı̀-sù, tē it ha̍h ê oē chiū-sı̄ khah-iâⁿ á-sı̄ tek-sèng. Tio̍h tı̀ tek-sèng ê thâu-khoe. Chín-kiù thoat-choē sı̄ sím-mı̍h? Kiám m̄ sı̄ khah-iâⁿ choē-koà mah? Chín-kiù thoat-lı̄ tùi-te̍k sı̄ sím-mı̍h? Kiám m̄ sı̄ khah-iâⁿ tùi-te̍k mah? Lâng siông-siông kóng chín-kiù, iā só͘ ēng ê ı̀-sù, chhin-chhiūⁿ kan-ta chí-bêng chín-kiù lêng-hûn bián lo̍h toē-ge̍k, thang jı̍p thian-kok. Án-ni sı̄ kan-ta chı̍t pō͘-hūn ê tē it soè-ê. Lán ê Chú Iâ-so͘ lâi sè-kan m̄-nā choè án-ni nā-tiāⁿ I lâi beh kiù-chō͘ hoān-nā tùi I lâi chhin-kūn Siōng-tè--ê, kàu ke̍k-thâu ê hó. Kiù-chō͘ kàu ke̍k-thâu ê hó, án-ni chiū-sı̄ chín-kiù, chiū-sı̄ tek-sèng.
Goá ài pò lín chai, chı̍t ê Ka-ná-tāi ê gín-ná tı̀ chit ê thâu-khoe, tùi che oē hō͘ lín ê koan-liām khah bêng, tio̍h cháiⁿ-iūⁿ tı̀ chit ê thâu-khoe.
Ui-liâm sı̄ Ko-téng Ha̍k-hāu ê ha̍k-seng, tùi i ê hiaⁿ ê kám-hoà, ín-chhoā i chiū-kūn Ki-tok. In nn̄g lâng sûi-sı̂ tı̄ in ê pêng-iú ê tiong-kan choè kang, bô kú hit só͘-chāi ê siàu-liân lâng chiū gián-kiù Sèng-chheh, in-ūi in put-chí him-bō͘ ài káng-kiù; iā khui kı̂-tó-hoē in-ūi in ài tit-tio̍h ún-chún. Lāu-lâng ū-ê iô-thâu kóng, “Chiah-ê siàu-liân lâng boē kú-tn̂g khiā-chāi.”
Ui-liâm thiaⁿ-kı̀ⁿ lâng án-ni kóng, soà chin kiaⁿ-hiâⁿ. Tùi i ê jia̍t-sim kap thiàⁿ-thàng, liâm-piⁿ ūi-tio̍h Chú choè kang, taⁿ chiah-ê bô kú kiám beh siau-bô mah? I kiám beh koh chiàu-kū pı̀ⁿ-choè léng-tām-bô oa̍h-khı̀ mah? á-sı̄ beh poa̍h-tó mah? I ná siūⁿ kha-thâu-u ná chhoah.
Teh siūⁿ ê sı̂, i choè chı̍t hāng ū tı̀-hūi ê sū; chiū-sı̄ chhin-kūn Siōng-tè ê Oē. I hian-khui Í-sài-a ê chheh, tha̍k tio̍h chı̍t chat, soà tiû-tû. “m̄-bián kiaⁿ, goá kap lí tı̄-teh; m̄-bián giâu-gı̂, goá sı̄ lí ê Siōng-tè; goá tek-khak pı̀-iū lí; hû-chhı̂ lí; iā ēng gı̄ ê chhiú khan lí ”( Í-sài-a 41 :10 ).
Tùi chiah-ê oē, i ê cheng-sı̂n tit-tio̍h an-chēng. Hit gō͘-hāng ê èng-ún, i sûi-ê kā i khoàⁿ, kàu hiah-ê khùi-la̍t jı̍p i ê sim-sı̂n. Āu-lâi tı̄ hit chat ê tiong-kan, tû-khı̀ “Goá” chit jı̄ í-goā, pa̍t jı̄ chhin-chhiūⁿ bô--khı̀, kan-ta chit jı̄ “Goá” hián-chhut chin bêng, tı̄ hit ê tiong-kan nā-tiāⁿ.
I khoàⁿ chit jı̄ “Goá” iā chai ta̍k jı̄ lóng sı̄ chí-khí Siōng-tè pún-sin. Tùi chit jı̄ “Goá” chhē tio̍h Siōng-tè, só͘-í hō͘ i ê kha-thâu-u chhoah. Taⁿ tı̄ I ê bı̄n-chêng tio̍h sí-bô? Só͘-í Ui-liâm chiū gı̂m-si, “Tùi I goá tit-tio̍h khah-iâⁿ, goá beh oá-khò I bô kiaⁿ: in-ūi Iâ-hô-hoa sı̄ goá ê khùi-la̍t, goá ê si; I iā sı̄ chín-kiù goá-ê”. Che kiám m̄ sı̄ chí-bêng tek-sèng mah ?
Chhin-ài siàu-liân ê peng, taⁿ lí kiám bô bêng-pe̍k, Ui-liâm tú-tú tı̄ kau-chiàn ê khí-thâu, chái-iūⁿ tı̀ tek-sèng ê thâu-khoe mah ?
Tāi-pı̍t iáu-bē khı̀ kap Kho-lı̄-a kau-chiàn, i tāi-seng tı̀ tek-sèng ê thâu-khoe. I khoàⁿ hit ê toā-hàn lâng, iā chı̍t-ē khoàⁿ i ê Siōng-tè, tı̄ i ba̍k-chêng ê toā-hàn lâng, soà pı̀ⁿ-choè soè-á-hàn. In-ūi tùi Siōng-tè ê êng-kng, i iáu-bē hiat chio̍h-thâu ê tāi-seng, i chai i tek-khak tek-sèng ( I Sat-bó͘-ní 17 ).
Í-lı̄-a tāi-seng tı̀ tek-sèng ê thâu-khoe, chiū kā A-khap ông kóng, “Tio̍h khí-lâi lim-chia̍h, in-ūi goá ū thiaⁿ-kı̀ⁿ lo̍h toā-hō͘ ê siaⁿ.” Āu-lâi i peh-chiūⁿ soaⁿ-téng kiû hō͘ ak toē, hit-sı̂ thiⁿ-nı̍h lóng bô hûn. Bô lâng thiaⁿ-kı̀ⁿ lo̍h-hō͘ ê siaⁿ, to̍k-to̍k Í-lı̄-a nā-tiāⁿ. Sian-ti só͘ thiaⁿ-kı̀ⁿ ê siaⁿ, sı̄ Siōng-tè èng-ún beh lo̍h-hō͘ ê siaⁿ, I chhim-chai Siōng-tè ê khùi-la̍t kap chin-sı̍t, só͘-í i thiaⁿ chit ê èng-ún ê siaⁿ, tú-tú chhin-chhiūⁿ hō͘ í-keng teh lo̍h ê khoán. I ēng tek-sèng ê kha-pō͘ peh-chiūⁿ soaⁿ-téng ê pâng-keng. I iáu-bē kı̂-kiû ê tāi-seng ū tı̀ tek-sèng ê thâu-khoe.
Chóng-sı̄ hit jı̍t Í-lı̄-a m̄ nā ū èng ún thang hō͘ i hó-táⁿ kiû tek-sèng. I tı̄ Ka-bı̍t hiàn sio-chè ū tit-tio̍h kàm-la̍p. Hit ê sio-chè sı̄ ūi-tio̍h Í-sek-lia̍t peh-sı̀ⁿ hiàn--ê, án-ni chiū-sı̄ Í-sek-lia̍t peh-sı̀ⁿ lóng siū chiap-la̍p, só͘-í Í-lı̄-a oē tit hó-táⁿ tı̄ Siōng-tè ê bı̄n-chêng lâi thoè choân Í-sek-lia̍t peh-sı̀ⁿ kiû lo̍h-hō͘.
Chhin-ài siàu-liân ê peng, siat-sú lín ài o̍h, lâi kiû ū èng-hāu ê kı̂-tó, thang choè toā ê lı̄-ek, chhiáⁿ gián-kiù Í-lı̄-a tı̄ soaⁿ-téng só͘ keng-kè ê kò͘-sū, iā kiû Sèng Sı̂n chí-sı̄ lí, tio̍h cháiⁿ-iūⁿ kiû, chhin-chhiūⁿ i chı̍t-iūⁿ. I beh chiong Siōng-tè èng-ún ê êng-kng kap lán ê hiàn-chè ê kong-hāu kā lín kóng; chit pái m̄ sı̄ tı̄ Ka-bı̍t hiàn--ê, sı̄ tı̄ Thâu-khak-oáⁿ ê toē (Iâ-so͘ tèng sı̍p-jı̄-kè ê só͘-chāi ). Āu-lâi tú-tú tı̄ kı̂-tó ê khí-thâu, i beh kā lí tı̀ tek-sèng ê thâu-khoe. Ēng chit-ê tı̀ tı̄ thâu-khak, lín chiū oē kian-kò͘ chı̀n-chêng, kàu tit-tio̍h só͘ kiû--ê. Khoàⁿ I Lia̍t-ông 18 :41-46.
VI Kiàm.
“Sèng Sı̂n ê kiàm, chiū-sı̄ Siōng-tè ê oē” ( Í-hut-só͘ 6 : 17 ).
Lán í-keng káng-kiù Io-toà, Hō͘-sim-kiàⁿ, Oê, Tı̂n-pâi kap Thâu-khoe. M̄ chai lín ū chù-ı̀, chai chit gō͘ hāng sı̄ tı̂-hông ê chiàn-kah, m̄-sı̄ ēng chiah-ê choè saⁿ-thâi ê ke-si. Chí-ū chı̍t hāng sı̄ saⁿ-thâi ê ke-si, chiū-sı̄ Sèng Sı̂n ê Kiàm, chiū-sı̄ Siōng-tè ê oē. Chhiáⁿ khoàⁿ Si-phian 149:6-9, chiū chai Siōng-tè ê peh-sı̀ⁿ ê chhiú, nā chin-chiàⁿ ū giâ chit ki kiàm, sı̍t-chāi oē choè chin kı̂-ı̄ⁿ ê sū.
Thiàⁿ-thàng ê soè-kiáⁿ ah, goá siá chiah-ê hō͘ lín, in-ūi lín ài cheng-chiàn hó ê cheng-chiàn, koh ài tit-tio̍h khah-iâⁿ. Thâu chı̍t hāng, lín tio̍h kı̀-tit chit ki siang-bı̄n ê chiàn-khı̀ sı̄ “Sèng Sı̂n ê Kiàm”. To̍k-to̍k khiā-khí tı̄ sim-lāi Siōng-tè ê Sı̂n chiah oē ēng chit ki kiàm, sui-sı̄ Sèng-keng iā oē choè lō͘-ēng. Siat-sú Sèng Sı̂n nā bô ēng Sèng-keng ê chiuⁿ-chat, iā sı̄ kan-ta pı̀ⁿ-choè pêng-siông ê oē, nā-sı̄ chit khoán chhin-chhiūⁿ phó͘-thong ê oē, tek-khak boē choè lín ê lı̄-ek. Lín nā kan-ta ēng lín ê siaⁿ-seh, chiong chit chat Sèng-keng kā lâng kóng, án-ni boē choè in ê lı̄-ek. Chóng-sı̄ lí teh kā lâng kóng hit chat ê sı̂, nā sı̄ chhin-chhiūⁿ Sèng Sı̂n chioh lí ê chhùi lâi kóng, thiaⁿ ê lâng chiū oē tit-tio̍h khùi-la̍t, āu-lâi chiū sı̍t-chāi oē tek-sèng. Sèng Sı̂n kap Sin-niû kā lâng kóng “Lâi ”, lâng chiū beh thiaⁿ. Chóng-sı̄ nā kan-ta Sin-niû (chiū-sı̄ lín kap goá ) cháu chı̀n-chêng kā lâng kóng“Lâi”, iā bô Sèng Sı̂n saⁿ-kap tı̄-teh, án-ni chiū bô lâng beh chù-ı̀ (Khé-sı̄-lio̍k 22 :17 ). Lín nā ài ha̍k-sı̍p thang ēng chit ki kiàm ê koân-le̍k, chhiáⁿ siông-sè káng-kiù Siōng-tè só͘ kóng, lūn I ê Sèng Sı̂n ê sū : Chim-giân 1 :23 ; Lō͘-ka 11 :13 ; Iok-hān 16 :13, 14. Ū chı̍t hāng chin pó-poè ê kı̂-tó, chiū-sı̄ Si-phian 45:3. Siat-sú lín nā ài ēng Siōng-tè ê oē choè ū khùi-la̍t--ê, chhiáⁿ chiong chit hāng lâi kı̂-tó.
Koh chı̍t hāng, chiū-sı̄ lín tio̍h bêng-pek chit ki sı̄ “siang-bı̄n” ê kiàm. Chı̍t bı̄n sı̄ chí-khí ı̀-hiòng Siōng-tè ê khùi-la̍t, koh chı̍t-bı̄n sı̄ chí-khí tí-tng tùi-te̍k ê khùi-la̍t. Lín ài tit-tio̍h tek-sèng ê kı̂-tó tı̄ thiⁿ-nı̍h á-bô ? Chit ki kiàm tı̄ lín ê chhiú, ū khùi-la̍t thang choè.
Goá beh kā lín kóng, Iok-sa-hoat oá-khò Siōng-tè, lâi ēng chit ê khùi-la̍t. Chèng peh-sı̀ⁿ kiaⁿ-hiâⁿ, iā i khiā tı̄ in ê bı̄n-chêng, kia̍h-ba̍k khoàⁿ Siōng-tè ê Tiān, kiû I pó-hō͘ in, in-ūi ū toā ê kun-peng teh-beh lâi kong-kek Iâ-lō͘-sat-léng (2 Le̍k-tāi chı̀-lio̍k 20 :9-12 ).
Thâu chı̍t hāng, lán tio̍h chù-ı̀, in-ūi Iok-sa-hoat bat Sèng-chheh. Siat-sú i nā m̄-bat, i chiū boē ēng i. Siat-sú I Lia̍t-ông poeh chiuⁿ kap káu chiuⁿ, i nā bô oân-choân chhim chai, i chiū bô kiàm thang ēng. I chai tē poeh chiuⁿ Só͘-lô-bûn só͘ kiû--ê, lāi-tiong kóng, Peh-sı̀ⁿ nā tú-tio̍h sím-mı̍h tùi-te̍k, in tio̍h khiā tı̄ Tiān-chêng, tı̄ hoān-lān ê sı̂, tio̍h âu-kiò in ê Siōng-tè, I beh thiaⁿ in, iā pang-chān in. I chai tē káu chiuⁿ sı̄ Siōng-tè hián-hiān kā Só͘-lô-bûn kóng, I ū thiaⁿ i ê kı̂-tó, I ū hō͘ Tiān chiâⁿ-sèng, iā I ê ba̍k-chiu kap sim-koaⁿ beh kú-tn̂g tı̄ hia bô soah.
Án-ni thang chai, Iok-sa-hoat tı̄ Siōng-tè ê bı̄n-chêng ū thang oá-khò, nā m̄ sı̄ Siōng-tè ê khùi-la̍t, chiū bô sím-mı̍h thang pang-chān i. Siōng-tè tı̄ ı̄ⁿ-siōng ê tiong-kan, ēng I ê èng-ún kā Só͘-lô-bûn kóng, soà kı̀ tı̄ chin-sı̍t ê Sèng-chheh. I kı̀-tit Siōng-tè ê èng-ún, lâi khiā tı̄ Tiān-chêng, kiû Siōng-tè ēng I ê khùi-la̍t tí-tng chiah-ê tùi-te̍k, kàu beh soah ê sı̂ kóng, “In-ūi goán bô khùi-la̍t thang tí-tng chit ê toā kun-peng, goán iā m̄ chai tio̍h cháiⁿ-iūⁿ choè, goán ê ba̍k-chiu to̍k-to̍k ǹg Lí.” Chiah-ê oē tùi hit-sı̂ chiâⁿ-choè hiah-ê bô lâng thang pang-chān--ê ê pó-poè. Chhiáⁿ lín tha̍k II Le̍k-tāi chı̀-lio̍k 20 chiuⁿ ê kò͘-sū, iā khoàⁿ Siōng-tè ê khùi-la̍t cháiⁿ-iūⁿ kàng-lo̍h, thiaⁿ in ê kı̂-kiû; tāi-seng chiok-hok chiah-ê kı̂-kiû ê peh-sı̀ⁿ, āu-lâi beh bia̍t-bô in ê tùi-te̍k. Tùi chit ê kò͘-sū, lín chiū thang bêng-pe̍k chit ki kiàm kap Siōng-tè ê khùi-la̍t.
Koh khoàⁿ Chhòng-sè-kı̀ 32 : 9-12, tı̄ hia Ngá-kok kiaⁿ i ê hiaⁿ I-sò ê kun-peng, só͘-í i ēng Siōng-tè só͘ èng-ún-ê lâi kiû. Si-un ê koân-lêng sûi-sı̂ kàng-lo̍h ún-chún i, hō͘ i ê hiaⁿ ê siū-khı̀ siau-bô, chiâⁿ choè hô-hó.
Choè lāu-bú-ê iā sı̄ teh siong-pi, in-ūi pháiⁿ-kúi ín-iú i thiàⁿ-thàng ê kiáⁿ-jı̂, iā ēng sè-kan ê thiàⁿ-chêng kap m̄-sı̀n ê toā khùi-la̍t, lâi bê-he̍k i ê sim-chı̀. Choè lāu-bú bô khùi-la̍t thang tí-tng chit khoán hui-siông ê khùi-la̍t, chóng-sı̄ i ū Sèng Sı̂n ê kiàm, chiū-sı̄ Siōng-tè ê oē. I khak-sı̍t kı̀-tit Siōng-tè ê èng-ún kóng, “Iâ-hô-hoa kóng, sui-bóng chit khoán toā khùi-la̍t ê pé-pa̍k, iā sı̄ teh-beh thoat-lı̄, siū tùi-te̍k lia̍h-ê beh tit-tio̍h chín-kiù : in-ūi kap lín cheng-chiàn--ê, goá beh kap lín cheng-chiàn, goá beh kiù lín ê kiáⁿ-jı̂.” Goá iáu-bē oē ēng sím-mı̍h kiat-kó thang kā lín kóng, chóng-sı̄ goá chai bô lūn sím-mı̍h lâng, nā chiàu chit ê hoat-tō͘ kı̀-tit Siōng-tè ê èng-ún, tek-khak ū chit hō ê kiat-kó, chiàu I só͘ kā lán kóng, “Tio̍h lâi saⁿ-kap piān-lūn”.
Chóng-sı̄ chit ki kiàm ū nn̄g bı̄n koh chı̍t bı̄n sı̄ tí-tng tùi-te̍k ê khùi-la̍t.
Gō͘-sûn-choeh hit jı̍t, Pí-tek tı̄ Iâ-lō͘-sat-léng chèng lâng ê tiong-kan, i ēng Siōng-tè ê oē kóng-khí hō͘ lâng tèng-sí ê Iâ-so͘. Chit ki kiàm tı̄ i ê chhiú teh ōng, chin kín koh ū khùi-la̍t, hit jı̍t chhı̀-chha̍k hiah-ê m̄-sı̀n--ê ū saⁿ chheng lâng.
Hui-le̍k khui-thiah Í-sài-á 53 chiuⁿ hō͘ Ai-thê-o-pek ê thài-kàm thiaⁿ. Hiah-ê oē chin ū khùi-la̍t, oē koáⁿ-chhut hit ê o͘-bı̄n lâng sim-lāi ê o͘-àm.
Kúi-nā nı̂ chêng, chı̍t ê chhia-chiáng tı̄ chhia-lāi teh kiâⁿ. I siū-khı̀ teh chiù choā, chin chū-khoa. I tı̄ mn̂g--nı̍h tú-tio̍h chı̍t ê lâng, hit lâng chai tio̍h cháiⁿ-iūⁿ ēng chit ki kiàm, chiū kóng, “Siōng-tè ê miâ m̄-thang lām-sám chheng-ho͘.” Hit ê chhia-chiáng sûi-sı̂ ēng chin bú-bān bô lé ê oē lâi ı̀n-tap. Hit ê lâng koh kóng, “Lām-sám chheng-ho͘ ê lâng,ū choē bô sià.” I siū chit khoán ê chhı̀-chha̍k koh khah siū-khı̀, soà koh tı̍t-tı̍t chiù-choā, iā chhut-la̍t sak chhia-mn̂g, hám tio̍h hit ê lâng ê chhiú, só͘-í huih tùi chńg-thâu-á choāⁿ-chhut, bak-tio̍h chhia-mn̂g. Chńg-thâu-á ê siong bô kú chiū hó, chóng-sı̄ siū hit ki kiàm só͘ chha̍k ê siong boē hó. Ná kú chit ki kiàm ê chhı̀-chha̍k ná chhim, kàu chha̍k-tio̍h i só͘ siat-to̍k ê oē, í-kı̍p kı̂-û chin-choē ê choē-ok; in-ūi ka-kı̄ sim boē pêng-an, só͘-í i tio̍h khı̀ kı̂-tó Siōng-tè, chhin-chhiūⁿ Pó-lô kóng, “Chú ah ! Lí ài goá cháiⁿ-iūⁿ choè?” Āu-lâi i chiâⁿ-choè thih-tō lāi-bı̄n í-kı̍p goā-ūi ê lâng ê hó bô͘-hoān. Mô͘ Kai-sat chı̍t pái chē bé-chhia chhut-goā ê sı̂, i kúi-nā pái liām chı̍t chat Sèng-keng. Tú-á i beh lo̍h chhia ê sı̂, chı̍t lâng kiâⁿ chı̀n-chêng mn̄g i kóng, “Chhéng-mn̄g leh, lí só͘ kóng ê Sèng-chheh kiám sı̄ Siōng-tè ê oē? Goá m̄ sı̀n”. I bêng-bêng ū pı̄-pān beh kap Mô͘ Kai-sat piān-lūn.
Kai-sat chù-ba̍k khoàⁿ hit ê lâng tiap-á-kú. Āu-lâi chiū kóng, “Chhéng-mn̄g leh, goá siūⁿ lí sı̄ kun-jı̂n hò͘ⁿ ?”
I sûi-sı̂ ı̀n kóng, “Án-ni tio̍h lah ”.
“Nā-sı̄ án-ni, chhéng-mn̄g lí, siat-sú nā ū chı̍t ê peng, giâ chit ki siang-bı̄n ê kiàm, chha̍k jı̍p lí ê kut-chhé, hit-sı̂ lí kiám tio̍h khiàm-ēng lâng kā lí kóng hit ki sı̄ kiàm, koh sı̄ siang-bı̄n-ê ?”
Hit ê koaⁿ thiaⁿ-kı̀ⁿ chit-ê, ba̍k-chiu khoàⁿ kē, soà kiâⁿ lı̄-khui khı̀ .
Kúi-nā nı̂ āu, i koh tú-tio̍h Mô͘ Kai-sat, iā kā i seh-siā. I kóng, “Goá chai sı̍t-chāi sı̄ Siōng-tè ê oē,in-ūi ū chhı̀ chha̍k goá; chóng-sı̄ hit-sı̂ goá bô ài sı̀n sı̄ Siōng-tè ê oē.”
Chit ki kiàm iû-goân ū khùi-la̍t thang thâi lí sim-lāi ê tùi-te̍k, chhin-chhiūⁿ thâi pa̍t lâng sim-lāi-ê chı̍t-iūⁿ. Goá ài kā lín kóng, chı̍t àm chit ki kiàm thoè goá thâi goá ê hoân-ló. Goá hoan-lâi hoan-khı̀ boē khùn-tit, in-ūi goá ê soè cha-bó͘-kiáⁿ phoà-pı̄ⁿ, iā chin hoân-ló, kiaⁿ-liáu i tú-tio̍h khah kan-khó͘. Tı̄ chit khoán kiaⁿ-hiâⁿ o͘-àm ê tiong-kan, chı̍t ê bû-hêng ê pêng-iú, chiong Siōng-tè ê oē lâi jı̍p tı̄ goá ê sim-lāi: “M̄-bián khoà-lū bı̂n-á-jı̍t ê sū.” Chit khoán kiàm ê chhı̀-chha̍k chin pó-poè, i bô siong-hāi goá; i kan-ta thâi goá sim-lāi ê hoân-ló nā-tiāⁿ. Goá siūⁿ tiap-á-kú, chai sı̄ kin-á-jı̍t ê khoà-lū teh hō͘ goá kan-khó͘, in-ūi goá ê soè-kiáⁿ hit-sı̂ an-jiân teh khùn. Chit ê bû-hêng ê pêng-iú só͘ hō͘ goá Siōng-tè ê oē, sı̄ pò goá m̄-bián khoà-lū bı̂n-á-jı̍t ê khó͘-thàng, to̍k-to̍k tio̍h thok-tiōng Siōng-tè. Chit khoán ê kan-khó͘ chiâⁿ choè hoaⁿ-hí kám-un, hō͘ hit mı̂ tit-tio̍h an-jiân, che sı̍t-chāi chin thang hoaⁿ-hí.
Lín chai chit ki kiàm ū Siōng-tè ê khùi-la̍t : iā ū khùi-la̍t thang thâi Siōng-tè ê tùi-te̍k, chiū-sı̄ lán goā-bı̄n kap sim-lāi ê tùi-te̍k. Hoān-nā choè Ki-tok ê peh-sı̀ⁿ, oē hiáu o̍h thang gâu ēng “Sèng Sı̂n ê Kiàm, chiū-sı̄ Siōng-tè ê oē”, nā án-ni thong sè-kan Ki-tok ê tùi-te̍k lóng tio̍h hâng-ho̍k, iā chiâⁿ-choè I ê kha-ta̍h-í.(Si-phian 110 :1 ) Lín kap goá nā gâu ēng chit ki kiàm, chiū lán oē chai tı̄ kau-chiàn ê sı̂, cháiⁿ-iūⁿ chiah oē tek-sèng. Siat-sú lín ài choè Ki-tok tek-sèng ê peng, lín tio̍h bat Sèng-keng, ná chhin-chhiūⁿ m̄-bat pa̍t khoán ê chheh. Tio̍h tı̄ Ki-tok ê kha-ē lâi káng-kiù.
VII Lán cháiⁿ-iū tio̍h khiàm-ēng Siōng-tè ê Chiàn-kah ?
Chhin-ài siàu-liân ê peng, chit hāng sı̄ chin iàu-kín ê bûn-toê, in-ūi ū chin iàu-kín ê ı̀n-tap.
Chit hù chiàn-kah, lán ta̍k hāng lóng tio̍h khiàm-ēng, in-ūi lán tio̍h tí-tng toā ê tùi-te̍k, á-sı̄ kong tùi-te̍k ê toā kun-peng, in put-sı̂ teh pé-siú, iā kè-bô͘ beh hō͘ lán tio̍h-tak, á-sı̄ sit-táⁿ, á-sı̄ ēng hoat-tō͘ beh hō͘ lán sit-pāi, boē choè hó ê peng. Pó-lô tı̄ chit chat lūn-khí chiah-ê tùi-te̍k kóng, “In-ūi lán ê kau-chiàn m̄ sı̄ tí-te̍k hiat-khı̀, chiū-sı̄ tí-te̍k chiah-ê pān chèng-sū-ê, chiah-ê chiáng-koân-ê, kap chit ê àm-sè chiah-ê kun-ông, í-kı̍p thiⁿ-tiong pháiⁿ ê sı̂n-lūi;”āu-lâi i koh kóng, “Só͘-í lín ēng Siōng-tè choân hù ê chiàn-kah, hō͘ lín tı̄ hong-hiám ê jı̍t tí-tng oē tiâu.” Siat-sú lán nā chhēng chit hù chiàn-kah, lán chiū oē tí-tng chit ê toā tùi-te̍k, ı̀-sù chiū-sı̄ tek-sèng. Nā bô chhēng chit hù chiàn-kah, lán chiū boē khiā-chāi, lán oē chiâⁿ-choè loán-jio̍k, iā poa̍h-tó tı̄ tùi-te̍k ê bı̄n-chêng, án-ni chiū-sı̄ chiàn-pāi. Che kiám m̄ sı̄ chin iàu-kín ê ı̀n-tap mah ?
Ū nn̄g hāng sū lán ê tùi-te̍k siông-siông ài lán khı̀ choè. Thâu chı̍t hāng: I ài lán boē kı̀-tit Siōng-tè ê oē. Án-ni i chiū thang ín-iú lán ûi-ke̍h Siōng-tè ê kài-bēng, iā choè lán ka-kı̄ sim-lāi só͘ ài-ê. Só͘-í put-lūn tú-tio̍h tùi-te̍k sím-mı̍h chhı̀-liān, lán nā ài kian-kò͘ siú I ê kài-bēng, lán chiū tio̍h chhēng chit hù chiàn-kah, chun-thàn Siōng-tè ê chí-ı̀ lâi choè, “chhin-chhiūⁿ tı̄ thiⁿ nı̍h chı̍t-iūⁿ”.
Tē jı̄ hāng : Tùi-te̍k put-sı̂ ài hō͘ lán giâu-gı̂ Siōng-tè ê èng-ún. Nā án-ni lán tı̄ kı̂-tó ê sı̂ chiū oē ià-siān sit-táⁿ. Lán ê Chú Iâ-so͘ kóng chit ê phı̀-jū, “kàu chit lō͘-bé ê sè-tāi, lâng tio̍h siông-siông kı̂-tó, m̄-thang ià-siān. ” Chóng-sı̄ Mô͘-kúi só͘ choè tú-tú sı̄ tò-hoán; i ê khùi-la̍t sı̄ put-sı̂ ài hō͘ lâng tı̄ kı̂-tó ê tāi-seng chiū ià-siān, m̄-nā án-ni, i ài lâng tı̄ bē kı̂-tó ê tāi-seng chiū bô khùi-la̍t. Chóng-sı̄ lán nā put-sı̂ ū chhēng chit-hù chiàn-kah, put-lūn tùi-te̍k beh cháiⁿ-iūⁿ hō͘ lán sit-táⁿ, lán iā sı̄ kian-kò͘ kı̂-tó kàu tit-tio̍h ún-chún.
“Tio̍h siông-siông kı̂-tó, sêng-sim khún-kiû, kéng-séng tı̄ chit-ê ,” hoān-nā chhēng chit hù chiàn-kah-ê, chiū-sı̄ ū chit khoán kı̂-tó ê hong-hoat.
Chóng-sı̄ lán tio̍h thoè sím-mı̍h lâng kı̂-tó? Pó-lô iû-goân kā lán kóng.
I kóng, “Ūi-tio̍h lóng-chóng ê sèng-tô͘ khún-kiû, ” ūi-tio̍h hiah-ê tı̄ ı̄ⁿ-pang á-sı̄ lán kàu-hoē-lāi ê loán-jio̍k ê sin thiaⁿ tō-lí ê lâng kiû, iā tio̍h ūi-tio̍h lín ke-lāi ê sı̀n-tô͘ kiû.
I koh kóng, “Iā thoè goá kiû, hō͘ goá oē tit khui-chhùi hó-táⁿ lâi kóng, ”chiū sı̄ thoè thoân-kàu-ê kap choè sian-siⁿ ê kiû, in-ūi in sı̄ thoân Siōng-tè ê oē hō͘ pa̍t lâng thiaⁿ. Só͘-í tio̍h siông-siông thoè lín ê soan-kàu-su kı̂-tó, hō͘ i kian-kò͘ sı̀n, hó-táⁿ soan-thoân Siōng-tè ê tō-lí; koh tı̄ chhù-nı̍h tio̍h te̍k-pia̍t thoè lín ê sian-siⁿ kı̂-tó hō͘ i kian-kò͘ sı̀n, hó-táⁿ pò-iông Siōng-tè ê tō-lí. M̄-thang phah-sǹg gín-ná ê kı̂-tó sı̄ bô kong-hāu, tı̀-kàu lâi hām-lo̍h Mô͘-kúi ê kè.
Iâ-so͘ Ki-tok bat kóng, “In-ūi lí ê tùi-te̍k, tùi gín-ná kap chia̍h-lin--ê ê chhùi, lí hō͘ in ê oē ū khùi-la̍t. ” I chit sı̂ iā oē ēng gín-ná ê chhùi chhin-chhiūⁿ hit-sı̂ chı̍t-iūⁿ.
Chhin-ài siàu-liân ê peng, tē it lō͘-bé lâi kóng, chiū-sı̄ tio̍h ióng-chòng tiàm tı̄ Chú ê khùi-la̍t koân-lêng ê lāi-bı̄n; in-ūi lán só͘ tio̍h tí-tng ê toā-tūi-peng, ū chı̍t ê chin toā ê thâu-lâng. Só͘-í tio̍h chhēng Siōng-tè choân-hù ê chiàn-kah, chiah oē tit thang khiā-chāi.
Tio̍h khiā-chāi, ēng Siōng-tè éng-oán ê chin-sı̍t choè Toà hâ tı̄ lí ê seng-khu, iā ēng Iâ-so͘ Ki-tok ê Hō͘-sim-kiàⁿ ûi tı̄ lí ê sim-nı̍h. Tio̍h khiā-chāi, chhēng chit siang Oê tı̄ lí ê kha, “goá ê Siōng-tè thoè goá siat-hoat goá ê kha-pō͘,”che sı̄ chı̍t kha; koh chı̍t kha chiū-sı̄ “I ta̍k hāng thoè goá siat-hoat hó sè. ”Koh tio̍h giâ Sı̀n ê Tı̂n-pâi, chhin-chhiūⁿ Ki-tok tı̄ khòng-iá só͘ choè, phah-bia̍t só͘ ū ê chhı̀-liān, m̄-thang hām-lo̍h choē. Tio̍h tı̄ kau-chiàn ê khí-thâu tı̀ tek-sèng ê thâu-khoe, in-ūi lán ê Chú kóng,“M̄-bián kiaⁿ, Goá kap lín tı̄-teh.” Tio̍h ēng Sèng-chheh chhiong-moá lín ê sim-lāi, nā Siōng-tè ê Sı̂n beh choè ò-biāu ê sū ài ēng ê sı̂, chiū ū piān-piān ê kiàm thang hō͘ I ēng. Siat-sú lín nā ēng I ê tō-lí chhiong-moá lín ê sim, I tek-khak m̄-bat iân-chhiân lâi ēng i.
“Siat-sú lín tiàm tı̄ Goá, iā Goá ê tō-lí tiàm tı̄ lín ê sim, lín só͘ ài-ê thang kiû, Goá beh thoè lín siat-hoat. ” I ê tō-lí pang-chān lán tı̄ kı̂-tó ê sı̂ tit-tio̍h kian-kò͘, in-ūi chiah-ê sı̄ kiàm, oē put-sı̂ thang hō͘ I ēng.
Só͘-í lán chit sı̂ sı̄ tı̄ khùi-la̍t ê mn̂g, án-ni ı̀-sù chiū-sı̄ khiā-chāi. “Tio̍h sı̂-siông ūi-tio̍h lóng-chóng ê sèng-tô͘ kı̂-tó, iā siông-siông thoè Siōng-tè ê lô͘-po̍k kı̂-tó, hō͘ in oē tit khui-chhùi hó-táⁿ lâi kóng.” Chú ah ! tio̍h pang-chān goán khiā-chāi, kà-sı̄ goán kı̂-tó, “Chiah hō͘ goán tı̄ khòng-iá kap ko͘-toaⁿ ê só͘-chāi oē tit hoaⁿ-hí, iā tı̄ soa-bo̍k ê só͘-chāi oē tit khoài-lo̍k, iā oē khui hoe chhin-chhiūⁿ mûi-kùi.” À-bēng.
