Siau Lı̂m ê Sió-toān

Chháu-tun thâu-chı̍t-ê Sı̀n-tô͘ Tı̄ 1899 nı̂, kū-le̍k 3 goe̍h-kan, Lı̂m-chek koāⁿ koá choá-tiâu beh khı̀ Lâm-tâu kùi-bōng, tô͘-tiong khoàⁿ-kı̀ⁿ chı̍t-ê Lāu-hoè-á, chhiú koāⁿ tâng-lô, kha-ciah-phiaⁿ chhah chhiū-pha, in-ūi sı̄ joa̍h-thiⁿ, kòng-lô teh liām, táⁿ-pān koài-chōng, giâu-gı̂ tı̄-teh chhiáⁿ sı̂n; nā beh chhiáⁿ sı̂n, thài bô the̍h kim-hiuⁿ choá-chek? Kı̂-koài! Kı̄n-oá chioh mn̄g, “Lāu-hiaⁿ sı̄ teh chhiáⁿ sı̂n mah?” I ı̀n kóng, “Hiàu! Goá sı̄ teh chhiáⁿ Oa̍h-sı̂n , pò lâng chai lâng sı̄ chı̍t-ê Oa̍h-sı̂n ê kiáⁿ”(pó-poè ê oē). Lı̂m-chek kóng, “Án-ni lâi goán Chháu-tun kóng.” Sı̀-goe̍h chhe-it chit-ê Lāu-hoè-á kó-jiân lâi. Chhe-peh N̂g Ou-phoê Tiúⁿ-ló chiap-soà lâi, ná thiaⁿ ná ū khı̀-bı̄, chiū sı̀n Chú, chiong chha̍k-lê ê sai-hū-keng chò lé-pài-tn̂g. Ô--hò! Hāi-lah! Kiû-sı̂n-chiá lâi lah! Tùi chhù-chêng koè ê lâng teh chhoh; chhut-mn̂g tú-tio̍h chhin-iú, mn̄g in, bô hoê-tap; hō͘ tāi-jı̂n kiò khı̀ phah nn̄g pái, sı̀n Iâ-so͘ kiám chhàu-lâng, lia̍h thâng teh ngia̍uh. Sím-mı̍h thang siū an-ùi? Kiù-chú an-ùi ê siaⁿ kóng, “Ūi-tio̍h goá, lâng chiah lé-mē lín.... chiū ū hok-khı̀”(Má-thài 5:11). Sı̀n-gióng chin kian-kò͘. Tı̄ 1907 nı̂ 6 goe̍h 2 jı̍t chiū-kı̄n Lı̂m Ha̍k-kiong bo̍k-su niá Sé-lé. Kin-nı̂-lāi gio̍k-thé soe-jio̍k, pún-nı̂ 6 goe̍h 30 hō, koe-seng kap Chú chò-hoé toà. “Thian-tông lóng bô khó͘-lān, éng-oa̍h bô sí.” Hó-lah! Hióng-siū 70 hoè, ûi-cho̍k cha̍p-goā lâng, kiû Siōng-tè hō͘ in chiap-sio̍k Lēng-sian-jı̂n ê kha-pō͘ kàu-boé. Kám-sióng nn̄g hāng: 1.Miâ-siaⁿ m̄-sı̄ tiâu-kò͘-ı̀ kiû--ê. Koāⁿ tâng-lô ê Lāu-hoè-á, goân-lâi sı̄ siáⁿ-lâng? Nā beh kóng lâng káⁿ chē-chē lâng m̄-bat, nā beh kóng miâ ún-tàng khah-chē lâng chai, chiū-sı̄ hit-ê “Gō͘-jı̍t bē tê-kho͘, la̍k-jı̍t kóng Iâ-so͘.” Chiang-hoà Khó͘ Chı̀n-peh lah! I pò-iông Iâ-so͘ ê miâ, Iâ-so͘ lâu i ê miâ hō͘ lâng kı̀-liām. 2.Chı̄n-tiong toè Chú ê kà-sı̄. Le̍k-tāi sı̀n-tô͘, siū-thâi--ê, jı̍p sai-hia̍t, lo̍h hoé-lô͘, pı̄ koáⁿ-tio̍k, phoah chho͘, kòng, mē. Hui Ki-tok kàu nā toā sı̍t-hiān, beh án-choáⁿ? Khó-lı̂n Chi-ná sı̀n-tô͘. Kiám-chhái sı̄ Chú te̍k-chè pó-kùi kun-khı̀. Lı̂m-chek chı̄n-tiong koè-liáu khó-kèng, goá hiān-chāi beh keng-koè, kín-sı̄n lah! (Tâi-oân Kàu-hoē-pò tē 510 koàn, 1927 nı̂ 9 ge̍h)