Sim-hiân 1

Ta̍k ê lâng sim tiong lóng ū chı̍t-tiâu hiân, tng hit tiâu hiân tín-tāng ê sı̂, i ê sim-lêng oē ū te̍k-pia̍t ê kám-èng, chhin-chhiūⁿ kú nı̂ sı̀-soàⁿ ê lāu pêng-iú tı̄ bô-phah-sǹg ê tiong-kan lâi sio-tú, iā chhin-chhiūⁿ bı̂n-bāng tiong ê kò͘-sū kèng-jiân sêng chin chı̍t-poaⁿ, chı̍t-chūn chı̍t-chūn ê sio-lō, kam-tiⁿ tùi sim-té tı̍t-tı̍t chhèng khí-lâi, goá chheng hit tiâu hiân kiò chò “sim-hiân”. Siàu-liân ê sı̂ hit tiâu hiân khah chia̍p tín-tāng, tú tio̍h chı̍t-ê só͘ ài ê lâng, á-sı̄ thiaⁿ-tio̍h chı̍t-siú tōng-jı̂n ê si-koa, khoàⁿ tio̍h chı̍t-chhut tōng-khı̀-hoê-chhiâng ê tiān-iáⁿ, á-sı̄ tha̍k-tio̍h chı̍t-phian put-jím-sek-chhiú ê bûn-chiuⁿ, sim lóng oē tiô-thiàu, hoaⁿ-hí kah boē kóng tit, chia̍h jú lāu, hit-tiâu sim-hiân soah jú tiām-chēng, ū-tang-sı̂ kui nı̂ thàng thiⁿ mā m̄ bat khı̀ kā kha̍p chı̍t ē. Sim-hiân-à sim-hiân! M̄ thang tiām-chēng, m̄ thang khı̀ hō͘ sí khı̀, siōng-thiⁿ chhòng-chō lâng ê sı̂, ū chiong i ê lêng pûn jı̍p lâng ê phı̄ⁿ-khang, lí tio̍h tiô-thiàu, hō͘ lán ho̍k-tò siàu-liân, chhin-chhiūⁿ eng-chiáu. (Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)