Sim-hiân 20

Tâi-oân lâng m̄ sı̄ bô gâu, Tâi-oân lâng chin gâu, ta̍k khoán chèng-koân lâi thóng-tı̄ lán lóng ū châi-tiāu thang sek-èng. Tâi-oân lâng m̄-sı̄ bô khiáu, Tâi-oân lâng chin khiáu, jı̄m hô mı̍h-kiāⁿ nā kha̍p tio̍h piⁿ, lán chiū ū châi-tiāu thang hóng chhut--lâi, jû si jû koa ê pē-bó oē, chèng siáⁿ-hoè ū siáⁿ-hoè ê thó͘-tē, phè-ha̍p kut-la̍t, khı̂n-khiām, sioh chêng, hò͘ⁿ kheh ê pún sèng, Tâi-oân lâng èng kai m̄ sı̄ kan-taⁿ ē hiáu chhiùⁿ “Saⁿ-siaⁿ-bô-nāi” ê pháiⁿ-miā-kiáⁿ. Būn-tê chhut tı̄ ba̍k-chiu khoàⁿ bô kàu hn̄g, khah khoàⁿ tō sı̄ sin-khu-piⁿ ê tāi-chı̀, ba̍k-chiu khoàⁿ bē hn̄g, sim-tn̂g chū-jiân e̍h, sim-tn̂g nā é, chı̍t-koá hó ê pún-sèng chiū khai-sí piàn-chit, kut-la̍t piàn chò phah piàⁿ teh thàn chı̂ⁿ, khı̂n-khiām piàn chò khiām hō͘ kiáⁿ-sun khai, sioh chêng sioh kah sı̄-hui-put-bêng, áⁿ ka-kı̄ ê lâng pí jı̄m-hô tāi-chı̀ lóng koh khah tiōng-iàu, só͘-í lán nā beh chhiùⁿ “Saⁿ-siaⁿ-bô-nāi” tio̍h bih tiàm pâng-keng lāi tùi kiàⁿ ka-kı̄ chhiùⁿ, chhiùⁿ ê sı̂ sūn-soà peh hı̄ⁿ-khang thiaⁿ Ou-chúi-kau ê chúi-kúi án-choáⁿ teh kiò, Jı̄-jı̄-pat ê oan-hûn án-choáⁿ teh háu, pêⁿ-pêⁿ sı̄ ū huih ū ba̍k-sái ê sin-khu, sı̄ án-choáⁿ lâu chhut--lâi ê ba̍k-sái chha-pia̍t ná ē hiah-nı̍h toā! (Tâi-oân Kàu-hoē Kong-pò tē 2163 kı̂, 1993 nı̂, 8 goe̍h)