Sim-hiân 27

Ū lâng mn̄g goá kóng, sı̄ án-choáⁿ siá sim-hiân siá kah tùi chia lâi, goá siūⁿ goá pēng bô thoat tê, in-ūi tı̄ koat-chı̀ ēng pē-bó oē siá-chok chı̀n chêng, ū chı̍t-toāⁿ chin-tn̂g chin-tn̂g ê sı̂-kan, goá ê sim-hiân bô teh tín-tāng, thàu-chá khoàⁿ jı̍t-chhut ná jı̍t-chhut, beh àm khoàⁿ jı̍t-lo̍h ná jı̍t-lo̍h, hái-éng phah hoāⁿ bô koh khip-ín goá, hong chhoe chhiū-hio̍h thiaⁿ bē tio̍h koa-siaⁿ, péng khui siàu-liân ê sı̂ ēng tiong-bûn siá ê si lú khoàⁿ lú bô bı̄, chheh chiàu siông teh tha̍k, kang chiàu siông teh chò, im-ga̍k chiàu siông teh thiaⁿ, sim-hiân bē tín-tāng chiū sı̄ bē tín-tāng, chhin-chhiūⁿ khı̀ hō͘ seⁿ-sian--khı̀ chı̍t-poaⁿ, liân poàⁿ mı̂ iā chò bô chhái-sek ê bı̂n-bāng, goá m̄ chai, goá m̄ chai tàu té sı̄ án-choáⁿ, tı̍t kàu ēng pē-bó oē khai sí siá-chok, goá chiah chhéⁿ-ngō͘, goá ê sim, goá ê chhiú, goá ê kha lı̄-khui Tâi-oân siuⁿ hn̄g lah!

Bô kha̍p tio̍h thô͘ ê sin-khu, ná phı̄ⁿ ē tio̍h kâⁿ hoeh ê le̍k-sú, Bô keng-ûn koè ê sim-tiân, ná siá ē chhut tōng jı̂n ê si-phian, Chı̍t-ki chháu sı̄ chı̍t tiám lō͘!  Bô kin ê hoe-chháu liâm-piⁿ ko͘! Liâm-piⁿ ko͘!

(Tâi-oân Kàu-hoē Kong-pò tē 2174 kı̂, 1993 nı̂, 10 goe̍h)