Sim-hiân 4

1962 nı̂ 9 goe̍h 28 jı̍t, a-pa ê chûn tı̄ se̍h koè Hêng-chhun chı̀n jı̍p Tâi-oân hái-kiap ê sı̂ lâi sit-chong, saⁿ-cha̍p kúi nı̂ lâi, liân lâng kap chûn lóng bô poàⁿ-tih siau-sit, 1966 nı̂ 5 goe̍h tiong-sûn, a-hiaⁿ ê chûn Thian-pó-lûn tı̄ chı̍t-ê hong-thai-thiⁿ koáⁿ boē hù thang jı̍p káng, phiau àn Chhâ-soaⁿ ê soaⁿ kha lâi lê-ta, hit chūn goá tú chhut goā tha̍k-chheh, thiaⁿ tio̍h siau-sit koáⁿ khı̀ Chhâ-soaⁿ khiā tiàm hái kı̂ⁿ khoàⁿ a-hiaⁿ ê chûn tı̄ hong-ú tiong iô-iô-pái-pái kap miā-ūn teh phok-tàu, (chûn í-keng kiông beh tn̄g chò nn̄g-chat, ı̂-it liân chiap ê sı̄ kà-sú-sek, só͘ ū ê chûn-goân lóng kheh tı̄ hia), sim tiong ū kóng boē-chhut ê kan-khó͘, chûn kap hái hoāⁿ kan-taⁿ nn̄g-pah goā kong-chhioh nā-tiāⁿ, khiok bû-lêng-ûi-le̍k, che chiū sı̄ Tâi-oân thó-hái lâng ê miā-ūn. A-hiaⁿ khah hēng-ūn, gô koè chı̍t ê kiò thiⁿ thiⁿ-boē-ı̀n, kiò tē tē put-lêng ê o͘-àm-mı̂, keh-jı̍t kèng-jiân hong-pêng-lōng-chēng, khioh tio̍h sı̀ⁿ-miā tńg-lâi ê a-hiaⁿ, siang-kha ta̍h chiūⁿ bé-thâu, sin-khu kan-taⁿ chhun chı̍t-niá lāi-saⁿ-khò͘, tı̄ sit-khı̀ a-pa liáu ê sı̀-tang āu koh tú-tio̍h chit-khoán tāi-chı̀, a-bú ê sim-chêng thó͘ siūⁿ mā chai, kóng-khí-lâi hó chhiò, a-hiaⁿ ê poê-siông-hùi kèng-jiân chí-ū gō͘-chheng gō͘-pah kho͘ nā-tiāⁿ, a-hiaⁿ ēng gō͘-pah kho͘ khı̀ bé chı̍t-ki sió-thê-khı̂m sàng goá, hō͘ goá chia̍h-lāu-chhut-phiah, the̍h tńg-khı̀ ha̍k-hāu ê sok-sià ngē-sí kù, hit ki sió-thê-khı̂m toà hō͘ goá ê tông-o̍h choē-choē ê khùn-jiáu, khiok phah khui goá im-ga̍k ê sim-mn̂g, nā sı̄ goá kin-á-jı̍t tı̄ im-ga̍k ê téng-koân ū tām-po̍h-á oē phı̄ⁿ tit ê sêng-chiū, kóng i sı̄ a-hiaⁿ ēng i ê sı̀ⁿ-miā oāⁿ-lâi-ê, mā bô koè hūn. (Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)