Sim-hiân 5

Ha-má-seng kàu Kı̂-āu ê hoé-chûn-á, bat chài koè goá ná n̂g-kim chı̍t-poaⁿ ê liân-siàu, chheng-chhun, saⁿ-cha̍p goā tang chêng, goá kap gín-á phoāⁿ, tiāⁿ-tiāⁿ tı̄ lé-pài-jı̍t ê ē-po͘, chē chûn koè Kı̂-āu kòng-kiû, khoàⁿ jı̍t-lo̍h, kı̀ⁿ-nā chiūⁿ chûn tō khai-sí chhiùⁿ-koa, bı̂n-iâu, koa-iâu, sèng-koa, bû-só͘-put-chí chhiùⁿ, àn chiūⁿ chûn chhiùⁿ kàu lo̍h chûn, iân-lō͘ chhiâ chiò ê se̍k-iông, hái-chiáu ê kiò siaⁿ, ūi goán phó͘ chhut it-seng lân-bōng ê hô-im. Goá chin ài chē tiàm hoé-chûn-á ê goā-iân hn̄g-hn̄g khoàⁿ káng-chhùi, chı̍t-bı̄n khoàⁿ chı̍t-bı̄n chò bāng, phah hoāⁿ ê lōng-hoa, siám-sih ê chúi-iáⁿ, siông-siông chiong goá ê sim-sū toà kàu chin hn̄g chin hn̄g ê sè-kài, kiâm-sip-bı̄ ê hái hong chhin-chhiūⁿ lēng goā chı̍t-chióng ê bó-gú, ta̍uh-ta̍uh teh tùi goá kóng-oē, oē-kı̀-tit ū chı̍t-tang ê nı̂-boé-jı̍t, goá kap chı̍t-ê tng-sı̂ iáu teh tha̍k tāi-ha̍k ê pêng-iú, sio-chio tı̄ hit-àm khı̀ chē hoé-chûn-á, tùi ē-àm peh-tiám chē kàu cha̍p-it tiám, chiah ta̍h tio̍h chhiú tiong bô poe sim iā chùi ê kha-pō͘, tò-tńg-khı̀ chhù-nih khùn. Bô lâng ū khùi-la̍t thang chiong kong-im se̍h tò-tńg, chóng-sı̄ tng sı̀ⁿ-miā ê hûn-jiah phah-tāng sim-hiân ê sı̂, goá siūⁿ, koè-khı̀, hiān-chāi kap bı̄-lâi sı̄ thiàu-iāu tı̄ kâng chı̍t-ê ga̍k-chiong téng-koân ê im-hû. (Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)