Sim-tiong ū han-chı̂

Bān-siōng keng-sin, tāi-tē hâm-chhiàu, ǹg pak ê thian-khong iū kiàn hoân-châu ê hāu-niáu, seng-seng-put-sek ê tāi-chū-jiân, koh chı̍t-pái ēng i put-piàn ê hoat-chek pò lán chai, ū jı̍t-kng chiàu-iāu ê só͘-chāi, chiū ū thiàⁿ kap sèⁿ-miā teh seng-tióng. Bô-lūn koân-io̍k ê chu-bı̄ ū loā kiông, o͘-àm ê koân-sè ū loā-ióng, kàu-boé lóng tio̍h chhin-chhiūⁿ hân-léng ê tang-thiⁿ chı̍t-poaⁿ, tı̄ chhun-hong chhoe-sàng ê ē-bı̄n lâi siau-soàⁿ. Bí Bo̍k-su tńg--lâi-lah! Jı̄-cha̍p tang bô kı̀ⁿ-bı̄n, Hō-ló-oē iû-goân liù-liù kiò, lóng bô khı̀ hō͘ seⁿ-sian khı̀, pı̀-koat chí-ū chı̍t-ê——sim-tiong ū hân-chı̂. Thiaⁿ Thian-hiân teh kóng, tò-khı̀ Eng-kok ê thâu-kúi tang, Bí bo̍k-su chò bāng ê sı̂ lóng ēng Hō-ló-oē teh bı̂n-bāng, chit-khoán ê thiàⁿ sı̄ sûn-kiat ê thiàⁿ, bô-ké ê thiàⁿ, sı̄ ta̍t-tit lán siàu-liām ê thiàⁿ, ûi-hām ê sı̄, Bí bo̍k-su-niû in-ūi náu-tiòng-hong tó tı̄ pēⁿ-chhn̂g, boē-thang kap i chò-hoé lâi. Kèng-thiàⁿ ê bo̍k-su-niû! Goán ū tùi Bí bo̍k-su chiap-tio̍h lí kià-lâi ê thiàⁿ-thàng kap chiok-hok, goán sêng-sim ǹg Siōng-tè khún-kiû, nā ē-tàng, goān I hō͘ lí ho̍k-tò siàu-liân chhin-chhiūⁿ eng-chiáu, thang hō͘ goán iā ū ki-hoē koh chı̍t-pái tı̄ Tâi-oân khoàⁿ-kı̀ⁿ lí ná chhun-thiⁿ chı̍t-poaⁿ ê chhiò-iông. (Tâi-oân Kàu-hoē Kong-pò tē 2095 kı̂, 1992 nı̂, 4 goe̍h)