Sin-bûn ê cha̍p-lio̍k 05

Ùi Wiki Tô·-su-kóan
16. Tı̀-ı̀ Kiù Lâng ê Phı̀-jū 
Bó͘ só͘-chāi ū chı̍t ê sı̀n Chú ê chí-bē phoà-pı̄ⁿ siong-tiōng, āu-lâi ū khah hó, Ū chı̍t mı̂ ū bāng-kı̀ⁿ chı̍t ê bāng. Bāng-kı̀ⁿ i ū lı̄-khui sè-kan, lêng-hûn chiūⁿ kàu Thian-tông. Jı̍p Thian-tông mn̂g lāi ū khoàⁿ-kı̀ⁿ choē-choē lâng lóng-chóng êng-kng, chun-kùi, hoaⁿ-hí, pêng-an, ia̍h khoàⁿ-kı̀ⁿ chiah-ê lâng lóng tı̀ bián-liû, chhēng súi saⁿ. Khoàⁿ-kı̀ⁿ in só͘ tı̀ ê bián-liû sı̄ chin kim chin hó khoàⁿ. Koh khoàⁿ-kı̀ⁿ bián-liû ū kim-kim kng-kng ê chhiⁿ tı̄-teh, ū ê ū chı̍t lia̍p, ū ê nn̄g lia̍p, ū ê gō͘ lia̍p, ū ê cha̍p goā lia̍p, ū ê koh khah choē; hō͘ tı̀ ê lâng chin-chiàⁿ thang hoaⁿ-hí. 
Chit ê chí-bē chı̍t ē kàu-tè, ū chı̍t ê thiⁿ-sài lâi chih-chiap i the̍h chı̍t téng bián-liû hō͘ i tı̀. I chih-tio̍h bián-liû chiū khoàⁿ-kı̀ⁿ sı̄ chin-chiàⁿ hó-khoàⁿ, Chóng-sı̄ lóng bô chhiⁿ tı̄-teh. I khoàⁿ-kı̀ⁿ án-ni chiū mn̄g thiⁿ-sài kóng, “Goá khoàⁿ pa̍t lâng só͘ tı̀ ê khah choē lâng ū kng chhiⁿ tı̄-teh, nā-sı̄ chit téng lóng bô, sı̄ cháiⁿ-iūⁿ ?” Thiⁿ-sài ı̀n kóng, “lí khoàⁿ lâng tı̀ ū chhiⁿ ê bián-liû sı̄ in-ūi in oa̍h tı̄ sè-kan ê sı̂ ū ín-chhoā lâng lâi sı̀n Chú tit-tio̍h kiù; taⁿ lí sui-jiân ū ho̍k-sāi Thiⁿ-pē, nā-sı̄ lí hō͘ lí ê ke-lāi tāi-chı̀ kap hong-sio̍k chó͘-tòng, lóng bô tı̀-ı̀ kiù lâng. Lí tit-tio̍h Chú ê un kàu chiah toā, kàu chiah chhim, iáu-kú m̄ kam-goān poah kang lâi lı̄-ek pa̍t-lâng. Lí kan-ta kò͘ ka-kı̄, tiàm chhù lāi kò͘ lí ê thé-biān, bô siūⁿ pa̍t lâng ū lêng-hûn put-chí pó-poè.” 
Chit ê chí-bē ı̀n kóng, “Chin-chiàⁿ ū iáⁿ, goá tı̄ sè-kan ê sı̂ bô phah-sǹg sí āu ê tāi-chı̀ iàu-kín kàu án-ni. Che káⁿ sı̄ in-ūi goá bô chı̄n-la̍t thiàⁿ Chú. Ai ah ! goá ê choē tāng, Chú ê un chin-chai chhim, hoaⁿ-hí kiù goá, goá chin-chiàⁿ boē kham-tit. Taⁿ beh koh mn̄g lí chı̍t kù oē, chhiáⁿ lí kā goá kóng. Hit lâng tı̀ hit téng ū moá-moá kng chhiⁿ ê bián-liû sı̄ chı̄-chūi ? Goá ioh i tı̄ sè-kan káⁿ sı̄ hó-gia̍h lâng, á-sı̄ choè lú thoân-tō, chiah ū êng thang khı̀ ín-chhoā hiah choē lâng lâi ho̍k-sāi Chú.” 
Thiⁿ-sài ı̀n kóng, “Lí toā-toā chhò, hit lâng tı̄ chia, lí khoàⁿ sı̄ chin chun-kùi, tiàm sè-kan ê sı̂, i sı̄ choè sòng-hiong chiú-koáⁿ.” 
Hit ê hū-jı̂n-lâng koh kóng , “I thái-thó oē tit-tio̍h kàu án-ni ?” 
Thiⁿ-sài ı̀n kóng , “Sı̄ in-ūi i ê sim siông-siông kau-poê Chú, lia̍h thiⁿ nı̍h ê tāi-chı̀ choè tē-it iàu-kín, sim moá-moá jı̂n-ài; tùi án-ni m̄-nā ín-chhoā i ke-lāi ê lâng choè Chú ê ha̍k-seng, koh put-lūn só͘ tú-tio̍h ê lâng i liâm-piⁿ siūⁿ khoàⁿ tio̍h ēng sím-mı̍h hong-hoat lâi kiù i. Tı̄ chia ū choē-choē lâng lóng sı̄ i só͘ ín-chhoā--ê. Lâi chit só͘-chāi ê sı̂, i lı̄-khui sè-kan, ū ngiâ-chih i, to-siā i, put-chí chun-kèng i. Chit ê chiú-koáⁿ lâng ka-kı̄ chai m̄-sı̄ i ê khùi-la̍t chiah ín-chhoā lâng, lóng sı̄ Chú ê Sı̂n pang-chān, Chú ia̍h o-ló i, kóng, ‘Goá iau , lí hō͘ Goá chia̍h, chhùi-ta lí hō͘ Goá lim.’(Má-thài 25 :34-36. Taⁿ lí thang khı̀ kı̀ⁿ Chú, I put-chí thiàⁿ lí, thoè lí lâi pàng-sak sı̀ⁿ-miā .” 
Chit ê chí-bē kóng, “Goá khı̀ kı̀ⁿ Chú tı̀ chit hō bô chhiⁿ ê bián-liû, goá chı̄n kiàn-siàu. Chit só͘-chāi sui-jiân sı̄ chin pêng-an, iáu-kú goá chin ài koh toà sè-kan kúi nı̂ kú, thang hián-bêng goá chin-chiàⁿ sı̄ Chú ê ha̍k-seng goá chiū beh chhut-la̍t lâi choè Chú ê kang.” 
Hū-jı̂n-lâng bāng kàu án-ni chiū chhíⁿ. 
Tùi hit-tia̍p i toā-toā kám-siā Siōng-tè jiâu i ê sı̀ⁿ-miā, hō͘ i tiàm tı̄ sè-kan khah kú. Koh i ta̍k-jı̍t ū kiû Siōng-tè hō͘ i khùi-la̍t tı̀-hūi thang ēng Kiù-chú sı̍p-jı̄-kè tō-lí lâi kóng hō͘ lâng thiaⁿ, koh hō͘ i oē khoàⁿ-phoà sè-kan, chai nā oē hō͘ Chú hoaⁿ-hí, sı̄ pí sè-kan ê hù-kùi bān pē khah hó. Khoàⁿ Tàn-í-lí 12 :3. 
17. Gín-ná hiàn Seng-khu choè Oa̍h ê Chè 
Ū chı̍t-jı̍t goá tı̄ koe-lō͘ teh kiâⁿ ū tú-tio̍h chı̍t ê soè-hàn gín-ná hiong-hiong cháu chhoàn-kè-khı̀. Hit sı̂ lo̍h seh tú-á chı̂ⁿ, koe-lō͘ chhı̂-chhı̂. Hit ê gín-ná bô soè-jı̄, teh cháu ê sı̂ kha tio̍h-tak poa̍h-tó. Goá khoàⁿ-kı̀ⁿ i ê seng-khu chhēng phoà-phoà ê saⁿ, iok-lio̍k ū cha̍p-it hè. Tı̄ Lûn-tun siâⁿ tı̄ koe-lō͘ nı̍h siông-siông ū tú-tio̍h gín-ná poa̍h-tó lâng put-kò sı̄ chhut-chāi i khı̀, to̍k-to̍k goá khoàⁿ chit ê gín-ná poa̍h-tó, bû-ı̀-tiong chiū khı̀ khan i khí-lâi, khoàⁿ i ê seng-khu lóng kō lâ-sâm, goá chiū the̍h chhiú-kun kā i chhit bı̄n, chhit chhiú, soà kā i kóng, “Soè kiáⁿ ah, lí siáⁿ-sū hiah kín cháu poa̍h-tó, āu-lâi lí tio̍h soè-jı̄ .” Soè-kiáⁿ kia̍h-ba̍k khoàⁿ goá chiū kóng, “Peh-chek ah put-chí to-siā, goá poa̍h-tó bô ū tio̍h-siong, goá in-ūi koáⁿ-kín boē kò͘-tit khoàⁿ lō͘.” Goá chiah mn̄g, “Lí siáⁿ-sū hiah kín ? Chit-tia̍p jı̍t oàⁿ-lah lí beh jı̍p o̍h á m̄ sı̄ ?” Ìn kóng, “Bô, goá in-ūi bô oê í-keng chı̍t lé-pài kú bô khı̀, goán lāu-bú ū kóng, kiám-chhái Pài-it oē tit-tio̍h sin oê chiah oē-tit thang khı̀. ”Hit-tia̍p goá boē hiáu-tit sím-mı̍h iân-kò͘ hō͘ goá ê sim ài mn̄g i kàu siông-sè, goá chiah mn̄g , “Lí ta̍h-lo̍h khiā ?” Ìn kóng, “Tı̄ keh-piah koe, miâ kiò Thâi-gû hāng.” Goá kóng, “Hòⁿ, hit tiâu lō͘ goá chai, Chóng-sı̄ siáⁿ-sū cháu tùi chia lâi, beh khı̀ ta̍h-lo̍h ?” Gín-ná ēng chhiú kí kóng, “Goá beh khı̀ hit keng tiàm.” Khoàⁿ hit keng tiàm sı̄ boē kan-kó ê mı̍h. I koh kóng, “Goá sı̄ beh boé chá-khí tǹg ê hé-sı̍t hō͘ Niá-ko͘-pô chia̍h. Peh-chek ah, lí khoàⁿ goá ū chı̂ⁿ beh khı̀ boé.” Goá khoàⁿ i só͘ the̍h sı̄ nn̄g chiam chı̂ⁿ nā-tiāⁿ, ài chhiò mn̄g i kóng, “Boé nn̄g chiam chı̂ⁿ ê mı̍h ū kàu-gia̍h thang chia̍h mah ?” Ìn kóng, “Oē, oē, hit keng oē boé.” “Lí beh boé sím-mı̍h tio̍h kā goá kóng.” I kóng, “Beh boé mı̄-pau, gû-lin-iû, chhâ, thô͘-thoàⁿ, kok hāng boé gō͘ ê chı̂ⁿ. Goá taⁿ beh kín-kín khı̀, kiaⁿ-liáu Niá-ko͘-pô oē thèng-hāu goá siuⁿ kú.” 
Thiaⁿ-kı̀ⁿ i kóng chiah-ê oē hō͘ goá ài chai siông-sè só͘-í kóng, “Koh tia̍p-á kú thang khı̀, goá ài mn̄g lí, lí ê lāu-pē tı̄-teh bô ?” Ìn kóng, “Kúi-nā nı̂ chêng hō͘ chúi kek-sí. ” “Lí ê lāu bú ū tı̄-teh bô ?” Ìn kóng, “Ū, siat-sú i nā sí m̄ chai beh cháiⁿ-iūⁿ.” Kóng kàu chit kù chiū lâu ba̍k-sái. Goá chiah koh mn̄g, “Chit ê Niá-ko͘-pô sı̄ cháiⁿ-iūⁿ ?” “I sı̄ lāu hū-jı̂n-lâng chı̄n sòng-hiong, nā-sı̄ i put-chí hó, siông-siông ài kóng Kiù-chú ê tāi-chı̀ kap i só͘ tit-tio̍h ê un. Lāu-bú chá-khí ū chhe goá khı̀ in tau kā i piàⁿ-sàu lāi-bı̄n, kā i soé bı̄n kā i chhu bı̂n-chhn̂g. Goá chhòng bêng-pe̍k mn̄g kóng, “Lí chá-khí ū chia̍h sím-mı̍h ?” I kóng “Bô, iáu-bē.” Goá chiah mn̄g, “ū iau bô ?” I kóng, “Lí iáu-bē lâi ê sı̂ goá chin iau, goá khoàⁿ-kı̀ⁿ lí lâi khioh boē kı̀-tit iau, Chóng-sı̄ bô joā kú oē tit-tio̍h mı̍h thang chia̍h, in-ūi Iâ-so͘ kóng beh chhe soè chhe-sài lâi pang-chān goá. Siūⁿ lí sı̄ hit ê soè chhe-sài.” 
Goá kóng,”Niá-ko͘-pô lí siūⁿ m̄ tio̍h goá boē án-ni choè, goá lóng bô chı̂ⁿ, bô poàⁿ ı̂ⁿ.” Niá-ko͘-pô soè siaⁿ ı̀n kóng, ‘Tio̍h, tio̍h, lí tek-khak sı̄ goá ê chhe-sài, lí tio̍h chhut koe-lō͘ kiâⁿ-lâi kiâⁿ-khı̀ goá beh tiàm tı̄ chia kı̂-tó kiû Thiⁿ Pē, goá chai Thiⁿ Pē oē hō͘ goá tām-po̍h mı̍h.” Só͘-í goá thiaⁿ i ê oē , tı̄ koe-lō͘ kiâⁿ-lâi, kiâⁿ-khı̀ tú-á se̍h chhit piàn, tú-tio̍h chit ê hū-jı̂n-lâng tı̄ i ê mn̂g-kháu beh chhiáⁿ goá khı̀ boé chiú, beh hō͘ goá nn̄g chiam ê kang chı̂ⁿ. Goá tāi-seng tiû-tû siūⁿ m̄ chai thang kā i boé á m̄-thang, in-ūi goá sı̄ kài-chiú ê lâng kiaⁿ-liáu oē hoān-tio̍h. Hit sı̂ hit ê hū-jı̂n-lâng koáⁿ goá kóng, “Kín khı̀ boé,” goá ū tò-tńg siūⁿ thàn hit ê kang-chı̂ⁿ thang boé Niá-ko͘-pô ê hé-sı̍t, só͘-í goá khı̀ kā i boé, ū thàn chiah-ê chı̂ⁿ. Peh-chek ah, lí phah-sǹg Iâ-so͘ oē siū-khı̀ goá, hoān-tio̍h kài-chiú ê sū bô ?”
Hit sı̂ goá thiaⁿ i chiah-ê oē nâ-âu khioh-tı̄ⁿ boē ı̀n i poàⁿ kù oē. Tia̍p-á kú chiah kóng, “Lí sı̄ hó ê cha-bó͘ gín-ná taⁿ tio̍h kín-kín khı̀, goān Siōng-tè kā lí chiok-hok.” I chiū koáⁿ-kín khı̀ kàu hit ê tiàm, goá chiū àm-chı̄ⁿ tè i khı̀, thiaⁿ-kı̀ⁿ i tı̄ tiàm-lāi kóng, “Kín-kín boē goá mı̄-pau, gû-lin-iû, chhâ, thô͘-thoàⁿ, ta̍k hāng gō͘ ê chı̂ⁿ.” Tiàm ê hé-kı̀ chiū beh the̍h boē i, goá chiah jı̍p tiàm kóng, “Ta̍k hāng hō͘ i sı̀-pē choē.” Gín-ná thiaⁿ goá ê siaⁿ oa̍t thâu khoàⁿ chiū tioh goá ê chhiú kóng, “Peh-chek ah, lí sı̄ thiàⁿ Iâ-so͘, kai-chài tı̄ lō͘-nı̍h tú-tio̍h lí.” Thêng tia̍p-á kú chiah kia̍h ba̍k khoàⁿ goá ê bı̄n kóng, “Goá phah-sǹg lí chiàⁿ-sı̄ Niá-ko͘-pô ê chhe-sài.”Goá bı̄n chhiò-chhiò chiū kóng, “Bô, lí chiū sı̄, taⁿ tio̍h kín-kín tò-khı̀ hō͘ Niá-ko͘-pô chia̍h.” 
Thêng chı̍t khek kú goá ū khı̀ Niá-ko͘-pô in tau, khoàⁿ-kı̀ⁿ hit ê gín-ná teh pı̄-pān hō͘ i chia̍h. Ū mı̄-pau, ū gû-lin-iû, ia̍h ū tê, chóng-sı̄ hit ê tê sı̄ kún-chúi chı̍t iūⁿ. 
Kàu chia̍h soah goá chiū kap hit ê sòng-hiong chhiⁿ-mı̂ lāu hū-jı̂n-lâng kóng-oē, chai i in-ūi sı̀n Chú ū put-chí pêng-an. 
Goá chiū mn̄g chit ê gín-ná kóng, “Lí choè Niá-ko͘-pô ê kang ū kúi jı̍t kú ?” Ìn kóng, “Peh-chek ah, goá kin-á-jı̍t sı̄ thâu chı̍t pái, in-ūi kin-á-jı̍t goá ê lāu-bú bô sím-mı̍h pêng-an ū chhe goá lâi, goá khiok ài koh lâi, sı̄ goá ê sim-koaⁿ put-chí hoaⁿ-hí choè.” Hit sı̂ hit ê gín-ná chai goá ū thiàⁿ i chiū siông-sè kóng i ê tāi-chı̀ hō͘ goá thiaⁿ. I kóng, kúi-nā ge̍h-jı̍t chêng ū tit-tio̍h têng-thâu-siⁿ, bêng-bêng chai i ê choē ū sià-bián, koh kóng, “Chā mı̂ ū khı̀ kı̂-tó hoē. Bo̍k-su ū tiah chı̍t chhiú si lâi gı̂m. Hit chhiú si ê ı̀-sù sı̄ chiong lâng choan sim kap só͘ ū ê, lóng hiàn Chú. Ū chām goá m̄ káⁿ gı̂m, in-ūi goá bô hit hō mı̍h, chóng-sı̄ kha chhiú seng-khu ê sū goá ū gı̂m nā-tiāⁿ, ia̍h goá phah-sǹg Iâ-so͘ ū chiap-la̍p. Peh-chek ah, goá m̄-bat hoaⁿ-hí kàu án-ni. Lé-pài soah goá ū cháu tò-khı̀ kā lāu-bú kóng, “Goá taⁿ bô chhun poàⁿ-hāng.” Goá ê lāu-bú chiah kóng, “Goá ê kiáⁿ bô chhun poàⁿ-hāng, sı̄ sím-mı̍h ı̀-sù ?” “Án-ne ah, goá í-keng ū chiong kha, chhiú, siaⁿ, hiàn hō͘ Iâ-so͘. Goá chhiáⁿ tha̍k chit chhiú si hō͘ lí thiaⁿ.” 
1.Goá ê sı̀ⁿ-miā hiàn hō͘ Lí, Choè Lí lō͘-ēng kàu chı̍t-sı̀. Sı̂-khek mı̂-jı̍t hiàn hō͘ Chú; Kui êng-kng Lí bān nı̂ kú. 
2.Goá ê chhiú ài Lí bēng-lēng, Ūi-tio̍h Lí lâi choè chhe-ēng. Goá ê kha ia̍h ài beh hiàn, Siông-siông thoè Lí kiâⁿ bô siān. 
3.Goá ê siaⁿ-im hō͘ Lí ēng, Hoaⁿ-hí o-ló Chú bô thêng Hiàn chhùi-tûn ūi Lí tín-tāng, Thoân hok-im tı̀-ı̀ kiù lâng. 
4.Goá ê chı̂ⁿ-gûn hiàn hō͘ Lí, Bô chı̍t si sı̄ sio̍k ka-kı̄. Goá ê châi-tiāu Lí siúⁿ-sù, Kam-goān hêng Lí choè khı̀-kū. 
5.Goá ū tiāⁿ-tio̍h ê sim-chı̀, Ǹg-bāng Chú kā goá chú-ı̀, Hiàn sim-koaⁿ goá ū koat-toàn, Éng kui Lí hō͘ Lí chiáng-koán. 
6.Goá ê thiàⁿ-thàng kiû Chú chān, Thiàⁿ Lí iâⁿ-kè thong sè-kan. Taⁿ lı̍p-chı̀ beh hiàn ka-kı̄, Éng-éng, choan-choan, kui hō͘ Lí. 
Tha̍k liáu lāu-bú lâu ba̍k-sái, chiah kóng i chin hoaⁿ-hí, in-ūi i hit-tia̍p tı̄ chhù-lāi ū thoè goá kı̂-tó. Lāu-bú chiū kap goá koh tha̍k, hit sı̂ goá chin hoaⁿ-hí. 
Bı̂n-bāng ê sı̂ ia̍h bat liām hit chhiú si, kàu thiⁿ kng lāu-bú kā goá kóng chā-mı̂ ū hâm-bı̂n teh liām-si, lāu-bú hō͘ goá phah-chhíⁿ. Kàu chá-khí goá ài tı̍t-tı̍t gı̂m hit chhiú si. Chia̍h chá-khí liáu goá chiū mn̄g lāu-bú, “Ūi-tio̍h Iâ-so͘ ū sím-mı̍h kang thang choè ?” Lāu-bú kóng, “Chhiáⁿ thèng-hāu, lán sı̄ chin sòng-hiong, ia̍h bô ū sím-mı̍h thang sàng lâng, kiám-chhái āu-lâi ū ki-hoē thang choè, tio̍h thèng-hāu Siōng-tè ê sı̂-chūn.” Goá koh kóng, “Án-ne ah, iáu-kú kiám bô sím-mı̍h thang choè oē sǹg sı̄ Iâ-so͘ ê kang ?” Koh tia̍p-á-kú lāu-bú chiah kóng, “Kiám-chhái hō͘ lí khı̀ chhiⁿ-mı̂ Niá-ko͘-pô tau kā i piàⁿ-sàu, chhù bı̂n-chhn̂g, m̄-chai lí oē á-boē ? In-ūi goá chá-khí seng-khu bô khoàiⁿ-oa̍h boē tit-thang pún-sin khı̀ . Lí nā án-ni choè chiū-sı̄ choè Chú ê kang, in-ūi Niá-ko͘-pô sı̄ Iâ-so͘ ê ha̍k-seng.” Goá chiah ı̀n i kóng, “Oē, goá tek-khak oē. Taⁿ í-keng choè liáu, Peh-chek ah, lí khoàⁿ ta̍k-hāng hó mah ?” Goá ı̀n i kóng, “Án-ni piàⁿ-sàu put-chí chheng-khı̀. ” 
Gín-ná khoàⁿ i ê saⁿ kóng, “Goá i-chiûⁿ sui-bóng phoà-noā, koh poa̍h-tó tı̄ hit ê lâ-sâm ê só͘-chāi ū bak-tio̍h saⁿ, kai-chài seng-khu lóng bô siong, goá ài mn̄g lāu-bú bı̂n-á-jı̍t thang hō͘ goá koh lâi piàⁿ-sàu chit ê só͘-chāi á-bô, goá ê sim put-chí ài choè chit hō sū, in-ūi pang-chān lâng sı̄ hō͘ goá ê sim toā pêng-an.” 
Goá thiaⁿ chit ê gín-ná kóng chiah-ê oē, chiū tha̍k Sèng-chheh hō͘ in thiaⁿ, saⁿ-kap kı̂-tó, ia̍h the̍h tām-po̍h chı̂ⁿ hō͘ Niá-ko͘-pô thang ēng chiū saⁿ-sı̂. 
Chhut-mn̂g ê sı̂ ū ín i kóng, “Pa̍t-jı̍t beh koh lâi khoàⁿ.” 
M̄-nā tio̍h thiaⁿ tō-lí, sı̍t-chāi tio̍h kiâⁿ i. Ngá-kok 1:22. 
18. Lūn Mô͘-kúi Bê-he̍k Lâng ê Sū 
Ū chı̍t ê Lé-pài-jı̍t chá-khí sı̂, chı̍t ê i-seng miâ Kah, mn̄g i ê hū-jı̂n-lâng kóng, “Lí chá-khí beh chhut-khı̀ lé-pài bô ? Goá in-ūi chiah kú choē-choē lâng phoà-pı̄ⁿ put-sı̂ bô êng, só͘-í kin-á-jı̍t siūⁿ m̄ chhut-khı̀ thiaⁿ tō-lí, beh toà lāi-bı̄n hioh-khùn.” 
Hū-jı̂n-lâng ı̀n kóng, “Goá ia̍h m̄ khı̀, in-ūi chā-jı̍t goá piàⁿ lāi-bı̄n chin siān, siūⁿ m̄ ài khı̀.” 
Kóng soah, chiū choè i khı̀ the tı̄ kau í, chhiú hian-khui Sèng-chheh,siūⁿ tio̍h tha̍k kúi chat, nā sı̄ tha̍k bô loā-choē ba̍k-chiu chin siap, chiū khùn khı̀. 
Bāng-kı̀ⁿ ná chhin-chhiūⁿ khoàⁿ-kı̀ⁿ chı̍t ê kúi-sı̂n, bı̄n chin hiông, chē tı̄ chō-ūi. Tı̄ kúi-sı̂n ê sı̀-ûi ū choē-choē pháiⁿ sı̂n bı̄n ia̍h chı̄n hiông, ta̍k-ê thâu-khak tı̀ hé choè bián-liû. Ta̍k-ê ū miâ kı̀ tı̄ bián-liû, chı̍t ê miâ kiò Oàn-hūn, chı̍t ê miâ kiò Pe̍h-chha̍t, chı̍t ê miâ kiò Kiau-ngō͘, chı̍t ê sı̄ Oàn-tò͘, chı̍t ê sı̄ Pháiⁿ-sèng-tē. Lóng sı̄ chı̍t hō miâ. 
Chē-ūi ê kúi ông chiū mn̄g chiah-ê kúi-sı̂n kóng, “Goá ê jı̂n-sı̂n--ah, lín kin-á-jı̍t Lé-pài-jı̍t ū choè sím-mı̍h tāi-chı̀ lâi chó͘-tòng Siōng-tè ê kok á bô ?”Kı̂-tiong chı̍t ê ı̀n kóng, “Ū--ah, goán chin bô êng ah, teh chó͘-tòng lâng khı̀ lé-pài-tn̂g thiaⁿ tō-lí.” 
Kúi ông kóng, “Án-ni put-chí hó, lín ēng sím-mı̍h hoat-tō͘ khı̀ chó͘-tòng in ?” 
Koh chı̍t ê kóng, “Goá ū bê-he̍k chı̍t lâng hō͘ i siūⁿ thâu-khak hı̂n m̄-bián khı̀ lé-pài, nā-sı̄ goá chai i nā khı̀ tek-khak tit-tio̍h toā lı̄-ek, in-ūi hit jı̍t bo̍k-su só͘ pı̄-pān ê tō-lí put-chí oē kám-kek lâng ê sim.” 
Koh chı̍t ê kóng, “Goá bê-he̍k chı̍t lâng hō͘ i kin-á-jı̍t khı̀ tiàm nı̍h, lâi kı̀ siàu. ” 
Ông ı̀n kóng, “Án-ni chin hó, āu-lâi ǹg-bāng i oē ûn-á pàng-sak tō-lí.” 
Koh chı̍t ê kóng, “Goá bê-he̍k chı̍t ê hū-jı̂n-lâng, hō͘ i siūⁿ i ê seng-khu ê saⁿ-á-kûn bô sı̂-kiâⁿ, thâu-khak só͘ chhah ê chhiam-á bô sím-mı̍h hó khoàⁿ,lâng oē khoàⁿ-khin i, i chiū m̄ khı̀.” 
Koh chı̍t ê kóng, “Goá ia̍h án-ni bê-he̍k choē-choē sòng-hiong lâng, hō͘ i siūⁿ i nā khı̀ lé-pài, khah hó-gia̍h ê lâng ài iàm-chiān i, nā-sı̄ goá chai, sı̄ bô-iáⁿ, in-ūi choē-choē hó-gia̍h lâng put-chí ài lı̄-ek sòng-hiong lâng, koh kap lâng saⁿ-kap chū-chı̍p kı̂-tó, gı̂m-si, tha̍k Sèng-chheh, sı̄ put-chí oē lı̄-ek lâng, ia̍h hō͘ Siōng-tè só͘ hoaⁿ-hí. 
Koh chı̍t ê kóng, “Goá bê-he̍k kúi-nā ê hó-gia̍h lâng, hō͘ in siūⁿ, in ài thé-biān lia̍h in ê thé-biān khah iàu-kín Siōng-tè ê kài-lu̍t. In-chiū siūⁿ,m̄-thang kiâⁿ lō͘ khı̀ lé-pài-tn̂g, nā beh chē kiō mı̄ hùi-khı̀, só͘-í in chiū toà lāi-bı̄n, á-sı̄ khı̀ chı̍t po͘ nā-tiāⁿ.” 
Kúi ông chiū kóng, “Lín chin-chiàⁿ gâu ēng kè-tı̀ lâi hāi Siōng-tè ê pe̍h-sı̀ⁿ.” 
Koh chı̍t ê kúi-ông, “Goá ia̍h ū bê-he̍k choē-choē kàu-hoē ê hiaⁿ-tı̄ chí-bē, hō͘ in siūⁿ in ê ià-siān, seng-khu bô ióng, só͘-í Lé-pài-jı̍t tio̍h khah oàⁿ khí-lâi, in chiū boē hù lé-pài, só͘-í lâi chı̍t po͘ tiāⁿ-tiāⁿ.” 
Koh chı̍t ê kóng, “Goá án-ni bê-he̍k kúi-nā lâng, hō͘ in siūⁿ in sı̄ sió-khoá phoà-pı̄ⁿ m̄-thang chhut-mn̂g, nā-sı̄ goá chai in éng-jı̍t tek-khak bô hō͘ sió-khoá phoà-pı̄ⁿ chó͘-tòng in choè seng-lí, á-sı̄ choè kang. In chin-chiàⁿ sı̄ gōng, in-ūi khı̀ lé-pài put-chí khah khoài m̄ sái chhut-la̍t, sı̄ chē teh thiaⁿ tiā-tiāⁿ, thiaⁿ liáu in ê sim oē pêng-an hoaⁿ-hí.” 
Kúi ông ı̀n kóng, “Chiah-ê lâng hō͘ chit hō sió-khoá sū chó͘-tòng in bô siú Siōng-tè Sèng-jı̍t, chin-chiàⁿ sı̄ chı̄n gōng. Lín án-ni ín-iú bê-he̍k lâng sı̄ oē chó͘-tòng choē-choē lâng tit-tio̍h kiù.” 
Koh chı̍t ê kúi kóng, “Goá ū put-chí hó ê hoat-tō͘, chó͘-tòng choē-choē siàu-liân lâng tit-tio̍h tō-lí.” 
Kúi ông ı̀n kóng, “Che put-chí hó, chó͘-tòng siàu-liân lâng sı̄ tē it iàu-kín, in-ūi siàu-liân lâng khah khoài ha̍k-sı̍p tō-lí, koh sim-koaⁿ khah nńg, Sèng Sı̂n chiū oē ēng Sèng-chheh ê kà-sı̄ kám-kek in ê sim. Lí ēng sím-mı̍h pō͘-sò͘ lâi hāi hit hō lâng ?” 
Hit ê kúi chiū koh kóng, “Goá hō͘ in lia̍h sè-kan ê hong-sio̍k khah iâⁿ Siōng-tè kok ê tō-lí. Goá bê-he̍k choē-choē kàu-hoē tiong siàu-liân ê chí-bē, hō͘ in m̄ khı̀ lé-pài, in-ūi tı̄ lō͘ nı̍h kiám-chhái oē hō͘ lâng kóng pháiⁿ-oē á-sı̄ hō͘ lâng khoàⁿ-kı̀ⁿ chiū kiàn-siàu, in án-ni sit-lo̍h choē-choē lı̄-ek, sim oē léng, āu-lâi ǹg-bāng in kúi-nā nı̂ bô chhut-mn̂g, chiū koàiⁿ-sı̀, m̄ ài khı̀.” 
Koh chı̍t ê kóng, “Goá ia̍h ū chó͘-tòng hū-jı̂n-lâng khı̀ thiaⁿ tō-lí.” 
Kúi ông mn̄g, “Lí ēng sím-mı̍h kè-tı̀ bê-he̍k in ?” 
I ı̀n kóng, “M̄ sı̄ bê-he̍k hū-jı̂n-lâng pún-sin, sı̄ bê-he̍k in ta-po͘ lâng, hō͘ in siūⁿ ta-po͘ lâng khı̀ chiū hó, ke-lāi lâng m̄ bián khı̀,in khah boē hiáu-tit thiaⁿ, khı̀ bô lō͘-ēng, tùi án-ni chó͘-tòng i, Nā-sı̄ goá chai hū-jı̂n-lâng khı̀ thiaⁿ chin iàu-kín, in-ūi in teh chiàu-kò͘ kiáⁿ-jı̂. Siat-sú lāu-bú bô thiaⁿ tō-lí thái oē kà-sı̄ kiáⁿ-jı̂ lâi ho̍k-sāi Siōng-tè.” 
Kúi ông kóng, “Lí só͘ choè chin sı̄ hó, chin gâu phiàn lâng. Lí m̄-nā chó͘-tòng hāi hū-jı̂n-lâng hō͘ i bô tit-tio̍h kiù, ia̍h hāi kiáⁿ-jı̂, hō͘ in tùi soè-hàn m̄-bat tō-lí, án-ni oē khoài jı̍p lán ê kok lâi choè pháiⁿ.” 
Koh chı̍t ê kúi-sı̂n kóng, “Goá hāi Siōng-tè ê kok ê hoat, sı̄ bê-he̍k lâng, hō͘ in Pài-la̍k siūⁿ bô êng thang pı̄-pān sim choan siú Siōng-tè Sèng-jı̍t. Ū lâng hō͘ i Pài-la̍k ài choè kang kàu oàⁿ-oàⁿ, ū ê hō͘ in lâu kúi-nā hāng kàu Lé-pài-jı̍t chá-khí lâi choè; kiám-chhái tām-po̍h kang, á-sı̄ tām-po̍h khang-khè, á-sı̄ lé-pài soah sūn-soà boé tām-po̍h mı̍h, án-ni lóng sı̄ chó͘-tòng lâng siú Lé-pài-jı̍t ê hoat-tō͘.” 
Koh chı̍t ê kóng, “Goá sui-bóng bô chó͘-tòng lâng khı̀ lé-pài-tn̂g nā-sı̄ goá kiáu-jiáu lâng ê sim hō͘ in khı̀ bô tit-tio̍h kà-sı̄.” 
Kúi ông mn̄g , “Lí sı̄ ēng sím-mı̍h hoat-tō͘ lâi kiáu-jiáu lâng ?” 
Ìn kóng, “Goá bê-he̍k lâng hō͘ i phō soè-hàn gín-ná lâi lé-pài-tn̂g, tı̄ hia sian-siⁿ teh kı̂-tó,tha̍k Sèng-keng kóng tō-lí ê sı̂, hō͘ in ài kap gín-ná hoā, thit-thô, bô iàu-kín thiaⁿ tō-lí ê kà-sı̄, tùi án-ni ka-kı̄ bô tit-tio̍h Sèng-sı̂n ê kám-hoà, ia̍h kiáu-jiáu pa̍t-ê ài thiaⁿ tō-lí ê lâng. Koh gín-ná tùi soè-hàn bô iok-sok chiū bô kèng-ùi ê sim, m̄-chai thang hun-piat Siōng-tè ê chhù koh-iūⁿ tı̄ lâng ê chhù.” 
Koh chı̍t ê kúi-sı̂n kóng, “Goá bê-he̍k kàu-hoē ê hiaⁿ-tı̄ chí-bē, hō͘ i thiaⁿ tō-lí ê sı̂ khí m̄ kam-goān ê sim, bô lia̍h hit ê tō-lí sı̄ Siōng-tè ê, hoán-tńg teh siūⁿ sian-siⁿ ū sím-mı̍h pē-pēng thang phoe-phêng, á-sı̄ bô sím-mı̍h gâu khui-thiah, á-sı̄ kan-ta ài hiâm goá chı̍t lâng; tùi án-ni ū khı̀, ia̍h ná bô khı̀, tō-lí boē jı̍p in ê sim.” 
Koh chı̍t ê sı̂n kóng, “Goá ēng koh khah hó ê hoat-tō͘, chiū-sı̄ bê-he̍k chı̍t ê thoân-tō ê sian-siⁿ hō͘ i bô êng thang tāi-seng pı̄-pān tō-lí, kı̂-tó, só͘-í tı̄ lé-pài-tn̂g só͘ kóng ê oē bô kám-kek lâng ê sim. Sui-jiân choē-choē lâng chū-chı̍p teh thiaⁿ, ia̍h bô lı̄-ek.” 
Kúi ông kóng, “Che chin-chiàⁿ sı̄ gâu kè-bô͘ hāi Siōng-tè ê kàu-hoē.” 
Koh chı̍t ê kóng, “Goá bê-he̍k kàu-hoē sı̄ hō͘ in siūⁿ hū-jı̂n-lâng, gín-ná khah hó chē tı̄ phian-phiah-ê só͘-chāi, só͘-í sian-siⁿ kóng tō-lí ê sı̂ ū ê thiaⁿ bô bêng, chiū saⁿ-kap kóng oē, chiū bô chı̀n-pō͘ tek-hēng.” 
Kúi ông thiaⁿ chèng jı̂n-sı̂n ê oē, chiū hoaⁿ-hí ba bún chhiò, o-ló in kóng, “Goá ê jı̂n-sı̂n ah ! lín kin-á-jı̍t só͘ hê-hok goá ê, chin-chiàⁿ sı̄ tèng goá ı̀. Kin-á-jı̍t tı̄ bó͘ keng lé-pài-tn̂g chió-chió lâng khı̀ thiaⁿ, che m̄-nā hāi hiah-ê lâng, koh ia̍h oē hō͘ hit só͘-chāi ê bo̍k-su sim chin kan-khó͘, i káng-kiù Sèng-keng pı̄-pān tō-lí ǹg-bāng thang kà-sı̄ bián-lē hiaⁿ-tı̄ chí-bē, taⁿ khoàⁿ choē-choē lâng bô lâi, i ê sim sit-chı̀.” 
I-seng-niû bāng kàu án-ni chiū chhíⁿ, kóng, “Kúi ông ah, lí boē-oē hāi goá. ”I ê ta-po͘ lâng kóng, “Lí khùn káⁿ ū bāng-kı̀ⁿ.” I-seng-niû kóng, “M̄ chai sı̄ bāng á m̄ sı̄, chı̍t hāng goá kin-á-jı̍t koat-toàn beh khı̀ lé-pài-tn̂g.” 
Tùi hit-tia̍p liáu-āu chit ê hū-jı̂n-lâng put-lūn hó thiⁿ, pháiⁿ thiⁿ, koâⁿ, joa̍h, siông-siông chı̄n sim khı̀ hù lé-pài, m̄-nā ka-kı̄ ê sim jia̍t-jia̍t, koh i ia̍h ū khǹg choē-choē lâng tio̍h iàu-kín Siōng-tè ê Sèng-jı̍t, khı̀ lé-pài. Í-keng kàu tè, m̄-thang kóng êng oē, gı̄-lūn sè-kan ê sū-bū, tio̍h choan sim kı̂-tó gı̂m-si tha̍k Sèng-chheh chiah-ê sū. 
Goān tha̍k chit ê phı̀-jū ê lâng, tio̍h ka-kı̄ séng-chhat, khoàⁿ i khı̀ lé-pài sı̄ sím-mı̍h hō ê sim, nā ū bô kèng-khiân chiū tio̍h koé, bián-tit hām-lo̍h Mô͘-kúi ê lô-bāng, lâi sit-lo̍h Siōng-tè ê un. 
Sèng-chheh choē-choē só͘-chāi ia̍h ū kı̀ Mô͘-kúi ê lı̄-hāi,chhin-chhiūⁿ Má-thài 4:3-10; 13: 19, 39: Lō͘-ka 22: 3, 4; Iok-hān 8:44; Lô-má 16:20; Ko-lı̂m-to Hō͘-su 4:4; 11;3, 13-15; I-hut-só͘ 6:11-18; Thiap-sat-lô-nı̂-ka Chiân-su 2: 18; Ngá-kok 4:7; Pí-tek Chiân-su 5:8,9; Iok-hān 1 su 3:10;Chhòng-sè-kı̀ 3:1-6.