Sin-ieh Iá-kok Tsṳ-sìn e̍k-tsò Tiê-chiu Pe̍h-uē

Sin-ieh Iá-kok Tsṳ-sìn e̍k-tsò Tiê-chiu Pe̍h-uē (1888 nî) huan-i̍k tsiá: W. Duffus, J.C. Gibson

tiān-chú éng-siōng, 《新約雅各書信 譯做 潮州白話》 Tiê-chiu Pe̍h-ūe-jī,

SIN-IEH IÁ-KOK TSṲ-SÌN E̍K-TSÒ TIÊ-CHIU PE̍H-UĒ

SÙAⁿ-THÂU:

LÓI-PÀI-TN̂G HÔNG-SOH-HṲN ÌN

1888

---

IÁ-KOK TSṲ-SÌN

1

Iá-kok, tsò Siãng-tì kũa Tsú Iâ-sou Ki-tok kâi po̍k, kāng sì-sùaⁿ khiã-khí kâi tsa̍p-jī chiⁿ-phài, chhiáⁿ-uaⁿ.

[2] Uá hiaⁿ-tĩ a, nín ngõ--tie̍h tsōi-tsōi-iēⁿ kâi chhì-liēn, lóng-tsóng tie̍h-thóiⁿ--tsò huaⁿ-hí; [3] nín tsai nín-kâi sìn-sim siũ-kùe-chhì chiũ seⁿ-tshut jím-nãi. [4] Chí-kâi jím-nãi tie̍h tsò-chiâⁿ kàu-búe-ke̍k, sái-kàu nín uân-tshuân, bô só khiàm-khueh.

[5] Tháng-jia̍k nín--tang ũ nâng tì-hũi put-tsok, chiũ tie̍h-khiû Siãng-tì, Siãng-tì sĩ kãu-kãu sṳ̀-pun chèng-nâng bô-cheh-hiâm; chiũ pit-tiāⁿ sṳ̀-pun i. [6] Zûi-to̍k tie̍h sêng-sìn lâi-khiû, bô-gî: in-ũi gî--kâi-nâng sĩ chhin-chhiẽⁿ hái-éng, huang tshue-tie̍h chiũ iâu-pùa. [7] Hṳ́--kâi-nâng mín-siẽⁿ tit-tie̍h Tsú sṳ̀ i sĩ-mih mue̍h; [8] sĩ sim-ì m̄-kuat kâi nâng, só-kiâⁿ kâi sṳ̄ tsn̂g-kâi m̄-kien-tiāⁿ.

[9] Pui-tsūaⁿ kâi hiaⁿ-tĩ tie̍h in-ũi i-kâi seng-kûiⁿ tsò hí-la̍k: [10] pù-tsok--kâi in-ũi i lo̍h pui-tsūaⁿ tsò hí-la̍k: uân khî i àiⁿ bô--khṳ̀ chhin-chhiẽⁿ tsháu-hue hièⁿ-seⁿ. [11] Ji̍t tshut kũa jie̍t-jie̍t kâi huang, chiũ nã-tiāu hṳ́-kâi tsháu; i-kâi-hue chiũ lo̍h, i-kâi múi-iông chiũ buâng--liáu: pù-nâng tõ i só-kiâⁿ--kâi iā pit-tie̍h chièⁿ-seⁿ tiau-sià.

[12] Jím-nãi chhì-liēn kâi nâng ũ-hok: uân-khî siũ-tit-kùe chhì i chiũ chiang-àiⁿ tit--tie̍h ióng-seⁿ, tǹg-zû tsun-iông kâi bō, chiũ-sĩ Tsú só èng-hṳ́ lâi-pun ài-sieh I kâi nâng. [13] Ngõ-iú-ho̍k kâi nâng m̄-hó-tàⁿ, Sĩ tshông-tõ Siãng-tì iú-ho̍k uá: in-ũi Siãng-tì bõi-tit pun ak só-iú-ho̍k, Siãng-tì ka-kī iā-bô iú-ho̍k nâng: [14] nā-sĩ kak-nâng sĩ pĩ ka-kĩ kâi sṳ-io̍k só khan-ín chiũ iú-ho̍k. [15] Sṳ-io̍k huâi-jẽng chiũ seⁿ tsũe-ak: tsũe-ak chiáng-sêng chiũ seⁿ-tshut sí-buâng.

[16] Uá ài-sieh kâi hiaⁿ-tĩ a, nín màiⁿ tshò-gōu. [17] Huâm si-pun hó-mue̍h kũa sûn-tshuân kâi ṳn-sṳ̀ bô-m̄-sĩ tshut-tõ chiēⁿ, tshông-tõ buān-kuang kâi Pẽ kàng-lo̍h--lâi, I bô kói-e̍k, iā bô hui-tńg kâi iáⁿ. [18] I sĩ tshut-tõ ka-kī kâi chí-i ēng chin-lí kâi tãu lâi-seⁿ nán, sái nán tõ I só-tsãu--tang tǹg-tsò thâu-soiⁿ kit-si̍t.

[19] Uá ài-sieh kâi hiaⁿ-tĩ a, nín tsai--liáu. Kak-nâng tie̍h méⁿ-méⁿ lâi-thiaⁿ, mān-mān lâi-tàⁿ, mān-mān lâi seⁿ-khì: [20] in-ũi nâng kâi náu-khì bô tsò-chiâⁿ Siãng-tì kâi ngĩ. [21] Kù-tshṳ́ tie̍h khṳ́-tiāu che̍k-khài u-ùe, kũa iông-ṳ̂ kâi ak-ta̍k, tie̍h un-jiû lâi sêng-siũ só-tsai-chèng kâi tãu, chiũ-sĩ õi kiù nín-kâi lêng-hûn.

[22] Nín tie̍h kiâⁿ-tãu, put-to̍k sĩ thiaⁿ-tãu khi-phièn ka-kī. [23] Nâng iā-sĩ thiaⁿ-tãu liáu bô-kiàⁿ, phì-zû tsò nâng ēng kiàⁿ lâi chiè só-seⁿ kâi mīn-mãu: [24] chiè-ãu chiũ khṳ̀, sûi-chiet m̄-it-tit ka-kī kâi nâng-iēⁿ tsãi-seⁿ. [25] Iā-sĩ ũ-nâng tsù-thóiⁿ sûn-tshuân kâi lu̍t-huap, chiũ-sĩ ts̃ṳ-iû kâi lu̍t-huap, sî-sî kù tõ-hṳ́-kò, m̄-sĩ thiaⁿ-liáu m̄-it-tit, nãi sĩ tsun-tshông lâi-kiâⁿ--kâi, chí-kâi-nâng chièⁿ-seⁿ kiâⁿ chiũ tit-hok.

[26] Put-lũn sĩ-mih-nâng thóiⁿ-tsò ka-kī sĩ sêng-kèng, iā-bô àn-tiām i-kâi-chi̍h, chiũ khi-phièn ka-kī kâi sim, chí-kâi-nâng kâi sêng-kèng sĩ hṳ-khang. [27] Tõ nán-kâi Pẽ Siãng-tì mīn-tsôiⁿ, chheng-kiet bô jiám-u kâi sêng-kèng, chiũ-sĩ sûn-kù kou-jî kúa-hũ tõ in kan-khóu tsṳ tang, tsṳ̃-siú màiⁿ pun sì-so̍k só mak--tie̍h.

2

Uá hiaⁿ-tĩ a, nín siú iông-kuang kâi Tsú, Iâ-sou Ki-tok, kâi tãu, m̄-hó chiè gūa-mãu tshú-nâng. [2] Zû-jia̍k ũ che̍k-nâng kùa kkim-chhiú-tsat, chhēng phâi-chhiâng, ji̍p nín-kâi hũe-tn̂g, iā ũ che̍k-kâi phîn-khiông nâng i-saⁿ lâm-lú ji̍p--lâi: [3] nín chiũ kù--tie̍h hṳ́-kâi chhēng phâi-chhiâng kâi, chiũ tàⁿ, Lṳ́ chhiáⁿ-tsõ chí-kò kâi hó ūi-tshṳ̀; iā kāng hṳ́-kâi phìn-khiông kâi nâng tàⁿ, Lṳ́ khiã--pàng hṳ́, ho̍k-sĩ tsõ--pàng uá kha-tèng-ẽ; [4] chièⁿ-seⁿ nín-kâi-sim khá-m̄-sĩ phien, ũ-ak-liãm lâi-lũn nâng. [5] Uá ài-sieh kâi hiaⁿ-tĩ a, nín chhiáⁿ-thiaⁿ; Siãng-tì khá-m̄-sĩ suán chí-sì--kan kâi phîn-khiông-nâng sái in tit--tie̍h sìn-sim kâi pù-kãu, siãng-chhiáⁿ hó sêng-kì chí-kâi kok, chiũ-sĩ Siãng-tì èng-hṳ́ àiⁿ-pun ài-sieh Siãng-tì kâi nâng? [6] Nã-sĩ nín lia̍h-khin chí-kâi phîn-khiông-nâng. Pù-nâng khá-m̄-sĩ iap-chì nín, thua nín kàu kong-ùaⁿ-tsôiⁿ? [7] I khá-m̄-sĩ húiⁿ-pãng nín só-tit-chheng kâi múiⁿ-miâⁿ? [8] Nín zû-kúaⁿ tsun-kiâⁿ hṳ́-kâi uâng-huap, chiũ-sĩ chiè siàⁿ-kiaⁿ hṳ́-che̍k-kù, Tie̍h ài-sieh lṳ́-kâi tshù-lîn chhin-chhiẽⁿ ka-kī, nín chiũ-sĩ kiâⁿ-siẽn. Jia̍k iā-sĩ chiang gūa-mãu lâi-tshú-nâng, [9] nín chiũ-sĩ kiâⁿ m̄-tie̍h, pun lu̍t-huap ngí--tsò huãm-jîn.

[10] Nâng zû-jia̍k siú tshuân-huap, tuaⁿ-tuaⁿ huãm-tie̍h che̍k-kiãⁿ, chiũ-sĩ huãm tshuân-lu̍t kâi tsũe. [11] Uân-khî tàⁿ, M̄-hó kiâⁿ-îm kâi, iā ũ-tàⁿ, M̄-hó suah-nâng. Chièⁿ-seⁿ lṳ́ sui bô kiâⁿ-îm huân-sĩ ũ-suah-nâng, lṳ́ íⁿ-keng sĩ huãm lu̍t-huap kâi nâng.

[12] Nín ho̍k-sĩ tàⁿ-ūe ho̍k-sĩ tsò-sṳ̄ tie̍h zû chiang-lâi chiè tsṳ̃-iû kâi lu̍t-huap siũ-sím-phuàn kâi nâng, hièⁿ-seⁿ kiâⁿ. [13] M̄-pat liên-mién-nâng kâi nâng, i siũ-sim-phùan iā bô tit--tie̍h liên-mién: liên-mién sĩ cheⁿ-iâⁿ sím-phuàn.

[14] Uá hiaⁿ-tĩ a, nâng sui--sĩ ka-kī tàⁿ ũ-sìn iā-sĩ bô-kiâⁿ, ũ sĩ-mih-iah, né? [15] hṳ́--khí sìn õi-kiù i, mé? Zû-jia̍k hiaⁿ-tĩ ché-mūe bô-thang-chhēng, ji̍t-chia̍h khueh-hua̍t, [16] nín--tang ũ-nâng tùi-in-tàⁿ, Nín phêng-an tńg--khṳ̀, nguãn nín chhēng-sie chia̍h-pá, huân-liáu bô chiang sin só-ēng kâi mue̍h pun i, ũ sĩ-mih-iah, né? [17] Chièⁿ-seⁿ lâi-thóiⁿ, sìn iā-sĩ bô kiâⁿ-ûi, khî-tang chiũ-sĩ sí. [18] Pit ũ-nâng tàⁿ, Lṳ́ ũ-sìn, uá ũ kiâⁿ-ûi: lṳ́ bô kiâⁿ-ûi kâi sìn pun uá thóiⁿ, uá chiũ ēng uá-kâi kiâⁿ-ûi hién-mêng uá-kâi-sìn pun lṳ́ thóiⁿ. [19] Lṳ́ sìn Siãng-tì sĩ to̍k-it: lṳ́ chièⁿ-seⁿ sĩ tie̍h, chèng-kúi iā ũ sìn chiũ tõ-tòng. [20] Hṳ-phû kâi nâng a, lṳ́ àiⁿ-tsai--mé, bô kiâⁿ-ûi kâi sìn sĩ bõi-kat-si̍t--kâi.

[21] Nán-kâi tsóu-pẽ A-pek-la̍h-hán khá-m̄-sĩ tshông kiâⁿ-ûi chheng-tsò-ngĩ, chiũ-sĩ hièn i-kâi-kiáⁿ Íⁿ-sat tõ tûaⁿ-chiēⁿ? [22] Khó-kièn i-kâi-sim kũa i-kâi kiâⁿ-ûi tâng hia̍p-la̍t, siãng-chhiáⁿ sìn sĩ tshông-tõ kiâⁿ-ûi tit--tie̍h tsò-chiâⁿ; [23] chièⁿ-seⁿ chiũ-sĩ èng-ngimām siàⁿ-kiaⁿ só-tàⁿ, A-pek-la̍h-hán sìn Siãng-tì, chí-kâi sǹg-tsò i-kâi-ngĩ, iā-sĩ chheng-tsò Siãng-tì kâi phêng-iú. [24] Khó-kièn nâng tit chheng-tsò-ngĩ sĩ in-ũi kiâⁿ-ûi, put-tãn sĩ tõ sìn.

[25] Kĩ-nńg La-ha̍p khá-m̄ iā-sĩ chièⁿ-seⁿ tshông kiâⁿ-ûi tit--tie̍h chheng-tsò-ngĩ, chiũ-sĩ i chiap-na̍p hṳ́-kâi sài-chiá, ãu sái in tùi pa̍t-tiâu-lōu tshut--khṳ̀? Chhin-chhiẽⁿ sin-thói bô sîn-hûn sĩ sí, chièⁿ-seⁿ sìn bô kiâⁿ-ûi iā-sĩ sí.

3

Uá-kâi hiaⁿ-tĩ a, m̄-hó tsōi tsò nâng kâi sin-seⁿ, in-ũi tsai pit-tiāⁿ siũ zú-tãng kâi tsũe. [2] Nán chèng-nâng tsōi-kiãⁿ-sṳ̄ ũ-sit-kha. Zû-jia̍k ũ-nâng tàⁿ-ūe bõi-sit, chí-kâi-nâng chiũ-sĩ uân-tshuân, õi iak-sok tshuân-sin. [3] Nán jia̍k-sĩ lo̍h hâm-thih tõ bé-tshùi, sái i sũn-ho̍k nán, chiũ õi ūn-tõng i tshuân-sin. [4] Iā hó-thóiⁿ hùaⁿ-kâi tsûn-chiah, sui--sĩ chièⁿ-tūa, pĩ khuâng-huang só-kúaⁿ, huân-sĩ chiang chì-sòi kâi tũa lâi ūn-tńg, sûi tãi-kong kâi i àiⁿ sái tùi-tî-kò khṳ̀. [5] Chièⁿ-seⁿ nâng-kâi-chi̍h iā sĩ sòi-sòi kâi sin-thói, nā-sĩ õi-la tūa-ūe. Aī, jie̍h-tsōi kâi tshâ, chì-mûi kâi húe chiũ sie--tit! [6] Chi̍h chiet-sĩ húe: tõ-nán peh-thói--tang kâi ak-sì-kài chiũ-sĩ chi̍h, tiam-u--tie̍h tshûan-sin, õi-sie ūn-tõng kâi buān-mue̍h, i ka-kī iā sĩ tshông-tõ tī-ge̍k--kò sie. [7] Kak-lūi kâi tsáu-siù pue-chiáu, khûn-thâng kũa hái-tói kâi mue̍h, lóng-tsóng hó chì-ho̍k, iā íⁿ-keng pī-nâng chì-ho̍k--kùe: [8] to̍k-to̍k chí-kâi-chi̍h bô nâng õi chì-ho̍k i; [9] m̄-tiām-chẽⁿ kâi ak-mue̍h, tshong-múaⁿ suah-nâng kâi ta̍k. Nán sõng-múi Tsú chiũ-sĩ Pẽ, sĩ ēng chí-kâi-chi̍h; chiù-mēⁿ nâng, chiũ-si chiè Siãng-tì kâi iēⁿ só-tsãu--kâi, iā-sĩ ēng chí-kâi-chi̍h: sõng-múi kũa chiù-mē tâng sĩ tshut tõ che̍k-kâi-tshùi. [10] Uá-kâi hiaⁿ-tĩ a, chí-kâi-sṳ̄ m̄-hó chièⁿ–seⁿ, [11] Phì-zû chí-kâi tsúi-tsûaⁿ kam kũn khóu khá-sĩ tâng-tshut che̍k-kâi-khang, né? [12] hiaⁿ-tĩ a, bô-hue-kúeⁿ chhiū õi-seⁿ kaⁿ-náⁿ, mé? ho̍k-sĩ phû-thô-chhiū õi-seⁿ bô-hue-kúeⁿ, mé? Kiâm-tsúi iā put-lêng tshut tiâm-tsúi.

[13] Nín--tang tî-tiâng ũ tì-hūi kièn-sek? chiũ pit--tie̍h ũ tì-hũi kâi un-jiû lâi hién-tshut i-kâi kiâⁿ-ûi. [14] Zû-jia̍k iā nín sim--tang ũ ta̍k-khóu kâi kòu-kī kũa cheⁿ-sèng, chiũ m̄-hó khùa-kháu lâi hũn-tiāu chin-lí. [15] Chí-khí tì-hũi m̄-sĩ tshông-tõ chiēⁿ--kò lo̍h--lâi, zûi-to̍k sĩ tshut tõ chí sì--kan so̍k hueh-khì, so̍k môⁿ-kúi. [16] Tî-kò ũ kòu-kī kũa cheⁿ-sèng, chiũ pit-tiāⁿ ũ tsa̍p-luãn, kũa kak-iēⁿ kâi ak-sṳ̃. [17] Nā-sĩ tshông-chiēⁿ lâi kâi tì-hũi, soiⁿ sĩ liâm-kiet, iáu chiũ hûa-phêng, un-liâng, jiû-sũn, tshong-múaⁿ, liên-mién kũa siẽn-hẽng, bô phien-sim, bô ngũi-ûi. [18] Kiaⁿ hûa-phêng kâi nâng chiũ-sĩ ēng hûa-phêng, lâi-chèng chiàⁿ-ngĩ kâi kúeⁿ-chí.

4

Nín--tang ũ chièn-tòu sie-cheⁿ sĩ tshông-tî-kò lâi? khá-m̄-sĩ tshông-tõ nín peh-thói--tang cheⁿ-chièn kâi sṳ-io̍k? [2] Nín tham-àiⁿ, bõi-tit-tie̍h: nín suah-lo̍k kòu-kĩ, bõi-tit-tie̍h; nín sie-cheⁿ chièn-tòu; nín bô-tit--tie̍h, sĩ in-ũi nín bô khiû. [3] Nín khiû bô-tit--tie̍h, sĩ in-ũi nín buáng-khiû, sĩ àiⁿ-chiang só-khiû--kâi lâi-tshông nín-kâi io̍k.

[4] Im̂-hũ--a, nín khá-m̄-tsai kāng sì-kài iú-ài sĩ tùi-te̍k Siãng-tì? Kù-tshṳ́ put-lũn tî-tiâng àiⁿ kāng sì-kài iú-ài chiũ-sĩ tsṳ́-tng tsò Siãng-tì kâi chhiû-te̍k. [5] Siàⁿ-kiaⁿ só-tàⁿ--kâi nín khá-sĩ thóiⁿ-tsò hṳ-ngân mé? I só-sái lâi kṳ-tsũ tõ nán-sim kâi Sîn luàn-sieh tì-kàu kòu-kĩ? Nā-sĩ I pun-nán zú-tūa kâi ṳn-sṳ̀. [6] Kù-tshṳ́ siàⁿ-kiaⁿ tàⁿ, Kiau-ngãu kâi nâng Siãng-tì tú-gṳ̃ i, khiam-sùn kâi nâng Siãng-tì sṳ̀-ṳn pun i. [7] Kù-tshṳ́ nín tie̍h hâng-ho̍k Siãng-tì; tie̍h tùi-te̍k mô-kúi, mô-kúi chiũ tsáu-khui nín. [8] Tie̍h chhin-kṳ̃n Siãng-tì, Siãng-tì chiũ chhin-kṳ̃n nín.

Tsò-ak kâi nâng, tie̍h sói nín-kâi-chhiú; nõ-sim kâi nâng, tie̍h chheng-kiet nín-kâi-sim. [9] Tie̍h tsṳ̃-khóu, ai-tshám, thî-kháu: nín-kâi chhiè-la̍k tie̍h pìⁿ--tsò ai-khàu, nín-kâi huaⁿ-hí tie̍h pìⁿ--tsò iu-tshôu. [10] Tõ Tsú tsôiⁿ tie̍h tsṳ̃-pui, Tsú chiũ seng-kûiⁿ nín.

[11] Hiaⁿ-tĩ a, m̄-hó siang húiⁿ-pãng. Pãng hiaⁿ-tĩ, ho̍k-sĩ ngí hiaⁿ-tĩ, chiũ-sĩ pãng lu̍t-huap, ngí lu̍t-huap: lṳ́ a-sĩ ngí lu̍t-huap, chiũ m̄-sĩ tsun-kiâⁿ lu̍t-huap, chiũ-sĩ ka-kī tsò hêng-kuaⁿ. [12] Li̍p lu̍t-huap--kâi kũa tsò hêng-kuaⁿ tuaⁿ-tuaⁿ sĩ che̍k, lêng chín-kiù iā lêng mit-tso̍h: lṳ́ sĩ mih-nâng hó-lâi-ngí tshù-lîn?

[13] Taⁿ, nín ũ-nâng tàⁿ, Ho̍k-sĩ kim-ji̍t ho̍k-sĩ mùa-ji̍t ún chiũ àiⁿ-khṳ̀ móng--kâi siâⁿ-ip, tõ-hṳ́-kò kùe che̍k-nîⁿ, tsò-seng-lí, tit-lĩ; [14] nā-sĩ mùa-khí kâi sṳ̄ nín tou m̄-tsai. Nín-kâi sèⁿ-miāⁿ pí-tsò tî-kâi? Nín sĩ chhin-chhiẽⁿ hûn-bū, siap-sî hién-tshut iáu chiũ bô--khṳ̀. [15] Nā-sĩ nín tie̍h chièⁿ-seⁿ tàⁿ, Zû-jia̍k ha̍h Tsú kâi chí-ì, ún chiũ seⁿ-tshûn--tõ-kò, ho̍k tsò chí-kâi-sṳ̄ ho̍k tsò hṳ́-kâi-sṳ̄. Taⁿ, nín sĩ chiang nín só tsṳ̃-sĩ lâi khua-kháu; [16] huâm chièⁿ-seⁿ kâi khua-kháu lóng-tsóng sĩ m̄-hó. Só-íⁿ tsai sĩ-siẽn m̄-khṳ̀-kiâⁿ kâi nâng, chí-kâi chiũ kui-tsò i-kâi tsũe.

5

Taⁿ, nín pù-nâng a, tie̍h in-ũi chiang-àiⁿ kàu-ki̍p nín kâi khóu-lān, khṳ̀ thî-khàu ai-kiè. [2] Nín-kâi hùe-tshâi àu-tiāu, nín-kâi i-ho̍k tsù-tiāu. [3] Nín-kâi kim-ngṳ̂n kauh-tiāu; i-kâi-san chiang-àiⁿ chí-chèng nín-kâi-tsũe, siãng-chhiáⁿ zû-húe sie nín-kâi-ne̍k. Nín tõ-chí kiáu-búe-ji̍t chek-thiok nín-kâi hùe-tshâi. [4] Kang-jîn kāng-nín kuah-tiũ--kâi, in-kâi kang-chîⁿ, nín put-ngĩ bô-hôiⁿ in, chí-kâi kang-chîⁿ u-siaⁿ: hṳ́-kâi siu-tang kâi nâng kâi u-siaⁿ íⁿ-keng thiaⁿ-kàu Buān-ũ kâi Tsú hĩⁿ--tang-liáu. [5] Nín tõ sì-kài chhia-chhíⁿ i̍t-la̍k; nín iáng nín-kâi-sim tõ pĩ-suah tsṳ ji̍t. [6] Nín ũ tiāⁿ-tsũe hṳ́-kâi ngĩ-jîn, lâi-suah i; i bô khàng-kṳ̃ nín.

[7] Kù-tshṳ́, hiaⁿ-tĩ a, nín tie̍h jím-thãi Tsú kàu--lâi. Chhì-siẽⁿ chiá lông-hu hi-mōⁿ tĩ seⁿ chí-kâi hó-hó kâi ngóu-kak, tõ jím-thãi i, thãi-kàu tit--tie̍h tsôiⁿ-aũ kâi hõu. [8] Nín iā-tie̍h jím-thãi; kien-kù nín-kâi-sim, uân-khî Tsú lâi kṳ̃n--liáu.

[9] Hiaⁿ-tĩ a, m̄-hó seⁿ-hiâm-uàn, chiũ mín tì-kàu tiāⁿ-tsũe; sím-phuàn kâi Tsú íⁿ-keng kàu mn̂g-kha--liáu. [10] Chèng soiⁿ-tsai-nâng thoh Tsú miâⁿ thuân-ūe--kâi õi siũ-khóu kũa õi-jím-nãi, hiaⁿ-tĩ, nín tie̍h chiang in tsò-môⁿ-iēⁿ. [11] Pat jím-nãi--kuè kâi nâng, nán chiũ chheng in tsò ũ-hok: nín pat thiaⁿ-kìⁿ Iak-pek só-jím-nãi--kâi, chiũ thóiⁿ-tshut Tsú kâi kat-ke̍k múaⁿ-múaⁿ sĩ tshṳ̂-pui liên-mién.

[12] Uá hiaⁿ-tĩ a, tsùe chhiet-iàu--kâi màiⁿ huat-sī, màiⁿ kí-thiⁿ màiⁿ kí-tī, iā màiⁿ kí sĩ-mih-mue̍h lâi huat-sī: nín tàⁿ-ūe sĩ tie̍h-tsò sĩ, hui tie̍h-tsò hui; chiũ mín tì-kàu hām-lo̍h tõ tsũe.

[13] Nín--tang ũ nâng siũ-khóu, mé? i chiũ tie̍h khî-táu. Ũ nâng hí-la̍k, mé? i chiũ tie̍h ngîm-si. [14] Nín--tang ũ nâng seⁿ-pēⁿ, mé? i chiũ tie̍h chhiáⁿ kong-hũe kâi chiáng-láu; in chiũ hó thòi i khî-táu, thoh Tsú miâⁿ ēng iû buah i: [15] tshông-tõ sìn-sim lâi khî-táu chiũ õi-kiù hṳ́-kâi pēⁿ-nâng, Tsú chiũ sái i õi khí-sin; jia̍k-sĩ i ũ huãm-tsũe, iā chiũ tit--tie̍h sià-mién. [16] Kù-tshṳ́ tie̍h jī-ke tsṳ̃-jīn nín-kâi tsũe, iā tie̍h siang-thòi khî-táu, sái nín õi-tit ui-hó. Che̍k-kâi ngī-jîn khî-táu tūa ũ kong-hāu. [17] Íⁿ-lĩ-a sĩ kāng-náng tâng-sèⁿ-chhêng kâi nâng, i chhiet-khiû màiⁿ lo̍h-hõu; hõu chiũ bô-lo̍h tõ-tī kàu saⁿ-nîⁿ kũa la̍k-kâi-gue̍h. [18] Aũ tsài-khiû thiⁿ chiũ sṳ̀-lîm hõu, tī chiũ tshut i-kâi thóu-súaⁿ.

[19] Uá-kâi hiaⁿ-tĩ a, nín--tang zû-jia̍k ũ nâng lī-khui chin-tãu, ũ nâng sái i hûe-tńg; [20] tie̍h-tsai sái che̍k-kâi tsũe-jîn lī-khui i-kâi tshò-lōu hûe-tńg, chiũ hó kiù che̍k-kâi lêng-hûn mín sí, siãng-chhiáⁿ hó chia-iám ke-ke tsũe.

IÁ-KOK TSONG.