Sin-thé-lí/Lūn Kut
1. Thong seng-khu ê lāi-bīn iok-lio̍k ū 200 gōa ki kut, chiah ê kut-thâu saⁿ chia̍h chhēng lâi chòe chi̍t ê kut-keh; phì-jû chhin-chhiūⁿ kô͘-chóa ê lâng, tāi-seng pa̍k chi̍t sian ê kut, āu-lâi ēng chóa kô͘ tī gōa-bīn. Lâng oa̍h ê sî iā sī án-ni; kut thang sǹg sī chòe kè, i ê gōa-bīn ū ki-bah kap phê lâi pau chiah ê kut, tùi án-ni chiâⁿ chòe chi̍t ê seng-khu, tú-tú ha̍p lâng ê lō͘-ēng.
2. Kut sī put-chí ū lō͘-ēng ê mi̍h; chi̍t hāng sī ōe pó-hō͘ lāi-bīn khah loán-jio̍k, khah nńg ê mi̍h; chhin-chhiūⁿ thâu-lô͘ (chiū-sī thâu-khak kut) ōe pó-hō͘ náu, á-sī hia̍p-kut ōe pó-hō͘ sim kap hì. Koh chi̍t hāng, kut sī giám-ngī ê mi̍h bián-tit hō͘ seng-khu nńg-nńg, nā bô kut lâng beh thái ōe khiā, ōe kiâⁿ?
3. Chiah ê kut thang pun sì khoán, chiū-sī tn̂g ê, té ê, píⁿ ê, bô hêng ê, (kóng bô hêng ì-sù m̄-sī bōe khòaⁿ-kìⁿ, sī bô miâ thang hō.)
Kut sui-jiân sī giám-ngī ê mi̍h, iáu-kú m̄-sī put-chí tāng, sī khin-phiò ê mi̍h. Tn̂g kut ê lāi-bīn ū khang-khak chhin-chhiūⁿ tek-kóng-á, só͘-í ōe khin koh ióng-ióng. Khang lāi ū kut-chhé tī-teh, kut-chhé ê sek-tì n̂g, ōe hâm iû.
4. Chiah ê kut sī nn̄g hō chit lâi ha̍p chiâⁿ ê, chi̍t hō sī khòng-bu̍t-chit, chi̍t hō sī seng-bu̍t-chit.
Siat-sú chiong kut lâi ngâu kàu thiám-thiám, chiū ōe tit-tio̍h hit ê seng-bu̍t-chit, chiū-sī ka.
Á-sī kut hē tī hé lâi pû, seng-chit chiū lóng-chóng sio-khì, só͘ lâu-teh sī hit ê khang-bu̍t-chit nā-tiāⁿ, chiū-sī chhin-chhiūⁿ he ê khoán-sit.
Lâng sòe-hàn ê sî chí nn̄g hō ê chit sī tùi-pòaⁿ, án-ni gín-ná ê kut sī khah nńg, só͘-í nā poa̍h-tó chiū khah bōe phah chi̍h kut-thâu.
Kàu tiong-liân ū seng-chit chi̍t hūn, khòng-bu̍t-chit nn̄g hūn, só͘-í kut khah ngī-chiāⁿ. Kàu lāu, khòng-bu̍t-chit khah chōe, seng-chit khah chió, só͘-í lāu-lâng ê kut khah chhè, siat-sú poa̍h-tó i ê kut khoài-khoài ōe chi̍h.
5. Nā siông-sè khòaⁿ chi̍t ki kut chiū chai gōa-bīn lóng ū chi̍t têng mo̍h teh pau, hō chòe kut-i. Kut ê gōa-bīn lóng sī tēng koh kng-ku̍t, chit hō tēng-kut chhng chōe-chòe khang hō͘ huih-kńg ōe sì-ûi liû-hêng, tòa huih lâi iúⁿ-chhī kut. Kut ê lāi-bīn kap gōa-bīn bô saⁿ-tâng, sī khah phàⁿ koh lio̍h-á chhin-chhiūⁿ hái-jiông ê khoán, ū bōe sǹg-tit ê sòe khang, lāi-bīn tóe âng ê kut-chhé koh ū chōe-chōe bî huih kńg.
6. Siat-sú kut phah chi̍h, chi̍h hûn ê só͘-chāi ōe chuh tām-po̍h huih, bô lóa-kú chit ê huih ōe kian kui tè, chit ê huih ōe chiâⁿ chi̍t hō chit chhin-chhiūⁿ ka ê khoán, hō͘ hit ki phah-chi̍h ê kut ê siang thâu ōe saⁿ-liân. Nā bô tín-tāng kúi-nā lé-pài kú chit ê ōe saⁿ-liân ê chit ōe piàn tēng kap kut saⁿ chhin-chhiūⁿ.
Kut í-keng phah-chi̍h, beh sio-chiap ê sî iàu-kín m̄-thang tín-tāng, kiâⁿ-liáu ōe lī-hûn, só͘-í tio̍h ēng pang-á lâi kah. Phah-chi̍h ê só͘-chāi hit ê sin ê kut khí-thâu ū seng-bu̍t-chit khah chōe só͘-í khah nńg, án-ni sòe-jī chiàu-kò͘; nā bô chiàu-kò͘, kàu tēng ê sî kut ōe khiau iā bōe koh-chài ti̍t.