Sin-thé-lí/Sin-thé-lí ê Chóng-lūn

Lūn kàu lâng ê seng-khu cháiⁿ-iūⁿ oa̍h, cháiⁿ-iūⁿ tōa, ū chōe-chōe hāng put-chí ò-biāu, lâng bōe lóng-chóng bêng-pe̍k chai, liân phok-ha̍k ê i-su chhâ-chhut iáu-kú lóng bē kàu-tóe, m̄-kú ū hāng í-keng hun-bêng thang kì, hō͘ tha̍k ê lâng chai.

Ài chòe i-seng ê tek-khak tio̍h káng-kiù chit hō tāi-chì kap seng-khu phòa-pīⁿ ê in-toaⁿ, chiah khah ōe hiáu-tit i-pīⁿ.

I-seng í-keng ū pī-pān chheh chōe-chōe pún hō͘ lâng o̍h kàu siông-sè, nā-sī pī-pān chit pún put-kò kóng tām-po̍h khah chhián ê nā-tiāⁿ.

Kiám-chhái lâng mn̄g kóng, ha̍k-seng bô-beh chòe i-seng mi̍h-sái tio̍h ha̍k-si̍p chit hō sū? Taⁿ lūn-kàu seng-khu cháiⁿ-iūⁿ tio̍h pó-tiōng, hit ê lí ta̍k lâng tek-khak tio̍h chai. Ū sî siàu-liân ê sî só͘ chòe ōe gāi-tio̍h sin-miā, tì-kàu chi̍t-sì-lâng seng-khu ōe lám, sī in-ūi m̄ chai ê iân-kò͘. Taⁿ pò i chai cháiⁿ-iūⁿ tio̍h sīn-tiōng, chiū chi̍t-sì-lâng lóng sin-miā, kiám m̄-sī khah hó mah? Sèng-keng tī Si-phian 139 phiⁿ tē 13, 14 chat kóng, 'In-ūi góa ê chōng-hú sī Lí só͘ chhòng-chō ê, Lí chhòng-chō góa ê sin-khu bí-biāu thang kiâⁿ.' Lán ê sin-khu kó-jiân sī chō-hòa ê Chú só͘ pī-pān ê, lán kiám m̄-tio̍h sòe-jī lâi chiàu-kò͘, bián-tit ge̍k Siōng-tè chhòng-chō jîn-lūi ê hó ì-sù.