Ū chı̍t ê gín-ná miâ kiò A-kiat, in toà ê só͘-chāi sı̄ khah joa̍h, lóng ài tı̀ bō-á chiah oē khah liâng. I ū chı̍t téng bô chin hó koh kū-kū ê bō-á, kè nı̂ beh kàu, i chin hoaⁿ-hí teh siūⁿ, ma-ma nā chı̂ⁿ hō͘ goá, it-tēng beh lâi boé chı̍t téng sin bō-á; chóng-sı̄ m̄-chai ū kàu chı̂ⁿ bô?
Chı̍t-jı̍t chı̍t-jı̍t it-tı̍t kè, 29 àm í-keng kàu, ta̍k ê gín-ná lóng chin khoài-lo̍k thiàu-lâi thiàu-khı̀, in-ūi ta̍k lâng lóng ū chhiⁿ-chhau thang chia̍h, koh ū pun chı̂ⁿ. A-kiat ê ma-ma iā chú chin chhiⁿ-chhau, chia̍h pn̄g pá, in pa-pa chı̍t lâng pun 5 kho͘ hō͘ in, sui-jiân bô chin-choē, in iā chin hoaⁿ-hí.
Keh-jı̍t thàu-chá, tāi-ke chin chá khí-lâi, ma-ma chhoā A-kiat kap ché-ché khı̀ koe-nih khoàⁿ nāu-jia̍t. Hit jı̍t hong chin thàu, koe-lō͘ iā chin-choē lâng teh thit-thô khoàⁿ nāu-jia̍t, in ná kiâⁿ ná khoàⁿ, kiâⁿ kàu chı̍t keng boē bō-á ê tiàm, A-kiat khoàⁿ-tio̍h lāi-bı̄n ê bō-á lóng chin súi, i khiā hia it-tı̍t khoàⁿ, khoàⁿ kah boē kı̀-tit ma-ma, ma-ma iā m̄-chai i tı̄ hia teh khoàⁿ, soà it-tı̍t kiâⁿ-khı̀. A-kiat khiā hia siūⁿ, goá nā ū kàu chı̂ⁿ it-tēng beh boé, chiū mn̄g kò͘ tiàm--ê “Hit téng chhiⁿ-sek ê bō-á joā choē chı̂ⁿ?”
