Sin Chong-kàu Kio̍k-pún
1953
Ka-tiong Chheng-liân pō͘ Hoat-hêng
** ** ** ** ** ** ** ** **
Sio̍k Ka-gı̄ Tiong-hoē kok kàu-hoē kong-kàm: Chheng-liân pō͘ ū chún-pı̄ chit pún khèng-chiok sèng-tàn ê ke̍k-chı̍p, Sui-jiân sè-sè pún, ǹg-bāng ē thang chò tāi-ke ê chham-khó.
Thâu chit ê, “Bōng-hiong kui” sı̄ Tâi-tiong Liú-goân Kàu-hoē Tân Kam-kó tiúⁿ-ló goân-chok ū lâng koh thiam-chiok ê. Tē 2 tè “Chin-sı̍t ê thiàⁿ” sı̄ Thok-ní-su-thài goân-chok, Sai-mn̂g T. K. C. im-ga̍k pō͘-tiúⁿ Si Bêng-tek hiaⁿ kha-sek ê. koh lo̍h-khı̀ ê 3 tè sı̄ Po͘-lí Lô Bûn-hok Bo̍k-su kià lâi ê, chhim-chhim kā tāi-ke seh to-siā.
Chit pún ê ı̀n-chheh ū tit-tio̍h Sai-mn̂g T.K.C. Si Bêng-tek, Chan Teng-iông, Tēⁿ Bo-hin 3 ūi hiaⁿ-tı̄ ê tio̍h-boâ, chhim-chhim seh-siā.
1953; 12; 1 Ka-tiong chheng-liân-pō͘
Tân Kong-hui, Chiam Thiam-bo̍k, Tân Kim-chhoan, Lí Tek-hoat, Kang Kiat-sêng, Khó͘ Chúi-lō͘, Tēⁿ Chiong-gı̄, Lâu Tek-hui.
Goān tāi-ke ngiâ-chih chin ū ı̀-gı̄ ê Sèng-tàn cheh kap hēng-hok ê sin-nı̂.
Bōng-hiong Kui
Khài-lio̍k: In-ūi hoé-chhia ê sū-kò͘, hō͘ A-hiong in bó-kiáⁿ hun-lı̂, Siōng-tè ê thiàⁿ khoàⁿ-kò͘ tı̄ hoān-lān tiong ê peh-sèⁿ, ín-chhoā in bó-kiáⁿ pêng-an saⁿ-kı̀ⁿ.
Jı̂n-bu̍t; A-hiong, ......... H
A-hiong ê a-bó, ......... M
N̂g i-su, .................. I
Lú thoân-tō Lâu sian-seⁿ, ......... L
Tâi-pak ê Tēⁿ Bo̍k-su, ......... T
Io̍k-iù-ı̄ⁿ ê N̂g sian-seⁿ, ......... N
Bē toā-be̍h-moâi ê lāu peh-à, ......... P
Jı̂n-ài-ché, ......... J
Kàu-hoē ê chheng-liân 3 ê .........(C1, C2, C3)
Hō͘-sū A Ài-hūi.........A
B Bí-iông ......... B
Io̍k-iù-ı̄ⁿ ê lāu-su ......... S
Chhut-goā lâng ......... G
Tē 1 bō͘
(N̂g lāi-kho ê pēⁿ-sek)
Khui-bō͘: A-hiong ê lāu-bú, tio̍h-siong giâm-tiōng, jı̂n-sū put-séng, tó tı̄ pēⁿ-chhn̂g, I-su hō͘-sū tı̄ chhn̂g-piⁿ.
I: Chit-ê chí-moāi siū-siong chiah tāng, ......... Lâu hoeh hiah-chē ......... kàu taⁿ iáu boē cheng-sı̂n ......... Sı̍t-chāi ū gûi-hiám, put-kò nā ū lâng beh hoeh hō͘ i kiám-chhái iáu ū ǹg-bāng.
A: Sian-siⁿ goán koh lâi khı̀ pài-thok Bo̍k-su, ǹg-bāng ē koh tit-tio̍h Bo̍k-su ê pang-bâng hó-bô?
I: Hó ... Nā m̄-sı̄ ū Siōng-tè ê thiàⁿ sı̍t-chāi sı̄ choa̍t-bāng, chóng-sı̄ lán to ū, ......... chhiáⁿ lí khı̀ pài-hāu Bo̍k-su.
A: Án-ni goá chit-má beh lâi khı̀.
I: Bí-iông lí koh khı̀ chún-pı̄ kiông-sim-che lâi kā i chù.
B: Hó. (I-su tùi hoān-chiá koh bong me̍h soà thè i kı̂-tó)
B: Sian-siⁿ pài-thok lí kā chù hòⁿ!
I: Hó.
L: N̂g sian-siⁿ pêng-an!
I. B: Pêng-an!
B: Lâu sian-siⁿ chhiáⁿ chia chē.
L: Hó, tú-á thiaⁿ tio̍h Ài-hūi sió-chiá teh kóng, ū chı̍t-ê chí-moāi, put-chí siong-tiōng, sı̍t-chāi chin khó-lı̂n, Bo̍k-su to sûi-sı̂ kiò lâng khı̀ liân-lo̍k kúi-ūi chheng-liân ǹg-bāng ē hó-sè.
I: Hō͘ lí chin hó kang, kàu-hoē hiah bô êng, lí iā liâm-piⁿ tō lâi kàu ūi, to-siā.
L: Khí-kám, khí-kám, chit-ê chí-moāi sûi-sı̂ siong-tiōng, ū lí chit-khoán ê ki-su̍t, kap i-tek, koh ū Siōng-tè ê pang-chān, goá sı̀n liâm-piⁿ ē hó. Taⁿ i to iáu-boē cheng-sı̂n, iā bē thang kap i tâm-lūn, án-ni goá tō lēng-hêng chiah koh lâi.
I: Hùi-sı̂n, hùi-sı̂n.
L: Lán lâi thè i kı̂-tó ......... Pêng-an!
A: Sian-siⁿ goá tńg lâi lah. Gı̄-ióng hiaⁿ in chit 3 ūi thiaⁿ-tio̍h Bo̍k-su kóng, sûi-sı̂ chı̀-goān soà kap goá lâi.
C: (1, 2, 3) N̂g sian-siⁿ pêng-an.
I: Pêng-an, to-siā lín ê hi-seng.
A: (1, 2, 3) Khí-kám, khí-kám.
I: Tı̄ chit-ê o͘-àm ê sè-tāi, iáu ū chhin-chhiūⁿ lín chit-khoán ê chheng-liân, put-chí siū an-ùi.
C: Khí-kám, tāi-seng ū Chú ê thiàⁿ ......... goán sı̄ chı̄n só͘ ē nā-tiāⁿ.
I: Ài-hūi, lí chhoā in khı̀ giām hoeh khoàⁿ sı̄ sio̍k sím-mı̍h hêng--ê.
A: Hó. (Sio-chhoā thè tiûⁿ, I-su iā thè-tiûⁿ koh chiūⁿ-tâi, the̍h chı̍t-tiuⁿ choá ná teh khoàⁿ, Ài-hūi iah chiūⁿ-tâi)
I: Gı̄-ióng kun sı̄ A. Khek-kí kun sı̄ O. Chèng-gı̄ kun sı̄ O. Án-ni kài tú-hó chit-ê chí-moāi i sı̄ A, án-ni 3 ê lâng ū ha̍h. Ài-hūi chit-má seng thiu Gı̄-ióng kun ê 200 oá, lâi kā chù, āu-lâi nā ū pit-iàu chiah koh lâi pài-thok in 2 ūi, taⁿ lí khı̀ chún-pı̄.
A: Hó.
Tē 2 bō͘
(Toā-be̍h moâi tiàm)
P: Lâi ò, sio ê toā-be̍h moâi, 3 kak tō hó, lâi lâi, chia̍h sio khah bē tiō, tiⁿ koh tı̄ⁿ toā oáⁿ koh boán-kı̂ⁿ.
J: Toā-be̍h peh-à kā lí bé 1 oáⁿ.
P: Hò͘ lâi. (J: phâng leh beh hā-tâi) Hèⁿ beh phâng khı̀ tó-ūi?
J: Beh phâng lâi khı̀ hia hō͘ chı̍t-ê gín-á chia̍h lah. (chhoā gín-á chhut lâi ko͘-chiâⁿ i chia̍h) Taⁿ beh siáⁿ pō͘, tú-á iū tı̍t-tı̍t khàu, chit-má iū m̄ chia̍h, Toā-be̍h peh-à, lí mā lâi tàu ko͘-chiâⁿ leh. Goá khoàⁿ chı̍t-ê gín-á khàu kah bô siaⁿ lah, tek-khak pak-tó͘ iau, in ê lâng m̄ chai tı̄ tó-ūi, kā mn̄g iā bē hiáu ı̀n.
P: È, Gín-á ché, lâng goá che toā-be̍h moâi kài hó chia̍h neh. (iōng thng-sı̂ kā i chhı̄) (Jı̂n-ài ché khı̀ bé thit-thô mı̍h hō͘ i)
J: Chit-ê thit-thô mı̍h soà hō͘ lí, chia̍h chia̍h leh, goá chiah chhoā lí lâi khı̀ chhoē lín ma-ma hōⁿ!
P: Gín-á ché lín chhù tı̄ tó-ūi?
J: Lí tı̄ hia khàu goā kú lah?
P: Ah! Lí thái ē kā mn̄g án-ni? Lín pa-pa hō chò sím-mı̍h miâ? Lí ū ma-ma bô?
H: Ū.
J: Lín ma-ma tı̄ tó-ūi?
P: A, lâng to teh beh ı̀n lah, hō͘ lí mn̄g chı̍t-ê soà koh tiām khı̀.
J: Kā chhoā lâi khı̀ phài-chhut-só͘ pò noh, iā bô beh án-choáⁿ?
P: Goán chit-keng tiàm-á kiáⁿ, bô, goá tō kā khioh khí lâi chhı̄.
G: Chit-ê gín-á sı̄ án-choáⁿ?
J: Tı̄ hoé-chhia lō͘ piⁿ teh khàu lah, khah kā mn̄g to m̄ ı̀n, goá chhoā i lâi chia̍h toā-be̍h moâi lah.
P: To m̄-chai i ê pē bó á-sı̄ chhù.
J: Phah-sǹg hoé-chhia sio-chông chū án-ni kap in ê lâng hun-lı̂ ê khoán.
G: Lín ū beh kā khioh khı̀ chhı̄ bô?
P: Goá chit keng tiàm-á iū chiah ā keng-á, iā chit ê Jı̂n-ài ché à iū iáu boē chò kheh, siūⁿ tio̍h tō chiâⁿ hùi-khı̀.
G: Goá toà tı̄ Tâi-pak, goán keh-piah ū chı̍t keng io̍k-iù-ı̄ⁿ. Só͘-í goá kā chhoā lâi khı̀ hia, chit-tiuⁿ si goá ê bêng-phı̀ⁿ, nā ū lâng chhoē, kiò i lâi goá chia chhoē.
P: Hioh-noh! Pài-thok pài-thok.
G: Toā-be̍h moâi ê chı̂ⁿ goā-choē? Goá soah hō͘ lí.
P: M̄ bián noh.
J: Goá chiah hō͘ i tō hó!
G: Hó! Bô goá kā chhoā lâi khı̀, nā ū lâng chhoē, chiah pò i lâi hōⁿ!
P: Hioh noh, hioh noh.
Tē 3 bō͘
(N̂g lāi-kho ê pēⁿ-sek)
Khai-bō͘; Thoân-tō-su chēng-chēng teh khoàⁿ A-hiong ê ma-ma. I-su teh bong-me̍h.
I: Put-chí khah hó, phah-sǹg liâm-piⁿ ē cheng-sı̂n lah.
L: Chin kai-chài Siōng-tè ū thiaⁿ lán ê kı̂-tó iā sı̄ lán ū chı̄n lán só͘ ē.
M: Ai-ioh, chia sı̄ tó-ūi? Goá ná ē lâi chia?
L: Pêng-an, lí ē tit tio̍h hó chin kám-siā Siōng-tè.
M: Goá ê kiáⁿ neh? A-hiong a, A-hiong a.
I: Chhiáⁿ lí m̄ thang khí lâi.
L: Lí sı̄ hoé-chhia sio-chông ê sı̂ tio̍h tāng-siong, lâng kā lí kng lâi N̂g sian-siⁿ chia, taⁿ kai-chài cheng-sı̂n lah, lí bān chhiáⁿ khí lâi, lí nā iáu ū sím-mı̍h tāi-chı̀ chhiáⁿ lí kóng hō͘ goán thiaⁿ, goán chiah thè lí siat-hoat.
I: Lí gûi-hiám ê tiong-kan, goá put-chí khoà-lū. Taⁿ í-keng cheng-sı̂n lah, lí liâm-piⁿ ē-hó, nā ū sím-mı̍h tāi-chı̀ āu lâi chiah lâi kóng, lí m̄-bián tio̍h-kip.
M: Goá ê cha-bó͘-kiáⁿ lah, goá ê cha-bó͘-kiáⁿ leh? Lín kóng hoé-chhia sio-chông sı̄ bô? Goá ê cha-bó͘-kiáⁿ phah-sǹg hō͘ hoé-chhia kauh sí lah.
L: Lâng kng lí lâi ê sı̂, to bô kóng khí gín-ná ê tāi-chı̀.
L: Lí ê cha-bó͘-kiáⁿ goā toā hàn?
M: 5 hoè lah, sán-sán-à thâu-hia̍h ū sè-hàn poa̍h-tó ê khı̂.
I: Bí-iông, lí koáⁿ-kín khı̀ hoé-chhia thâu hù-kı̄n mn̄g khoàⁿ chōng-hóng, hoé-chhia sū-kò͘ āu, ū lâng khoàⁿ tio̍h chit khoán gín-á á-bô?
B: Hó! Chit ūi thài-thài chhiáⁿ lí an-sim, goá ē lâi khı̀ mn̄g hō͘ hó-sè.
L: Chhiáⁿ lí an-sim, tı̄ bô saⁿ-bat ê tiong-kan, chhin-chhiūⁿ N̂g sian-seⁿ iā án-ni chiàu-kò͘ lí, kàu-hoē ê chheng-liân iā chiong hoeh sàng-lí, lí ê sè-kiáⁿ tek-khak ē chhoē tio̍h, chhiáⁿ lí m̄-bián khoà-ı̀.
M: To-siā, sı̍t-chāi chin-kai-chài, hō͘ lín chin to-siā.
L: Lí bat thiaⁿ-tio̍h Ki-tok-kàu ê tō-lí á-bô?
M: Hò͘! Hit hō Iâ-so͘ he sı̄-bô?
L: Sı̄, kı̀ⁿ nā sı̀n Iâ-so͘ ê lâng ū pêng-an, koh ū Siōng-tè ê thiàⁿ, bô-lūn tú-tio̍h sím-mı̍h sū, āu-lâi iā-sı̄ lóng ē piàn-chò hok-khı̀.
I: Chit-pái lí tı̄ goá chia tit-tio̍h seng-khu i-hó, goá iā ǹg-bāng lí soà lâi sı̀n Iâ-so͘ pài Siōng-tè.
M: Pài Siōng-tè he goá m̄ noh, nı̂-á cheh-á ā boē ēng tit pài, he m̄-hó!
L: N̂g sian-siⁿ kap chiah-ê hō͘-sū sió-chiá chiah-nı̍h kā lí chiàu-kò͘, chit 3 ê chheng-liân bô tiâu-kiāⁿ hoaⁿ-hí hoeh hō͘ lí, che lóng sı̄ Siōng-tè ê thiàⁿ ê kám-kak, in lóng bô teh siūⁿ beh tùi lí tit-tio̍h sím-mı̍h, chí-ū ūi tio̍h beh kiù lí, in hoaⁿ-hí hi-seng it-chhè, chit-ê cheng-sı̂n kiám bô pó-poè.
M: Ū lah, chin to-siā, chóng-sı̄ che kap pài Siōng-tè to bô koan-hē.
L: Nā bô Siōng-tè ê thiàⁿ, in boē hiáu án-ni thiàⁿ-lí, siat-sú nā ta̍k-lâng lóng sı̀n Iâ-so͘, chit-ê sè-kài tek-khak ē chin hēng-hok. Só͘-í goá bô lūn tùi sím-mı̍h lâng, goá lóng ài pò i chai chit ê siau-sit, goá iā ǹg-bāng lí ū chı̍t-jı̍t ē lâi sı̀n Chú Iâ-so͘.
B: Sian-siⁿ, goá khı̀ hoé-chhia thâu mn̄g, iā ū khı̀ phài chhut só͘ mn̄g, bô lâng khoàⁿ-kı̀ⁿ, ū hit khoán gín-ná, kàu beh tńg-lâi tı̄ oat-kak hit keng bē toā-be̍h moâi hia chiah mn̄g tio̍h kóng ū.
M: Iā lí bô kā chhoā lâi sı̄ bô?
B: Tō kóng ū chia̍h chı̍t-oáⁿ toā-be̍h moâi, āu lâi hō͘ chı̍t ê sin-sū chhoā khı̀ Tâi-pak lah.
M: Ai ioh! Thài ē beh kā goá chhoā khı̀ hiah hn̄g lah.
L: Bí-iông sió-chiá, lâi hùi-sı̂n lí khı̀ chhiáⁿ hit-ê bē toā-be̍h moâi ê lāu a-peh lâi chı̍t-ē hó bô?
I: Sı̄, sı̄ kā chhiáⁿ Toā-be̍h peh-à lâi, lán chiū ū hoat-Tō͘, lí tio̍h chē 3-lián-chhia khı̀ kā chài lâi hâⁿ!
B: Hó, goá sûi-sı̂ chhoā-i lâi.
L: Chit-ê chí-moāi, lí ê sè-kiáⁿ kah ē chia̍h toā-be̍h moâi, kah ē tàng khı̀ kàu Tâi-pak án-ni tāi-khài sı̄ bô tio̍h-siong, put-kò lán ǹg-bāng hit ê sin-sū sı̄ chı̍t-ê chin hó ê lâng. Nā goán sı̀n Siōng-tè ê lâng, chit-ê sı̂-chūn tio̍h kiû Siōng-tè chiàu-kò͘ sè-kiáⁿ khui-lō͘; án-ni kau-tài I ê chhiú, lóng bián khoà-lū.
I: Lâng kng lí lâi ê sı̂, goá khoàⁿ lí hiah siong-tiōng, iā thè lí kı̂-tó, chit ê thoân-tō sian-siⁿ lâi thàm lí, iā thè lí kı̂-tó, chin-chiàⁿ Siōng-tè kā lí pı̄-pān hiah ê chheng-liân hoaⁿ-hí hoeh sàng lí, lí chiah tit-tio̍h hó, só͘-í goán án-ni sı̀n, chiong chit ê pò lí chai, ǹg-bāng lí iā ē chai Siōng-tè ê thiàⁿ.
M: Hó lah, ū chı̍t jı̍t goá ē kap lín lâi sı̀n Siōng-tè.
L: Ǹg-bāng ē thang tı̄ kín-kín ê tiong-kan lí lâi ngiâ-chih Chú tı̄ lí ê sim-lāi.
B: Sian-siⁿ, toā-be̍h peh-à lâi lah!
I: Oh, lô-hoân lí, chhiáⁿ chē.
L: Chhiáⁿ chia chē.
I: Taⁿ lâi chhiáⁿ lí kóng chit ê gín-á ê tāi-chı̀ hō͘ goán thiaⁿ hòⁿ.
P: To Jı̂n-ài-à chhoā chı̍t-ê gín-á lâi, seng-khu kō kah choân thô͘, khàu-kah bô siaⁿ, té toā-be̍h-moâi hō͘ chia̍h, kā mn̄g koè-lâi mn̄g koè-khı̀ iā lóng m̄-ı̀n.
M: Hit-ê gín-á seⁿ chò sím-mı̍h khoán?
P: Sán-sán-à chiau sè hàn-á.
M: Thâu-hia̍h ū chı̍t-khı̂ bô?
P: Bô tiuⁿ-tı̂ khoàⁿ-tio̍h poh káⁿ ū o.
I: Hit ê Jı̂n-ài sió-chiá ū kóng tùi tó-ūi chhoā lâi á-bô?
P: Kóng tı̄ hoé-chhia lō͘-piⁿ teh khàu, i kā chhoā lâi ê.
I: Hit ê sin-sū sı̄ án-choáⁿ kóng kā lín chhoā gín-á khı̀?
P: Goá chham Jı̂n-ài-à toà hia chio-ho͘ i lóng bē hó-sè, ū ko͘-chiâⁿ i chia̍h chı̍t-oáⁿ toā-be̍h-moâi, í-goā mn̄g téng mn̄g ē, lóng m̄ ı̀n, goán to chiâⁿ-bô hoat-tō͘, tú siūⁿ beh kā chhoā khı̀ phài-chhut-só͘ ê sı̂, chı̍t-ê chhēng se-chong ê sin-sū mn̄g goán sı̄ án-choáⁿ, āu-lâi i the̍h chı̍t-tiuⁿ phiàn-toaⁿ hō͘ goán, kóng i toà tı̄ Tâi-pak, m̄-chai kóng in chhù tı̄ sím-mı̍h ı̄ⁿ ê keh-piah. Kóng i beh kā chhoā khı̀, nā-ū lâng chhoē chiah pò khı̀ i hia, goá to siūⁿ kóng chit-keng m̄ chiâⁿ tiàm-á thài-sè-keng leh, koh Jı̂n-ài-à iā iáu boē chò-kheh.
L: Hit-tiuⁿ phiàn-toaⁿ lí ū the̍h lâi bô?
P: Ā hó-kóng, kóng kah goán hit ê lāu sam-pat ê, kı̀ⁿ ū jı̄-choá, lóng kā lí sa-sa khı̀ khí-hoé, chá-khí liân hit-tiuⁿ phiàn-toaⁿ chò chı̍t ē kā lí sio-sio tiāu-khı̀, chiah teh hùi-khı̀, m̄-sı̄ sáⁿ. Tú-á lín chit ê hō͘-sū sió-chiá khı̀ mn̄g liáu-āu, chiah hō͘ goá siàn chhùi-phé, m̄-sı̄ sáⁿ. Koh hit hō kha-siàu.
M: (Lâu ba̍k-sái) Ah! Taⁿ goá beh siáⁿ pō͘?
P: Chit-ūi tō-sı̄ cha-bó͘-gín-á ê lāu-bú sı̄ bô?
I: Sı̄, taⁿ bô iàu-kín, kah lâng iáu tı̄-teh, kín-bān ē hō͘ lán chhoē-tio̍h, chit tiong-kan chiah lâi liân-lo̍k, hit-ê lâng nā ū koh lâi Ka-gı̄, chhiáⁿ lí chiah pò goá chai.
P: Ē-nò, ē-nò.
I: Bí-iông lí koh iōng 3-lián-chhia kā chài Toā-be̍h peh-à tńg-khı̀, iā hùi-sı̂n lí chin-chē sı̂-kan, che chı̍t sut-á thiap lí. (chit kù sı̄ tùi P kóng-ê)
P: Hé, m̄-thang noh, hō͘ goá chē 3-lián-chhia, goá to siūⁿ kàu-pún lah.
I: Chhiáⁿ lí siu, m̄-bián kheh-khı̀.
P: Sian-siⁿ, lí chin gâu chò lâng, hō͘ lí toā thàn-chı̂ⁿ.
L: Taⁿ chhiáⁿ lí an-sim koh chai-iáⁿ tı̄ Tâi-pak, khoài chhoē lah, lí nā hó, goá ē kài-siāu lí khı̀ chhoē Tâi-pak ê Bo̍k-su lah, goán tek-khak ū pān-hoat thang pang-bâng lí, bô goá sit-lé, goá ē siông-siông lâi thàm lí, iā ē thè lí kı̂-tó.
M: Chin to-siā, sı̍t-chāi lín chin thiàⁿ goá.
L: Pêng-an.
I: Pêng-an, chiah koh lâi.
Tē 4 bō͘
(Tēⁿ Bo̍k-su hú-siōng)
M: Bo̍k-su ū tı̄-teh bô?
T: Ū, chhiáⁿ jı̍p lâi chē.
M: Goá sı̄ tùi Ka-gı̄ lâi ê, goán hia ê Bo̍k-su kài-siāu goá lâi pài-hāu lí, m̄-chai chit-chūn lí ē chin bô êng á-bē?
T: Bē, bē! Chhiáⁿ chē (the̍h kài-siāu-chn̄g khí lâi tha̍k.)
T: Hó! Án-ni hó, ǹg-bāng goá ē thang pang-chān lí.
M: Bo̍k-su, goá chin kiàn-siàu, thâu-á chin nge̍h-sim, taⁿ sǹg thiaⁿ tō-lí bô-goā-kú, ta̍k-hāng lóng bē hiáu-tit, ǹg-bāng tit-tio̍h lí ê chí-tō.
T: Khí kám, taⁿ chiàu goá siūⁿ to chò 2 chām kiâⁿ.
M: Hó.
T: Tāi-seng lâi chhoē lí ê thâu-lō͘, āu-lâi chiah chhoē sè-kiáⁿ hòⁿ!
M: Ǹg-bāng tit-tio̍h Bo̍k-su ê chí-tō.
T: Lí ē chò sím-mı̍h kang-gē? Chiam-chhia iûⁿ-chhâi, hit hong-bı̄n lí sím-mı̍h khoán?
M: Ham-bān ham-bān-ā, nā ū iūⁿ tio̍h ē-hiáu, chhin-chhiūⁿ che, iā-sı̄ goá ka-kı̄ chò ê.
T: Hó, án-ni hó, lâi pài-thok Tân tiúⁿ-ló hit keng tiàm chı̍t pêng hō͘ lí chò iûⁿ-chong, iā lâi chioh chiam-chhia. Hò͘! Án-ni chit ê būn-tê tāi-khài bô būn-tê.
M: Goá tùi gín-ná saⁿ te̍k-pia̍t ū chhù-bı̄, só͘-í chhiáⁿ lí iā thè goá chioh gín-ná saⁿ ê iūⁿ.
T: Hó, gín-ná saⁿ iā te̍k-pia̍t sı̄ khah ū khiàm-khoeh ê khoán, āu-lâi goá chiah lâi chio chı̍t-koá lú chheng-liân hō͘ lí chí-tō gín-ná saⁿ ê chò-hoat, lí ê tiàm-hō beh hō-chò sím-mı̍h?
M: Chhiáⁿ Bo̍k-su kā goá siūⁿ.
T: Lí ê kiáⁿ ê miâ sı̄ hō-chò A-hiong hòⁿ, ǹg-bāng A-hiong tńg lâi, só͘-í lâi hō-chò Bōng-hiong-kui ho̍k-chong tiàm hó bô?
M: Hó hó, hō͘ Bo̍k-su chin to-siā.
T: Ǹg-bāng lí it-hoat jia̍t-sim thang tit-tio̍h Siōng-tè ê thiàⁿ.
M: Chhiáⁿ Bo̍k-su thè goá kı̂-tó, iā siông-siông chí-tō goá.
T: Lán lâi kı̂-tó.
Tē 5 bō͘
(Io̍k-iù-ı̄ⁿ)
Khai-bō͘; Lāu-su kap ha̍k-seng, chhiùⁿ-koa, chhiùⁿ-koa soah.
S: Lín tāi-ke chin gâu chhiùⁿ-koa, koh chin gâu pí iû-hı̀, án-ni Siōng-tè kài hoaⁿ-hí o͘. Kiù-chú-tàn teh beh kàu lah, lín ū hoaⁿ-hí bô?
U: Ū.
S: Kin-á-jı̍t tang sı̂?
H: 12 goe̍h 12 jı̍t.
S: Kiù-chú-tàn sı̄ 12 goe̍h 25, án-ni iáu kúi jı̍t?
A: 5 jı̍t.
B: 10 jı̍t.
C: 15 jı̍t.
H: iáu 13 jı̍t.
S: A-hiong khah tio̍h, lín tāi-ke lóng chin gâu, tiong-kan A-hiong siāng-gâu chhiùⁿ siāng-gâu pí. Lín to lóng án-ni chı̀n-pō͘ è!
S: A-hiong, chit pái iā beh te̍k-pia̍t hō͘ lí chò lín chit keng ê tāi-piáu, khı̀ kàu-hoē hù Kiù-chú-tàn o͘.
H: M̄-ah, goán ā bô súi-saⁿ.
S: Súi-saⁿ lāu-su chiah chhoā lí lâi khı̀ chò.
H: Mā to soà chò hō͘ in.
S: Hó, lán tāi-seng chò chı̍t-niá chiah kong-ke chhēng hòⁿ? Lín ài sím-mı̍h khoán ê?
U: Goán ài âng ê, goá ài n̂g ê.
S: Hó! Án-ni ē-po͘ A-hiong chiah kap goá lâi khı̀ chò hòⁿ! Lán koh lâi chhiùⁿ chı̍t-tiâu koa hòⁿ.
Tē 6 bō͘
(Bōng-hiong-kui ho̍k-chong-tiàm)
M: (Teh chò chhia-á)
S: Pêng-an!
M: Pêng-an!
S: Lí káⁿ bē jı̄n tit goá hòⁿ? Téng-jı̍t ū thiaⁿ tio̍h Bo̍k-su siāu-kài, kóng lí tùi lâm-pō͘ lâi tı̄ chia, teh khui gín-á saⁿ ê tiàm. Oh! Siat-pı̄ liáu chin hó-sè.
M: Khí-kám, khí-kám, siū tāi-ke ê thiàⁿ-thàng.
S: Chin bô êng ê khoán hòⁿ?
M: Tit Chú ê un-tián, lóng sı̄ lán ê hoē-iú lâi chù-bûn.
S: Sı̄ tāi-ke sio pang-chān, goá kin-á-jı̍t mā sı̄ siūⁿ beh lâi pài-thok lí chò chı̍t-niá.
M: To-siā. M̄-chai ài sím-mı̍h khoán ê hòⁿ? Kúi-hoè beh chhēng ê?
S: 5 hoè, to tı̄ goán hit keng sêng-chek siōng-hó, chit pái beh chò tāi-piáu khı̀ kàu-hoē, só͘-í teh siūⁿ kóng lâi kā i chò chı̍t-niá súi-saⁿ hō͘ i chhēng.
M: Chhin-chhiūⁿ lí chiah nih hó, hō͘ lí thiàⁿ ê gín-á chin hēng-hok, goá tı̄ chit ê tiàm-kháu nā khoàⁿ-tio̍h lāu-bú chhoā gín-á koè, goá tō sim-koaⁿ jû-chhéng-chhéng.
S: Ai! Goá ū thiaⁿ-tio̍h kóng lí ū teh chhoē chı̍t ê gín-á hòⁿ! Chhoē iáu-boē tio̍h loh? Ē-lah Tâi-pak thài-khoah leh, só͘-í bē-thang liâm-piⁿ chhoē-tio̍h, ū chı̍t-jı̍t tek-khak ē chhoē tio̍h, chhiáⁿ lí bián khoà-ı̀.
M: Goá ta̍k-jı̍t to teh kiû, ǹg-bāng Siōng-tè ē siúⁿ-sù goán kín saⁿ-kı̀ⁿ.
S: Sı̄, Siōng-tè tek-khak ē thiaⁿ lí ê kı̂-tó.
M: Chit-má chit khoán ê, siōng sı̂-kiâⁿ-neh, lâi chò che hó bô?
S: Hó!
M: Gín-á tang-sı̂ beh chhoā lâi niû?
S: Goá mā ū kā chhoā lâi neh, tı̄ keh-piah teh khoàⁿ thit-thô-mı̍h, A-hiong lâi ò͘.
H: Hó, Lāu-su, chhâ ê ke mā ē cheng bô me̍h.
M: Ah! A-hiong, goá ê kiáⁿ A-hiong, A-hiong lí ē jı̄n-tit ma-ma á-bē?
H: Ma-ma.
M: Goá ê kiáⁿ ah! Kám-siā Siōng-tè kám-siā Siōng-tè.
