——Hióng-èng Kiàn-kok-tóng “Iā kut-hu, chèng 1 châng chhiū” ê sin sı̂-tāi chòng-sek.
Tng goá sí ê jı̍t,
Chhiáⁿ ūi goá chèng chı̍t-châng chhiū.
Piàn-iā kut-hu ê thó͘-toē,
Joa̍h-thiⁿ hio̍h tng chhiⁿ.
Chhiū-ki sio-khan choè ı̀m-ńg,
Jia-cha̍h chhiah-jı̍t-kng.
Ba̍k-sái bián ūi goá lâu.
Ba̍k-sái sı̄ jı̂n-seng
hó͘-thàng ê phiau-thâu.
Taⁿ goá ū éng-kiú ê an-hioh,
An-ùi bô koh sit-lo̍h.
M̄-bián khún-pa̍k chhiⁿ-hoe.
Oa̍h-thiàu-thiàu ê chhái-sek
Bô sio̍k thô͘-toé ê chhong-pe̍h.
M̄-bián chong-kàu gı̂-sek, iā bián gı̂m-si.
Taⁿ goá khı̂ⁿ-tiâu sí-bông ê sı̍t,
Poe ǹg Siōng-tè sin-piⁿ.
Kan-ta ūi goá chèng chı̍t-châng chhiū,
Tng goá ê kut sio-choè hoé-hu.
Ū chı̍t-jı̍t
Hong chhoe chhiū-hio̍h ê ga̍k-siaⁿ
Beh siau-iûⁿ
Tı̂n-sè ê hoân-chhiû.
Chhim-bâi ê kin beh pho͘-pâi
Bô jı̄ ê bōng-pâi,
Kı̀-lio̍k chı̍t-ê
Tiām-tiām kiâⁿ-koè sè-kan ê sı̀ⁿ-miā:
M̄-ài chhut-miâ,
Sim-goān m̄-bat tit chiâⁿ.
iû-goân ǹg-bāng:
Hiú-noā ê jio̍k-thé koh oa̍h.
Tı̄ kú-nı̂ āu ê chhun-thiⁿ
Hong-seh tàng-koè ê ta-ki,
Sin-íⁿ tng teh seⁿ.
