Sin chong-kàu

Tı̄ Oa̍t-lâm lâm-pō͘ ê kau-chí ê só͘-chāi, ū chı̍t ê sin-heng ê chong-kàu, kiò-chò Ko-tâi-kàu, ū 150 bān ê sı̀n-tô͘. Ko-tâi-kàu ê siat-lı̍p sı̄ A. D. 1926 nı̂. Tùi chı̍t lâng, miâ Ńg Bûn-kiû só͘ chhòng-siat--ê, Ńg Bûn-kiû tı̄ 1919 nı̂, chū-chheng Ko-tâi-jı̂n, siông-siông siū sı̂n ê kám-tiàu, 1925 nı̂ tı̄ Se-kòng, tı̄ chı̍t pái kong-bū jı̂n-oân chı̍p-hoē tiong, chiūⁿ-tâng lâi kóng, I sı̄ Tiong-kok ê si-jı̂n Lí Thài-pe̍k lâi hián-sèng, kóng, “Ko-tâi sı̄ ú-tiū ê Chú.” Lí Thài-pe̍k khó͘-khǹg chham-ka ê lâng, tio̍h siông-siông kap Ńg Bûn-kiû chiap-chhiok, tùi i lâi chí-sı̄ kàu-gı̄, lâi cho͘-chit ê sin ê chong-kàu, kiò-chò Hoān-kong-tek. Ko-tâi-kàu tı̄ Se-kòng sêng-lı̍p í-āu, thoân-pò͘ hui-siông kín, 20 goā nı̂ kú, in ê sı̀n-tô͘ í-keng ū 150 bān lâng. In jı̄n “Sù-hái kai hiaⁿ-tı̄.” Chú-tiuⁿ lâng sí-āu lûn-hoê choán-sè, chông-siōng ài bu̍t, kı̀m-chí sat-seng, thê-chhiòng chū-chè chō͘-jı̂n. In ê kàu-tiâu kap kài-lu̍t, m̄-sı̄ tùi kó͘-tāi ê tù-chok the̍h-lâi--ê, sı̄ tùi Tiong-sè-kí Hoat-kok kap Oa̍t-lâm ê bêng-tù chhau chhut--lâi-ê, nā ū sı̀n-tô͘ hoat-chhut gı̂-būn, thang tùi só͘ chí-tēng 12 chéng ê goân-su khı̀ chhoē kái-tap. Ko-tâi hiān-sı̂ ê kàu-chú, kong-khai khip-siu Hu̍t-kàu, Tō-kàu, Jû-kàu kap Ki-tok-kàu ê kàu-gı̄, tông-sı̂ iā sı̀n-hōng chiah ê chong-kàu ê kàu-chú. In-ūi kui-tēng it-tēng ê sı̂-kan kı̂-tó. Ko-tâi ê léng-siù kóng, “Goán ê sim-lêng ū siū-tio̍h kiâⁿ sé-lé Iok-hān, Sng Tiong-san Sian-seⁿ, Khêng-a-hu-khek ê sé-lé.” Chit ê chong-kàu ū chèng-tı̄-tek ê sek-chhái tı̄-teh. (Tâi-oân Kàu-hoē Kong-pò tē 799 hō, 1955 nı̂ 7 ge̍h)