Chı̍t-tioⁿ chı̍t-tioⁿ ê tē-tô͘
Kó͘-chá kó͘-chá ê ke-lō͘
Hô-lân Kūn-ông Tāi-chheng-tè-kok
Toā-chéⁿ-thâu
Lâng leh kóng
Ū chó͘-sian taⁿ-chúi ê kha-pō͘
Bô chûn ê Gō͘-tiâu-káng
Sı̂n-kiō iú leh chhut-sûn
Lô-kó͘ siaⁿ
Tiān-chú-khı̂m hoe-chhia
Toā-chéⁿ-thâu
M̄-chai tı̄ tó chı̍t-jiah
Sı̂n-kiō chhut-sûn ê jı̍t-chí
Khóng-chú-biō thâu-chêng
Kiaⁿ-thiⁿ-tāng-tē ê phàu-á siaⁿ
Thâu-kı̂ Pat-ka-chiòng
Iô-iô-pái-pái hiòng chiân kiâⁿ
Chhiⁿ- âng-teng hoê-phiah
Chhit-iâ Peh-iâ ui-bú
Tı̄n-thâu chóng chhut-tōng
Biō kah biō ê goā-kau sū-kiāⁿ
Sı̂n-bêng ū chı̀n-hoà
Ài khoàⁿ Chheng-liâng ê cha-bó͘-gín-á
Ài khoàⁿ bi-ki-ni thiàu-bú
Sèng-jı̂n ū khai-hoà
Ài thiaⁿ hoan-lú chhiòⁿ-koa
Phoàn-kiong ê chio̍h-jı̄
Kiông-kiông beh khoàⁿ bô
Má-kong-biō Thiāu-á-hâng-ke
Lâi-lâi-khı̀-khı̀ ê lâng kah chhia
Thih-kè âng-mn̂g-thô͘ tá-má-ka
Le̍k-sú chı̍t-ia̍h chı̍t-ia̍h
Chı̍t-pah nn̄g-pah gō͘-pah
Bı̂n-chú sı̂-tāi bé-phiò ê koaⁿ-hó͘
Chı̍t-chiah chı̍t-chiah
Kó͘-chek ê bōng-pâi
Chı̍t-jiah chı̍t-jiah
Bô-êng ê kiáⁿ-sun
Bô-êng ê kha-pō͘
Pó͘-sı̍p-pan tiān-tōng-oân-kū
Tha̍k bô chó͘-sian le̍k-sú ê le̍k-sú
Tha̍k bô ka-tı̄ thó͘-tē ê tē-lí
Tha̍k bô ka-tı̄ kò͘-hiong ê bûn-jı̄
Khó-chhı̀ ê kan-ga̍k lāi-té
Bô-siaⁿ ê su-ı̄ⁿ
Mn̂g-kháu ū lāu-lâng leh phàu-tê
Chó͘-sian ê le̍k-sú
Siá tı̄ hāng-á-lāi
Chó͘-sian ê khe-lâu
Sı̄ chı̍t tiâu chı̍t tiâu
Ou-o͘-chhàu-chhàu ê chúi-kau
Khoàⁿ bô Lûn-á-téng ê tē-sè
Siáⁿ-mı̍h sı̄ Thài-iâ-kiā
Siáⁿ-mı̍h sı̄ Iau-kúi-tiâⁿ
Tá-má-ka kô͘--khı̀-lâi ê thó͘-tē
Ta̍k-jı̍t lâi-lâi-khı̀-khı̀
Âng-mn̂g-thô͘ ê chhiū-nâ
Chhoē bô tē-tô͘-téng ê kó͘-siâⁿ
