Sit-siaⁿ ê ı̀ⁿ-á

70 goā hoè ê A-iàn-pô sı̄ toà tı̄ gún tau tùi-bı̄n chhân tiong-ng ê lāu chhù-piⁿ, ùi in tau beh koè-lâi gún tau, ài kiâⁿ-koè Hoé-iām-peh ê chhân-hoāⁿ, hāⁿ-koè chı̍t-tiâu sè-tiâu ê pâi-chúi-kau, peh khí-lih toā-lō͘, koè toā-lō͘ tō ē-tàng tı̍t-chiap kiâⁿ-jı̍p gún chhù thâu-chêng ê chio̍h-thâu-lō͘. Sui-bóng tùi A-iàn-pô lâi kóng, chit-toāⁿ lō͘ ū tām-po̍h-á chia̍h-la̍t, m̄-koh i nā-sı̄ ū-êng, iah-sı̄ thiⁿ-khı̀ hó ê sı̂, tō lâi chhoē gún tau ê “súi a-má” khai-káng. A-iàn-pô sı̄ súi a-má ê ti-kí pêng-iú, ia̍h-sı̄ a-má tiong-sı̍t ê thiaⁿ-chiòng. A-iàn-pô nā lâi, in kóng ê tāi-chı̀ chóng--sı̄ lı̄ bē khui chhù-piⁿ thâu-boé ê jı̂n-chêng sè-kò͘ kap cho͘-gū, toā-pō͘-hūn ê sı̂-kan lóng sı̄ thiaⁿ gún a-má se̍h-se̍h-liām, seng chiù-mā gún a-kong tàng-sng koh phian-sim, koh lâi tō liām chhù lāi-té hāu-seⁿ, sin-pū, toā-sè-hàn bô sóng-khoài ê tāi-chı̀, tong-jiân mā chı̍t-tui oàn-thàn, put-pêng. Goá tiāⁿ-tiāⁿ hoâi-gı̂, sı̄ án-choáⁿ A-iàn-pô tòng ē tiâu gún a-má ê『疲勞轟炸』? I chóng--sı̄ hiah-nı̄ ū nāi-sim, tiām-tiām teh thiaⁿ, sui-bóng i bô siáⁿ-mih hoê-èng, gán-sı̂n mā tiāⁿ-tiāⁿ khoàⁿ tùi hn̄g-hn̄g ê tē-pêng-soàⁿ, chit chūn ê i hō͘ goá ê kám-siū, sı̄ chı̍t-ê ū khı̀-chit kap ū hân-ióng ê chng-kha a-pô. A-iàn-pô lâng chin é, koh o͘-sán o͘-sán, o͘-o͘ ê thâu-mo͘ iōng chı̍t-khang chı̍t-khang ê o͘-bāng bāng--leh. I ū koà hı̄ⁿ-kau-á, chı̍t-tùi kim ê hı̄ⁿ-kau-á, in-ūi nı̂-kú goe̍h-chhim, kā i ê hı̄ⁿ-kau-khang giú kah chin toā-khang. Sè-hàn, goá siōng ài chē tı̄ i ê sin-khu-piⁿ, chim-chiok khoàⁿ i ê hı̄ⁿ-kau-khang, khang ē jú lâi jú toā, goá sim-lāi put-sı̂ teh siūⁿ, tang-sı̂ i ê hı̄ⁿ-kau-khang ē lı̍h--khui-leh? Lēng-goā, i chhiâng-chāi chhēng o͘-sek ê saⁿ, tı̄ goá sè-hàn ê kı̀-tı̀ lāi-té, khoàⁿ--khí-lâi chiok giâm-siok koh chong-giâm, tı̄ i o͘-sek ê sè-kài chhàng siáⁿ-mih khoán ê pı̀-bı̍t--leh? Toā-hàn liáu-āu, goá ta̍uh-ta̍uh-á liáu-kái A-iàn-pô tiām-chēng, giâm-siok, chong-giâm ê hêng-siōng, sı̄ in-ūi i khám-khek ê ūn-miā. I ū saⁿ-ê hāu-seⁿ, m̄-koh lóng bô-kāng sèⁿ, hun-pia̍t sèⁿ So͘, sèⁿ N̂g kap sèⁿ Lı̂m. A-iàn-pô tı̄ i 40 hoè chı̀n-chêng, bat chio-koè saⁿ-ê ang-sài, m̄-koh lóng té-miā óng-seng--lo͘h, i chêng-āu chiú-koá saⁿ-pái. Chng--nih ê lâng, chóng--sı̄ tùi i siū ūn-miā ê chhòng-tı̄ ū chióng-chióng ê thoân-giân kap chhai-chhek, a-pa kóng sı̄ “A-iàn-pô toān-chiáng ê koan-hē”, goá siūⁿ beh chèng-sı̍t a-pa tùi goá kóng ê tāi-chı̀: toān-chiáng ē sí-ang. Ta̍k pái i lâi chhoē súi a-má ê sı̂, goá tō koáⁿ-kín chioh ki-hoē sûi-sı̂ beh thau-khoàⁿ i ê chhiú, goá tùi i siang-chhiú ê chhiú-té-hûn chin hò͘ⁿ-hiân, tàu-té toān-chiáng sı̄ seⁿ-chò siáⁿ-khoán? M̄-koh chū-thâu kàu-boé, goá lóng bô hoat-tō͘ sūn-lı̄ khoàⁿ-tio̍h A-iàn-pô ê siang-chhiú. Gín-á lâng m̄-bat tāi-chı̀, m̄-chai che hoān-sè sı̄ A-iàn-pô siōng-toā ê kı̀m-kı̀. A-iàn-pô sui-bóng sán koh po̍h-pán, kha-chhiú soah chin liú-lia̍h, lo̍h-chhân chèng-choh bô su cha-po͘-lâng, chóng-sǹg io-chhı̄ saⁿ-ê hāu-seⁿ toā-hàn, chhoā-bó͘ seⁿ-kiáⁿ, hō͘ i koè chı̍t-toāⁿ pêng-chēng ê jı̍t-chí. M̄-koh sí-bông ê àm-iáⁿ iû-goân tiām-tiām oá-kı̄n in chhù-lāi ê cha-po͘-lâng, tāi-seng sı̄ sèⁿ So͘ ê hāu-seⁿ, seⁿ-ióng chı̍t-toā-tı̄n gín-á, soah tı̄ 40 goā hoè tō tio̍h-gâm koè-sin, hit-chūn, i ê khan-chhiú koh ū-sin, chin-chiàⁿ sı̄ pi-chhám. Soà--lo̍h-lâi, sèⁿ N̂g--ê hit-pâng mā tó--lo̍h-lâi, lâu saⁿ-ê iáu teh tha̍k kok-tiong kok-hāu ê cha-po͘ gín-á. Chhù-lāi í-keng ū saⁿ-ê chhiú-koá--ê, A-iàn-pô koh 1 pái kiâⁿ tı̄ sí-bông ê chhim-kok lāi-té. Tû-khı̀ khoàⁿ-kò͘ iáu sè-hàn ê sun, i iû-goân gia̍h tı̂-thâu, kè-sio̍k tı̄ i ê thó͘-tē téng-bı̄n oa̍h--lo̍h-lâi. Hiān-chhú-sı̂, siūⁿ-tio̍h i 60 goā hoè iáu tı̄ chhân-tiong-ng kan-khó͘ choh-sit ê hêng-iáⁿ, goá sim-lāi ū kóng bē chhut--lâi ê hi-bı̂. It-tı̍t kàu goá tha̍k ko-tiong ê sı̂, sí-bông koh lâi tı̄ tùi-bı̄n ê kó͘-chhù. Sèⁿ-n̂g ê toā-hàn-sun tı̄ kang-tiûⁿ siōng-pan, sió-iā-pan āu tńg--khı̀, koè-tńg-kang tō sí tı̄ ka-tı̄ ê bı̂n-chhn̂g-téng, i chiah 19 hoè. Goá éng-oán ē kı̀--tit, hit-kang thàu-chá, N̂g ê sin-pū A-chhun-ı̂, chin kiaⁿ-hiâⁿ cháu--chhut-lâi, soah poa̍h-lo̍h tı̄ chhân-té, kui sin-khu lóng sı̄ chhân-thô͘, ná khàu ná hoah, lâi kiò gún a-pa khı̀ in tau, kóng i ê hāu-seⁿ sí--a. Tı̄ A-chhun-ı̂ pi-chhám ê ai-khàu-siaⁿ tiong, chhin-chhiūⁿ khoàⁿ-tio̍h A-iàn-pô ê ūn-miā tı̄ i ê sin-pū sin-khu téng chhut-hiān, che sı̄ siáⁿ khoán ê jı̂n-seng--leh! Goá mn̄g ka-tı̄...... Toā-hàn liáu-āu, goá kiàn-pái nā tı̄ gún tau ê tiū-tiâⁿ khoàⁿ tùi A-iàn-pô í-keng pha-hng--khı̀ ê lāu-chhù, koân koh toā-châng ê tek-nâ, kā chit-keng bô-lâng chhut-jı̍p ê ang-chng lāu-chhù pau kah ba̍t-ba̍t-ba̍t, tō ē siūⁿ-khí í-keng koè-sin ê A-iàn-pô, sı̄-m̄-sı̄ pı̀ⁿ-chò chı̍t-chiah o͘-sek ê ı̀ⁿ-á, kè-sio̍k poe tı̄ in tau ê chhù-téng, tek-nâ kap chhân-hn̂g--leh? Sı̂-kan ê tn̂g-hô, chóng ē kā sí-bông ê kı̀-tı̀ ta̍uh-ta̍uh-á chhiong-soàⁿ--khı̀, ná seng-oa̍h eng-kai tō-sı̄ seng oa̍h--lo̍h-khı̀ ê tō-lí--a! (TGB Thong-sı̀n tē 80 kı̂, 2006 nı̂ 5 goe̍h)