Siuⁿ chē
Goá m̄-sı̄ hit-chióng ē-sái chı̍t-pái bé chiok chē chhiùⁿ-phı̀ⁿ koh thiaⁿ kah chiok sóng ê lâng, mı̍h-kiāⁿ nā chek siuⁿ chē ē hō͘ goá ū ap-le̍k, goá chin kiaⁿ mı̍h-kiāⁿ chek kui-tui, mā bē kah-ı̀ chu-sı̀n it-tı̍t lúi-chek, he hō͘ goá ê hū-tam khah toā-koè khoài-lo̍k. Goá it-tı̍t tı̄ chit-khoán mâu-tún lāi-té. Goá m̄-sı̄ chhiau-kip tiān-náu hit-lūi ê lâng, mā m̄-sı̄ go͘gle, liân sió-hêng ê tô͘-su-koán to m̄-sı̄; sui-bóng goá chin siūⁿ beh liáu-kái chit-ê sè-kài, m̄-koh goá m̄-sı̄ chit-ê sè-kài mā m̄-sı̄ ú-tiū, kiám-chhái tùi tı̄ i piⁿ--á se̍h leh kiâⁿ ū chhù-bı̄, m̄-koh iáu bô hoat-tō͘ khiā tı̄ goā-kháu chhiūⁿ tı̄ goā-thài-khong khoàⁿ kāng-khoán. Tùi goá lâi kóng, khoàⁿ-koè koh-khah chē chheh, chin-chiàⁿ ū ı̀n-sióng--ê iáu-sı̄ hit kúi-pún. Kı̂-thaⁿ ê chheh bô kiâⁿ khah thâu-chêng, kan-taⁿ sı̄ teh chèng-bêng bó͘-chióng khài-liām ê chûn-chāi, pı̄ ı̀n-chèng iah-sı̄ bô ko͘-toaⁿ, tō ná-chhiūⁿ ū lâng tông-chêng Murakami Haruki hông thó-ià ê goân-in, sı̄ i kóng ê hit-koá chin-lí chá tō tı̄ chiok chē kó͘-chheh lāi-té chhut-hiān--koè-a. Ū chiok chē su-sióng chá tō hông kóng--koè. Siáⁿ-mih su-sióng sı̄ chhau pa̍t-lâng ê, siáⁿ-mih sı̄ ka-tı̄ ê, tiong-ng ê bô-kâng iáu-sı̄ khoàⁿ ē chhut--lâi. Chò āu-poē ū-iáⁿ khah kan-khó͘, tō chhin-chhiūⁿ thiaⁿ it-tı̍t teh cháu-chhoē kin ê Rock & Roll, tı̄ cháu-chhoē ê koè-têng, oan-nā thiaⁿ ē chhut ū bô-kâng ê só͘-chāi, ū ê hoān-sè ē hō͘ lâng kái-piàn tùi pún-té kah-ı̀ ê mı̍h-kiāⁿ ê khoàⁿ-hoat. Chiâⁿ chē mı̍h-kiāⁿ, lóng sı̄ chı̍t-chióng『先入為主』ê chōng-thāi. Tı̄ tē-kiû téng-koân, lán í-keng sı̄『量產生物』ê āu-poàⁿ-toāⁿ, ū thài chē mı̍h-kiāⁿ lâng lóng chhoân piān-piān, lán bián hoat-hiān『繞日說』, bián hoat-hiān la̍t-ha̍k, bián iàu-ı̀ tiān án-choáⁿ來, bián kiaⁿ e-hng àm-mi-mo͘, bián hoân-ló bô chheh thang khoàⁿ, bián o̍h ga̍k-lí tō ū moá-sı̀-kè ê im-ga̍k, bián o̍h liap-iáⁿ bí-ha̍k tō ū sianpai choan-ka siūⁿ mā siūⁿ bē kàu ê sian-chı̀n ki-khı̀, lán chiūⁿ-bāng ū lia̍h bē liáu ê chu-liāu, thiaⁿ bē liáu ê koa......, it-chhè ê it-chhè, lóng siuⁿ koè-thâu chē, chē kah moá-sı̀-kè. Án-ne lâi, lán soah m̄-chai beh o̍h siáⁿ, sit-khı̀ hong-hiòng, chhan-chhiūⁿ bô-liâu ê chèng-kheh chı̍t-kang kàu-àm kan-taⁿ teh lā-sái niâ. Só͘-ū ê mı̍h-kiāⁿ, i ê lâi-goân kap le̍k-sú lóng chiah-nı̄-á tin-kùi, m̄-koh kàu kah kin-á-jı̍t, chiah-ê soah pı̀ⁿ-chò chiah-nı̄ bô kè-ta̍t. Siong-phín-hoà ê it-chhè, hō͘ lâng kan-taⁿ chhun beh iah boài nn̄g-chióng piáu-ta̍t hong-sek, tı̄ chit lō khoân-kéng--nih, lâng, kám-kak ka-tı̄ jú lâi jú m̄-chiâⁿ lâng, chu-sı̀n kip-siu koè-thâu chē, toā-náu chia̍h kah pá-tu-tu, pí ūi-tn̂g khah oh siau-hoà, lán ē kiaⁿ, só͘-í ē-hiáu lı̄-iōng kiaⁿ-hiâⁿ ê lâng tō ē iâⁿ. Siūⁿ-khí tiān-iáⁿ “Bowleng For Columbine” (『科倫拜校園事件』) lāi-té, hóng-būn Marilyn Manson, i kóng chı̍t-toāⁿ hō͘ goá ı̀n-sióng chiok chhim ê oē: “Chit-má ê siong-gia̍p nā beh sêng-kong, tio̍h-ài it-tı̍t chè-chō kiaⁿ-hiâⁿ. Lán bé kiám-pûi-io̍h-á sı̄ kiaⁿ siuⁿ pûi bô-lâng beh ài, lán bé sé-bı̄n--ê sı̄ kiaⁿ seⁿ thiau-á-chí bô-lâng ē ài, in-ūi ē kiaⁿ......só͘-í......」 Siuⁿ chē mı̍h-kiāⁿ kā lán sak ǹg thâu-chêng khı̀, hō͘ lán bē-hù su-khó, goá sêng-jı̄n, tı̄ to͘-chhı̄ seng-oa̍h, beh ū thang su-khó ê khoân-kéng, pí beh suh-tio̍h chheng-khı̀ ê khong-khı̀ koh-khah oh. (TGB Thong-sı̀n tē 80 kı̂, 2006 nı̂ 5 goe̍h)