Soán-te̍k khah tiōng-iàu--ê

Ū lâng sı̂-siông kóng lán-ê pháiⁿ-oē, lán kám-kak chin tiōng-iàu, só͘-í, lán chin siū-khı̀, khı̀ kah ū chı̍t-kang sim-chōng-pı̄ⁿ, ko-hiat-ap, lán chiū chai, kı̂-sı̍t lâng kóng lán-ê pháiⁿ-oē, bô goā tiōng-iàu. Gín-á piàⁿ seng-ha̍k, lán kám-kak chin tiōng-iàu, tán kah ū chı̍t-kang, lán-ê gín-á piàⁿ kah cheng-sı̂n sit-siông, sim-lí koh-iūⁿ, lán chiū chai-iáⁿ, tha̍k seng-ha̍k-lu̍t siōng-koân ê ha̍k-hāu, mā bô hiah-nı̍h tiōng-iàu.

Lán kám-kak gín-á o̍h koá châi-gē chin tiōng-iàu, lé-pài-jı̍t bô khı̀ tha̍k chú-jı̍t-o̍h, khı̀ chham-ka chok-bûn-pan, bí-su̍t-pan, tiān-náu-pan; tán kàu ū chı̍t-kang, lán-ê gín-á pı̀ⁿ-choè bô Sı̀n-gióng ê lâng, hit-chūn lán chiū chai, châi-gē mā bô goā tiōng-iàu.

Lá kám-kak chı̂ⁿ-châi chin tiōng-iàu, só͘-í lán piàⁿ-miā thàn-chı̂ⁿ, piàⁿ kah phah-pháiⁿ seng-khu, lı̄-khui Siōng-tè hn̄g-hn̄g, lán chiū chai, kim-chı̂ⁿ iā bô hiah-nı̍h tiōng-iàu.

Lán kám-kak miâ-siaⁿ, tē-ūi, koân-le̍k, sêng-kong, ha̍k-būn...... chin-choē mı̍h-kiāⁿ lóng chin tiōng-iàu, tān-sı̄ kàu ū chı̍t-kang, lán khó-lêng iā ē hoat-kak, chin-choē lán só͘ lia̍h-choè tiōng-iàu--ê, kı̂-sı̍t sı̄ bô siáⁿ-mı̍h tiōng-iàu.
Ū-iáⁿ, tû-liáu Siōng-tè ê chí-ı̀, Siōng-tè ài lán khı̀ tui-kiû ê thiàⁿ, kong-gı̄, chèng-tı̍t, liông-siān...... í-kı̍p Siōng-tè só͘ sù ê oa̍h-miā, kı̂-thaⁿ--ê, sı̍t-chāi lóng-sı̄ chhù-iàu--ê.
Kim-chı̂ⁿ, miâ-siaⁿ, tē-ūi, ha̍k-būn...... chún-kóng chiah-ê tùi jı̂n-seng sı̄ tiōng-iàu, iā kan-ta ē-tàng pâi tı̄ Siōng-tè, thiàⁿ, kong-gı̄, liông-siān, chhin-chêng, oa̍h-miā ê āu-piah āu-piah nā-tiāⁿ.

Ū sı̂-kan ê sı̂, lán ē-hiáu soán-te̍k khah-chia̍p (khah-ài) kap Siōng-tè kau-poê, thàm-hóng phoà-pı̄ⁿ ê lâng, chhoē su-iàu an-ùi ê pêng-iú khai-káng, chham-ka ta̍k-chióng ê chō-chiū-hoē......, khah-chió khı̀ khoàⁿ phah-kiû pí-sài, khoàⁿ tiān-iáⁿ tiān-sı̄, se̍h pah-hoè kong-si, phah tiān-tōng oân-khū ..... án-ni, Siōng-tè ē tùi lán kóng, “Lí ū soán-te̍k tio̍h khah tiōng-iàu--ê.” (Hong-hiòng Tē 5 kı̂, 1990 nı̂ 7 goe̍h)