Soé thô͘ âng-á

Ū chı̍t ê pa-pa khı̀ ke-nı̍h beh tò--lâi, tı̄ lō͘-piⁿ khoàⁿ lâng teh bē thô͘ choè ê âng-á, choè khí chin súi. Bı̄n hún-khí chin pe̍h, chhùi-phoé kap chhùi-tûn iā tiám âng-âng, chin-chiàⁿ hó khoàⁿ, chiū bé tò khı̀ hō͘ i sè-sè hàn ê cha-bó͘-kiáⁿ thit-thô. Sió Lē-hoâ tùi pa-pa chiap thô͘ âng-á hui-siông hoaⁿ-hí. Khoàⁿ âng-á ê bı̄n pí i khah pe̍h, chhùi-phoé iā pí i khah âng, ba̍k-bâi sè-sè choā oan-oan, ba̍k-chiu toā-toā lúi kap i sio-siòng. Sió Lē-hoâ kak-tit chin khoài-lo̍k, chin thiàⁿ thô͘ âng-á chiū phō i tı̄ heng-chêng, kiò i choè “siáu me-meh” chin hoaⁿ-hí kā i chim, kā i bong. Bián loā-kú thô͘ âng-á ê bı̄n chin pháiⁿ khoàⁿ, niau-niau o͘-o͘. I chiū siūⁿ-khí ma-ma cháiⁿ-iūⁿ iúⁿ-chúi kā i sé-bı̄n, só͘-í i chiū iúⁿ-chúi the̍h i sè-sè ê bı̄n-kin lâi kā i ê thô͘ me-meh sé-bı̄n. Bô phah-sǹg ná sé soà ná o͘, liân chúi iā chin o͘. Sió Lē-hoâ soà háu chhut-lâi. ma-ma lâi mn̄g i cháiⁿ-iūⁿ háu, háu sím-mı̍h? I kóng siàu me-meh ê bı̄n cháiⁿ-iūⁿ sé bē chheng-khı̀, m̄ nā án-ni thô͘ me-meh ê ba̍k-chiu, súi-súi ê ba̍k-bâi lóng bô khı̀ lah, kiám m̄-sı̄ chhiⁿ-mı̂ lah mah? Hiaⁿ-ché chē-chē lâng ka-kı̄ teh siūⁿ lâng ēng siu-ióng, iok-sok ka-kı̄ ǹg-bāng thang chò-chiâⁿ hó ê jı̂n-keh. Nā-sı̄ m̄-chai lán sı̄ thô͘ chhòng-chō ê, sı̍t-chāi sı̄ bô hoat-tō͘ thang ka-kı̄ sé. Ū sı̂ lán sı̄ tian-tò lōng-khá hoán-choat, ka-kı̄ ài súi soà tian-tò bái. It-hoat ài beh sé-chheng ka-kı̄, soà it-hoat lō͘-chhut ka-kı̄ ê kiaⁿ lâng. Taⁿ chí-ū chı̍t-tiâu lō͘ chiū-sı̄ sı̀n Chú Iâ-so͘ tit-tio̍h I kā lán piàn-hoà choè sin chhòng-chō ê lâng chiah ū ǹg-bāng. Nā m̄-sı̄ hoà sin-jı̂n, siū piàn-oāⁿ choè sin ê lâng. Lí ka-kı̄ sé, iā soà tı̀ bō-á chng hō͘ i chhin-chhiūⁿ lâng, kin-tú nā-sı̄ kâu, kàu-boé iā-sı̄ kâu. Kâu bē pı̀ⁿ-choè lâng, chí-ū Siōng-tè chiah ē têng-sin ké-oāⁿ lâng ê sim. (Oa̍h-miā ê Bí-niû tē 65 kı̂, 1959 nı̂ 10 ge̍h)