Soat-iàu-lūn

Ùi Wiki Tô·-su-kóan
 Tı̄ chá-nı̂ ū chı̍t ê siàu-liân hū-jı̂n-lâng sèⁿ Kám, miâ Kek. Tùi sè-hàn chhin-kı̄n lú-o̍h, siū sian-seⁿ ê kàu-hùn, jı̍t-jı̍t ha̍k-sı̍p tō-tek, put-chí ū lêng-khiáu, koh chē-chē lâng o-ló i ê lú-tek. Taⁿ í-keng tha̍k-liáu chut-gia̍p, chiū tò-khı̀ tı̄ i ê pún-hiuⁿ; bô loā-kú i ê sı̄-toā-lâng kā i phit-phoè hō͘ chı̍t ê choh-chhân-hu. Pêng-sò͘ hit ê choh-sit-lâng sı̄ tē-it gâu kek-khı̀, ia̍h bô siū tō-lí ê kà-sı̄. Ū chı̍t jı̍t i ê hū-jı̂n-lâng ēng tō-lí khó͘-khǹg i, bô gı̂-gō͘ siông-siông kap i chò tùi-te̍k. Goân-pún sı̄ ǹg-bāng beh ín-chhoā i ê tiōng-hu nn̄g-lâng ē lâi saⁿ-kap sı̀n Chú, ta̍uh-ta̍uh ēng un-jiû, khiam-sùn chò bô͘-iūⁿ hō͘ i khoàⁿ; nā-sı̄ lóng bô chhái kang, tı̀-kàu i-ê hū-jı̂n-lâng tı̍t-tı̍t tàm-chı̀, soà liân i pún-sin ia̍h choa̍t-bāng. Koh ia̍h bô ài kā i lí-ke, ti-tu keⁿ-si thô͘ eng-ia lóng pàng kù-chāi i. Goân-pún sı̄ chheng-liâm pe̍k-iāu ê jı̂n-châi; taⁿ soà pı̀ⁿ chò thô͘-gû sio̍k-thún, chē-chē lâng hiâm, chió lâng o-ló. Che chiàu lán phah-sǹg, kiám m̄-sı̄ bô hoat-tō͘ thang koh-chài ho̍k-tò i ê sēng-tek mah? 
 Kai-chài ū chı̍t-ūi thoân tō-lí ê lâng, sèⁿ Kéng, miâ Kài, i siông-siông chhut-goā kóng tō-lí hō͘ lâng thiaⁿ. Só͘ kiâⁿ ê lō͘ bô-tiāⁿ bô-tio̍h, chhàu-tú-khám ū chı̍t jı̍t teh beh kiâⁿ tùi hit ê hū-jı̂n-lâng in tau koè. Tı̄ hit lō͘-nı̍h gū-tio̍h ià-siān, koh chhùi-ta, khoàⁿ-kı̀ⁿ kı̄n tau ū chı̍t tè chhù, chiū oat-jı̍p-khı̀ beh chiām-sı̂ kā in chioh hioh, ǹg-bāng ē tit-tio̍h tām-po̍h-á chúi thang chí chhùi-ta, bô gı̂-gō͘ hit ê siàu-liân hū-jı̂n-lâng chı̍t-ē khoàⁿ-kı̀ⁿ sûi-sı̂ siám-pı̄. Kéng Sian-seⁿ chiū kā chı̍t ê sè-hàn gín-á thó khoàⁿ ū tām-po̍h-á chúi thang lim á-bô? Hit ê gín-á sûi-sı̂ iúⁿ lâi hō͘ i. Kéng Sian-seⁿ siông-sè khoàⁿ in ê lāi-thâu bô sím-mı̍h chheng-khı̀-siùⁿ, chı̍t sı̀-kè choan ti-tu-si, chiū khoàⁿ-kı̀ⁿ tı̄ phian-phiah ê só͘-chāi ū chı̍t nn̄g pún ê Sin-kū-iok, ia̍h ū kúi-nā pún sı̄ Kàu-hoē lāi khah siông ēng ê chheh. Khoàⁿ liáu bē bián-tit lio̍h-á gông-ngia̍h, koh chı̍t sı̀-kè kā in khoàⁿ khah chin, to ia̍h bô ho̍k-sāi chhâ-thâu-pu̍t. Kéng Sian-seⁿ lio̍h-á jı̄n-kı̀ⁿ hit ê hū-jı̂n-lâng tı̄ kúi-nā nı̂ chêng ū bat lâi bó͘ kàu-hoē lé-pài, chin-chiàⁿ ū khiân-sêng chin-sı̍t ê sim-koaⁿ. Nā-sı̄ Kéng Sian-seⁿ siūⁿ ài beh kā hit ê hū-jı̂n-lâng chhı̀-mn̄g khoàⁿ chiah-ê chheh sı̄ tùi tah-lo̍h tit-tio̍h, hū-jı̂n-lâng lóng m̄ káⁿ chhut-lâi.
 Thêng ū chı̍t-sı̂ kú Kéng Sian-seⁿ beh khí-sin ê sı̂, chiū kā chit ê sè-hàn gín-á seh to-siā, soà kā in kóng, Tı̄ lín chit lāi-bı̄n ū pó, ı̀-sù sı̄ khoàⁿ in ê lāi-bı̄n kàu-gia̍h lâ-sâm ù-oè, kiám-chhái liân in ê sim-koaⁿ ia̍h sı̄ án-ni, nā bô thài káⁿ pı̀ⁿ chit hō hêng-tōng kú-chí leh? I taⁿ kā in kóng, Chit lāi-bı̄n ū pó, in tek-khak ē lâi péng-chhoē, sè-kan lâng tē-it tùi-tiōng ê chı̂ⁿ-châi, péng nā bô chiū tek-khak ē hian-khui chiah ê chheh lâi tha̍k, nā tha̍k ê sı̂ Siōng-tè ún-tàng ē khui-khé i ê sim-ba̍k, hō͘ in ē chai choē thang kı̍p-sı̂ lâi hoán-hoé. 
 Kéng Sian-seⁿ tú-á khí-sin, hit ê gín-ná sûi-sı̂ cháu khı̀ kā i ê lāu-bó kóng, Thâu-tú-á hit ê chheⁿ-hūn lâng kā lán thó-chúi chia̍h, kàu beh chhut-khı̀ ê sı̂ i kóng, lán chit lāi-bı̄n ū pó. Hit ê hū-jı̂n-lâng thiaⁿ-kı̀ⁿ sim chı̍t-sı̂ hoaⁿ-hí kàu bē kò͘-tit, i chiū tāi-seng tùi tı̄ chhián-hiān ê só͘-chāi lâi péng, nā-sı̄ péng lóng bô chiū khoàⁿ-kı̀ⁿ kè-á-téng ū chē-chē pún chheh, chiū ta̍k pún poaⁿ lo̍h-lâi ia̍h khoàⁿ ū nge̍h choá-phiò tı̄ hit lāi-bı̄n á-bô? Kàu lō͘-boé pún chiū jı̄n-kı̀ⁿ i chá-chêng siông-siông káng-kiù hit pún, chiū hian-khui siông-sè khoàⁿ lâi tha̍k, “Siōng-tè sı̄ kng-kng bô chı̍t-tiám-á o͘-àm, chit ê sı̄ goán tùi Chú só͘ siū ê tō-lí, lâi thoân hō͘ lín. Lán kóng ēng sim kau-poê Siōng-tè, lâi kiâⁿ tı̄ o͘-àm sı̄ lām-sám, bô sêng-sı̍t, Siōng-tè khiā-khí tı̄ kng-bêng, lán nā kiâⁿ tı̄ kng-bêng, chiū sim kap Siōng-tè kau-poê, Siōng-tè ê Kiáⁿ Iâ-so͘ Ki-tok ê hoeh sé-tû lóng-chóng ê choē.” I Hān 1:5-7. 
 Hit ê hū-jı̂n-lâng tha̍k liáu kám-kek m̄ o̍h i ê sim-koaⁿ, chiū siūⁿ khí i chá-chêng ū chiū-kı̄n tı̄ Ko͘-niû ê kha-tau, chē chē lâng o-ló i-ê sēng-tek, koh in-khı̂n káng-kiù Siōng-tè ê Sèng-keng, só͘ kiâⁿ só͘ chò, bô chı̍t hāng thang hō͘ lâng hiâm, bô gı̂-gō͘ chit-sı̂ ē lâi pàng-sak goá ê Kiù-chú Iâ-so͘ Ki-tok. Koh thó͘-khùi kóng, Kin-ná-jı̍t lâi kàu tı̄ goá ê ke-lāi m̄-sı̄ pêng-siông ê koè-lō͘ lâng, tek-khak sı̄ Siōng-tè só͘ chhe ê lô͘-po̍k. Siūⁿ-liáu sim bē bián-tit ū ut-chut ê kan-khó͘, chiū ē kı̀-tit chá-chêng Kiù-chú Iâ-so͘ ū chı̍t kù oē teh kóng, “Chhut-goā chiū hō͘ i toà, thǹg-pak-theh tio̍h hō͘ i chhēng, ià-siān chiū tio̍h hó khoán-thāi i gū-tio̍h iau chhùi-ta tio̍h hō͘ i lim-chia̍h”. Taⁿ chit-sı̂ bô lâi chih-chiap i, chiū tı̀-kàu ū ai-siong lâu ba̍k-sái. Tùi tha̍k sèng-chheh liáu chhı̀-chha̍k tio̍h i ê sim, chai i pún-sin sı̄ lâ-sâm ê lâng, chiū kín-kín poaⁿ-chhut i-ê ke-si àng-tāng, ēng chúi sé chheng-khı̀, lāi-bı̄n í-kı̍p thô͘-kha iah-sı̄ án-ni, koh i pún-sin kap sè-kiáⁿ lóng pı̀ⁿ-chò chheng-liâm pe̍k-iāu ê lâng, chhin-chhiūⁿ tı̄ ē-té si--nı̍h ū kóng:--
 Iâ-so͘ kiò chhéⁿ choē-ok jı̂n, Tû-khı̀ kū-sèng oāⁿ chò sin, Hian khui Sèng-chheh lâi káng-kiù, Chhı̀-chha̍k goá sim toā iu-chhiû. Chú taⁿ hō͘ goá sim chheng-khı̀, Ē tit chiū-kı̄n I sin-piⁿ, Hō͘ lâng ē chai thang hoán-hoé, Sı̀n-khò Kiù-chú sià tāng choē. 
 I ê tiōng-hu tı̄ goā-bı̄n, beh chı̀n-jı̍p lāi bı̄n, hut-jiân-kan khoàⁿ-kı̀ⁿ in ê lāi-bı̄n chin chheng-khı̀-siùⁿ, koh khoàⁿ-kı̀ⁿ i ê hū-jı̂n-lâng ū chhiò-iông ê bı̄n-māu. I ê tiōng-hu tı̄ chá-chêng sui-jiân gâu khêng-pek tō-lí, nā-sı̄ i ê hū-jı̂n-lâng soà tı̀-kàu sit-lo̍h i ê phín-hēng, koh-chài lâi heng-khí i, hō͘ i ê tiōng-hu khoàⁿ-liáu bē-bián tit siū kám-ke̍k, soà hoaⁿ-hí thiaⁿ-siū hū-jı̂n-lâng ê khó͘-khǹg, lâi saⁿ-kap sı̀n Chú Iâ-so͘ Ki-tok.
 (Tâi-lâm Kàu-hoē-pò tē 289 koàn,1909 nı̂ 4 ge̍h)