Kiok: Chún kóng sio̍k-gí ū án-ni kóng, goá mā m̄-sı̄ cha-bó͘ lâng .
Sūn : Ah bô, lí sı̄ cha-po͘--ê .
Kiok: M̄-sı̄.
Sūn : Poàⁿ lâm iûⁿ--ê.
Kiok: Khàu iau, lâng goá sı̄ “siáu-chê”, iáu bē “kè lâng”--leh.
Sūn : Iáu bē “kè lâng--ê” kiò-chò “siáu chı̍t-ē”，nā “kè káu--ê” , m̄ chiū siáu nn̄g-ē ！
Kiok: Siáng beh kè káu? Lí mài o͘-pe̍h kā goá bú-jio̍k.
Sūn : Ài kóng “kè--lâng”, “lâng” tı̄ chia ài tha̍k chò “khin-siaⁿ”, piáu-sı̄ pó͘-chhiong “kè” ê sû.
Kiok: Kiaⁿ sí-lâng, Tâi-gí koh ū hun “khin-siaⁿ”--o͘ ?
Sūn : Sí-lâng eng-kai sı̄ m̄-chai thang kiaⁿ chiah-tio̍h--lah, ài kóng “kiaⁿ--sí-lâng” “sí-lâng” ài kóng “khin-siaⁿ”.
Kiok: Kiaⁿ--sí-lâng! Sí-lâng iā ē kóng khin-siaⁿ !
Sūn : Lí sı̄ choan-kang beh lia̍h goá ê oē-kut, “Chhoē” goá ê mâ-hoân.
Kiok: Oē ū oē-kut--o͘ ? Kám ū oē-bah ? Chı̍t-kin bē joā chē ? Ah “Mâ-hoân” sı̄ lóng cháu khı̀ tó-ūi bih ? Nā bô, ná tio̍h choan-kang khı̀ chhoē ?
Sūn : Nā chiàu lí chit-ê kò-sèng, hoān-sè m̄-tiāⁿ iōng chhoē-ê niâ,koh tio̍h sı̀-kè “chhiau” chiah kam-goān.
Kiok: Chhoē kap chhiau ū siáⁿ bô-kāng? Lí kám ē sái kóng lâi hō͘ goá phı̄ⁿ phang--leh.
Sūn : Lán lâi tiâu-kiāⁿ kau oāⁿ, lí seng kóng “Mâ-hoân” ná ē bē sái chhoē, goá chiah kái-soeh “Chhoē” kap “Chhiau” hō͘ lí thiaⁿ.
Kiok: “Chhoē” sı̄ chhoē bô khoàⁿ--kı̀ⁿ ê mı̍h-kiāⁿ, mâ-hoân ài kóng “Chāu”, chāu mâ-hoân, chhin-chhiūⁿ chāu chı̂ⁿ án-ni, chı̍t-tiuⁿ piàn chò khah chē tiuⁿ, tan-sûn ê tāi-chı̀ bú kàu khah ho̍k-cha̍p chiū sı̄ “Chhoē”, mâ-hoân ná-ū iáⁿ phàng-kiàn--khı̀, chiū m̄-thang khı̀ “Chhoē”.
Sūn : Chiah hùi-khı̀ ! “Chhiau” tio̍h ài siang-chhiú khı̀ péng, “Chhoē” iōng ba̍k-chiu khoàⁿ chiū hó, án-ni kóng ū kán-tan--bô?
Kiok: Chiah-nı̍h kán-tan ê tō-lí, lí lia̍h-chún goá m̄-chai--o͘ ? Goá iōng kha-thâu-u siūⁿ......, bô,bô--lah, chún goá bô kóng.
Sūn : Lí ê kha-thâu-u kiám-chhái ū koan-chat-iām, chhiâng-chāi ē siūⁿ m̄-tio̍h--khı̀.
Kiok: Kha-thâu-u mā ē ū koan-chat-iām?
Sūn : Lán nā m̄-chai chiū tiām-tiām.
Kiok: Sí-lâng tio̍h ài kóng khin-siaⁿ.
Sūn : Tâi-gí kóng--lâi sı̄ chin hó-thiaⁿ. Tiàm chia goá kā lí kóng chı̍t-ê pı̀-bı̍t, lí boē sái kā lâng kóng o͘!
Kiok: Sím-mı̍h hó-khang--ê, chiah-nı̍h sı̂n-pı̀ neh!
Sūn: Lí ē-kı̀-tit lán chêng-pái ū kóng tio̍h “Bú-gí toā-pó͘-oân” ê tāi-chı̀ bô!
Kiok: Ū ah! Kóng liáu chin-hó ah! Chiok chē lâng, thàu-chá khí lâi lóng kia̍h kok-kı̂ chhiùⁿ kok-koa toā-pó͘-oân liām saⁿ piàn neh!
Sūn: Bô-iáⁿ bô chiah, kóng liáu tùi-tùi. Goá sı̄ kóng A-pı̀ⁿ-á mā thiaⁿ tio̍h lán “Bú-gí toā-pó͘-oân” ê hòng-sàng, thiaⁿ liáu chiâⁿ kám-tōng, te̍k-pia̍t chhoē goá khı̀ i ê chhù--nı̍h ha-tê khai-káng, koh hō͘-siōng gián-kiù Tâi-gí bûn-hoà ê khùn-kéng neh.
Kiok: Án-ni lí án-cháiⁿ kap A-pı̀ⁿ-á kóng neh!
Sūn: Lí tō m̄-chai kap A-pı̀ⁿ-á kóng-oē sı̄ chı̍t-chióng hiáng-siū, bô-lūn lí án-cháiⁿ kā chhò-kàn la̍k-kiāu, i lóng mā chhiò-chhiò thiaⁿ, hō͘ lí kóng kah sóng, i chiah liâu-liâu ı̀n. Goá kā kóng lín chip-chèng-tóng ū kàu khoàⁿ khin lán Tâi-oân-lâng, tı̄ soán-kí ê sı̂, kóng Tâi-gí kóng kah chhùi-kak choân pho, chı̍t-ē hoāⁿ chhiú-thâu chiū boē-kı̀ liáu-liáu, koè-khı̀ ū ê chèng-tóng sı̄ iōng-chı̂ⁿ teh bé phiò, tǹg hō͘ i siāng bô mā ū chı̂ⁿ thang khai, chia̍h nn̄g-tǹg chheⁿ-chhau, chit-má tńg hō͘ lín, sím-mı̍h lóng bô, beh chia̍h hô͘-sı̂n ka-tı̄ ha̍p, sı̍t-chāi chiok m̄-kam-goān, lâng sı̄ kim-kong-tóng, lín sı̄ khi-phiàn-o͘-pe̍h kóng, tùi bú-gí ê kian-chhı̂ tian-tò thè-pō͘, hō͘ lâng kám-kak chiok sit-bōng ah!
Kiok: Ah A-pı̀ⁿ-á ū sím-mı̍h hoán-ı̀n neh?
Sūn: A-pı̀ⁿ-á thó͘ chı̍t-ê toā-khùi kā goá kóng--
Píⁿ: Goá chò chóng-thóng mā chiok bô-nāi leh! Choân-kok ê kong-bū jı̂n-goân iáu sı̄ kū sè-le̍k teh pá-chhı̂, mûi-thé o͘-pe̍h kóng, chiàu saⁿ-tǹg siu-lí iáu bô kàu, liân siau-iā mā the̍h lâi tàu, nā m̄-sı̄ goá thài ū Tâi-oân-chêng Tâi-oân-sim koh sè-kài-koan ê tı̀-hūi, chá chiū khòng-kha-khiàu lah! Lâng kóng oá soaⁿ soaⁿ tó, oá chúi chúi khó, oá ti-tiâu sí ti-bó, oá hiaⁿ-ko sí hiaⁿ-só, sı̍t-chāi bô m̄-tio̍h, ka-tı̄ nā chai chı̍t-châng, khah iâⁿ khoàⁿ pa̍t-lâng, lín hó-hó án āu-piah lâi thui-sak, goá chèng-chhek lâi phoè-ha̍p, goā-kong lāi-ı̀n, siong-sı̀n lán ê bú-chhin boē koh chài lâu ba̍k-sái lah!
Sūn: Án-ni chiū bô m̄-tio̍h lah! Hiān-chāi ūi-tio̍h “piáng-piáng” nn̄g-siaⁿ hông khia, ū lâng koh chhiàng-siaⁿ beh “phóng-phóng” sái chiàn-chhia lâi hek-kiaⁿ, lí nā bô khah sè-jı̄, tio̍h hō͘ in lia̍h-khı̀ Pak-kiaⁿ.
Píⁿ : Lí bián hoân-ló, goá ē hó-hó chiau-thāi in, sui-jiân lâng lóng kiò goá A-pı̀ⁿ-á, bı̄n mā sêng Tâi-lâm toā-piáⁿ, pak-tó͘ koh ı̂ⁿ-ı̂ⁿ, m̄-kú goá ê chhùi ē tiⁿ-tiⁿ, beh hō͘ Tâi-oân chhut-thâu-thiⁿ sı̄ chá-bān ê tāi-chı̀. hó-ka-chài lín soán liáu tio̍h lâng, á-bô Tâi-oân m̄-chai beh piàn chò siáⁿ-khoán neh!
Sūn: Sı̄ án-cháiⁿ kóng neh?
Píⁿ: Thau-thau kā lí kóng, chhut--khı̀ boē-sái sı̀-kè hòng-sàng o͘! Kin-nı̂ chóng-thóng soán-kí kēng-soán khai-sí ê sı̂-chūn, ū chı̍t-jı̍t chı̍t-ē kı̀-chiá lâi pài-hóng goá, i mn̄g goá kóng: “Lí iōng So͘ Cheng-chhiong chò lí ê kēng-soán-chóng-pō͘ chú-jı̄m, tong-chho͘ lí sı̄ án-choáⁿ phoàⁿ-tēng i sı̄ chı̍t-ūi chhong-bêng koh ū lêng-le̍k ê lâng neh?” Goá kā i ı̀n-kóng: “Goá mn̄g i chı̍t-ê būn-tê: Sím-mih lâng sı̄ lín lāu-pē ê hāu-seⁿ, m̄-kú m̄ sı̄ lí ê hiaⁿ-tı̄? I hō͘ goá chı̍t-ê chèng-khak ê tap-àn : Sı̄ goá, So͘ Cheng-chhiong. Só͘-í goá chai-iáⁿ i sı̄ chı̍t-ūi chhong-bêng koh ū lêng-le̍k ê lâng.” Chit-ê kı̀-chiá chiū khı̀ tùi-hong ê kēng-soán-chóng-pō͘, mā chiong chia ê oē kā Liân--ê kóng, Liân--ê chiū kiò Má--ê lâi khó-chhı̀. I mn̄g Má--ê kóng: “Sím-mih lâng sı̄ lín lāu-pē ê hāu-seⁿ, m̄-kú m̄ sı̄ lí ê hiaⁿ-tı̄?” Má--ê siūⁿ chı̍t-ē chiū kóng: “Chhiáⁿ sió-tán--chı̍t-ē.” Má--ê chiū khı̀ keh-piah chhéng-kàu Ông Kim-pêng chit-ê būn-tê, Ông Kim-pêng kóng: “Kán-tan lah, tap-àn sı̄ goá, Ông Kim-pêng.” Má--ê chiū tńg-khı̀ Liân--ê hia kóng: “Tap-àn sı̄ Ông Kim-pêng.” Liân--ê kóng: “Má--ê, lí sı̍t-chāi ū-kàu gōng, chèng-khak ê tap-àn sı̄ ‘So͘ Cheng-chhiong’ lah.”
Sūn: Chin-chiàⁿ ū kàu hó-chhiò. Thiⁿ-kong ū ba̍k-chiu, hó-sū pháiⁿ-sū lóng ē chhâ-siu, chı̍t-kûn phok-sū khah su lán chia ê phok-thó͘ neh ! kóng liáu chiâⁿ-kú, thian-lâm tē-pak oē sian, oē kàu thiⁿ-kng iā boē ià-siān, lí khoàⁿ hit-kang A-pı̀ⁿ-á teh chú-chhı̂ Tiong-siông-hoē ê sı̂, bı̄n chhàu-chhàu bô siáⁿ cheng-sı̂n, sı̄ in-ūi kap goá kóng kui-mê bô-khùn, sit-bı̂n só͘ ín-khí--ê.
Kiok: Lí kap A-píⁿ thı̂ hiah-kú, ū kóng beh án-cháiⁿ lâi thui-sak lán ê Tâi-oân bûn-hoà bô?
Sūn: Ū ah! beh cháu ê sı̂, goá kā A-píⁿ-á kóng, Tâi-oân ê bûn-hoà boē sái tn̄g, chèng-hú ài ū kè-ek lâi thui-sak, hō͘ bı̄-lâi ê kiáⁿ-sun koh ē-tàng phı̄ⁿ tio̍h Tâi-gí ê phang-bı̄, pàng-gû chia̍h chháu ê chèng-chhek, chiâⁿ-kín chiū ē chiong kok-cho̍k-kûn ê bú-gí siau-bia̍t khı̀.
