Píⁿ : Á-bô lí mā kà nn̄g-pō͘--á.
Sūn: 1925 nı̂ Chhoà Poê-hoé thui-sak Tâi-gí bûn-hoà ê sı̂-chūn, ū the̍h-chhut “cha̍p-hāng koán-kiàn”, sūn-soà koh chò koa lâi thui-tōng.
píⁿ : Goá sı̄ chai-iáⁿ ū “Cha̍p-hāng koán-kiàn” chit-pún chheh, m̄-kú m̄ bat thiaⁿ-kı̀ⁿ sím-mı̍h koa, lí ē sái kóng lâi phı̄ⁿ-phang boē?
Sūn: Hó ah! I ê koa-sû sı̄ án-ni siá--ê.
Sè-kài hong-khı̀ jı̍t-jı̍t-khai, bô hun lâm-pak kap tang-sai; In-hô lán ê Tâi-oân tó, kū-siòng kàu taⁿ iû-goân chāi, kū-siòng kàu taⁿ iû-goân chāi.
Koài koài koài, in-hô ē chit-iūⁿ, koài koài koài, lán tio̍h siūⁿ khoàⁿ māi.
Ngó͘-kok bô hō͘ boē chhut-gê, chiáu-á bô sı̍t chiū bē poe; Lâng ū thâu-náu choè iàu-kín, bûn-bêng khai-hoà chū-jiân ē, bûn-bêng khai-hoà chū-jiân ē.
Sı̄ sı̄ sı̄, kàu-ióng choè iàu-kín, sı̄ sı̄ sı̄, lán kú bô tha̍k-chheh.
Hàn-bûn lı̄ lán í-keng kú, Hô-bûn tāi-ke siōng-bı̄ iú; Lí goá nā ài chhut-thâu-thiⁿ, Pe̍h-oē-jı̄ ē tio̍h kín hù, Pe̍h-oē-jı̄ ē tio̍h kín hù.
Kiâⁿ kiâⁿ kiâⁿ, boē-tàng koh iân-tı̂, Kiâⁿ kiâⁿ kiâⁿ, boē-tàng koh iân-tı̂.
Tı̄ chia goá mā the̍h chhut “Cha̍p-hāng chhián-kiàn” kap chı̍t-siú koa, hō͘ lí chò chham-khó.
Píⁿ : Chin-chiàⁿ kám-siā! Chhiáⁿ kóng.
Sūn: Tē-it hāng: Tiāⁿ chia̍h bú-gí toā-pó͘-oân, sim-koaⁿ chiah boē kiat kui-oân.
Tē-jı̄ hāng: Chè-tēng sin hiàn-hoat, kiáⁿ-sun oē chhut-thoat.
Tē-saⁿ hāng: Kok-hoē kái-kek ài kiám-poàⁿ, sè-kài ba̍k-chiu kim-kim khoàⁿ.
Tē-sı̀ hāng: Sam-thong nā choân thong, liâm-piⁿ chhiáⁿ sai-kong.
Tē-gō͘ hāng: Chèng-tı̄ ài chheng-bêng, ke-ke hō͘-hō͘ hó ka-têng.
Tē-la̍k hāng: Tâi-oân Tiong-kok, chı̍t-pêng chı̍t-kok, kiáⁿ-sun oē hēng-hok.
Tē-chhit hāng: Bú-gí bûn-hoà ài liû-thoân, lâng-lâng éng-oán toà Tâi-oân.
Tē-peh hāng: Kok-chè tiâu-liû pún-thó͘-hoà, bí-lē pó-tó lâng ài toà.
Tē-káu hāng: Le̍k-sú tē-lí ài kàu-io̍k, nńg-thé ngē-thé ài kiàn-tio̍k.
Tē-cha̍p hāng: Kok-ka an-choân ài chù-tiōng, Tâi-oân chiàⁿ-miâ ài ūn-tōng.
Koh sàng lí chı̍t-tiâu koa, iōng lán Tâi-oân bı̂n-iâu “Ú-iā-hoe” ê tiāu lâi chhiùⁿ:
Hó-nı̂ tang, hó-nı̂ tang, chhēng sin-saⁿ súi-tang-tang, kè-tio̍h hó-ang, sim-chêng khin-sang, it-seng it-sè chia̍h boē khang.
Hó-nı̂-tang, hó-nı̂-tang, lâi thāu-lâng bô thāu-thâng, chhang-á toā-châng, soàn-á bô-kāng, khêng-hoe khui-hoe pah-jı̍t-âng.
Hó-nı̂ tang, hó-nı̂-tang, lām chò-hoé piàn-sêng khang, chò-lâng hang-hang, chò-sū thoah-thang, san-tin hái-bı̄ chia̍h boē phang.
Ǹg-bāng ta̍k-ke lóng hó-nı̂ tang, koh boē hō͘ to̍k-thâng lâi ù-jiám múi chı̍t-ê lâng ê sim-lêng.
Píⁿ : Chin-chiàⁿ ū kàu-chán, “Hó-nı̂ tang, hó-nı̂ tang, Gô͘ Siok-tin súi-tang-tang” , hó-kı̀ koh hó-thiaⁿ, to-siā ló͘-la̍t! lēng-kang nā “Bûn-hoà-pō͘” sêng-lı̍p ê sı̂, chiah iau-chhiáⁿ lí lâi tàu saⁿ-kāng.
Sūn: To-siā chóng-thóng sian-seⁿ ê hó-ı̀, chí-iàu goán ê ǹg-bāng ē sı̍t-hiān, goán chiū siā-thiⁿ siā-tē lah !
Kiok: Lí ū kàu hó-ūn neh, kap A-píⁿ-á kóng hiah chē gō͘-sı̀-saⁿ--ê, hō͘ lâng chiok him-siān ê. goá mā beh kóng chı̍t-ê pı̀-bı̍t, lí boē sái kā lâng kóng o͘.
Sūn: Goá iōng goá ê sin-koân thé-tāng chò pó-chèng, choa̍t-tùi boē kóng--chhut-khı̀, nā bô goá chiū kiám 10 kong-hun, lak 10 kong-kin.
Kiok: Lí nā siūⁿ beh kiám-pûi chiū kóng chı̍t-siaⁿ, mài tiàm hia kóng hiah ū--ê bô--ê chı̍t toā-tui. goá kā lí kóng, téng lé-pài jı̄ àm-sı̂ nn̄g-tiám ê sı̂-chūn, lán hù-thâu--ê A-liân ché lâi chhoē goá khai-káng kóng－－
Liân : Chit chām m̄-chai hoān tio̍h sím-mı̍h soah, tek-sit tó chı̍t-sian thó͘-tı̄-kong, goá lāu-sı̍t-lâng kóng lāu-sı̍t-oē, chia ê chèng-kheh m̄-tha̍k le̍k-sú koh pı̂n-toāⁿ mn̄g lāu-su, m̄-bat jı̄ koh kóng-oē toà chhı̀ boē sè-jı̄, sı̍t-chāi ū kàu ut-chut, nā m̄-sı̄ lín chó͘-má chit-má teh kia̍h koái-á, goá chiū sái “Khong-kun it-hō” kah in piàⁿ lah!
Kiok: A-liân ché ah! Lín bián tio̍h-kiaⁿ mā mài toā-sè siaⁿ, tòng-chò káu teh pūi hoé-chhia kāng-khoán, sim-chêng pàng hō͘ khin-sang, chu-hoat kai-khong, chū-iû chū-chāi.
Liân : Bô kóng bô khı̀, ná kóng ná khı̀, kóng kah chia ê mûi-thé o͘-pe̍h lâi, chiong goá ê oē tn̄g-thâu tn̄g-boé chhú tiong-ng, bêng-bêng sı̄ pó͘-io̍h-hng, kā goá tòng-chò liû-sng, óng-hùi goá tı̄ “Le̍k-tó tāi-ha̍k” ū-chheh tha̍k kah bô-chheh, siū-chı̄n khó͘-lān bô oàn-chhoeh, koh it-tı̍t teh bú-jio̍k goá ê jı̂n-keh, sı̍t-chāi ná khoàⁿ ná chheh, chheh-phoê chǹg-jı̍p chheh-sim.
Kiok: Siáⁿ-lâng kiò lí beh kah hiah thóng-phài--ê ū kóng ū chhiò, chit-má phoà sim-koaⁿ hông chia̍h lâng koh hiâm chhàu-chho leh!
Liân : Lí ná án-ne kóng neh! lâng goá mā sı̄ beh chhiok-chı̀n cho̍k-kûn hô-hâi chiah hi-seng chū-ngó͘, lo̍h-hái chò siáu-bó͘. Á-bô lí kóng beh án-cháiⁿ chò neh?
Kiok: Lán lóng sı̄ cha-bó͘-lâng, “un-jiû” sı̄ lú-sèng siōng toā ê bú-khı̀, jiû lêng khek kǹg, chı̍t-sı̀-lâng bián phah-sǹg, un-jiû kam-tiⁿ chhiūⁿ choâⁿ-chúi, chia̍h liáu bô pûi mā ē súi.
Liân : Goá soà lóng boē-kı̀-tit goá sı̄ chı̍t-ê un-jiû ê lú-sèng ho͘! Ta̍k-kang kap hiah ê chèng-kheh bêng-cheng àm-tàu ū kàu thiám, kiông-kiông beh sit-khı̀ goá ê pún-lêng lah!
Kiok: Tio̍h sı̄ án-ne ah! Lí tio̍h ài chun-chiàu sam-chiông sù-tek lâi chò chiū pó pêng-an chia̍h pah-jı̄, seng-oa̍h khoài-lo̍k ē sūn-lı̄.
Liân : Sı̄ tó sam-chiông sù-tek neh!
Kiok: Tē-it chiông: Sam-put gō͘-sı̂ lâi Ko-hiông, liáu-kái lâm-pō͘ lâng ê sim-siaⁿ, hō͘ lâm-hong sió-chut-á piàn eng-hiông.
Tē-jı̄ chiông: Ū-êng bô-êng khı̀ Thian-siông, chhin-kı̄n goân-chū-bı̂n, kap tāi chū-jiân chò pêng-iú, thài-tō͘ m̄-thang siuⁿ khu̍t-kiông.
Tē-saⁿ chiông: Siāng-hó poaⁿ-khı̀ toà Sam-tiông, chò-lâng ài o̍h chhiong chhiong chhiong, chò-sū mài koh o͘-pe̍h chhiong, án-ne lēng-kang chiah oē hōng-hông piàn oa̍h-liông.
Tē-it tek: Chhùi-chı̍h chò kong-tek, lâng-kóng sim bái bô lâng chai, chhùi pháiⁿ siōng lı̄-hāi, tùi-hù thóng-phài ài chhiò chhiò khoáⁿ seng-lé, pài oân chiah lâi lé.
Tē-jı̄-tek, sin-toāⁿ chhiūⁿ nńg-tek: chò-lâng chò-sū nńg-sin-toāⁿ, khiam-hi chū-séng mài chhàu-toāⁿ, chē-chē pêng-iú lâi chò-phoāⁿ.
Tē-saⁿ tek: Iōng-sim cheng koân-ek, lâng kóng nā sı̄ ài kè-kàu, thàn-chá thiah lô͘-chàu, kap lâng iōng-sim kau-poê, lēng-kang khah boē thu̍t-chhoê, chē hō͘ chiàⁿ chiah oē tit lâng thiàⁿ, khah séng sı̀-tang ê phah-piàⁿ.
Tē-sı̀ tek: Chû-pi chò khı̀-phek, lâng lóng kóng lí sı̄ lú tiong hô-kiat, ūi bı̂n-chú, ūi jı̂n-koân chhut-seng jı̍p-sí, lóng bô oàn-thàn, ū liōng chiah ū hok, ū chû-pi ê sim chiah ū moá-chiok.
Liân : To-siā lí ê chí-tō, goá ē jı̄n-chin khı̀ chò goá siōng tiōng-iàu ê kak-sek, koh khah chē khùi-la̍t ūi lán Tâi-oân lâng phah-piàⁿ lah!
Kiok: M̄-bián hiah kheh-khı̀ lah!
Sūn: Lán nn̄g-ê lóng sı̄ ū hok-khı̀ ê lâng, Tâi-oân chhut chin-chú, lán koh ē-tàng hiáng-siū chū-iû kap bı̂n-chú, sı̍t-chāi ū kàu hó.
Kiok: Kàu taⁿ lí chiah chai.
Kiok: A-kiok--a
Sūn : A-sūn--a.
Ha̍p: Chiok-hok tāi-ke pêng-an khoài-lo̍k chia̍h pah-jı̄, gín-á toā-sè hó io-chhı̄,SARS liû-hêng ài sè-jı̄, ka-têng sū-gia̍p chiâu sūn-lı̄.Ǹg-bāng tāi-ke chia̍h pá êng-êng, choè-hoé lâi chhòng-chō Tâi-gí ê bûn-bêng. Kám-un o͘ !
