Tâi-oân-káu-á chiàⁿ-miâ ūn-tōng

1 tı̄n Tâi-oân pún-thó͘-káu-á chò-hoé leh chhit-thô, êng-êng bóng phò-tāu . Ou-káu--ê kóng: " Gún chú-lâng hit-jı̍t kap lâng khı̀ Tâi-pak giâ kı̂-á kiam chhiàng-siaⁿ, tńg-lâi kàu chhù--nih it-tı̍t hoah thiám, m̄-koh sim-chêng chin khin-sang, mā it-tı̍t hoah-kóng: 'Tâi-oân-kok bān-soè', hoah-kah thiòng kah ." Theh-lih kóng: " Lán mā su-iàu lâi chiàⁿ-miâ--1-ê chiah-tio̍h ." Pà-piu--ê kóng: " Ná-tio̍h chiàⁿ siáⁿ-mı̍h miâ, chāi-lâi Lán 'Tâi-oân-thó͘-káu-á ' tiō chin chhut-miâ: Sàu-to-boé, Kiuⁿ-á-kha, Ū chı̍h-pan, siáⁿ-lâng m̄-chai Lán ê phín-chéng tē 1 miâ, 'Tâi-oân-thó͘-kau' hó-miâ-siaⁿ, ná-tio̍h chiàⁿ siáⁿ-mı̍h-miâ .” Ou-káu--ê hun-sek kóng: " 'Tâi-oân-thó͘-káu' ū-iáⁿ hó-miâ-siaⁿ, m̄-koh Lán tio̍h toè Lán chú-lâng kiâⁿ m̄-chiah-tio̍h, chú-lâng beh chiàⁿ-miâ, Lán mā-tio̍h chiàⁿ-miâ, án-ni m̄-chiah sı̄ tiong-sim ê Tâi-oân-káu-cho̍k ." Pà-piu--ê kóng: "Án-ni kóng sı̄ ū tō-lí , ah bô beh kiò siáⁿ-mı̍h miâ ? " Ou-káu--ê kóng: "Chin kán-tan, kā 'thó͘' the̍h-tiāu, kui-khı̀ kiò-chò Tâi-oân-káu-á tiō OK . " Pà-piu--ê kóng: "Kan-nā chha 1 jı̄ 'thó͘', kám ū siáⁿ-mı̍h bô-kāng ? " Ou-káu--ê kóng: "Heh chha--chē leh nò͘ ! Lí kā siūⁿ-khoàⁿ-māi, Lán nā-sı̄ 'Tâi-oân-thó͘-káu', ah Lán ê chú-lâng m̄-tiō-sı̄ 'Tâi-oân-thó͘-lâng'--lò͘."