Tâi-oân ê chúi-gû, 1 chiah phú-phú, pūn-pūn, sı̄ hō͘ lâng khoàⁿ boē chiūⁿ-ba̍k--ê! Gín-á-lâng nā-sı̄ sńg kàu kui sin-khu, chiū oē hō͘ toā-lâng mē kóng: “1 ê ká-ná thô͘-gû--leh!” Thô͘-gû chiū-sı̄ Tâi-oân chúi-gû.
Chng-kha gín-á sı̄ ta̍h thô͘ toā-hàn--ê. Bô 1 ê gín-á m̄-sı̄ kui sin-khu choân thô͘-hún. Chhin-chhiūⁿ chúi-gû-á-kiáⁿ kāng-khoán, tāi-ke lóng sı̄ thô͘-gû 1 kô.
Tâi-oân sı̄ lông-gia̍p khí-ke, chē-chē lâng sı̄ chò-sit--ê. Thàu-chá thiⁿ boē kng tio̍h chhut-mn̂g, tiám-sim kap chiàⁿ-tǹg lóng tı̄ hn̂g--nih chia̍h. Cha-bó͘-lâng kiaⁿ jı̍t pha̍k, hong khau, iōng kin-á pau thâu pau bı̄n. Cha-po͘-lâng khiok-sı̄ pha̍k kàu o͘-kim o͘-kim. Goá kā khoàⁿ--khí-lâi, in pí gín-á jú-khah sêng thô͘-gû. Kap in sin-khu-piⁿ ê chúi-gû, bô sím-mih khu-pia̍t.
Bo̍k-chêng Tâi-oân ê sán-gia̍p, chē-chē chhut-cháu khı̀ Chi-ná. Lâu-tı̄ Tâi-oân ê kang-chhiúⁿ kap kang-tē, mā chē-chē ēng goā-lô. Só͘-í Tâi-oân lô-kang sit-gia̍p ê hiān-siōng put-chí-á giâm-tiōng. Tâi-oân ê kó͘-phiò chí-sò͘, tı̄ 2000 nı̂ 12 goe̍h 22 hit jı̍t, sı̄ 4811. Kó͘-phiò-cho̍k chē-chē lâng sim-lāi oàn-thàn, sı̄m-chı̀ oàn-thàn chèng-hú bû-lêng.
Tâi-oân ê keng-chè, tı̄ chı̍t-koá lâng ê ba̍k-chiu lāi, sı̄ o͘-àm-thiⁿ chı̍t-phiàn. Sı̄ bô hi-bāng, mā bô-ài koh ǹg-bāng, phah-sǹg ı̂-bı̂n khı̀ pa̍t-ê kok-ka.
Sū-sı̍t siōng, Tâi-oân só͘ siau-sit--ê, m̄-sı̄ keng-chè-la̍t, sı̄ Tâi-oân-lâng ê “chúi-gû-á sèng”!
Sán-gia̍p ē chhut-cháu khı̀ Chi-ná, chē-chē sı̄ ǹg-bāng Chi-ná ê chiān-kè lô-kang. Che, chiū-sı̄ jı̂n-sèng ê “tham”! Bô kò͘ tio̍h Tâi-oân ê lô-kang su-iàu--in. Tı̄ Tâi-oân chhiàⁿ goā-lô, mā-sı̄ chit-chióng tham-sio̍k ê sim-lí.
M̄-kú, oē kóng tò-tńg--lâi, Tâi-oân-lâng chiām-chiām siau-sit nāi-lô chia̍h-khó͘ ê cheng-sı̂n. Chia̍h-hó chò khin-khó, chhēng súi-súi tán niá sin-súi. Chit-chióng sim-lí, pı̀ⁿ-chò chiok phó͘-phiàn ê hiān-siōng. Goā-lô thàn chit-chūn, toā-liōng chı̀n-jı̍p Tâi-oân. Tâi-oân ê sán-gia̍p iā-sı̄ thàn chit-chūn, kā in chhut-cháu ê lí-iû the hō͘ Tâi-oân-lâng.
Só͘-í, Tâi-oân chit-má siōng su-iàu--ê, sı̄ chúi-gû ê pún-sèng! Phú-phú chho͘-chho͘ ê piáu-bı̄n, chiah oē-kham-tit tāi-chū-jiân ê hong chhoe, jı̍t pha̍k kiam hō͘ lâm.
Ū chı̍t kù-oē kóng: “Jı̄n-chin ê lú-jı̂n siōng súi!” Goá kám-kak Tâi-oân ê chúi-gû chiū-sı̄ chiah-nı̍h súi! Nn̄g-ki kak saⁿ-hiòng, ńg lāi-bı̄n pau oan jı̍p--khı̀. Chhin-chhiūⁿ ló͘-le̍k phah-siàⁿ ê nn̄g-ki chhiú-kut, éng-oán oan-oan, chhiú-poâⁿ ǹg ē-bı̄n, khang-khoè chò boē lı̄!
(Tâi-bûn Bóng-pò tē 52 kı̂, 2001 nı̂ 1 ge̍h)
