Tâi-oân Kàu-hōe Kong-pò 780 Hō/Kong-kò/1954 nî, Sè-kài Liân-ha̍p Kî-tó-hōe

Kong-kò

1954 nî, Sè-kài Liân-ha̍p Kî-tó-hōe

(Chit phiⁿ tī goân-chheh tē 3 ia̍h)

Chiaⁿ-goe̍h chhe 3 (lé-pài-ji̍t) kàu chhe 9 (pài-la̍k).

Lé-pài-ji̍t (Chiaⁿ-goe̍h chhe 3).

Má-thài 19:26; Hi-pek-lâi 13:18, 4:16.

108 nî kú thong sè-kài ê Ki-tok-tô͘ kè-sio̍k poah sin-nî thâu chi̍t lé-pài liân-ha̍p ūi-tio̍h Chú Iâ-so͘ Ki-tok ê Kàu-hōe kap kóng-khoah Siōng-tè ê kok tī lâng ê tiong-kan lâi kî-tó.

1954 nî1 kî-tó ê chú-tê sī chi̍p-tiong tī kiâⁿ sin-jiah ê Chú Iâ-so͘ Ki-tok. Lán ún-tàng bô bē kì-tit tùi I lâi kiû chhiau chū-jiân ê in-hūi kap lêng-le̍k. Chóng-sī thang siong-pi ê sū-si̍t, chiu-si lán lóng siông-siông ūi-tio̍h lán tùi Siōng-tè kap I ê khùi-la̍t ê koan-liām chin sió, tì-kàu siu chó͘-tòng, bē-thang tit-tio̍h I só͘ beh èng-ún ê siúⁿ-sù. Nā-sī Siōng-tè bô só͘ m̄ ē, koh Chú Iâ-so͘ Ki-tok chā-ji̍t, kin-á-ji̍t tâng chi̍t-iūⁿ, ti̍t kàu tāi-tāi. Só͘-í lán tī I ê miâ tio̍h hó-táⁿ chiū-kīn in-tián ê chō-ūi, kàu-gia̍h chhim-sìn Siōng-tè ē kā lán chiâⁿ só͘ mn̄g ê kap só͘ siūⁿ ê sū, I sī pò-tap in-khîn chhōe-kiû I ê.

Pài-it (chiàⁿ-goe̍h chhe 4).

"Siōng-tè ê ōe."

Sèng-keng: Chhū gō͘-chheng lâng (Iok-hān6:1--13).

Be̍k-sióng: Kûn-chiòng ke̍k tōa ê khiàm-khoeh.

Sè-kiáⁿ kiong-hōng mi̍h-kiāⁿ.

Sîn-sèng ê be̍k-sī. Tùi hōng-hiàn, thang hō͘ chèng-lâng khòaⁿ-kìⁿ Chú ê êng-kng.

Chhàm-hóe: Lán tùi ha̍k-si̍p Siōng-tè ê ōe chin bô kàu-gia̍h, tì-kàu tùi chin-lí ê tì-sek bē cha̍p-hun hoat-ta̍t.

Lán ū hut-lio̍k bô kàu-gia̍h eng-kai chiong Siōng-tè ê ōe pò lâng chai.

Lán bô cha̍p-hun hiàn-sin hō͘ Siōng-tè ê ōe piàn-thoân tī ta̍k só͘-chāi.

Kám-siā: Kū-nî tiong ē thang khan-hêng Sèng-keng kàu ta̍k-ūi. Ū koh sin e̍k chin-chē khoán ōe ê Sèng-keng. Siōng-tè só͘ siúⁿ-sù sîn-lêng ê kng chiò chē-chē tha̍k Sèng-keng ê lâng.

Khún-kiû: Ūi-tio̍h hoan-e̍k Sèng-keng ê lâng kap hia̍p-hōe, hoat-hêng, khok-chhiong Sèng-keng lâi kî-tó. Ūi-tio̍h bē Sèng-keng ê lâng kap ki-koan lâi kî-tó.

Sèng-keng khǹg tī lí-siā, pīⁿ-īⁿ, kaⁿ-ga̍k kap siâng-khoán ê só͘-chāi hō͘ Sèng-keng ê tê-ba̍k hián-chhut tī kong-chiòng.

Ūi-tio̍h Sèng-keng Su-īⁿ kap kàu-siū kî-tó.

Ūi-tio̍h tē-hng kok kau-hòe ê cha-keng-pan ē ná hoat-ta̍t, tī Siōng-tè ê ōe lâi hùn-liān sìn-tô͘ lâi kî-tó.

Pài-jī (chiàⁿ-goe̍h chhe 5).

"Ka-têng kap kàu-io̍k."

Sèng-keng: Gâi-ló͘ ê cha-bó͘-kiáⁿ koh-oa̍h (Má-thài 9:18--26).

Be̍k-sióng: Pi-siong sè-kiáⁿ phòa-pīⁿ.

Ka-têng pē-bó sìn-gióng ê kè-ta̍t.

Su-iàu Ki-tok ê lêng-le̍k lâi pang-chān.

Chhàm-hóe: In-ūi kòe-khì tùi bô sìn Chú ê ka-têng kap sè-kiáⁿ, lán chin léng-tām. Hiah ê tūi-lo̍h ê sè-kiáⁿ, bô tī in hām-lo̍h chōe ê í-chêng lâi chhōe in. Lán Ki-tok-tô͘ chin chió chiong hok-im chò chèng-siông ê ha̍k-hāu kàu-io̍k lâi kà-sī sè-kiáⁿ.

Kám-siā: Kám-siā Siōng-tè, chiâⁿ ta̍k hāng Soan-tō-hōe kap siâⁿ-chhī, chng-kha tiong-kan sè-kiáⁿ chióng-chióng ê chó͘-chit, pò͘-bō͘, hái-kîⁿ ê chū-hōe téng-téng. Koh tī chē-chē o̍h-tn̂g ū cha-keng-pan kap Thoân-khè.

Koh tī o̍h-tn̂g, tōa-o̍h ū Ki-tok-tô͘ chò kàu-oân, chò káng-su.

Khún-kiû: Ūi-tio̍h Ki-tok-kàu ka-têng kap pē-bó kî-tó.

Koan-hē kau-hòe chi̍t hong-bīn kè-chhōa ê pī-pān kap chí-tō lâi kî-tó.

Ūi-tio̍h Chú-ji̍t-o̍h kap châ-keng-hōe. Chheng-liân thoân-khè, ka-têng chi̍p-hōe, iá-gōa chi̍p-hōe. Ha̍k-hāu, tōa-o̍h Ki-tok-tô͘ thoân-khè kap ha̍k-seng ê kang-chok lâi kî-tó. Ūi-tio̍h Ki-tok-kàu ê tù-chok-ka siá chheng-liân khiàm-ēng ê chheh kap kò͘-sū ê lâng lâi kî-tó.

Pài-saⁿ (Chiaⁿ-goe̍h chhe 6).

"Phó͘-sè kàu-hōe"

Sèng-keng: Sū-lī-hui-nî-ki ê hū-jîn-lâng (Má-thài 15:21--28).

Be̍k-sióng: Ha̍k-seng tùi īⁿ-pang ê hū-jîn-lâng chin bô koan-sim.

Siōng-tè só͘ ài ê sī kian-kò͘ ê sìn-sim, bô khò kok-che̍k.

Sêng-jīn Iâ-so͘ ê sîn-sèng.

Chhàm-hóe: Kòe-thâu khu-chip kàu-phài ê hun-pia̍t, bē tit saⁿ liōng-kái, lâi saⁿ-thiàⁿ. Hun kàu-phài ê chhò bōe cha̍p-hun jīn-bêng, bô ēng che chò chhàm-hóe ê tê-ba̍k lâi kî-tó.

Kám-siā: Tùi Sèng Sîn ê siúⁿ-sù, ke-thiⁿ jîn-ài kap lêng-tek ê liáu-kái. Tī ta̍k chām hō͘ Ki-tok-tô͘ ná chhin-bi̍t saⁿ-kap kî-tó, chò kiàn-chèng.

Ūi-tio̍h chē-chē só͘-chāi sin-siat ê kàu-hōe lâi kám-siā Chú.

Khún-kiû: Ūi-tio̍h ta̍k lâng chhut-la̍t saⁿ lí-kái tī kàu-hōe tiong saⁿ kau-pôe lâi kî-tó.

Hō͘ lán hoaⁿ-hí hoan-gêng, hō͘-thāi, liáu-kái tùi pa̍t kok lâi ê ha̍k-seng kap lâng-kheh.

Ūi-tio̍h siū khún-tio̍k tiàm tī thih-bō͘ āu ê Ki-tok-tô͘ kî-tó. Ūi-tio̍h lâm Ìn-tō͘ kàu-hōe ū kap pa̍t kok teh thó-lūn, ài hap-it saⁿ chhin-bi̍t hia̍p-le̍k lâi kî-tó.

Pài-sì (Chiaⁿ-goe̍h chhe 7).

"Kok-bîn kap siú-léng."

Sèng-keng: Pé-chóng ê lô͘-po̍k (Mt 8:5--13).

Be̍k-sióng: Pé-chóng sêng-jīn Ki-tok sī chòe ū koân-ui ê. Chai i chi̍t ê lâng ê la̍t ū kài-hān. I ū óa-khò Siōng-tè oa̍h ê sìn-gióng lâi chò siú-léng.

Chhàm-hóe: Sè-kài ê peh-sìⁿ tī hōe-gī thó-lūn ê sî, oân-choân bē kì-tit Siōng-tè. Peh-sìⁿ ê kiau-ngō͘ kap m̄ kam-goān chiap-la̍p pa̍t kok ê lâng ê kiàn-kái, lâi seⁿ-chhut phò-hoāi kap oàn-hīn tī lâng ê tiong-kan.

Kám-siā: In-ūi chiām-chiām teh hia̍p-le̍k tī kok-chè-tek ê kau-pôe. In-ūi Ki-tok-kàu ê chí-tō-chiá tī ta̍k kok teh chīn pún-hūn.

Khún-kiû: Phó͘-sè ê léng-siù si̍t-hiān bān-sū khò Siōng-tè thang tit-tio̍h hó ê kiat-kó.

Kiû Siōng-tè ê tì-hūi siúⁿ-sù tī kok-ka hōe-gī. Hō͘ Ki-tok-tô͘ ū chek-jīm, ē thang tam-tng kok-ka sū-kiāⁿ, lâi kî-tó.

Ūi-tio̍h kiān-khong, kàu-io̍k, niû-si̍t kap liông-sim ê chū-iû tāi-ke saⁿ-kap chhut-la̍t.

Kái-koat pī-lān ê lâng ê būn-tê.

Hia̍p-le̍k saⁿ-kap tam-tng seng-sán, hō͘ ki-hng ê só͘-chāi m̄-bián ki-gō.

Hō͘ sè-kài bē pêng-an ê hiān-si̍t chē-chē būn-tê tit-tio̍h kai-koat.

Pài-gō͘ (Chiaⁿ-goe̍h chhe 8).

"Pò͘-tō kap hùn-heng."

Sèng-keng: Lia̍p-sat-lō͘ koh-oa̍h (Iok-hān 11:17--44).

Be̍k-sióng: Liân hiah ê sí tī chōe-tiong ê lâng tùi Chú Iâ-so͘ sîn-lêng ê khùi-la̍t lâi oa̍h. Iâ-so͘ sī koh-oa̍h kap oa̍h-miā, chí-ū I ê hoat-chhut choa̍t-tùi ū koân ê ōe hō͘ lâng chū-iû. Koh hō͘ lán siūⁿ ha̍k-seng ū tì-hūi ài pang-chān siū hoān-lān ê lâng.

Chhàm-hóe: Lán kàu taⁿ bô koan-sim hiah ê kàu-hōe gōa ê lâng ê khiàm-khoeh.

Tī sìn-tô͘ tiong iā saⁿ keh-tn̄g, hun-pia̍t lâng tī Ki-tok ê gōa-bīn.

Lán chin hán-tit tùi chhù-piⁿ pò͘-tō.

Kám-siā: Kám-siā Siōng-tè ê Sîn, chò kang tī chē-chē só͘-chāi ê lâng ê sim-lāi. Ūi-tio̍h sè-kài chē-chē só͘-chāi ê kàu-hōe ho̍k-heng lâi kám-siā.

Khún-kiû: Ūi-tio̍h kàu-hōe chèng-siông teh thoân hok-im, káng-tō lâikî-tó. Ūi-tio̍h teh kè-e̍k kap chí-tō pò͘-tō ê sū, í-ki̍p pó-chhî pò͘-tō ló͘-le̍k ê kiat-kó, kàu-hōe ê lé-pài kau-pôe khah ū piàn-ōaⁿ. Sìn Siōng-tè ê lâng lâi kó͘-bú, ū khah tōa thoân hok-im ê jia̍t-sim khah chhim ê ǹg-bāng, tit lêng-sèng ho̍k-heng.

Pài-la̍k (Chiaⁿ-goe̍h chhe 9).

"Ke-lāi kap gōa-bīn chò kan-chèng"

Sèng-keng: Hoān-tio̍h kúi--ê (Mk 5:1--19).

Be̍k-sióng: Hoān-tio̍h kúi ê lâng tùi thé-giàm só͘ tit ū la̍t pún-chit-tek ê kan-chèng. Chú ū kiâⁿ sím-mi̍h sū, ū iú-le̍k ê chèng-kù. Kiù-chú hoan-hù kóng, "Khì pò-thoân."

Chhàm-hóe: Lán bô tiong-si̍t sūn bēng-lēng kan-chèng Ki-tok. Lán tī chèng-lâng ê bīn-chêng bô hián-chhut tù! Kiù-chú só͘ siū ê kám-siā. Tùi kàu-hōe ê soan-tó sū-gia̍p lán chin chió teh kî-tó kap hōng-hiàn kim-chîⁿ.

Kám-siā: Sè-kài ta̍k ūi kàu-hōe ū teh tióng-tōa. Hōe-iú tùi kò-jîn thoân-tō ke-thiⁿ chek-jīm-kám. Ná chē lâng ài tha̍k Ki-tok-kàu ê bûn-hiàn.

Khún-kiû: Kiû Chú hō͘ lán chìn-pō͘ chò kiàn-chèng tī kàu-hōe. Hō͘ choân kàu-hōe ê sìn-tô͘ lóng chiâⁿ chò pò͘-tō-tūi-oân. Kiû Chú sù hok kap chhe-ēng Soan-tō-hōe. Kéng-tiàu lâng chìn-chêng chò kang tī thoân hok-im ê chhân-hn̂g. Kiû Chú siúⁿ-sù sè-kài thoân-tō ki-kim.

Pó͘-chhî Ki-tok-tô͘ chò kiàn-chèng ê tì-hūi, tī hia seⁿ-khí ài-kok-sī-m̄, hō͘ sìn-chiá ê chèng-kù bô sit-lo̍h.

Ūi-tio̍h Ki-tok-kàu bûn-hiàn ê hoat-tián liû-thong kap keng-pān ê lâng lâi kî-tó.